ಬಹುನಿರೀಕ್ಷಿತ ಥ್ರಿಲ್ಲರ್ ಚಿತ್ರ ‘ಅರಿಷಡ್ವರ್ಗ’ ನವೆಂಬರ್ 27ರಂದು ರಾಜ್ಯಾದ್ಯಂತ ಬಿಡುಗಡೆ

ಮಂಗಳೂರು, ನ.23: ಯುಟ್ಯೂಬ್ ನಲ್ಲಿ ಬಿಡುಗಡೆಯಾಗಿರುವ ಟ್ರೈಲರ್ ಮೂಲಕ ಭಾರೀ ಸದ್ದು ಮಾಡುತ್ತಿರುವ ಕನ್ನಡ ಚಿತ್ರ ‘ಅರಿಷಡ್ವರ್ಗ’ ನವೆಂಬರ್ 27ರಂದು ರಾಜ್ಯಾದ್ಯಂತ ಬಿಡುಗಡೆಯಾಗಲಿದೆ.

ಒಂದು ಕೊಲೆ, ಅದರ ಸುತ್ತ ನಡೆಯುವ ಕಥೆಯ ಥ್ರಿಲ್ಲರ್ ಅಂಶಗಳನ್ನೊಳಗೊಂಡ ‘ಕನಸು ಟಾಕೀಸ್’ನಿರ್ಮಾಣದ ಈ ಚಿತ್ರವನ್ನು ಅರವಿಂದ್ ಕಾಮತ್ ನಿರ್ದೇಶಿಸಿದ್ದಾರೆ.

ಹೆಣ್ಣಿನ ಲೈಂಗಿಕತೆಯನ್ನು ಗಂಭೀರವಾಗಿ ಮತ್ತು ಸಭ್ಯವಾಗಿ ಭಾರತೀಯ ಚಿತ್ರಗಳು ತೋರಿಸಿರುವುದು ತುಂಬಾ ಕಡಿಮೆ. ಇಂತಹ ತುಂಬಾ ಮುಖ್ಯ, ಆದರೆ ಸೂಕ್ಷ್ಮ ಎನಿಸುವ ವಿಷಯವನ್ನು ಮುಟ್ಟುವ ಧೈರ್ಯ ಮಾಡುವವರು ಕಡಿಮೆ. ಇಂತಹ ಗಂಭೀರ ವಿಷಯಕ್ಕೆ ಥ್ರಿಲ್ಲರ್ ಅಂಶಗಳನ್ನು ಸೇರಿಸಿ ಮಾಡಲಾದ ತರ್ಕ, ಉತ್ಕರ್ಷ, ಅಪರಿಚಿತ ಇಂತಹ ಒಳ್ಳೆಯ ಮರ್ಡರ್ ಮಿಸ್ಚರಿ ಚಿತ್ರಗಳು 90ರ ದಶಕದಲ್ಲಿ ಕೆಲವು ಬಂದಿವೆ. ಇದೇ ಸಾಲಿನಲ್ಲೇ  ನಿಲ್ಲುವ ಚಿತ್ರವಾಗಿದೆ ಅರಿಷಡ್ವರ್ಗ. ಮಾನವ ಸಂಬಂಧಗಳು, ಅವುಗಳ ಸುತ್ತ ಸುತ್ತುವ ಅರಿಷಡ್ವರ್ಗಗಳ ಕಥೆಯನ್ನು ಥ್ರಿಲ್ಲರ್ ರೂಪದಲ್ಲಿ ಈ ಚಿತ್ರ ನೀಡಿದೆ ಎಂದು ಚಿತ್ರ ತಂಡ ಹೇಳಿದೆ.

ನವೆಂಬರ್ 11ರಂದು ಯುಟ್ಯೂಬ್ ನಲ್ಲಿ ಬಿಡುಗಡೆಯಾಗಿರುವ ಚಿತ್ರದ ಟ್ರೇಲರ್ ಗೆ ಭಾರೀ ಮೆಚ್ಚುಗೆ ವ್ಯಕ್ತವಾಗಿದೆ. ಥ್ರಿಲ್ಲರ್ ಪ್ರಿಯರಿಗೆ ಹೇಳಿ ಮಾಡಿಸಿದ ಚಿತ್ರ ಎಂದು ವೀಕ್ಷಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಚಿತ್ರದಲ್ಲಿ ದೊಡ್ಡ ತಾರಾಗಣವಿದ್ದು, ಪ್ರಮುಖ ಪಾತ್ರದಲ್ಲಿ ಅವಿನಾಶ್, ನಂದಗೋಪಾಲ್, ಸಂಯುಕ್ತ ಹೊರನಾಡು, ಮಹೇಶ್ ಬಂಗ್, ಅಂಜು ಆಳ್ವ , ಗೋಪಾಲಕೃಷ್ಣ ದೇಶಪಾಂಡೆ, ಅರವಿಂದ್ ಕುಪ್ಲಿಕರ್ ಶ್ರೀಪತಿ ಮಂಜನ ಬೈಲು ಮೊದಲಾದವರು ನಟಿಸಿದ್ದಾರೆ.

ಉದಿತ್ ಹರಿದಾಸ್ ಚಿತ್ರಕ್ಕೆ ಸಂಗೀತ ನಿರ್ದೇಶನ ಮಾಡಿದ್ದು, ಬಾಲಾಜಿ ಮನೋಹರ್ ಛಾಯಾಗ್ರಾಹಕರಾಗಿದ್ದಾರೆ. ಬೆಂಗಳೂರಿನ ರಾಜಾಜಿನಗರದ ಪಿವಿಆರ್ ಓರಿಯನ್ ಮಾಲ್ ನಲ್ಲಿ ಮತ್ತು ಮಂಗಳೂರಿನಲ್ಲಿ ಭಾರತ್ ಸಿನೆಮಾಸ್ ನಲ್ಲಿ ನವೆಂಬರ್ 26ರಂದು ಚಿತ್ರದ ಪ್ರೀಮಿಯರ್ ಶೋ ಇರಲಿದೆ.