ಬಹುನಿರೀಕ್ಷಿತ ಐಪಿಎಲ್ ಸೆ. 19ರಿಂದ ಯುಎಇಯಲ್ಲಿ ಆರಂಭ

ಹೊಸದಿಲ್ಲಿ, ಜು.24: ಬಹುನಿರೀಕ್ಷಿತ ಇಂಡಿಯನ್ ಪ್ರೀಮಿಯರ್ ಲೀಗ್(ಐಪಿಎಲ್)ಸೆಪ್ಟಂಬರ್ 19ರಿಂದ ಯುನೈಟೆಡ್ ಅರಬ್ ಎಮಿರೇಟ್ಸ್(ಯುಎಇ)ನಲ್ಲಿ ಆರಂಭವಾಗಲಿದ್ದು, ಫೈನಲ್ ಪಂದ್ಯ ನವೆಂಬರ್ 8ರಂದು ನಡೆಯಲಿದೆ ಎಂದು ಐಪಿಎಲ್ ಚೇರ್ಮನ್ ಬ್ರಿಜೇಶ್ ಪಟೇಲ್ ಶುಕ್ರವಾರ ಸುದ್ದಿಸಂಸ್ಥೆ ಪಿಟಿಐಗೆ ತಿಳಿಸಿದ್ದಾರೆ.

ಐಪಿಎಲ್ ಟೂರ್ನಿಯ ಆಡಳಿತ ಮಂಡಳಿಯು ಮುಂದಿನ ವಾರ ಸಭೆ ಸೇರಿ ಕಾರ್ಯಕ್ರಮದ ವಿವರಗಳನ್ನು ಅಂತಿಮಗೊಳಿಸಿ ವೇಳಾಪಟ್ಟಿಯನ್ನು ಅನುಮೋದಿಸಲಿದೆ. ಈ ಯೋಜನೆಯ ಕುರಿತು ಬಿಸಿಸಿಐ ಫ್ರಾಂಚೈಸಿಗಳಿಗೆ ಅನೌಪಚಾರಿಕವಾಗಿ ತಿಳಿಸಿದೆ.

‘‘ಆಡಳಿತ ಮಂಡಳಿಯು ಶೀಘ್ರವೇ ಸಭೆ ಸೇರಲಿದೆ. ನಾವು ವೇಳಾಪಟ್ಟಿಯನ್ನು ಅಂತಿಮಗೊಳಿಸಲಿದ್ದೇವೆ. ಟೂರ್ನಿಯು ಸೆಪ್ಟಂಬರ್ 19ರಿಂದ ನವೆಂಬರ್ 8ರ ತನಕ ನಡೆಯಲಿದೆ. ಸರಕಾರದ ಅನುಮತಿಯೂ ಸಿಗಲಿದೆ ಎಂಬ ನಿರೀಕ್ಷೆಯಲ್ಲಿದ್ದೇವೆ. ಇದು ಸಂಪೂರ್ಣ 51 ದಿನಗಳ ಐಪಿಎಲ್ ಆಗಿರುತ್ತದೆ’’ ಎಂದು ಗುರುವಾರ ಟೂರ್ನಿಯ ದಿನಾಂಕದ ಕುರಿತು ವರದಿ ಮಾಡಿದ್ದ ಪಿಟಿಐಗೆ ಪಟೇಲ್ ಖಚಿತಪಡಿಸಿದರು.

ಆಸ್ಟ್ರೇಲಿಯದಲ್ಲಿ ಈ ವರ್ಷದ ಅಕ್ಟೋಬರ್-ನವೆಂಬರ್‌ನಲ್ಲಿ ನಿಗದಿಯಾಗಿದ್ದ ಟ್ವೆಂಟಿ-20 ಟೂರ್ನಿಯನ್ನು ಕೋವಿಡ್-19 ಸಾಂಕ್ರಾಮಿಕ ರೋಗದ ಕಾರಣಕ್ಕೆ ಐಸಿಸಿ ಮುಂದೂಡಲು ನಿರ್ಧರಿಸಿದ ಹಿನ್ನೆಲೆಯಲ್ಲಿ 13ನೇ ಆವೃತ್ತಿಯ ಐಪಿಎಲ್ ನಡೆಯುವುದಕ್ಕೆ ಹಾದಿ ಸುಗಮವಾಗಿತ್ತು.

