‘ನಿಮ್ಮ ಆರೋಪಗಳನ್ನು ಗಂಭೀರವಾಗಿ ಪರಿಗಣಿಸಿದ್ದೇವೆ': ಕಾಂಗ್ರೆಸ್ ಪತ್ರಕ್ಕೆ ಫೇಸ್ ಬುಕ್ ಪ್ರತಿಕ್ರಿಯೆ

ಹೊಸದಿಲ್ಲಿ: ಭಾರತದಲ್ಲಿ ಫೇಸ್ ಬುಕ್ ಬಿಜೆಪಿ ಪರ ಧೋರಣೆ ಹೊಂದಿದೆ ಎಂದು ಆರೋಪಿಸಿ ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಕೆ ಸಿ ವೇಣುಗೋಪಾಲ್ ಅವರು ಫೇಸ್ ಬುಕ್ ಸಿಇಒ ಮಾರ್ಕ್ ಝುಕರ್ ಬರ್ಗ್ ಅವರಿಗೆ ಬರೆದಿದ್ದ ಎರಡು ಪತ್ರಗಳಿಗೆ ಸಂಸ್ಥೆ ಉತ್ತರ ನೀಡಿದೆ.

“ಕಾಂಗ್ರೆಸ್ ಪಕ್ಷದ ಪರವಾಗಿ ನೀವು ಎತ್ತಿದ ವಿಚಾರಗಳನ್ನು ನಾವು ಗಂಭೀರವಾಗಿ ತೆಗೆದುಕೊಂಡಿದ್ದೇವೆ'' ಎಂದು  ವೇಣುಗೋಪಾಲ್ ಅವರಿಗೆ ಬರೆದ ಪತ್ರದಲ್ಲಿ ಫೇಸ್ ಬುಕ್ ನ ಪಬ್ಲಿಕ್ ಪಾಲಿಸಿ ಡೈರೆಕ್ಟರ್ ನೀಲ್ ಪಾಟ್ಸ್  ಹೇಳಿದ್ದಾರೆ. ಆದರೆ  ಭಾರತದಲ್ಲಿ ಫೇಸ್ ಬುಕ್‍ನ ಉನ್ನತ ಸಿಬ್ಬಂದಿ ಎದುರಿಸುತ್ತಿರುವ ಆರೋಪಗಳ ಕುರಿತಂತೆ ಉನ್ನತ  ಮಟ್ಟದ ತನಿಖೆಯನ್ನು ಸಮಯಮಿತಿಯೊಳಗೆ ನಡೆಸಬೇಕೆಂಬ ಕಾಂಗ್ರೆಸ್ ಆಗ್ರಹದ ಬಗ್ಗೆ ಫೇಸ್ ಬುಕ್ ಪತ್ರದಲ್ಲಿ ಉಲ್ಲೇಖವಾಗಿಲ್ಲ. ಅಷ್ಟೇ ಅಲ್ಲದೆ ವಾಲ್ ಸ್ಟ್ರೀಟ್ ಜರ್ನಲ್ ವರದಿಯನ್ನಾಧರಿಸಿ ಫೇಸ್ ಬುಕ್ ಇಂಡಿಯಾದ ಪಬ್ಲಿಕ್ ಪಾಲಿಸಿ ಡೈರೆಕ್ಟರ್ ಅಂಖಿ ದಾಸ್ ಅವರ ವಿರುದ್ಧ  ಮಾಡಿದ ಆರೋಪಗಳ ಕುರಿತೂ ಫೇಸ್ ಬುಕ್  ಪತ್ರದಲ್ಲಿ ಯಾವುದೇ ಉಲ್ಲೇಖವಿಲ್ಲ.

ಫೇಸ್ ಬುಕ್ ನಿಷ್ಪಕ್ಷಪಾತಿ ಎಂದು ನೀಲ್ ಪಾಟ್ಸ್ ತಮ್ಮ ಪತ್ರದಲ್ಲಿ ಹೇಳಿದ್ದಾರಲ್ಲದೆ  ಜನರು ತಮ್ಮ ಅಭಿಪ್ರಾಯಗಳನ್ನು ಸ್ವತಂತ್ರವಾಗಿ ವ್ಯಕ್ತಪಡಿಸಲು ತಮ್ಮ  ಸಂಸ್ಥೆಯು ವೇದಿಕೆಗಳು ಅವಕಾಶ ಒದಗಿಸುತ್ತವೆ ಎಂದಿದ್ದಾರೆ.

“ತಾರತಮ್ಯ ಕುರಿತಾದ ಆರೋಪಗಳನ್ನು ನಾವು ಗಂಭೀರವಾಗಿ ಪರಿಗಣಿಸುತ್ತೇವೆ ಹಾಗೂ ದ್ವೇಷ ಮತ್ತು ನಿಂದನೆಯ ಎಲ್ಲಾ ವಿಧಗಳನ್ನೂ ನಾವು ಖಂಡಿಸುತ್ತೇವೆ. ಸಾರ್ವಜನಿಕ ವ್ಯಕ್ತಿಗಳ ದ್ವೇಷಪೂರಿತ ಪೋಸ್ಟ್ ಗಳ ಕುರಿತಂತೆ ನಮ್ಮ ನೀತಿಯಂತೆ ಅಂತಹ ಪೋಸ್ಟ್ ಗಳನ್ನು ನಾವು ತೆಗೆದುಹಾಕುತ್ತೇವೆ ಹಾಗೂ ಮುಂದೆಯೂ ನಮ್ಮ ವೇದಿಕೆಗಳಲ್ಲಿ ಸಾರ್ವಜನಿಕ ವ್ಯಕ್ತಿಗಳ ದ್ವೇಷಪೂರಿತ ಹೇಳಿಕೆಗಳನ್ನು ತೆಗೆದು ಹಾಕುತ್ತೇವೆ” ಎಂದು ಪತ್ರದಲ್ಲಿ ಬರೆಯಲಾಗಿದೆ.

ಫೇಸ್ ಬುಕ್ ಪತ್ರದ ಕುರಿತು ಪ್ರತಿಕ್ರಿಯಿಸಿದ ಕಾಂಗ್ರೆಸ್ ಡಾಟಾ ಅನಾಲಿಟಿಕ್ಸ್ ವಿಭಾಗದ ಮುಖ್ಯಸ್ಥ ಪ್ರವೀಣ್ ಚಕ್ರವರ್ತಿ, “ಪಕ್ಷ ಎತ್ತಿದ ವಿಚಾರಗಳ ಗಂಭೀರತೆಯನ್ನು ಫೇಸ್ ಬುಕ್ ಮನಗಂಡಿದೆಯಾದರೂ ಫೇಸ್ ಬುಕ್ ಇಂಡಿಯಾ ಅಧಿಕಾರಿಗಳ ವಿರುದ್ಧ ಮಾಡಲಾದ ಆರೋಪಗಳನ್ನು ಅಲ್ಲಗಳೆದಿಲ್ಲ” ಎಂದಿದ್ದಾರೆ.