ಕಾಬೂಲ್ ವಿವಿಯಲ್ಲಿ ಪುಸ್ತಕ ಮೇಳದ ಮೇಲೆ ಉಗ್ರರ ದಾಳಿ, 25 ಜನರ ಮೃತ್ಯು

ಕಾಬೂಲ್(ಅಫ್ಘಾನಿಸ್ತಾನ್),ನ.2: ದೇಶದ ಅತ್ಯಂತ ದೊಡ್ಡ ಶಿಕ್ಷಣ ಸಂಸ್ಥೆಯಾಗಿರುವ ಇಲ್ಲಿಯ ಕಾಬೂಲ್ ವಿವಿಯಲ್ಲಿ ಸೋಮವಾರ ಆಯೋಜಿಸಲಾಗಿದ್ದ ಪುಸ್ತಕ ಮೇಳದ ಮೇಲೆ ಉಗ್ರರು ದಾಳಿ ನಡೆಸಿದ್ದಾರೆ. ಭದ್ರತಾ ಪಡೆಗಳು ಮತ್ತು ಉಗ್ರರ ನಡುವೆ ಸುಮಾರು ಒಂದು ಗಂಟೆ ಕಾಲ ನಡೆದ ಗುಂಡಿನ ದಾಳಿಯಲ್ಲಿ ಕನಿಷ್ಠ 25 ಜನರು ಸಾವನ್ನಪ್ಪಿದ್ದಾರೆ ಮತ್ತು ಹಲವರು ಗಾಯಗೊಂಡಿದ್ದಾರೆ. ಅಫ್ಘಾನಿಸ್ತಾನಕ್ಕೆ ಇರಾನ್ ರಾಯಭಾರಿಯಾಗಿರುವ ಬಹದೂರ್ ಅಮಿನಿಯಾನ್ ಸೇರಿದಂತೆ ಹಲವಾರು ಗಣ್ಯರು ದಾಳಿ ಸಂದರ್ಭ ಪುಸ್ತಕ ಮೇಳದಲ್ಲಿ ಉಪಸ್ಥಿತರಿದ್ದರು.

ವಿವಿ ಕ್ಯಾಂಪಸ್‌ನಲ್ಲಿ ನಡೆದ ದಾಳಿ ಸಂದರ್ಭ ಮೃತರ ಸಂಖ್ಯೆಯನ್ನು ಆಂತರಿಕ ಸಚಿವಾಲಯದ ವಕ್ತಾರ ತಾರೀಖ್ ಆರಿಯಾನ್ ಅವರು ತಿಳಿಸಿಲ್ಲವಾದರೂ 20 ಜನರು ಮೃತಪಟ್ಟಿದ್ದಾರೆಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ. ದಾಳಿಯಲ್ಲಿ ಭಾಗಿಯಾಗಿದ್ದ ಎಲ್ಲ ಮೂವರು ಉಗ್ರರನ್ನು ಹೊಡೆದುರುಳಿಸಲಾಗಿದೆ ಎಂದು ಆರಿಯಾನ್ ತಿಳಿಸಿದರು.

ಸಂಜೆಯ ವೇಳೆಗೆ ದಾಳಿಯ ಕುರಿತು ಕೆಲವು ವಿವರಗಳು ಬಹಿರಂಗಗೊಂಡಿವೆ. ಇದೇ ವೇಳೆ ತಾನು ದಾಳಿಯಲ್ಲಿ ಭಾಗಿಯಾಗಿರುವುದನ್ನು ನಿರಾಕರಿಸಿ ತಾಲಿಬಾನ್ ಹೇಳಿಕೆಯೊಂದನ್ನು ಹೊರಡಿಸಿದೆ.

ಬಂಡುಕೋರರು ಅಮೆರಿಕ ಬೆಂಬಲಿತ ಅಫ್ಘಾನ್ ಸರಕಾರದೊಂದಿಗೆ ಮುಂದುವರಿಸಿರುವ ಶಾಂತಿ ಮಾತುಕತೆಗಳ ನಡುವೆಯೇ ಈ ದಾಳಿ ನಡೆದಿದೆ. ದೇಶದಲ್ಲಿ ಪ್ರತಿದಿನವೂ ರಕ್ತಪಾತ ಮುಂದುವರಿದಿದ್ದರೂ,ಇಸ್ಲಾಮಿಕ್ ಸ್ಟೇಟ್‌ಗೆ ನಿಷ್ಠ ಗುಂಪುಗಳು ಶಿಟ್ಟೆಗಳ ಮೇಲೆ ದಾಳಿಗಳನ್ನು ನಡೆಸುತ್ತಿದ್ದರೂ ಅಮೆರಿಕವು ತನ್ನ ಅತ್ಯಂತ ಸುದೀರ್ಘ ಯುದ್ಧದಿಂದ ಹಿಂದೆ ಸರಿಯಲು ನೆರವಾಗುವ ನಿಟ್ಟಿನಲ್ಲಿ ಮಾತುಕತೆಗಳು ಅರಬ್ ದೇಶ ಕತರ್‌ನಲ್ಲಿ ನಡೆಯುತ್ತಿವೆ.

