ಸಂತೋಷ್ ಅಂದ್ರಾದೆ ಕಲಾ ಪ್ರದರ್ಶನ ಉದ್ಘಾಟನೆ

ಮಂಗಳೂರು, ನ.1: ನಗರದ ಕೊಡಿಯಲ್ ಗುತ್ತು ಸೆಂಟರ್ ಫಾರ್ ಮೀಡಿಯಾ, ಆರ್ಟ್ ಡಿಸೈನ್ ಕೇಂದ್ರದಲ್ಲಿ ಆಯೋಜಿಸಲಾದ ಮಂಗಳೂರು ಮೂಲದ ಕಲಾವಿದ ಸಂತೋಷ್ ಅಂದ್ರಾದೆ ಅವರ ವರ್ಣಚಿತ್ರಗಳ ಪ್ರದರ್ಶನವನ್ನು ಖ್ಯಾತ ವಾಸ್ತುಶಿಲ್ಪಿ ಶರತ್ ಪೂಂಜಾ ಉದ್ಘಾಟಿಸಿದರು.

ಆರ್ಟ್ ಕೆನರಾ ಟ್ರಸ್ಟ್ ಮತ್ತು ಇಂಟಾಚ್ (ಇಂಡಿಯನ್ ನ್ಯಾಷನಲ್ ಟ್ರಸ್ಟ್ ಫಾರ್ ಆರ್ಟ್ ಆ್ಯಂಡ್ ಕಲ್ಚರಲ್ ಹೆರಿಟೇಜ್) ಮಂಗಳೂರು ಅಧ್ಯಾಯದ ಸಹಯೋಗದೊಂದಿಗೆ ಆಯೋಜಿಸಲಾಗಿತ್ತು.

ಈ ಸಂದರ್ಭದಲ್ಲಿ ಮಾತನಾಡಿದ ಶರತ್ ಪೂಂಜಾ, ವರ್ಣಚಿತ್ರ ಕಲಾವಿದ ಸಂತೋಷ್ ಅಂದ್ರಾದೆ ಅವರ ಕೃತಿಗಳನ್ನು ಶ್ಲಾಘಿಸಿದರು.
ಸಂತೋಷ್ ಅಂದ್ರಾದೆ ಮಾತನಾಡಿ, ತಮ್ಮ ಕೃತಿಗಳ ರಚನೆಗೆ ಸ್ಫೂರ್ತಿಯಾದವುಗಳ ಬಗ್ಗೆ ವಿವರವಾಗಿ ಮಾಹಿತಿ ನೀಡಿದರು. ವಿಶೇಷವಾಗಿ ಮಂಗಳೂರಿನ ವಿಕಾಸಗೊಳ್ಳುತ್ತಿರುವ ನಗರ ಭೂದೃಶ್ಯಗಳನ್ನು ವಿವರಿಸಿದರು.

ಸಮಾರಂಭದಲ್ಲಿ ಇಂಟಾಚ್‌ನ ಮಂಗಳೂರು ಅಧ್ಯಾಯದ ಮುಖ್ಯಸ್ಥ ಸುಭಾಸ್ ಚಂದ್ರ ಬಸು ಅಧ್ಯಕ್ಷತೆ ವಹಿಸಿದ್ದರು.
ಕಾರ್ಯಕ್ರಮದಲ್ಲಿ ಕಲಾವಿದ ಮತ್ತು ಆರ್ಟ್ ಕೆನರಾ ಟ್ರಸ್ಟ್‌ನ ಟ್ರಸ್ಟಿ ಜನಾರ್ದನ ಹವಾಂಜೆ ಸ್ವಾಗತಿಸಿದರು. ಟ್ರಸ್ಟಿ ನೆಮಿರಾಜ್ ಶೆಟ್ಟಿ ವಂದಿಸಿದರು. ಪ್ರದರ್ಶನವು ನ.8ರವರೆಗೆ ಎಲ್ಲ ದಿನಗಳಲ್ಲಿ ಬೆಳಗ್ಗೆ 11ರಿಂದ ಸಂಜೆ 7ರವರೆಗೆ ವೀಕ್ಷಕರಿಗೆ ತೆರೆದಿರುತ್ತದೆ.

ಸಂತೋಷ್ ಅಂದ್ರಾದೆ ಅವರು ಪ್ರಸಕ್ತ ವರ್ಷದ ಒರಾ-ಮೊಜಾರ್ಟೊ ರಾಷ್ಟ್ರೀಯ ಕಲಾ ಸ್ಪರ್ಧೆಯ ವಿಜೇತ. ಪ್ರದರ್ಶನವು ಕ್ಯಾನ್ವಾಸ್, ಟೆರಾಕೋಟಾ ಮತ್ತು ಮರದ ಮೇಲೆ ಚಿತ್ರಿಸಿದ ಇತ್ತೀಚಿನ ಕೃತಿಗಳ ವಿಶಾಲ ಶ್ರೇಣಿಯನ್ನು ಪ್ರದರ್ಶಿಸುತ್ತದೆ. 40 ಕಲಾಕೃತಿಗಳನ್ನು ಪ್ರದರ್ಶನಕ್ಕಿಡಲಾಗಿದೆ.