ರಾಷ್ಟ್ರೀಯ ಭದ್ರತಾ ಕಾಯ್ದೆಯಡಿ 2 ವರ್ಷದಲ್ಲಿ 1,200 ಜನರ ಬಂಧನ

ಹೊಸದಿಲ್ಲಿ, ಸೆ.21: ರಾಷ್ಟ್ರೀಯ ಭದ್ರತಾ ಕಾಯ್ದೆ(ಎನ್‌ಎಸ್‌ಎ)ಯಡಿ 2017 ಮತ್ತು 2018ರಲ್ಲಿ ಪೊಲೀಸರು ಸುಮಾರು 1,200 ಜನರನ್ನು ಬಂಧಿಸಿದ್ದು ಇದರಲ್ಲಿ 563 ಮಂದಿ ಇನ್ನೂ ಪೊಲೀಸ್ ಕಸ್ಟಡಿಯಲ್ಲಿದ್ದಾರೆ ಎಂದು ಕೇಂದ್ರ ಸಹಾಯಕ ಗೃಹ ಸಚಿವ ಜಿ. ಕಿಶನ್ ರೆಡ್ಡಿ ಸೋಮವಾರ ರಾಜ್ಯಸಭೆಯಲ್ಲಿ ಹೇಳಿದ್ದಾರೆ. ನ್ಯಾಷನಲ್ ಕ್ರೈಮ್ ರೆಕಾರ್ಡ್ಸ್ ಬ್ಯೂರೊ(ಎನ್‌ಸಿಆರ್‌ಬಿ)ಯ 2018ರ ವರದಿಯನ್ನು ಉಲ್ಲೇಖಿಸಿ ಸಚಿವರು ಈ ಮಾಹಿತಿ ನೀಡಿದ್ದಾರೆ. 2017ರಲ್ಲಿ ಎನ್‌ಎಸ್‌ಎ ಕಾಯ್ದೆಯಡಿ ದೇಶದ ವಿವಿಧೆಡೆ 501 ಜನರ ಬಂಧನವಾಗಿದ್ದು ಪರಿಶೀಲನಾ ಸಮಿತಿಯ ಸೂಚನೆಯಂತೆ 229 ಜನರನ್ನು ಬಿಡುಗಡೆಗೊಳಿಸಲಾಗಿದೆ. 2018ರಲ್ಲಿ 697 ಜನರನ್ನು ಬಂಧಿಸಿದ್ದು ಇದರಲ್ಲಿ 406 ಜನರ ಬಿಡುಗಡೆಯಾಗಿದೆ. ಎನ್‌ಎಸ್‌ಎಯಡಿ ಅತೀ ಹೆಚ್ಚು ಬಂಧನ ಪ್ರಕರಣ ನಡೆದಿರುವ ರಾಜ್ಯಗಳಲ್ಲಿ ಮಧ್ಯಪ್ರದೇಶ ಅಗ್ರಸ್ಥಾನದಲ್ಲಿದ್ದರೆ ಉತ್ತರ ಪ್ರದೇಶ ಎರಡನೇ ಸ್ಥಾನದಲ್ಲಿದೆ. ಮಧ್ಯಪ್ರದೇಶದಲ್ಲಿ 2017 ಮತ್ತು 2018ರಲ್ಲಿ 795 ಜನರನ್ನು ಎನ್‌ಎಸ್‌ಎ ಕಾಯ್ದೆಯಡಿ ಬಂಧಿಸಿದ್ದರೆ, ಪರಿಶೀಲನಾ ಸಮಿತಿಯ ಸೂಚನೆಯಂತೆ 466 ಜನರನ್ನು ಬಿಡುಗಡೆಗೊಳಿಸಲಾಗಿದೆ. ಉತ್ತರಪ್ರದೇಶದಲ್ಲಿ 2017 ಮತ್ತು 18ರಲ್ಲಿ 338 ಜನರ ಬಂಧನವಾಗಿದ್ದು 150 ಜನರನ್ನು ಬಿಡುಗಡೆಗೊಳಿಸಲಾಗಿದೆ ಎಂದು ಸಚಿವರು ಹೇಳಿದ್ದಾರೆ.