ಸಂಸತ್ ಭವನ ಪ್ರವೇಶಿಸುವ ಸಂಸದರಿಗೆ ಕೊರೋನ ನೆಗೆಟಿವ್ ಪ್ರಮಾಣಪತ್ರ ಕಡ್ಡಾಯ
ಹೊಸದಿಲ್ಲಿ,ಸೆ.4: ಈ ತಿಂಗಳ 14ರಂದು ಆರಂಭಗೊಳ್ಳಲಿರುವ ಸಂಸತ್ನ ಮುಂಗಾರು ಅಧಿವೇಶನದಲ್ಲಿ ಭಾಗವಹಿಸುವ ಎಲ್ಲಾ ಸಂಸದರು ಸದನವನ್ನು ಪ್ರವೇಶಿಸಬೇಕಾದರೆ ಕೋವಿಡ್ 19 ತಪಾಸಣೆಯಲ್ಲಿ ನೆಗೆಟಿವ್ ಫಲಿತಾಂಶ ಬಂದಿರುವ ಪ್ರಮಾಣಪತ್ರವನ್ನು ಕಡ್ಡಾಯವಾಗಿ ತಮ್ಮೊಂದಿಗೆ ತರಬೇಕು ಎಂದು ಆಂಗ್ಲ ಸುದ್ದಿ ಜಾಲತಾಣವೊಂದು ವರದಿ ಮಾಡಿದೆ.
ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿಯ ಶಿಫಾರಸಿನ ಅನ್ವಯ ಲೋಕಸಭೆ ಹಾಗೂ ರಾಜ್ಯಸಭಾ ಸಚಿವಾಲಯಗಳು ಹೊರಡಿಸಿರುವ ಮಾರ್ಗದರ್ಶಿ ಸೂತ್ರಗಳಿಗೆ ಅನುಗುಣವಾಗಿ ಈ ನಿಯಮವನ್ನು ರೂಪಿಸಲಾಗಿದೆ.
ಲೋಕಸಭೆಯ ಸಂಸತ್ ಅಧಿವೇಶನ ಆರಂಭಗೊಳ್ಳುವ 72 ತಾಸುಗಳ ಮೊದಲು ಸಂಸದರು ಕೋವಿಡ್-19 ತಪಾಸಣೆಗೆ ಒಳಗಾಗಬೇಕಿದೆ. ಒಂದು ವೇಳೆ ಹಾಗೆ ಮಾಡಲು ವಿಫಲರಾದ ಸಂಸದರು ಸಂಸತ್ಭವನದ ಸ್ವಾಗತ ಕೌಂಟರ್ನಲ್ಲಿ ಕೊರೋನ ವೈರಸ್ ಪರೀಕ್ಷೆಗೊಳಪಡಬೇಕಾಗುತ್ತದೆ.
ಒಂದು ವೇಳೆ ಸಂಸದನ ಕುಟುಂಬದ ಯಾವುದೇ ಸದಸ್ಯ ಅಥವಾ ಸಿಬ್ಬಂದಿಗೆ ಕೊರೋನ ಸೋಂಕು ದೃಢಪಟ್ಟಿದ್ದಲ್ಲಿ, ಸಂಬಂಧಪಟ್ಟ ಸಂಬಂಧಪಟ್ಟ ಸಂಸದನು 14 ದಿನಗಳ ಕಾಲ ಸ್ವಯಂ ಕ್ವಾರಂಟೈನ್ಗೆ ಒಳಪಡಬೇಕಾಗುತ್ತದೆ. ಅವರ ಕುಟುಂಬ ಸದಸ್ಯರು ಹಾಗೂ ಸಿಬ್ಬಂದಿ ಕೂಡಾ, ಅಧಿವೇಶನಕ್ಕೆ ಮುನ್ನ ತಪಾಸಣೆಗೊಳಪಡಬೇಕಾಗುತ್ತದೆ.