ಕೋವಿಡ್-19 ಭೀತಿಯನ್ನು ಎದುರಿಸಲು ಸ್ಟಾಂಡರ್ಡ್ ಆಪರೇಟಿಂಗ್ ಕಾರ್ಯವಿಧಾನವನ್ನು ಸಿದ್ಧಪಡಿಸಲಾಗುತ್ತಿದೆ. ಎಮಿರೇಟ್ಸ್ ಕ್ರಿಕೆಟ್ ಮಂಡಳಿಗೆ ಈ ಕುರಿತು ಬಿಸಿಸಿಐ ಔಪಚಾರಿಕವಾಗಿ ಮಾಹಿತಿನೀಡಲಿದೆ ಎಂದು ಪಟೇಲ್ ಹೇಳಿದ್ದಾರೆ.

‘‘ನಾವು ಸ್ಟಾಂಡರ್ಡ್ ಆಪರೇಟಿಂಗ್ ಕಾರ್ಯ ವಿಧಾನವನ್ನು ರಚಿಸುತ್ತಿದ್ದು, ಇದು ಕೆಲವೇ ದಿನಗಳಲ್ಲಿ ಸಿದ್ಧವಾಗಲಿದೆ. ಸ್ಟೇಡಿಯಂಗೆ ಪ್ರೇಕ್ಷಕರ ಪ್ರವೇಶಕ್ಕೆ ಅನುವು ಮಾಡಿಕೊಡುವುದು, ಕೊಡದಿರುವುದು ಯುಎಇ ಸರಕಾರಕ್ಕೆ ಬಿಟ್ಟ ವಿಚಾರ. ಎಲ್ಲ ರೀತಿಯಲ್ಲೂ ಸುರಕ್ಷಿತ ಅಂತರ ಕಾಯ್ದುಕೊಳ್ಳಲಾಗುವುದು. ಈ ಕುರಿತು ಔಪಚಾರಿ ಕವಾಗಿ ಯುಎಇ ಕ್ರಿಕೆಟ್ ಮಂಡಳಿಗೆ ಪತ್ರ ಬರೆಯಲಿದ್ದೇವೆ’’ಎಂದುಪಟೇಲ್ ನುಡಿದರು.

ಯುಎಇನಲ್ಲಿ ಮೂರು ಮೈದಾನಗಳು ಐಪಿಎಲ್‌ಗೆ ಲಭ್ಯವಿದೆ. ಅವುಗಳೆಂದರೆ: ದುಬೈ ಇಂಟರ್‌ನ್ಯಾಶನಲ್ ಸ್ಟೇಡಿಯಂ, ಶೇಖ್ ಝಾಯೆದ್ ಸ್ಟೇಡಿಯಂ(ಅಬುಧಾಬಿ) ಹಾಗೂ ಶಾರ್ಜಾ ಮೈದಾನ.

ತಂಡಗಳ ಅಭ್ಯಾಸಕ್ಕಾಗಿ ಐಸಿಸಿ ಅಕಾಡಮಿಯ ಮೈದಾನವನ್ನು ಬಿಸಿಸಿಐ ಬಾಡಿಗೆಗೆ ಪಡೆಯುವ ಸಾಧ್ಯತೆಯಿದೆ. ಐಸಿಸಿ ಅಕಾಡಮಿಯಲ್ಲಿ ಎರಡು ಸಂಪೂರ್ಣ ಆಕಾರದ ಕ್ರಿಕೆಟ್ ಮೈದಾನಗಳಿದ್ದು, ಇದರಲ್ಲಿ 38 ಟರ್ಫ್ ಪಿಚ್‌ಗಳು, 6 ಒಳಾಂಗಣ ಪಿಚ್‌ಗಳು, 5,700 ಚದರಡಿ ಹೊರಾಂಗಣ ಪ್ರದೇಶದ ಜೊತೆಗೆ ಫಿಸಿಯೋಥೆರಫಿ ಹಾಗೂ ಮೆಡಿಸಿನ್ ಸೆಂಟರ್‌ಗಳಿವೆ.

