ಶರೀರದಲ್ಲಿಯ ಈ ಮೂರು ಸ್ಥಿತಿಗಳು ಹಿಮೊಫಿಲಿಯಾ ಅಥವಾ ಕುಸುಮರೋಗವನ್ನು ಸೂಚಿಸಬಹುದು

 ಹಿಮೊಫಿಲಿಯಾ ಅಥವಾ ಕುಸುಮರೋಗ ಒಂದು ವಂಶವಾಹಿ ಕಾಯಿಲೆಯಾಗಿದೆ. ಅಪರೂಪದ ಈ ರಕ್ತಸ್ರಾವ ರೋಗವಿರುವವರಲ್ಲಿ ರಕ್ತವನ್ನು ಹೆಪ್ಪುಗಟ್ಟಿಸುವ ಪ್ರೋಟಿನ್‌ಗಳು ಇರುವುದಿಲ್ಲವಾದ್ದರಿಂದ ರಕ್ತವು ಸಮರ್ಪಕವಾಗಿ ಹೆಪ್ಪುಗಟ್ಟುವುದಿಲ್ಲ. ಪರಿಣಾಮ ಅಂತಹವರಿಗೆ ಸಣ್ಣ ಗಾಯವಾದರೂ ವಿಪರೀತ ರಕ್ತಸ್ರಾವವಾಗುತ್ತದೆ. ಮಹಿಳೆಯರಲ್ಲಿ ರಕ್ತಸ್ರಾವ ಕಾಯಿಲೆಗಳು ವಾನ್ ವಿಲ್ಲೆಬ್ರಾಂಡ್ ಡಿಸೀಸ್ ಮತ್ತು ಕುಸುಮರೋಗವನ್ನು ಒಳಗೊಂಡಿದ್ದು ಇವೆರಡೂ ಆನುವಂಶಿಕವಾಗಿವೆ ಮತ್ತು ಕ್ಲೋಟಿಂಗ್ ಫ್ಯಾಕ್ಟರ್ ಅಥವಾ ರಕ್ತವನ್ನು ಹೆಪ್ಪುಗಟ್ಟಿಸುವ ಪ್ರೋಟಿನ್‌ಗಳ ಕೊರತೆಯಿಂದ ಉಂಟಾಗುತ್ತವೆ. ಮಹಿಳೆಯರು ಕುಸುಮರೋಗದ ವಾಹಕರಾಗಿರುತ್ತಾರೆ. ಪ್ರಮುಖ ಅಂಗಗಳಲ್ಲಿ ರಕ್ತಸ್ರಾವವಾಗುವವರೆಗೆ ಈ ರೋಗವು ಮಾರಣಾಂತಿಕವಲ್ಲ. ಆದರೆ ಇದು ವ್ಯಕ್ತಿಯನ್ನು ದುರ್ಬಲಗೊಳಿಸುವ ಕಾಯಿಲೆಯಾಗಿದ್ದು,ಇದನ್ನು ಗುಣಪಡಿಸಲು ಯಾವುದೇ ಚಿಕಿತ್ಸೆಯಿಲ್ಲ.

ಸೂಕ್ತ ರೋಗನಿರ್ಣಯಕ್ಕಾಗಿ ಹಿಮೊಫಿಲಿಯಾದ ಲಕ್ಷಣಗಳನ್ನು ತಿಳಿದುಕೊಳ್ಳುವುದು ಅಗತ್ಯವಾಗುತ್ತದೆ. ಸಣ್ಣಗಾಯವಾದರೂ ವಿಪರೀತ ರಕ್ತಸ್ರಾವ

 ಸಣ್ಣಪುಟ್ಟ ಗಾಯಗಳಾದರೂ ವಿಪರೀತ ರಕ್ತಸ್ರಾವವಾಗುತ್ತಿದ್ದರೆ ಅದಕ್ಕೆ ಹಿಮೊಫಿಲಿಯಾ ಸಂಭಾವ್ಯ ಕಾರಣವಾಗಿರಬಹುದು. ಹೊಸ ಪ್ರಕರಣಗಳ ಪೈಕಿ ಸುಮಾರು ಮೂರನೇ ಒಂದರಷ್ಟು ತಾಯಿ ಅಥವಾ ಮಗುವಿನಲ್ಲಿಯ ಜೀನ್ ಅಥವಾ ವಂಶವಾಹಿಯ ಹೊಸ ರೂಪಾಂತರದಿಂದ ಉಂಟಾಗುತ್ತವೆ. ಇಂತಹ ಪ್ರಕರಣಗಳಲ್ಲಿ ತಾಯಿಯು ವಾಹಕಳಾಗಿದ್ದಾಗ ಮತ್ತು ತಂದೆಗೆ ರೋಗವಿಲ್ಲದಿದ್ದಾಗ ಗಂಡುಮಕ್ಕಳು ಹಿಮೊಫಿಲಿಯಾಕ್ಕೆ ತುತ್ತಾಗುವ ಶೇ.50 ರಷ್ಟು ಅಪಾಯವಿರುತ್ತದೆ ಮತ್ತು ಹೆಣ್ಣುಮಕ್ಕಳು ವಾಹಕರಾಗುವ ಶೇ.50ರಷ್ಟು ಅಪಾಯವನ್ನು ಹೊಂದಿರುತ್ತಾರೆ. ಯಾವುದೇ ವ್ಯಕ್ತಿಗೆ ಆಗಾಗ್ಗೆ ಸಣ್ಣಪುಟ್ಟ ಗಾಯಗಳಿಗೂ ವಿಪರೀತ ರಕ್ತಸ್ರಾವವಾಗುತ್ತಿದ್ದರೆ ಅದನ್ನು ಲಘುವಾಗಿ ಪರಿಗಣಿಸಕೂಡದು ಮತ್ತು ತಕ್ಷಣ ತಜ್ಞವೈದ್ಯರನ್ನು ಭೇಟಿಯಾಗಬೇಕು.

