ಸ್ವಾವಲಂಬಿ ಭಾರತ ಅಭಿಯಾನದ ಉತ್ತೇಜನಕ್ಕೆ 101 ರಕ್ಷಣಾ ವಸ್ತುಗಳ ಆಮದು ನಿಷೇಧಿಸಿದ ಕೇಂದ್ರ

ಹೊಸದಿಲ್ಲಿ,ಆ.9: ಪ್ರಧಾನಿ ನರೇಂದ್ರ ಮೋದಿ ಅವರು ಕರೆ ನೀಡಿರುವ ಆತ್ಮನಿರ್ಭರ್ ಭಾರತ ಅಭಿಯಾನಕ್ಕೆ ಅನುಗುಣವಾಗಿ ಸ್ವದೇಶಿ ಉತ್ಪಾದನೆಯನ್ನು ಹೆಚ್ಚಿಸಲು ರಕ್ಷಣಾ ಸಚಿವಾಲಯವು ನಿಗದಿತ ಗಡುವಿನ ಬಳಿಕ 101 ರಕ್ಷಣಾ ಸಾಮಗ್ರಿಗಳ ಆಮದನ್ನು ನಿಲ್ಲಿಸಲಿದೆ ಎಂದು ಕೇಂದ್ರ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರು ರವಿವಾರ ಇಲ್ಲಿ ತಿಳಿಸಿದರು.

ಸರಕಾರದ ಈ ಮಹತ್ವದ ಉಪಕ್ರಮದಿಂದಾಗಿ ದೇಶಿಯ ಉದ್ಯಮವು ಮುಂದಿನ ಆರೇಳು ವರ್ಷಗಳಲ್ಲಿ ಸುಮಾರು ನಾಲ್ಕು ಲ.ಕೋ.ರೂ.ಗಳ ಗುತ್ತಿಗೆಗಳನ್ನು ಪಡೆಯಲಿದೆ. ಆಮದು ನಿರ್ಬಂಧಗಳನ್ನು 2020 ಮತ್ತು 2024ರ ನಡುವೆ ಹಂತಹಂತವಾಗಿ ಜಾರಿಗೊಳಿಸಲಾಗುವುದು ಎಂದು ಸಿಂಗ್ ಹೇಳಿದರು.

ಅಮದು ನಿರ್ಬಂಧ ಪಟ್ಟಿಯು ಫಿರಂಗಿ ಬಂದೂಕುಗಳು, ದಾಳಿ ರೈಫಲ್‌ಗಳು, ಜಲಾಂತರ ಶಬ್ದಶೋಧಕ ವ್ಯವಸ್ಥೆ, ಸಾಗಣೆ ವಿಮಾನಗಳು, ಲಘು ಯುದ್ಧ ಹೆಲಿಕಾಪ್ಟರ್‌ಗಳು ಮತ್ತು ರಾಡಾರ್‌ಗಳಂತಹ ಉನ್ನತ ತಂತ್ರಜ್ಞಾನ ಶಸ್ತ್ರಾಸ್ತ್ರ ವ್ಯವಸ್ಥೆಗಳು ಮತ್ತು ಇತರ ಹಲವಾರು ಸಾಮಗ್ರಿಗಳನ್ನು ಒಳಗೊಂಡಿದೆ ಎಂದು ಕೇಂದ್ರವು ಹೇಳಿಕೆಯಲ್ಲಿ ತಿಳಿಸಿದೆ.