ಸಂಸತ್ ಅಧಿವೇಶನದ ಅವಧಿಯಲ್ಲಿ ಕರ್ತವ್ಯ ನಿರ್ವಹಿಸುವ ಎಲ್ಲಾ ಉದ್ಯೋಗಿಗಳಿಗಾಗಿ ಸೋಂಕಿನ ತಪಾಸಣೆಗಾಗಿ ಲೋಕಸಭಾ ಕಾರ್ಯಾಲಯವು ಶನಿವಾರದಂದು, ಕೋವಿಡ್ -19 ಪರೀಕ್ಷಾ ಶಿಬಿರವನ್ನು ಆಯೋಜಿಸಿದೆ.
ಸುರಕ್ಷಿತ ಅಂತರ ಕಾಯ್ದುಕೊಳ್ಳುವಿಕೆ, ಮಾಸ್ಕ್ ಧರಿಸುವಿಕೆ, ಕೈಗಳ ಶುಚಿತ್ವ ಕಾಯ್ದುಕೊಳ್ಳುವಿಕೆ, ಹಾಲ್, ಭೋಜನಶಾಲೆ ಅಥವಾ ಲಾಬಿಯಲ್ಲಿ ದಟ್ಟಣೆಯನ್ನು ತಪ್ಪಿಸುವುದು ಮತ್ತಿತರ ಮುಂಜಾಗರೂಕತಾ ಕ್ರಮಗಳನ್ನು ಕೂಡಾ ಕೈಗೊಳ್ಳಲಾಗುವುದು. ಸದನದ ಕಲಾಪಗಳ ಸಂದರ್ಭದಲ್ಲಿ ಸಂದರ್ಶಕರನ್ನು ಆಹ್ವಾನಿಸದಂತೆಯೂ ಎಂಪಿಗಳಿಗೆ ಸಲಹೆ ನೀಡಲಾಗಿದೆ. ಕಾಗದರೂಪದ ದಾಖಲೆಪತ್ರಗಳನ್ನು ಹಾಗೂ ವರದಿಗಳನ್ನು ಸದನಕ್ಕೆ ತಾರದಂತೆ ಸೂಚಿಸಲಾಗಿದೆ. ಅದರ ಬದಲಿಗೆ ಡಿಜಿಟಲ್ ಪ್ರತಿಗಳನ್ನೇ ಬಳಸುವುದಕ್ಕೆ ಅವರನ್ನು ಉತ್ತೇಜಿಸಲಾಗಗಿದೆ.
ಈ ಮಧ್ಯೆ ಸದನದ ಕಲಾಪಗಳನ್ನು ವರದಿ ಮಾಡುವ ಮಾಧ್ಯಮ ಸಿಬ್ಬಂದಿ ಕೂಡಾ ಕಡ್ಡವಾಯವಾಗಿ ಕೋವಿಡ್-19 ತಪಾಸಣೆಗೆ ಒಳಪಡಬೇಕಾಗುತ್ತದೆ. ಯಾರಿಗಾದರೂ ಸೋಂಕು ತಗಲಿದೆಯೆಂ ಎಂಬುದನ್ನು ಪತ್ತೆಹಚ್ಚಲು ಧಿವೇಶನ ಆರಂಭಗೊಂಡ ಏಳು ದಿನಗಳ ಬಳಿಕ, ಎಲ್ಲಾ ಸಂಸದರು, ಅವರ ಕುಟುಂಬ ಸದಸ್ಯರು ಹಾಗೂ ಸಿಬ್ಬಂದಿ, ಕಾರ್ಯಾಲಯದ ಸಿಬ್ಬಂದಿ ಮತ್ತು ಮಾಧ್ಯಮಮಂದಿಯನ್ನು ಮರುತಪಾಸಣೆಗೊಳಪಡಿಸಲಾಗುವುದು ಎಂದು ಸಂಸತ್ಭವನದ ಅಧಿಕಾರಿಗಳು ತಿಳಿಸಿದ್ದಾರೆ.