ಸಂದುಗಳಲ್ಲಿ ಬಿಗಿತ ಮತ್ತು ನೋವು:

ವಂಶವಾಹಿ ರೋಗಗಳ ಸಮಸ್ಯೆಯೆಂದರೆ ಹಲವರಲ್ಲಿ ಅದನ್ನು ಪತ್ತೆ ಹಚ್ಚಲು ವರ್ಷಗಳೇ ಬೇಕಾಗಬಹುದು. ಆದ್ದರಿಂದ ಹಿಮೊಫಿಲಿಯಾದಲ್ಲಿ ವ್ಯಕ್ತಿಗೆ ಸಂದುಗಳಲ್ಲಿ ಊತ ಮತ್ತು ನೋವಿನ ಅನುಭವವಾಗಬಹುದು. ಶರೀರದ ಯಾವುದೇ ಭಾಗದ ಕೀಲು ಅಥವಾ ಸಂದುಗಳಲ್ಲಿ ಬಿಗಿತ,ನೋವು,ಪೆಡಸುತನ ಇತ್ಯಾದಿಗಳು ಉಂಟಾಗಬಹುದು. ಆದರೆ ಈ ಸಮಸ್ಯೆಗಳಿಗೆ ಮನೆಮದ್ದುಗಳಿಂದ ಪರಿಹಾರ ಪಡೆಯಬಹುದು. ಆದರೆ ದೀರ್ಘಸಮಯದವರೆಗೆ ಸಮಸ್ಯೆ ಕಾಡುತ್ತಿದ್ದರೆ ಶಸ್ತ್ರಚಿಕಿತ್ಸೆ ಏಕೈಕ ಪರಿಹಾರ ಮಾರ್ಗವಾಗುತ್ತದೆ.

ದಿಢೀರ್ ಮೂಗಿನಿಂದ ರಕ್ತಸೋರಿಕೆ:

ಮೂಗಿನ ಒಳಗಿನ ಪದರದ ಬಳಿಕ ರಕ್ತನಾಳವು ಒಡೆದಾಗ ಮೂಗಿನಿಂದ ರಕ್ತಸ್ರಾವ ಉಂಟಾಗುತ್ತದೆ. ಇದನ್ನು ವೈದ್ಯಕೀಯ ಭಾಷೆಯಲ್ಲಿ ‘ಎಪಿಸ್ಟಾಕ್ಸಿಸ್’ ಎಂದು ಕರೆಯಲಾಗುತ್ತದೆ. ಮೂಗಿನಿಂದ ರಕ್ತಸ್ರಾವ ಹಿಮೊಫಿಲಿಯಾದ ಪ್ರಮುಖ ಲಕ್ಷಣಗಳಲ್ಲೊಂದಾಗಿದೆ. ಹಿಮೊಫೊಲಿಯಾವಲ್ಲದೆ ಚಳಿಯೂ ಮೂಗಿನ ಭಿತ್ತಿಯನ್ನು ಕೆರಳಿಸುವ ಮೂಲಕ ರಕ್ತಸ್ರಾವದ ಅಪಾಯವನ್ನು ಹೆಚ್ಚಿಸುತ್ತದೆ.

  ಎರಡು ವಿಧಗಳು: ಕುಸುಮರೋಗವನ್ನು ಹಿಮೊಫಿಲಿಯಾ-1 ಮತ್ತು ಹಿಮೊಫಿಲಿಯಾ-2 ಎಂಬ ಎರಡು ವಿಧಗಳಲ್ಲಿ ವರ್ಗೀಕರಿಸಲಾಗಿದೆ. ಮೊದಲ ವಿಧದಲ್ಲಿ ರಕ್ತವನ್ನು ಹೆಪ್ಪುಗಟ್ಟಿಸುವ ಫ್ಯಾಕ್ಟರ್-8 ಮಟ್ಟ ಅತ್ಯಂತ ಕಡಿಮೆ ಅಥವಾ ಶೂನ್ಯವಾಗಿದ್ದರೆ,ಫ್ಯಾಕ್ಟರ್ 9 ಕಡಿಮೆಯಿದ್ದರೆ ಹಿಮೊಫಿಲಿಯಾ-2 ಉಂಟಾಗುತ್ತದೆ. ಸುಮಾರು ಶೇ.80ರಷ್ಟು ರೋಗಿಗಳು ಹಿಮೊಫಿಲಿಯಾ-1ರಿಂದ ನರಳುತ್ತಾರೆ. ಸಾಮಾನ್ಯ ಹಿಮೊಫಿಲಿಯಾ ಪ್ರಕರಣದಲ್ಲಿ ರೋಗಿಗೆ ಎಲ್ಲಾದರೂ ಒಮ್ಮೊಮ್ಮೆ ರಕ್ತಸ್ರಾವವಾಗುತ್ತಿರುತ್ತದೆ. ಆದರೆ ಸ್ಥಿತಿ ಗಂಭೀರಗೊಂಡಾಗ ದಿಢೀರ್ ಮತ್ತು ನಿರಂತರ ರಕ್ತಸ್ರಾವವಾಗುತ್ತದೆ.