2019ರಲ್ಲಿ ದಿನಗೂಲಿ ಕಾರ್ಮಿಕರ ಆತ್ಮಹತ್ಯೆ ಪ್ರಕರಣಗಳು ದ್ವಿಗುಣ: ಎನ್‌ಸಿಆರ್‌ಬಿ ವರದಿ

ಹೊಸದಿಲ್ಲಿ, ಸೆ.6: ದೇಶದಲ್ಲಿ 2019ರಲ್ಲಿ 1,39,123 ಅತ್ಮಹತ್ಯೆ ಪ್ರಕರಣ ವರದಿಯಾಗಿದ್ದು, ಇದರಲ್ಲಿ ಸುಮಾರು 25%ದಷ್ಟು ಸಾವಿನ ಪ್ರಕರಣ ದಿನಗೂಲಿ ಕಾರ್ಮಿಕರಿಗೆ ಸಂಬಂಧಿಸಿದ್ದಾಗಿದೆ. ಈ ಹಿಂದಿನ 6 ವರ್ಷಕ್ಕೆ ಹೋಲಿಸಿದರೆ 2019ರಲ್ಲಿ ದಿನಗೂಲಿ ನೌಕರರ ಆತ್ಮಹತ್ಯೆ ಪ್ರಕರಣ ದ್ವಿಗುಣಗೊಂಡಿದ್ದು 23.4%ಕ್ಕೆ ಹೆಚ್ಚಿದೆ ಎಂದು ಇತ್ತೀಚೆಗೆ ಬಿಡುಗಡೆಯಾಗಿರುವ ನ್ಯಾಷನಲ್ ಕ್ರೈಂ ರೆಕಾರ್ಡ್ಸ್ ಬ್ಯೂರೊ(ಎನ್‌ಸಿಆರ್‌ಬಿ)ದ ವರದಿ ತಿಳಿಸಿದೆ.

ಆದರೆ ಕೃಷಿ ಕ್ಷೇತ್ರದಲ್ಲಿ ಕೆಲಸ ಮಾಡುತ್ತಿರುವ ದಿನಗೂಲಿ ಕಾರ್ಮಿಕರನ್ನು ಈ ಅಂಕಿ ಅಂಶದಲ್ಲಿ ಸೇರಿಸಲಾಗಿಲ್ಲ. 2019ರಲ್ಲಿ ತಮಿಳುನಾಡಿನಲ್ಲಿ ಅತ್ಯಧಿಕ ದಿನಗೂಲಿ ನೌಕರರ ಆತ್ಮಹತ್ಯೆ ಪ್ರಕರಣ ವರದಿಯಾಗಿದ್ದರೆ(5,186), ಮಹಾರಾಷ್ಟ್ರ(4,128), ಮಧ್ಯಪ್ರದೇಶ(3,964), ತೆಲಂಗಾಣ(2,858) ಮತ್ತು ಕೇರಳ(2,809) ಆ ಬಳಿಕದ ಸ್ಥಾನದಲ್ಲಿವೆ. ರಾಷ್ಟ್ರೀಯ ಅಪರಾಧ ದಾಖಲೆಗಳ ಬ್ಯೂರೊ(ಎನ್‌ಸಿಆರ್‌ಬಿ)ದ ‘ಅಪರಾಧ ಮತ್ತು ಆತ್ಮಹತ್ಯೆಗೆ ಸಂಬಂಧಿಸಿದ ವಿಭಾಗ’ದಲ್ಲಿ ದಿನಗೂಲಿ ಕಾರ್ಮಿಕರ ವರ್ಗೀಕರಣ 2014ರ ಬಳಿಕಷ್ಟೇ ಆರಂಭಿಸಲಾಗಿದ್ದು, ದಿನಗೂಲಿ ಕಾರ್ಮಿಕರ ಆತ್ಮಹತ್ಯೆ ಪ್ರಕರಣದಲ್ಲಿ ವರ್ಷದಿಂದ ವರ್ಷಕ್ಕೆ ಭಾರೀ ಹೆಚ್ಚಳವಾಗುತ್ತಿರುವುದು ಆತಂಕದ ವಿಷಯವಾಗಿದೆ. 2018ರಲ್ಲಿ ಉದ್ಯೋಗಿಗಳ ಆತ್ಮಹತ್ಯೆ ಪ್ರಕರಣದಲ್ಲಿ ದಿನಗೂಲಿ ಕಾರ್ಮಿಕರ ಪ್ರಮಾಣ ಅತ್ಯಧಿಕ (22.4%)ವಾಗಿದೆ ಎಂದು ವರದಿ ತಿಳಿಸಿದೆ.

