ಚಿತ್ರೋದ್ಯಮದ ಅಪಹಾಸ್ಯ ಸಹಿಸಲು ಸಾಧ್ಯವಿಲ್ಲ: ಹೇಮಾಮಾಲಿನಿ

 ಹೊಸದಿಲ್ಲಿ, ಸೆ.16: "ಬಾಲಿವುಡ್ ಯಾವಾಗಲೂ ಉನ್ನತ ಗೌರವದಲ್ಲಿ ಉಳಿಯುತ್ತದೆ ಹಾಗೂ ಡ್ರಗ್ಸ್ ಹಾಗೂ ಸ್ವಜನ ಪಕ್ಷಪಾತದಂತಹ ಆರೋಪಗಳ ಬಗ್ಗೆ ಯಾರೂ ಅದರ ಗೌರವ ಕಡಿಮೆ ಮಾಡಲು ಸಾಧ್ಯವಿಲ್ಲ. ಚಿತ್ರೋದ್ಯಮದ ಅಪಹಾಸ್ಯವನ್ನು ಸಹಿಸಲು ಸಾಧ್ಯವಿಲ್ಲ'' ಎಂದು ಹಿರಿಯ ನಟಿ ಹಾಗೂ ಬಿಜೆಪಿ ಸಂಸದೆ ಹೇಮಾ ಮಾಲಿನಿ ಹೇಳಿದ್ದಾರೆ. ಈ ಮೂಲಕ ಹಿರಿಯ ನಟಿ ಜಯಾ ಬಚ್ಚನ್‌ರ ಅಭಿಪ್ರಾಯಕ್ಕೆ ಸಹಮತ ವ್ಯಕ್ತಪಡಿಸಿದ್ದಾರೆ.

 ‘‘ನನಗೆ ಈ ಉದ್ಯಮದಿಂದ ಹೆಸರು, ಖ್ಯಾತಿ, ಗೌರವ ಎಲ್ಲವೂ ಸಿಕ್ಕಿದೆ... ಇಂತಹ ಆರೋಪವು ನನಗೆ ನಿಜವಾಗಿಯೂ ನೋವನ್ನುಂಟು ಮಾಡುತ್ತದೆ’’ ಎಂದು ಹೇಮಾ ಮಾಲಿನಿ ಹೇಳಿದರು.

"ಸುಶಾಂತ್ ಸಿಂಗ್ ರಜಪೂತ್ ಸಾವಿನ ತನಿಖೆಗೆ ಸಂಬಂಧಿಸಿದ ಮಾದಕ ದ್ರವ್ಯ ಸೇವನೆಯ ಆರೋಪಗಳೊಂದಿಗೆ ಚಿತ್ರೋದ್ಯಮವನ್ನು ಕೆಣಕುವ ಪ್ರಯತ್ನ’’ಎಂದು ಕರೆದ 71ರ ವಯಸ್ಸಿನ ಹೇಮಾ ಮಾಲಿನಿ ಹಿಂದಿ ಚಲನ ಚಿತ್ರಗಳಲ್ಲಿ ತಮ್ಮ ಸಮಕಾಲೀನರಾದ ಮತ್ತೊಬ್ಬ ಹಿರಿಯ ನಟಿ ಜಯಾ ಬಚ್ಚನ್ ಸಂಸತ್ತಿನಲ್ಲಿ ಹೇಳಿರುವ ಹೇಳಿಕೆಗೆ ದನಿಗೂಡಿಸಿದರು.

