ಎನ್‌ಐಟಿಕೆ: 3ಡಿ ಮುದ್ರಣ ಕ್ಷೇತ್ರದಲ್ಲಿ ಇಂಟರ್ನ್‌ಶಿಪ್‌ಗೆ ಅವಕಾಶ
ಮಂಗಳೂರು, ಜು.18: ಎನ್‌ಐಆರ್‌ಎಫ್ ಶ್ರೇಯಾಂಕದಲ್ಲಿ ದೇಶದಲ್ಲಿ 13ನೇ ಸ್ಥಾನ ಹೊಂದಿರುವ ಕರ್ನಾಟಕದ ಪ್ರಮುಖ ತಾಂತ್ರಿಕ ಸಂಸ್ಥೆಯಾದ ರಾಷ್ಟ್ರೀಯ ತಂತ್ರಜ್ಞಾನ ಸಂಸ್ಥೆ (ಎನ್‌ಐಟಿಕೆ)ಯು ಹಗುರವಾದ ಸಂಯೋಜನೆಗಳ 3ಡಿ ಮುದ್ರಣ ಕ್ಷೇತ್ರದಲ್ಲಿ ಪರಿಣತಿಯನ್ನು ಸಾಬೀತುಪಡಿಸಿದೆ.
ನ್ಯೂಯಾರ್ಕ್ ವಿಶ್ವವಿದ್ಯಾಲಯ (ಎನ್‌ವೈಯು) ದೊಂದಿಗೆ ಎನ್‌ಐಟಿಕೆ ಸಹಯೋಗದ ಯೋಜನೆಯು ಯುನೈಟೆಡ್ ಸ್ಟೇಟ್ಸ್‌ನ ನ್ಯಾಷನಲ್ ಸೈನ್ಸ್ ಫೌಂಡೇಶನ್ (ಎನ್‌ಎಸ್‌ಎಫ್) ನಿಂದ ವಿದ್ಯಾರ್ಥಿಗಳಿಗೆ ಅಂತರರಾಷ್ಟ್ರೀಯ ಸಂಶೋಧನಾ ಅನುಭವ (ಐಆರ್‌ಇಎಸ್) ಅನುದಾನ ಪಡೆದಿದೆ.
ಈ ಮೂಲಕ ಪ್ರತಿ ಬೇಸಿಗೆ ಅವಧಿಯಲ್ಲಿ ಇಂಟರ್ನ್‌ಶಿಪ್‌ಗೆ ಎನ್‌ಐಟಿಕೆಯಲ್ಲಿ ಆರು ಯುಎಸ್‌ಎ ವಿದ್ಯಾರ್ಥಿಗಳಿಗೆ ಆತಿಥ್ಯ ವಹಿಸಲು ಮೂರು ವರ್ಷಗಳ ಅವಧಿಗೆ ಎರಡು ಕೋಟಿ ರೂ. ಅನುದಾನ ನೀಡಲಾಗುತ್ತದೆ.
ಸಾಮಾಜಿಕ ಅಗತ್ಯಗಳಿಗಾಗಿ ಕಾರ್ಯಸಾಧ್ಯವಾದ ಪರಿಹಾರಗಳನ್ನು ಅಭಿವೃದ್ಧಿಪಡಿಸುವತ್ತ ಗಮನಹರಿಸಿ 3ಡಿ ಮುದ್ರಣದಲ್ಲಿ ಹೊಸ ಮಾರ್ಗಗಳನ್ನು ಅನ್ವೇಷಿಸಲು ಎರಡೂ ದೇಶಗಳ ವಿದ್ಯಾರ್ಥಿಗಳಿಗೆ ಇದೊಂದು ಉತ್ತಮ ಅವಕಾಶವಾಗಿದೆ.
ಡಾ.ಮೃತ್ಯುಂಜಯ ದೊಡ್ಡಮನಿ (ಎನ್‌ಐಟಿಕೆ) ಮತ್ತು ಪ್ರೊ. ನಿಖಿಲ್ ಗುಪ್ತಾ (ಎನ್‌ವೈಯು) ಆಯಾ ದೇಶಗಳಲ್ಲಿ ಈ ಕಾರ್ಯಕ್ರಮವನ್ನು ನಿರ್ದೇಶಿಸಲಿದ್ದಾರೆ. 3ಡಿ ಮುದ್ರಣ ಸಂಶೋಧನೆಯನ್ನು ಪ್ರಯೋಗಾಲಯದಿಂದ ಕೈಗಾರಿಕಾ-ಪ್ರಮಾಣದ ಸಾಕ್ಷಾತ್ಕಾರಕ್ಕೆ ತೆಗೆದುಕೊಳ್ಳುವ ಸಮಗ್ರ ಅನುಭವವನ್ನು ವಿದ್ಯಾರ್ಥಿಗಳಿಗೆ ಒದಗಿಸುವ ಉದ್ದೇಶ ಈ ಯೋಜನೆಯದ್ದಾಗಿದೆ.
ಈ ಸಹಕಾರಿ ಯೋಜನೆಯು ಎನ್‌ಐಟಿಕೆ; ಎನ್‌ವೈಯು, ನ್ಯೂಯಾರ್ಕ್, ಯುಎಸ್‌ಎ; ನ್ಯೂಯಾರ್ಕ್ ಸಿಟಿ ಕಾಲೇಜ್ ಆಫ್ ಟೆಕ್ನಾಲಜಿ (ಸಿಟಿಟೆಕ್), ಯುಎಸ್‌ಎ; ಐಐಟಿ ಕಾನ್ಪುರ್ (ಐಐಟಿಕೆ) ಮತ್ತು ಆಹಾ 3ಡಿ ಇನ್ನೋವೇಶನ್ಸ್ ಪ್ರೈ.ಲಿ., ಜೈಪುರ, ಇವುಗಳನ್ನು ಒಳಗೊಂಡಿದೆ.
ಡಾ.ಗಫರ್ ಗೈಲಾನಿ (ಸಿಟಿಟೆಕ್), ಡಾ.ಜಯರಾಜ್ ಪಿಚೈಮಾನಿ (ಎನ್‌ಐಟಿಕೆ), ಪ್ರೊ. ಆನಂದನ್ ಶ್ರೀನಿವಾಸನ್ (ಎನ್‌ಐಟಿಕೆ), ಪ್ರೊ. ಶಕ್ತಿ ಗುಪ್ತಾ (ಐಐಟಿಕೆ) ಮತ್ತು ಆಕಾಶ್ ಈ 3ಡಿ ಮುದ್ರಣ ಯೋಜನೆಯ ತಂಡದ ಇತರ ಸದಸ್ಯರಾಗಿ ಕಾರ್ಯನಿರ್ವಹಿಸಲಿದ್ದಾರೆ. 3ಡಿ ಮುದ್ರಣವು ಉತ್ಪಾದನಾ ಸನ್ನಿವೇಶವನ್ನು ಗಣನೀಯವಾಗಿ ವೃದ್ಧಿಪಡಿಸುವ ಸಾಮರ್ಥ್ಯವನ್ನು ಹೊಂದಿದೆ ಎಂದು ಎಂದು ಎನ್‌ಐಟಿಕೆ ನಿರ್ದೇಶಕ ಪ್ರೊ.ಕೆ. ಉಮಾಮಹೇಶ್ವರ ರಾವ್ ಪ್ರಕಟನೆಯಲ್ಲಿ ತಿಳಿಸಿದ್ದಾರೆ.
