ಕೋವಿಡ್-19 ಸಾವಿನ ಅಪಾಯ ತಗ್ಗಿಸುವಲ್ಲಿ ಪ್ಲಾಸ್ಮಾ ಚಿಕಿತ್ಸೆಯಿಂದ ಯಾವುದೇ ಲಾಭವಿಲ್ಲ

ಹೊಸದಿಲ್ಲಿ,ಆ.6: ಕೋವಿಡ್-19 ರೋಗಿಗಳಲ್ಲಿ ಸಾವಿನ ಅಪಾಯವನ್ನು ತಗ್ಗಿಸುವಲ್ಲಿ ಪ್ಲಾಸ್ಮಾ ಚಿಕಿತ್ಸೆಯಿಂದ ಯಾವುದೇ ಲಾಭವಾಗಿಲ್ಲ ಎಂದು ಇಲ್ಲಿಯ ಏಮ್ಸ್ ಆಸ್ಪತ್ರೆಯಲ್ಲಿ ಈ ಚಿಕಿತ್ಸಾ ವಿಧಾನದ ಪರಿಣಾಮಕಾರಿತ್ವವನ್ನು ತಿಳಿದುಕೊಳ್ಳಲು ನಡೆಸಲಾದ ಪ್ರಯೋಗಾತ್ಮಕ ಪರೀಕ್ಷೆಗಳ ಮಧ್ಯಂತರ ವಿಶ್ಲೇಷಣಾ ವರದಿಯು ತಿಳಿಸಿದೆ.

ಪ್ಲಾಸ್ಮಾ ಥೆರಪಿಯಲ್ಲಿ ಕೋವಿಡ್-19ನಿಂದ ಚೇತರಿಸಿಕೊಂಡಿರುವ ವ್ಯಕ್ತಿಯ ರಕ್ತದಲ್ಲಿನ ಆ್ಯಂಟಿಬಾಡಿಗಳು ಅಥವಾ ಪ್ರತಿಕಾಯಗಳನ್ನು ಕೊರೋನ ವೈರಸ್ ರೋಗಿಯ ಶರೀರದಲ್ಲಿ ಸೇರಿಸಿ ಆತನ ರೋಗ ನಿರೋಧಕ ವ್ಯವಸ್ಥೆಯು ಸೋಂಕಿನ ವಿರುದ್ಧ ಹೋರಾಡುವಂತೆ ಉತ್ತೇಜಿಸಲಾಗುತ್ತದೆ.

30 ಕೋವಿಡ್-19 ರೋಗಿಗಳನ್ನು ಪ್ರಾಯೋಗಿಕ ಪರೀಕ್ಷೆಗೊಳಪಡಿಸಿದ ಸಂದರ್ಭದಲ್ಲಿ ಪ್ಲಾಸ್ಮಾ ಥೆರಪಿಯು ಸಾವುಗಳ ಅಪಾಯವನ್ನು ತಗ್ಗಿಸುವಲ್ಲಿ ನೆರವಾಗಿದ್ದು ಕಂಡು ಬಂದಿಲ್ಲ ಎಂದು ಗುರುವಾರ ಇಲ್ಲಿ ಸುದ್ದಿಸಂಸ್ಥೆಗೆ ತಿಳಿಸಿದ ಏಮ್ಸ್ ನಿರ್ದೇಶಕ ಡಾ.ರಣದೀಪ ಗುಲೇರಿಯಾ ಅವರು,ಪ್ರಾಯೋಗಿಕ ಪರೀಕ್ಷೆಗಳ ವೇಳೆ ಒಂದು ಗುಂಪಿನ ರೋಗಿಗಳಿಗೆ ಪ್ಲಾಸ್ಮಾ ಚಿಕಿತ್ಸೆಯ ಜೊತೆಗೆ ಪ್ರಮಾಣಿತ ಪೂರಕ ಚಿಕಿತ್ಸೆಯನ್ನು ನೀಡಲಾಗಿದ್ದರೆ,ಇನ್ನೊಂದು ಗುಂಪಿನ ರೋಗಿಗಳಿಗೆ ಪ್ರಮಾಣಿತ ಪೂರಕ ಚಿಕಿತ್ಸೆಯನ್ನು ಮಾತ್ರ ನೀಡಲಾಗಿತ್ತು. ಎರಡೂ ಗುಂಪುಗಳಲ್ಲಿ ಸಾವುಗಳ ಸಂಖ್ಯೆ ಸಮಾನವಾಗಿತ್ತು ಮತ್ತು ಪ್ಲಾಸ್ಮಾ ಚಿಕಿತ್ಸೆಯಿಂದ ರೋಗಿಗಳ ಆರೋಗ್ಯ ಸ್ಥಿತಿಯಲ್ಲಿ ಹೆಚ್ಚಿನ ಚೇತರಿಕೆ ಕಂಡು ಬಂದಿರಲಿಲ್ಲ ಎಂದು ಹೇಳಿದರು.