ಬಾಲಿವುಡ್‌ನಲ್ಲಿ ಡ್ರಗ್ಸ್ ಕುರಿತು ಸಂಸತ್ತಿನಲ್ಲಿ ಮಾತನಾಡಿದ ನಟ ಹಾಗೂ ಬಿಜೆಪಿ ಸಂಸದ ರವಿ ಕಿಶನ್ ಅವರ ವಿರುದ್ಧ ರಾಜ್ಯಸಭೆಯಲ್ಲಿ ಮಾತನಾಡಿದ ಸಮಾಜವಾದಿ ಪಕ್ಷದ ಸದಸ್ಯೆ ಜಯಾ ಬಚ್ಚನ್, ‘‘ಕೆಲವೇ ಜನರ ಕಾರಣದಿಂದಾಗಿ ನೀವು ಇಡೀ ಉದ್ಯಮವನ್ನು ಕೆಡಿಸಲು ಸಾಧ್ಯವಿಲ್ಲ...ಮನರಂಜನಾ ಕ್ಷೇತ್ರದ ಜನರನ್ನು ಸಾಮಾಜಿಕ ಜಾಲತಾಣಗಳಲ್ಲಿ ನಿಂದಸಲಾಗುತ್ತಿದೆ. ಈ ಕ್ಷೇತ್ರದಿಂದ ಹೆಸರು ಗಳಿಸಿದವರು ಅದನ್ನು ಗಟಾರ ಎಂದು ಕರೆದಿದ್ದಾರೆ. ಇದನ್ನು ನಾನು ಸ್ವಲ್ಪವೂ ಒಪ್ಪುವುದಿಲ್ಲ. ಇಂತಹ ಭಾಷೆ ಬಳಸದಂತೆ ಸರಕಾರ ಜನರಿಗೆ ಹೇಳಬೇಕು’’ಎಂದು ಪರೋಕ್ಷವಾಗಿ ನಟಿ ಕಂಗನಾ ರಣಾವತ್ ಅವರನ್ನು ಟೀಕಿಸಿದ್ದರು.

ಚಿತ್ರರಂಗವನ್ನು ಗಟಾರ ಎಂದು ಕರೆದಿದ್ದ ಕಂಗನಾ ಅಲ್ಲಿ ಕೆಲಸ ಮಾಡುವ ಶೇ.99ರಷ್ಟು ಮಂದಿ ಡ್ರಗ್ಸ್ ಬಳಸಿದ್ದಾರೆ ಎಂದು ಹೇಳಿದ್ದರು.

ಹೇಮಾಮಾಲಿನಿ -ಜಯಾ ಬಚ್ಚನ್ ರಾಜಕೀಯದಲ್ಲಿ ಪ್ರತಿ ಸ್ಪರ್ಧಿಗಳಾಗಿದ್ದರೂ ಜಯಾ ಅವರ ಭಾವನೆಯನ್ನು ಹೇಮಾಮಾಲಿನಿ ಬೆಂಬಲಿಸಿದ್ದಾರೆ.

‘‘ಜನರಿಗೆ ನಾನು ಹೇಳಬಯಸುತ್ತೇನೆ, ಬಾಲಿವುಡ್ ಸುಂದರವಾದ ಸ್ಥಳ, ಸೃಜನಶೀಲ ಜಗತ್ತು . ಇದು ಕಲೆ ಹಾಗೂ ಸಂಸ್ಕೃತಿಯ ಉದ್ಯಮವಾಗಿದೆ...ಜನರು ಇದರ ಬಗ್ಗೆ ಕೆಟ್ಟದಾಗಿ ಮಾತನಾಡುವುದನ್ನು, ಡ್ರಗ್ಸ್ ಔಷಧಗಳು ಹಾಗೂ ಅಂತಹ ವಿಷಯಗಳ ಬಗ್ಗೆ ಕೇಳಿದಾಗ ನನಗೆ ತುಂಬಾ ನೋವುಂಟಾಗುತ್ತದೆ. ಕಪ್ಪು ಕಲೆ ಇದ್ದರೆ ಅದನ್ನು ತೊಳೆಯಿರಿ. ಅದು ಹೋಗುತ್ತದೆ. ಬಾಲಿವುಡ್‌ನ ಕಲೆಯೂ ಹೋಗುತ್ತದೆ. ಚಿತ್ರೋದ್ಯಮ ಕಟ್ಟಲು ಅನೇಕ ಕಲಾವಿದರು ತುಂಬಾ ಶ್ರಮಿಸಿದ್ದರು. ಬಾಲಿವುಡ್ ಒಂದು ಭಾರತ. ಕೆಲವರು ನಮ್ಮ ಉದ್ಯಮವನ್ನು ಅಪಹಾಸ್ಯ ಮಾಡುವಾಗ ನಾನು ಅದನ್ನು ಸ್ವೀಕರಿಸಲು ಸಾಧ್ಯವಿಲ್ಲ’’ಎಂದು ಹೇಮಾ ಮಾಲಿನಿ ಹೇಳಿದ್ದಾರೆ.