ಶಸ್ತ್ರಸಜ್ಜಿತ ಹೋರಾಟ ವಾಹನ (ಎಎಫ್‌ವಿ)ಗಳೂ ಪಟ್ಟಿಯಲ್ಲಿದ್ದು, ಡಿಸೆಂಬರ್ 2021ರಲ್ಲಿ ಇವುಗಳ ಆಮದುಗಳ ಮೇಲಿನ ನಿರ್ಬಂಧ ಜಾರಿಗೆ ಬರಲಿದೆ. ಸೇನೆಯು ತಲಾ 5,000ಕೋ.ರೂ.ಗೂ ಹೆಚ್ಚಿನ ಅಂದಾಜು ಬೆಲೆಯಲ್ಲಿ ಸುಮಾರು 200 ಎಎಫ್‌ವಿಗಳ ಪೂರೈಕೆಗಾಗಿ ದೇಶಿಯ ಉದ್ಯಮಕ್ಕೆ ಗುತ್ತಿಗೆ ನೀಡುವ ನಿರೀಕ್ಷೆಯಿದೆ. ಜಲಾಂತರ್ಗಾಮಿಗಳ ಮೇಲಿನ ಆಮದು ನಿರ್ಬಂಧವೂ ಡಿಸೆಂಬರ್ 2021ರಲ್ಲಿ ಜಾರಿಗೊಳ್ಳಲಿದ್ದು, ನೌಕಾಪಡೆಯು ತಲಾ ಸುಮಾರು 42,000 ಕೋ.ರೂ.ವೆಚ್ಚದಲ್ಲಿ ಆರು ಜಲಾಂತರ್ಗಾಮಿಗಳ ಪೂರೈಕೆಗೆ ಬೇಡಿಕೆ ಸಲ್ಲಿಸುವ ನಿರೀಕ್ಷೆಯಿದೆ. ವಾಯುಪಡೆಗಾಗಿ ಲಘು ಯುದ್ಧ ವಿಮಾನ ಎಂಕೆ 1ಎ ಅನ್ನು ಪಟ್ಟಿಯಲ್ಲಿ ಸೇರಿಸಲಾಗಿದ್ದು ಡಿಸೆಂಬರ್ 2020ರಲ್ಲಿ ಆಮದು ನಿರ್ಬಂಧ ಜಾರಿಗೆ ಬರಲಿದೆ. 85,000 ಕೋ.ರೂ.ಗೂ ಅಧಿಕ ವೆಚ್ಚದಲ್ಲಿ 123 ವಿಮಾನಗಳನ್ನು ಖರೀದಿಸಲು ಉದ್ದೇಶಿಸಲಾಗಿದೆ ಎಂದು ತಿಳಿಸಿರುವ ಸಚಿವಾಲಯವು,ನಿರ್ಬಂಧ ಪಟ್ಟಿಯಲ್ಲಿ ಸೇರಿಸಲು ಇನ್ನಷ್ಟು ರಕ್ಷಣಾ ಸಾಮಗ್ರಿಗಳನ್ನು ಗುರುತಿಸಲಾಗುವುದು ಎಂದಿದೆ.

 ರಕ್ಷಣಾ ಸಚಿವಾಲಯವು ಸಶಸ್ತ್ರ ಪಡೆಗಳು ಹಾಗೂ ಸಾರ್ವಜನಿಕ ಮತ್ತು ಖಾಸಗಿ ಕ್ಷೇತ್ರಗಳ ಉದ್ಯಮಗಳು ಸೇರಿದಂತೆ ಸಂಬಂಧಿಸಿದ ಎಲ್ಲರೊಂದಿಗೆ ಸಮಾಲೋಚನೆಗಳ ಬಳಿಕ ಈ ಪಟ್ಟಿಯನ್ನು ಸಿದ್ಧಪಡಿಸಿದೆ ಎಂದು ತಿಳಿಸಿದ ಸಿಂಗ್,ಸರಕಾರದ ಈ ನಿರ್ಧಾರವು ಭಾರತೀಯ ರಕ್ಷಣಾ ಉದ್ಯಮವು ಸಶಸ್ತ್ರ ಪಡೆಗಳ ಅಗತ್ಯಗಳನ್ನು ಪೂರೈಸಲು ತನ್ನದೇ ವಿನ್ಯಾಸ ಮತ್ತು ಅಭಿವೃದ್ಧಿ ಸಾಮರ್ಥ್ಯಗಳನ್ನು ಬಳಸಿಕೊಂಡು ಅಥವಾ ಡಿಆರ್‌ಡಿಒದ ತಂತ್ರಜ್ಞಾನಗಳನ್ನು ಅಳವಡಿಸಿಕೊಂಡು ನಿರ್ಬಂಧ ಪಟ್ಟಿಯಲ್ಲಿನ ಸಾಮಗ್ರಿಗಳನ್ನು ತಯಾರಿಸಲು ಸದವಕಾಶವನ್ನು ನೀಡಿದೆ ಎಂದರು.