ಆದರೆ ಇದು ಕೇವಲ ಮಧ್ಯಂತರ ವಿಶ್ಲೇಷಣೆಯಾಗಿದೆ ಮತ್ತು ಗುಂಪಿನ ಯಾವುದೇ ಭಾಗಕ್ಕೆ ಪ್ಲಾಸ್ಮಾ ಚಿಕಿತ್ಸೆಯಿಂದ ಲಾಭವಾಗಬಹುದೇ ಎನ್ನುವುದನ್ನು ತಿಳಿದುಕೊಳ್ಳಲು ಹೆಚ್ಚು ವಿವರವಾದ ಮೌಲ್ಯಮಾಪನವನ್ನು ನಡೆಸುವ ಅಗತ್ಯವಿದೆ ಎಂದು ಹೇಳಿದ ಡಾ.ಗುಲೇರಿಯಾ, ಪ್ಲಾಸ್ಮಾವನ್ನು ಅದರ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಪರೀಕ್ಷೆಗೊಳಪಡಿಸಬೇಕಾಗುತ್ತದೆ ಮತ್ತು ಅದು ಕೋವಿಡ್-19 ರೋಗಿಗಳಿಗೆ ನೆರವಾಗಲು ಸಾಕಷ್ಟು ಆ್ಯಂಟಿಬಾಡಿಗಳನ್ನು ಒಳಗೊಂಡಿರಬೇಕಾಗುತ್ತದೆ ಎಂದು ತಿಳಿಸಿದರು.

ಬುಧವಾರ ಕೋವಿಡ್-19 ಕುರಿತು ನಡೆದ ಮೂರನೇ ನ್ಯಾಷನಲ್ ಕ್ಲಿನಿಕಲ್ ಗ್ರಾಂಡ್ ರೌಂಡ್ಸ್‌ ನಲ್ಲಿ ಮಧ್ಯಮದಿಂದ ತೀವ್ರ ಕೊರೋನ ವೈರಸ್ ರೋಗಿಗಳಲ್ಲಿ ಪ್ಲಾಸ್ಮಾ ಚಿಕಿತ್ಸೆಯ ಪರಿಣಾಮಕಾರಿತ್ವದ ಬಗ್ಗೆ ಚರ್ಚೆಗಳು ನಡೆದಿದ್ದವು.