ದುಬೈನಲ್ಲಿ ಈಗಿರುವ ಆರೋಗ್ಯ ಮಾರ್ಗಸೂಚಿಯ ಪ್ರಕಾರ ಕೋವಿಡ್-19 ಟೆಸ್ಟ್‌ನಲ್ಲಿ ನೆಗೆಟಿವ್ ವರದಿ ಹಿಡಿದುಕೊಂಡು ಬರುವವರು ಕ್ವಾರಂಟೈನ್‌ನಲ್ಲಿರುವ ಅಗತ್ಯವಿಲ್ಲ. ಈ ರೀತಿಯ ವರದಿ ಇರದೇ ಇರುವವರು ಪರೀಕ್ಷೆಗೆ ಒಳಗಾಗಬೇಕಾಗುತ್ತದೆ.

ಭಾರತೀಯ ಕ್ರಿಕೆಟ್ ತಂಡದ ಆಸ್ಟ್ರೇಲಿಯ ಪ್ರವಾಸ ತೂಗುಯ್ಯಿಲೆಯಲ್ಲಿರುವುದನ್ನು ತಪ್ಪಿಸಲು ಬಿಸಿಸಿಐ ಸೆಪ್ಟಂಬರ್ 26ರಂದೇ ಐಪಿಎಲ್ ಆರಂಭಿಸಲು ನಿರ್ಧರಿಸಿದೆ ಎಂಬ ಊಹಾಪೋಹ ಹರಡಿತ್ತು.

‘‘ಆಸ್ಟ್ರೇಲಿಯ ಸರಕಾರದ ನಿಯಮಗಳ ಪ್ರಕಾರ ಭಾರತೀಯ ಕ್ರಿಕೆಟ್ ತಂಡ ಕಡ್ಡಾಯವಾಗಿ 14 ದಿನಗಳ ಕ್ವಾರಂಟೈನ್‌ನಲ್ಲಿ ಇರಬೇಕಾಗುತ್ತದೆ’’ ಎಂದು ಬಿಸಿಸಿಐ ಅಧಿಕಾರಿಗಳು ತಿಳಿಸಿದ್ದಾರೆ.

ಭಾರತೀಯ ಕ್ರಿಕೆಟ್ ತಂಡ ಐಪಿಎಲ್ ಬಳಿಕ ಡಿಸೆಂಬರ್ 3ರಿಂದ ಬ್ರಿಸ್ಬೇನ್‌ನಲ್ಲಿ ಆಸ್ಟ್ರೇಲಿಯ ವಿರುದ್ಧ ನಾಲ್ಕು ಪಂದ್ಯಗಳ ಟೆಸ್ಟ್ ಸರಣಿಯನ್ನು ಆಡಲು ಆರಂಭಿಸಲಿದೆ. ಪ್ರತಿಯೊಂದು ತಂಡಕ್ಕೆ ತರಬೇತಿಗೆ ಕನಿಷ್ಠ ಒಂದು ತಿಂಗಳ ಅಗತ್ಯವಿದೆ. ಐಪಿಎಲ್ ಫ್ರಾಂಚೈಸಿಗಳು ತಯಾರಿ ನಡೆಸಲು ನಾಲ್ಕು ವಾರಗಳ ಮೊದಲೇ ಯುಎಇಗೆ ತೆರಳುವ ಸಾಧ್ಯತೆಯಿದೆ.

ವಿಶ್ವದ ಶ್ರೀಮಂತ ಟ್ವೆಂಟಿ-20ಟೂರ್ನಿ ಐಪಿಎಲ್ ಮಾರ್ಚ್ ಅಂತ್ಯದ ವೇಳೆಗೆ ಆರಂಭವಾಗಬೇಕಾಗಿತ್ತು. ಆದರೆ, ಕೋವಿಡ್-19 ಸಾಂಕ್ರಾಮಿಕ ರೋಗದ ವೈರಸ್ ಹರಡುವುದನ್ನು ನಿಯಂತ್ರಿಸಲು ಅಂತರ್‌ರಾಷ್ಟ್ರೀಯ ಪ್ರವಾಸ ನಿರ್ಬಂಧಗಳನ್ನು ಹೇರಲಾಗಿದೆ. ಹೀಗಾಗಿ ಐಪಿಎಲ್‌ನ್ನು ಅನಿರ್ದಿಷ್ಟಾವಧಿ ಮುಂದೂಡಲಾಗಿತ್ತು. ಆದಾಗ್ಯೂ, ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗುಲಿ ಈ ವರ್ಷವೇ ಐಪಿಎಲ್ ನಡೆಯಲಿದೆ ಎಂದು ಹೇಳುತ್ತಾ ಬಂದಿದ್ದರು.