ಗುಂಡಿನ ಕಾಳಗದ ಐದು ಗಂಟೆಗಳ ಬಳಿಕವೂ ವಿವಿಯ ಸುತ್ತಲಿನ ಖಾಲಿ ರಸ್ತೆಗಳಲ್ಲಿ ಗ್ರೆನೇಡ್ ಸ್ಫೋಟಗಳು ಮತ್ತು ಗುಂಡು ಹಾರಾಟದ ಶಬ್ದಗಳು ಆಗಾಗ್ಗೆ ಕೇಳಿಬರುತ್ತಲೇ ಇದ್ದವು. ಅಫ್ಘಾನ್ ಯೋಧರು ವಿವಿಗೆ ಸರ್ಪಗಾವಲು ಹಾಕಿದ್ದಾರೆ. ದಾಳಿಯ ಸಂದರ್ಭ ಹಲವಾರು ವಿದ್ಯಾರ್ಥಿಗಳು ಸ್ಥಳದಿಂದ ಪರಾರಿಯಾಗುವ ಮೂಲಕ ಪ್ರಾಣ ಉಳಿಸಿಕೊಂಡಿದ್ದಾರೆ.

ಪಿಸ್ತೂಲುಗಳು ಮತ್ತು ಕಲಾಶ್ನಿಕೋವ್ ಅಸಾಲ್ಟ್ ರೈಫಲ್‌ಗಳಿಂದ ಸಜ್ಜಿತರಾಗಿದ್ದ ಉಗ್ರರು ಗುಂಡುಗಳನ್ನು ಹಾರಿಸುತ್ತಿದ್ದನ್ನು ತಾನು ಕಂಡಿದ್ದಾಗಿ ವಿವಿಯ ವಿದ್ಯಾರ್ಥಿ ಅಹ್ಮದ್ ಸಮೀಮ್ ಸುದ್ದಿಗಾರರಿಗೆ ತಿಳಿಸಿದ. ದೇಶದ ಅತ್ಯಂತ ಹಳೆಯ ವಿವಿಯಾಗಿರುವ ಇಲ್ಲಿ ಸುಮಾರು 17,000 ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದಾರೆ.

ಪುಸ್ತಕ ಮೇಳದ ಬಗ್ಗೆ ಚರ್ಚಿಸಲು ಅಫ್ಘಾನ್ ಅಧಿಕಾರಿಗಳು ನಿರಾಕರಿಸಿದರು. ಅಮಿನಿಯನ್ ಮತ್ತು ರಾಯಭಾರಿ ಕಚೇರಿಯ ಸಾಂಸ್ಕೃತಿಕ ವಿಭಾಗದ ಮುಖ್ಯಸ್ಥ ಮೊಜ್ತಾಬಾ ನೂರೂಝಿ ಅವರು ಪುಸ್ತಕ ಮೇಳವನ್ನು ಉದ್ಘಾಟಿಸಲಿದ್ದಾರೆ. ಸುಮಾರು 40 ಇರಾನಿ ಪ್ರಕಾಶಕರೂ ಮೇಳದಲ್ಲಿ ಭಾಗವಹಿಸುತ್ತಿದ್ದಾರೆ ಎಂದು ಇರಾನಿನ ಅರೆಸರಕಾರಿ ಐಎಸ್‌ಎನ್‌ಎ ಸುದ್ದಿಸಂಸ್ಥೆಯು ರವಿವಾರ ವರದಿ ಮಾಡಿತ್ತು. ಇರಾನಿನ ಸರಕಾರಿ ಟಿವಿಯು ದಾಳಿಯ ಸುದ್ದಿಯನ್ನು ಪ್ರಸಾರಿಸಿದೆಯಾದರೂ ತನ್ನ ಅಧಿಕಾರಿಗಳ ಬಗ್ಗೆ ಯಾವುದೇ ಮಾಹಿತಿಗಳನ್ನು ನೀಡಿಲ್ಲ.

ಈ ಹಿಂದೆ ಅಫ್ಘಾನಿಸ್ತಾನದಲ್ಲಿ ಇರಾನಿ ರಾಜತಾಂತ್ರಿಕರನ್ನು ಗುರಿಯಾಗಿಸಿಕೊಂಡು ಹಲವಾರು ದಾಳಿಗಳು ನಡೆದಿದ್ದು,ಇದು ಉಭಯ ದೇಶಗಳ ನಡುವೆ ಹೆಚ್ಚುಕಡಿಮೆ ಯುದ್ಧ ಸ್ಥಿತಿಯನ್ನು ಹುಟ್ಟುಹಾಕಿತ್ತು. 1998ರಲ್ಲಿ ಉತ್ತರ ಅಪಘಾನಿಸ್ತಾನದ ತನ್ನ ಕಾನ್ಸುಲೇಟ್ ಕಚೇರಿಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಒಂಬತ್ತು ರಾಜತಾಂತ್ರಿಕರ ಸಾವುಗಳಿಗೆ ತಾಲಿಬಾನ್ ಹೊಣೆಯೆಂದು ಪ್ರತಿಪಾದಿಸಿದ್ದ ಇರಾನ್,ಉಭಯ ದೇಶಗಳ ನಡುವಿನ 950 ಕಿ.ಮೀ.ಉದ್ದದ ಗಡಿಗೆ ತನ್ನ ಸೇನೆಯನ್ನು ರವಾನಿಸಿತ್ತು.

ಇಂದಿನ ದಾಳಿಯ ಹೊಣೆಯನ್ನು ಯಾವುದೇ ಗುಂಪು ವಹಿಸಿಕೊಂಡಿಲ್ಲ,ಆದರೆ ಸಂಶಯದ ಮುಳ್ಳು ಇಸ್ಲಾಮಿಕ್ ಸ್ಟೇಟ್ ಗುಂಪಿನತ್ತ ನೆಟ್ಟಿದೆ.