ಪ್ಲಾಸ್ಟಿಕ್ ಮರುಬಳಕೆಯಿಂದ ಮನೆ ನಿರ್ಮಾಣ

ಮಂಗಳೂರು, ನ.8: ‘ಪ್ಲಾಸ್ಟಿಕ್ಸ್ ಫೋರ್ ಚೇಂಜ್ ಇಂಡಿಯಾ’ ಫೌಂಡೇಶನ್‌ನಿಂದ ಕರಾವಳಿ ತೀರದಲ್ಲಿ ಅನೌಪಚಾರಿಕ ತ್ಯಾಜ್ಯ ಸಂಗ್ರಹಕಾರರ ಜೀವನ ಮಟ್ಟ ಅಭಿವೃದ್ಧಿಪಡಿಸಲು ಮತ್ತು ಸುಧಾರಿಸಲು ಮುಂದೆ ಬಂದಿದೆ. ಪ್ಲಾಸ್ಟಿಕ್ ಮರುಬಳಕೆಯಿಂದ ಮನೆ ನಿರ್ಮಾಣ ಮಾಡಬಹುದಾದ ಯೋಜನೆಯನ್ನು ಫೌಂಡೇಶನ್ ಆರಂಭಿಸಿದೆ.

ಕರಾವಳಿ ತೀರದ ಪಚ್ಚನಾಡಿ ಮತ್ತು ಮಂಗಳೂರಿನ ಕುರಿಕಟ್ಟ ಪ್ರದೇಶಗಳಲ್ಲಿ ಯೋಜನೆ ರೂಪಿಸಲಾಗುತ್ತಿದೆ. ಸಮುದಾಯದ ಪ್ರೌಢ ಶಾಲಾ ವಿದ್ಯಾರ್ಥಿಗಳಿಗೆ ಆನ್‌ಲೈನ್ ತರಗತಿಗಳನ್ನು ಪ್ರಾರಂಭಿಸುತ್ತಿದೆ. ಪರಿಸರ ಸುಸ್ಥಿರತೆಯ ನಿಟ್ಟಿನಲ್ಲಿ ಪ್ಲಾಸ್ಟಿಕ್ ತ್ಯಾಜ್ಯವನ್ನು ಬಳಸಿ ಕಡಿಮೆ-ವೆಚ್ಚದ ಆಶ್ರಯ ಧಾಮವನ್ನಾಗಿ ಪರಿವರ್ತಿಸುವ ಬೃಹತ್ ಯೋಜನೆಯಾಗಿದೆ.

ಮರುಬಳಕೆಯ ಪ್ಲಾಸ್ಟಿಕ್‌ನ ಬೇಡಿಕೆ ಕುಸಿತವಾಗಿದೆ. ಇದು ಭಾರತದಂತಹ ದೇಶಗಳಲ್ಲಿ ಮರುಬಳಕೆ ವ್ಯವಸ್ಥೆಗಳ ಬೆನ್ನೆಲುಬಾಗಿರುವ ಅನೌಪ ಚಾರಿಕ ತ್ಯಾಜ್ಯ ಸಂಗ್ರಹಕಾರರ ಆದಾಯದ ಅವಕಾಶಗಳ ಮೇಲೆ ಬಹಳಷ್ಟು ಪರಿಣಾಮ ಬೀರಿದೆ. ಪ್ರತಿಷ್ಠಾನವು ನವೀನ ಮತ್ತು ಪರಿಸರ ಸುಸ್ಥಿರತಾ ಯೋಜನೆಯನ್ನು ಪ್ರಾರಂಭಿಸಿದೆ. ಇದು ಪ್ಲಾಸ್ಟಿಕ್ ತ್ಯಾಜ್ಯವನ್ನು ಮರುಬಳಕೆ ಮಾಡುವ ಕಟ್ಟಡ ಸಾಮಗ್ರಿಗಳಾಗಿ ಪರಿವರ್ತಿಸುತ್ತದೆ. ಇದನ್ನು ಅನೌಪಚಾರಿಕ ತ್ಯಾಜ್ಯ ಸಂಗ್ರಹಕಾರರಿಗೆ ಕಡಿಮೆ-ವೆಚ್ಚದ ಆಶ್ರಯಧಾಮವನ್ನು ನಿರ್ಮಿಸಲು ಬಳಸಬಹುದು.