2014ರಲ್ಲಿ ಆತ್ಮಹತ್ಯೆ ಮಾಡಿಕೊಂಡವರಲ್ಲಿ 12%ದಷ್ಟು ದಿನಗೂಲಿ ಕಾರ್ಮಿಕರಾಗಿದ್ದರೆ, 2015ರಲ್ಲಿ ಈ ಪ್ರಮಾಣ 17.8%ಕ್ಕೆ, 2016ರಲ್ಲಿ 19.2%ಕ್ಕೆ, 2017ರಲ್ಲಿ 22.1%ಕ್ಕೆ ಏರಿಕೆಯಾಗಿದೆ. 2014ರಿಂದ 2019ರವರೆಗಿನ ಐದು ವರ್ಷದಲ್ಲಿ ಆತ್ಮಹತ್ಯೆ ಮಾಡಿಕೊಂಡ ದಿನಗೂಲಿ ಕಾರ್ಮಿಕರ ಸಂಖ್ಯೆ 15,735ರಿಂದ 32,563ಕ್ಕೆ ಏರಿಕೆಯಾಗಿದೆ. ದಿನಗೂಲಿ ಕಾರ್ಮಿಕರಲ್ಲಿ ಮಹಿಳೆಯರಿಗಿಂತ ಪುರುಷರ ಆತ್ಮಹತ್ಯೆ ಪ್ರಕರಣ ಅಧಿಕವಾಗಿದೆ. 2019ರಲ್ಲಿ ಆತ್ಮಹತ್ಯೆ ಮಾಡಿಕೊಂಡ 32,563 ದಿನಗೂಲಿ ಕಾರ್ಮಿಕರಲ್ಲಿ ಪುರುಷರ ಸಂಖ್ಯೆ 29,092, ಮಹಿಳೆಯರ ಸಂಖ್ಯೆ 3,467, ನಾಲ್ವರು ತೃತೀಯ ಲಿಂಗಿಗಳು. ವ್ಯಾಪಕ ನಿರುದ್ಯೋಗ, ಮದ್ಯಪಾನ ಚಟ, ಆರ್ಥಿಕ ಅಡಚಣೆ, ಕೌಟುಂಬಿಕ ಹಿಂಸೆ ಹಾಗೂ ಸಾಲದ ಹೊರೆ ಇತ್ಯಾದಿ ಸಮಸ್ಯೆಗಳು ಭಾರತೀಯರಲ್ಲಿ ಮಾನಸಿಕ ಆರೋಗ್ಯದ ಮೇಲೆ ಪರಿಣಾಮ ಬೀರಿದೆ ಎಂದೂ ವರದಿ ತಿಳಿಸಿದೆ.

ಈ ವರದಿಯಲ್ಲಿ ಆತ್ಮಹತ್ಯೆ ಮಾಡಿಕೊಂಡವರನ್ನು 9 ವಿಭಾಗಗಳಲ್ಲಿ ವರ್ಗೀಕರಿಸಲಾಗಿದೆ. ದಿನಗೂಲಿ ಕಾರ್ಮಿಕರು, ಗೃಹಿಣಿಯರು, ಕೃಷಿ ಕ್ಷೇತ್ರದಲ್ಲಿ ತೊಡಗಿಸಿಕೊಂಡವರು, ವೃತ್ತಿಪರರು/ವೇತನ ಪಡೆಯುವವರು, ವಿದ್ಯಾರ್ಥಿಗಳು, ಸ್ವಉದ್ಯೋಗಿಗಳು, ನಿವೃತ್ತರು, ನಿರುದ್ಯೋಗಿಗಳು ಮತ್ತು ಇತರರು ಎಂದು ವರ್ಗೀಕರಿಸಲಾಗಿದೆ.

ನಿರುದ್ಯೋಗದಿಂದ ಆತ್ಮಹತ್ಯೆ ಪ್ರಕರಣವೂ ದ್ವಿಗುಣ

ನಿರುದ್ಯೋಗದಿಂದ ಆತ್ಮಹತ್ಯೆ ಮಾಡಿಕೊಳ್ಳುವವರ ಅಂಕಿಅಂಶವನ್ನು ಎನ್‌ಸಿಆರ್‌ಬಿ 1995ರಿಂದ ದಾಖಲಿಸುತ್ತಿದ್ದು, 2019ರಲ್ಲಿ ಒಟ್ಟು ಆತ್ಮಹತ್ಯೆ ಮಾಡಿಕೊಂಡವರಲ್ಲಿ ನಿರುದ್ಯೋಗಿಗಳ ಪ್ರಮಾಣ 10.1% ಆಗಿದ್ದು, 1995ಕ್ಕೆ ಹೋಲಿಸಿದರೆ ಇದು ಕೂಡಾ ದುಪ್ಪಟ್ಟಾಗಿದೆ. 2019ರಲ್ಲಿ ಆತ್ಮಹತ್ಯೆ ಮಾಡಿಕೊಂಡ ನಿರುದ್ಯೋಗಿಗಳ ಪ್ರಮಾಣ, ಅದರ ಹಿಂದಿನ ವರ್ಷಕ್ಕೆ ಹೋಲಿಸಿದರೆ 8.37%ರಷ್ಟು ಹೆಚ್ಚಿದೆ.

ಕರ್ನಾಟಕ ನಾಲ್ಕನೇ ಸ್ಥಾನದಲ್ಲಿ

ನಿರುದ್ಯೋಗಿಗಳ ಆತ್ಮಹತ್ಯೆ ಪ್ರಕರಣ ಅಧಿಕವಾಗಿರುವ ರಾಜ್ಯಗಳ ಪಟ್ಟಿಯಲ್ಲಿ ಕರ್ನಾಟಕ ನಾಲ್ಕನೇ ಸ್ಥಾನದಲ್ಲಿದೆ. ಕೇರಳ (10,963), ಮಹಾರಾಷ್ಟ್ರ(1,511), ತಮಿಳುನಾಡು(1,368), ಕರ್ನಾಟಕ(1,293) ಮತ್ತು ಒಡಿಶಾ (858) ಕ್ರಮವಾಗಿ ಒಂದರಿಂದ ಐದನೇ ಸ್ಥಾನದಲ್ಲಿದೆ ಎಂದು ವರದಿ ತಿಳಿಸಿದೆ.