“ಪ್ಲಾಸ್ಮಾ ಸುರಕ್ಷಿತವಾಗಿದೆ. ಅದರ ಪರಿಣಾಮಕಾರಿತ್ವಕ್ಕೆ ಸಂಬಂಧಿಸಿದಂತೆ ನಮಗೆ ಈವರೆಗೆ ಹಸಿರು ನಿಶಾನೆ ದೊರಕಿಲ್ಲ. ಹೀಗಾಗಿ ಕ್ಲಿನಿಕಲ್ ಬಳಕೆಯು ಅತ್ಯಂತ ನ್ಯಾಯಯುತವಾಗಿರಬೇಕು ಮತ್ತು ರಾಷ್ಟ್ರೀಯ ಮಾರ್ಗಸೂಚಿಗಳಿಗೆ ಅನುಗುಣವಾಗಿರಬೇಕು” ಎಂದು ವೆಬಿನಾರ್‌ನಲ್ಲಿ ಹೇಳಿದ ಏಮ್ಸ್‌ನ ಔಷಧಿ ವಿಭಾಗದ ಅಡಿಷನಲ್ ಪ್ರೊಫೆಸರ್ ಡಾ.ಮನೀಷ್ ಸೋನೆಜಾ ಅವರು,ಪ್ಲಾಸ್ಮಾ ಥೆರಪಿಯ ಪರಿಣಾಮಕಾರಿತ್ವವನ್ನು ಸಾಬೀತುಗೊಳಿಸುವ ಸಾಕ್ಷ್ಯಾಧಾರಗಳು ಸದ್ಯಕ್ಕೆ ಲಭಿಸಿಲ್ಲ,ಹೀಗಾಗಿ ಕೊರೋನ ವೈರಸ್ ರೋಗಿಗಳಲ್ಲಿ ಆಫ್-ಲೇಬಲ್ ಬಳಕೆಗಾಗಿ ಪ್ಲಾಸ್ಮಾ ಥೆರಪಿಯನ್ನು ತನಿಖಾತ್ಮಕ ಚಿಕಿತ್ಸೆಯನ್ನಾಗಿ ಪಟ್ಟಿ ಮಾಡಲಾಗಿದೆ ಎಂದು ತಿಳಿಸಿದರು.

ಕೊರೋನ ವೈರಸ್ ರೋಗಿಯು ಪ್ಲಾಸ್ಮಾ ಚಿಕಿತ್ಸೆಗೆ ಅರ್ಹನಾಗಿದ್ದಾನೆ ಮತ್ತು ಈ ಚಿಕಿತ್ಸಾ ವಿಧಾನವು ಲಾಭದಾಯಕವಾಗಬಹುದು ಎಂದು ರೋಗಿಗೆ ಚಿಕಿತ್ಸೆ ನೀಡುತ್ತಿರುವ ವೈದ್ಯರು ನಿರ್ಧರಿಸುವವರೆಗೆ ಪ್ಲಾಸ್ಮಾ ಚಿಕಿತ್ಸೆಗಾಗಿ ರೋಗಿಯ ಬಂಧುಗಳು ಒತ್ತಾಯಿಸಬಾರದು ಎನ್ನುವುದನ್ನು ಈವರೆಗಿನ ಪ್ರಯೋಗಾತ್ಮಕ ಪರೀಕ್ಷೆಗಳು ಸ್ಪಷ್ಟಪಡಿಸಿವೆ ಎಂದು ಹೇಳಿದ ಏಮ್ಸ್‌ನ ಔಷಧಿ ವಿಭಾಗದ ಸಹಾಯಕ ಪ್ರೊಫೆಸರ್ ಡಾ.ನೀರಜ್ ನಿಶ್ಚಲ್ ಅವರು,ಪ್ಲಾಸ್ಮಾ ಚಿಕಿತ್ಸೆಯು ಏನಾದರೂ ಪಾತ್ರವನ್ನು ಹೊಂದಿದ್ದರೂ ಅದು ರೋಗದ ಆರಂಭಿಕ ಹಂತಕ್ಕೆ ಸೀಮಿತವಾಗಿದೆ ಮತ್ತು ಈ ಚಿಕಿತ್ಸೆ ಪರಿಣಾಮಕಾರಿಯಾಗಲು ಪ್ಲಾಸ್ಮಾ ಸಾಕಷ್ಟು ಪ್ರಮಾಣದಲ್ಲಿ ಸೋಂಕಿನ ವಿರುದ್ಧ ಆ್ಯಂಟಿಬಾಡಿಗಳನ್ನು ಒಳಗೊಂಡಿರಬೇಕು ಎಂದು ತಿಳಿಸಿದರು.