ಪಚ್ಚನಾಡಿಯಲ್ಲಿ ಪ್ಲಾಸ್ಟಿಕ್ ತ್ಯಾಜ್ಯದಿಂದ ಮಾಡಿದ ಮೊದಲ ಮನೆ ಪೂರ್ಣಗೊಂಡ ನಂತರ ಯೋಜನೆಯ ಯಶಸ್ವಿಕೃತ ಮಾದರಿ/ಪೈಲಟ್ ತಯಾರಾಗಿರುತ್ತದೆ. ಪ್ಲಾಸ್ಟಿಕ್ ತ್ಯಾಜ್ಯವನ್ನು ಬಳಸಿಕೊಂಡು ಇಂತಹ ಅನೇಕ ಮನೆಗಳನ್ನು ನಿರ್ಮಿಸಲು ಈ ಯೋಜನೆಯನ್ನು ಉಳಿಸಿಕೊಳ್ಳಲು ಮತ್ತು ಬೆಳೆಸಲು ಫೌಂಡೇಶನ್ ಯೋಜಿಸಿದೆ. ಇದರಿಂದಾಗಿ ಈ ಸಮುದಾಯಗಳಿಗೆ ಆದಾಯದ ಅವಕಾಶಗಳನ್ನು ಸೃಷ್ಟಿಸುತ್ತದೆ. ಇದರಿಂದ ಪ್ಲಾಸ್ಟಿಕ್ ಮಾಲಿನ್ಯದ ಸಮಸ್ಯೆಯ ವಿರುದ್ಧ ಹೋರಾಡಿದಂತಾಗುತ್ತದೆ.

ಆರ್ಥಿಕ, ಸಾಮಾಜಿಕ, ಶಿಕ್ಷಣ, ಆರೋಗ್ಯ ರಕ್ಷಣೆ-ಪೋಷಣೆ, ತರಬೇತಿ ಮತ್ತು ಮಾಹಿತಿ ಕಾರ್ಯಾಗಾರ, ಮಹಿಳಾ ಸಶಕ್ತೀಕರಣ, ವಸ್ತುಗಳ ಮರುಬಳಕೆ ಮತ್ತು ತೀರಾ ಕಡಿಮೆ ವೆಚ್ಚದಲ್ಲಿ ಆಶ್ರಯದಾಮಗಳ ನಿರ್ಮಾಣಗಳು ಸಹಿತ ಹಲವು ಸೇವೆಗಳು ಈ ಯೋಜನೆಯ ಭಾಗವಾಗಿವೆ.

ತಂತ್ರಜ್ಞಾನವನ್ನು ಸಕಾರಾತ್ಮಕವಾಗಿ ಬಳಸಬಹುದು. ಕಡಿಮೆ ಮೌಲ್ಯದ ಪ್ಲಾಸ್ಟಿಕ್ ತ್ಯಾಜ್ಯವನ್ನು ಮನೆಗಳಾಗಿ ಪರಿವರ್ತಿಸಬಹುದು. ಮಂಗಳೂರಿನ ಸಮುದಾಯಗಳಿಗೆ ಆನ್‌ಲೈನ್ ಶಿಕ್ಷಣ ನೀಡಲು ಮುಂದಾಗಿದ್ದೇವೆ. ಹಲವು ಪರಿಹಾರಗಳನ್ನು ಸಕ್ರಿಯಗೊಳಿಸಲು ಸಂಸ್ಥೆ ಸನ್ನದ್ಧವಾಗಿದೆ ಎಂದು ಪ್ಲಾಸ್ಟಿಕ್ ಫಾರ್ ಚೇಂಜ್ ಇಂಡಿಯಾ ಫೌಂಡೇಶನ್‌ನ ಶಿಫ್ರಾ ಜೇಕಬ್ಸ್ ಪ್ರಕಟನೆಯಲ್ಲಿ ತಿಳಿಸಿದ್ದಾರೆ.