ಇನ್ಫೋಸಿಸ್ ಮಂಗಳೂರು ಕಚೇರಿಯಲ್ಲಿ ಬೆಳ್ಳಿಹಬ್ಬದ ಸಂಭ್ರಮ
ಮಂಗಳೂರು, ಸೆ.10: ಸಾಫ್ಟ್ವೇರ್ ಕ್ಷೇತ್ರದಲ್ಲಿ ಮುಂಚೂಣಿಯಲ್ಲಿರುವ ಇನ್ಫೋಸಿಸ್ ಸಂಸ್ಥೆಯು ಮಂಗಳೂರಿನಲ್ಲಿ ತನ್ನ ಕಾರ್ಯಾಚರಣೆಯ 25 ವರ್ಷ ಪೂರೈಸಿದ ಹಿನ್ನೆಲೆಯಲ್ಲಿ ಬೆಳ್ಳಿಹಬ್ಬ ಆಚರಿಸಿಕೊಂಡಿತು.
ಇನ್ಫೋಸಿಸ್ ಬೆಂಗಳೂರು ಪ್ರಧಾನ ಕಚೇರಿಯಿಂದ ಹೊರಗೆ ಇನ್ಫೋಸಿಸ್ ಸ್ಥಾಪಿಸಿರುವ ಮೊದಲ ಅಭಿವೃದ್ಧಿ ಕೇಂದ್ರವಾಗಿದೆ ಮಂಗಳೂರು. 1995ರಲ್ಲಿ ಬಾಡಿಗೆ ಮಹಡಿಯ ಕಚೇರಿಯಿಂದ ಕೆಲವೇ ಉದ್ಯೋಗಿಗಳೊಂದಿಗೆ ಕಾರ್ಯ ಆರಂಭಿಸಿದ್ದ ಕಚೇರಿ ಈಗ ಮುಡಿಪುನಲ್ಲಿರುವ 360 ಎಕರೆ ಕ್ಯಾಂಪಸ್ ಹೊಂದಿದೆ.
ವಿಶ್ವಾದ್ಯಂತ ಗ್ರಾಹಕರಿಗೆ ಸಾಫ್ಟ್ವೇರ್ ಯೋಜನೆಗಳ ಸೌಲಭ್ಯ ಕಲ್ಪಿಸಲು ವಿಶ್ವ ದರ್ಜೆಯ ಸೌಲಭ್ಯಗಳನ್ನು ಹೊಂದಿದೆ. ಈ ಕಚೇರಿ ನೌಕರರಿಗೆ ಅತ್ಯಾಧುನಿಕ ಸೌಕರ್ಯ ನೀಡುತ್ತಿದೆ. ಇದರಲ್ಲಿ ಎರಡು ಫುಡ್ಕೋರ್ಟ್ಗಳು, ಸುಧಾರಿತ ಧ್ವನಿ ವ್ಯವಸ್ಥೆ ಹೊಂದಿರುವ ತೆರೆದ ಥಿಯೇಟರ್, ಅಂತರ್ ರಾಷ್ಟ್ರೀಯ ಗುಣಮಟ್ಟದ ಫುಟ್ಬಾಲ್ ಮತ್ತು ಕ್ರಿಕೆಟ್, ವಾಲಿಬಾಲ್ ಕೋರ್ಟ್ಗಳನ್ನು ಒಳಗೊಂಡಿರುವ ಒಳಾಂಗಣ, ಆಟಗಳಿಗೆ ಕ್ರೀಡಾ ಸಂಕೀರ್ಣ ಇತರ ಸೌಲಭ್ಯಗಳ ನಡುವೆ ಈಜುಕೊಳ ಸೌಲಭ್ಯವಿದೆ.
ಪರಿಸರ ಸಂರಕ್ಷಣೆಗೆ ಬದ್ಧವಾಗಿರುವ ಇನ್ಫೋಸಿಸ್ ಸಂಸ್ಥೆಯು ಇಲ್ಲಿನ ಬರಡು ಭೂಮಿಯನ್ನು ಹಸಿರು ಆವರಣವನ್ನಾಗಿ ಪರಿವರ್ತಿಸಿದೆ. ಇನ್ಫೋಸಿಸ್ ಮಂಗಳೂರು ಕಚೇರಿ ತನ್ನ ಉದ್ಯೋಗಿಗಳೊಂದಿಗೆ ಸುತ್ತಮುತ್ತಲಿನ ಸಮುದಾಯಗಳ ಉನ್ನತಿಗಾಗಿ ನಿಕಟವಾಗಿ ಕೆಲಸ ಮಾಡಿದೆ. ಅವಕಾಶ ವಂಚಿತ ಮಕ್ಕಳಿಗೆ ವಿದ್ಯಾರ್ಥಿವೇತನ, ನೋಟ್ಬುಕ್ ಮತ್ತು ಬಟ್ಟೆ ವಿತರಣಾ ಅಭಿಯಾನ ಮತ್ತು ರಕ್ತದಾನ ಶಿಬಿರಗಳನ್ನು ಹಮ್ಮಿಕೊಳ್ಳುತ್ತಿದೆ.
ಬಗಂಭಿಲ ಗ್ರಾಮದಲ್ಲಿ ಹೊಸ ಅಂಗನವಾಡಿ ಕೇಂದ್ರ ಮತ್ತು ನಡುಪಡವು ಗ್ರಾಮದಲ್ಲಿ ಸರಕಾರಿ ಪ್ರಾಥಮಿಕ ಶಾಲೆಗೆ ಇಂಗ್ಲಿಷ್ ತರಗತಿಗಳನ್ನು ಆರಂಭಿಸಲು ನೆರವು ನೀಡಲಾಗಿದೆ. ನೌಕರರ ಸುರಕ್ಷತೆ ಮತ್ತು ಯೋಗಕ್ಷೇಮಕ್ಕೆ ಆದ್ಯತೆ ನೀಡಿ, ನೌಕರರು ಮತ್ತು ಅವರ ಕುಟುಂಬಗಳಿಗೆ ವರ್ಚ್ಯುಯಲ್ ಮೋಜಿನ ಚಟುವಟಿಕೆಗಳನ್ನು ಆಯೋಜಿಸಲಾಗಿದೆ ಎಂದು ಸಂಸ್ಥೆಯ ಪ್ರಕಟನೆ ತಿಳಿಸಿದೆ.
