ಸರಕಾರಿ ಬ್ಯಾಂಕುಗಳು ಸೇವಾಶುಲ್ಕಗಳನ್ನು ಹೆಚ್ಚಿಸಿಲ್ಲ:ವಿತ್ತ ಸಚಿವಾಲಯದ ಹೇಳಿಕೆ
ಹೊಸದಿಲ್ಲಿ,ನ.3: ಸಾರ್ವಜನಿಕ ಕ್ಷೇತ್ರದ ಬ್ಯಾಂಕು(ಪಿಎಸ್ಬಿ)ಗಳು ತಮ್ಮ ಸೇವಾಶುಲ್ಕಗಳಲ್ಲಿ ಯಾವುದೇ ಏರಿಕೆಯನ್ನು ಮಾಡಿಲ್ಲ ಎಂದು ಕೇಂದ್ರ ವಿತ್ತ ಸಚಿವಾಲಯವು ಮಂಗಳವಾರ ಸ್ಪಷ್ಟಪಡಿಸಿದೆ. ತನ್ಮಧ್ಯೆ ಖಾತೆಯೊಂದರಲ್ಲಿ ಪ್ರತಿ ತಿಂಗಳಿಗೆ ಉಚಿತ ನಗದು ಠೇವಣಿಗಳ ಸಂಖ್ಯೆಗೆ ಸಂಬಂಧಿಸಿದಂತೆ ತಾನು ಮಾಡಿದ್ದ ಬದಲಾವಣೆಗಳನ್ನು ಹಿಂದೆಗೆದುಕೊಳ್ಳಲು ಬ್ಯಾಂಕ್ ಆಫ್ ಬರೋಡಾ (ಬಿಒಬಿ) ನಿರ್ಧರಿಸಿದೆ.
ಬಿಒಬಿ ಪ್ರತಿ ತಿಂಗಳಿಗೆ ಖಾತೆಯಲ್ಲಿ ಉಚಿತ ಹಣ ಜಮಾವಣೆ ಮತ್ತು ಹಣ ಹಿಂದೆಗೆದುಕೊಳ್ಳುವಿಕೆಗೆ ಸಂಬಂಧಿಸಿದಂತೆ ನ.1ರಿಂದ ಜಾರಿಯಾಗುವಂತೆ ಕೆಲವು ಬದಲಾವಣೆಗಳನ್ನು ಮಾಡಿತ್ತು. ಉಚಿತ ಹಣ ಜಮಾವಣೆಯನ್ನು ತಿಂಗಳಿಗೆ ಐದು ಸಲಕ್ಕೆ ಮತ್ತು ಹಣ ಹಿಂಪಡೆಯುವುದನ್ನು ಮೂರು ಸಲಕ್ಕೆ ಇಳಿಸಲಾಗಿತ್ತು. ಈ ಉಚಿತ ವಹಿವಾಟುಗಳನ್ನು ಮೀರಿದ ವಹಿವಾಟುಗಳ ಮೇಲಿನ ಶುಲ್ಕಗಳಲ್ಲಿ ಬದಲಾವಣೆಗಳನ್ನು ಮಾಡಿರಲಿಲ್ಲ ಎಂದು ವಿತ್ತ ಸಚಿವಾಲಯವು ತಿಳಿಸಿದೆ.
ಪ್ರಸಕ್ತ ಕೋವಿಡ್-19 ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಬದಲಾವಣೆಗಳನ್ನು ಹಿಂದೆಗೆದುಕೊಳ್ಳಲು ತಾನು ನಿರ್ಧರಿಸಿರುವುದಾಗಿ ಬಿಒಬಿ ತಿಳಿಸಿದೆ. ಇತರ ಯಾವುದೇ ಸರಕಾರಿ ಬ್ಯಾಂಕು ಇತ್ತೀಚಿಗೆ ಇಂತಹ ಶುಲ್ಕಗಳನ್ನು ಹೆಚ್ಚಿಸಿಲ್ಲ ಎಂದೂ ಅದು ಹೇಳಿದೆ.
ಆರ್ಬಿಐ ಮಾರ್ಗಸೂಚಿಗಳಂತೆ ಪಿಎಸ್ಬಿಗಳು ಸೇರಿದಂತೆ ಎಲ್ಲ ಬ್ಯಾಂಕುಗಳು ತಮ್ಮ ಸೇವೆಗಳಿಗೆ ವೆಚ್ಚಕ್ಕನುಗುಣವಾಗಿ ನ್ಯಾಯಯುತ,ಪಾರದರ್ಶಕ ಮತ್ತು ತಾರತಮ್ಯರಹಿತ ಶುಲ್ಕಗಳನ್ನು ವಿಧಿಸಬಹುದಾಗಿದೆ. ಕೋವಿಡ್ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಸದ್ಯೋಭವಿಷ್ಯದಲ್ಲಿ ಬ್ಯಾಂಕ್ ಶುಲ್ಕಗಳನ್ನು ಹೆಚ್ಚಿಸುವ ಯಾವುದೇ ಉದ್ದೇಶವನ್ನು ತಾವು ಹೊಂದಿಲ್ಲ ಎಂದು ಇತರ ಪಿಎಸ್ಬಿಗಳೂ ತಿಳಿಸಿವೆ ಎಂದು ಸಚಿವಾಲಯವು ಹೇಳಿದೆ.
ಬ್ಯಾಂಕ್ ಶುಲ್ಕಗಳನ್ನು ಹೆಚ್ಚಿಸುವ ಕ್ರಮವನ್ನು ಪ್ರತಿಪಕ್ಷಗಳು ಪ್ರತಿಭಟಿಸಿದ್ದವು.
