ಜನರ ಸಮಸ್ಯೆಗಳಿಗೆ ಐಕ್ಯ ಹೋರಾಟವೇ ಪರಿಹಾರ: ನ್ಯಾ.ನಾಗಮೋಹನ್ದಾಸ್
ರೈತ, ದಲಿತ, ಕಾರ್ಮಿಕ, ಜನವಿರೋಧಿ ಮಸೂದೆಗಳನ್ನು ಹಿಂಪಡೆಯಲು ಒತ್ತಾಯಿಸಿ ವಾಹನ ಜಾಥಾ ಸಮಾರೋಪ
ಮಂಗಳೂರು, ನ. 23: ಎಪಿಎಂಸಿ, ಭೂ ಮಸೂದೆ ಕಾಯ್ದೆಗೆ ತಿದ್ದುಪಡಿ ತರಲು ಮುಂದಾಗಿರುವ ಕೇಂದ್ರ ಸರಕಾರದ ನಡೆ ರೈತರಿಂದ ಭೂಮಿಯನ್ನು ಕಿತ್ತು ಕಾರ್ಪೊರೇಟ್ ಸಂಸ್ಥೆಗಳಿಗೆ ನೀಡುವುದಾಗಿದೆ. ಇದು ರೈತರನ್ನು ದಿವಾಳಿ ಮಾಡುವ ಹೆಜ್ಜೆಯಾಗಿದ್ದು, ಈ ಬಗ್ಗೆ ಸರಕಾರ ಎಚ್ಚೆತ್ತುಕೊಳ್ಳದಿದ್ದಾಗ ಜನಪರ ಐಕ್ಯ ಹೋರಾಟವೊಂದೇ ಪರಿಹಾರ ಎಂದು ಕರ್ನಾಟಕ ಉಚ್ಚ ನ್ಯಾಯಾಲಯದ ನಿವೃತ್ತ ನ್ಯಾಯಾಧೀಶ ಎಚ್.ಎನ್. ನಾಗಮೋಹನ್ದಾಸ್ ಅಭಿಪ್ರಾಯಿಸಿದ್ದಾರೆ.
ನಗರದ ಪುರಭವನದಲ್ಲಿ ಇಂದು ಅಖಿಲ ಭಾರತ ರೈತ ಸಂಘರ್ಷ ಸಮನ್ವಯ ಸಮಿತಿ, ರೈತ ದಲಿತ ಕಾರ್ಮಿಕ ಜನಪರ ಚಳವಳಿಗಳ ಒಕ್ಕೂಟದಿಂದ ಜಿಲ್ಲಾದ್ಯಂತ ಆಯೋಜಿಸಲಾಗಿದ್ದ ವಾಹನ ಜಾಥಾ ಹಾಗೂ ಬಹಿರಂಗ ಸಭೆಯ ಸಮಾರೋಪ ಸಮಾರಂಭವನ್ನು ಆನ್ಲೈನ್ ಮೂಲಕ ಉದ್ಘಾಟಿಸಿ ಅವರು ಮಾತನಾಡುತ್ತಿದ್ದರು. (ಸಭಾ ವೇದಿಕೆಯ ಎದುರು ಆನ್ಲೈನ್ ಮೂಲಕ ಎಚ್.ಎನ್.ನಾಗಮೋಹನ್ದಾಸ್ ಅವರ ನೇರ ಭಾಷಣವನ್ನು ಬೃಹತ್ ಪರದೆಯ ಮೂಲಕ ವೀಕ್ಷಣೆಗೆ ಅವಕಾಶ ಕಲ್ಪಿಸಲಾಗಿತ್ತು.)
ಕೊರೋನ ಸಂಕಷ್ಟದ ಹಿನ್ನೆಲೆಯಲ್ಲಿ ಕೇಂದ್ರ ಸರಕಾರ ಲಾಕ್ಡೌನ್ ಘೋಷಿಸಿದಾಗ ಅದು ಜನಸಾಮಾನ್ಯರ ಜೀವ ರಕ್ಷಣೆಗಾಗಿ ಮಾಡಿದ ಕ್ರಮ ಎಂದು ಎಲ್ಲರೂ ಸ್ವಾಗತಿಸಿದ್ದರು. ಆದರೆ ವಾಸ್ತವದಲ್ಲಿ ಲೌಕ್ಡೌನ್ ನೆಪದಲ್ಲಿ ಅಘೋಷಿತ ತುರ್ತು ಪರಿಸ್ಥಿತಿಯನ್ನು ಹೇರಿ ಯಾವುದೇ ಚರ್ಚೆ ಇಲ್ಲದೆ ರೈತ, ದಲಿತ ಹಾಗೂ ಕಾರ್ಮಿಕ ವಿರೋಧಿ ಸುಗ್ರೀವಾಜ್ಞೆಗಳ ಸರಮಾಲೆಯನ್ನೇ ಘೋಷಿಸಿತು ಎಂದು ಅವರು ಆರೋಪಿಸಿದರು.
1965ರಲ್ಲಿ ಹಸಿರು ಕ್ರಾಂತಿಯ ಪರಿಣಾಮ ದೇಶದಲ್ಲಿ ಆಹಾರ ಭದ್ರತೆಗೆ ಮುನ್ನುಡಿ ಹಾಕಲಾಯಿತು. ಇಂದು ದೇಶದಲ್ಲಿ 285 ಮಿಲಿಯ ಟನ್ ಆಹಾರ ಉತ್ಪಾದನೆಯ ಮೂಲಕ ಸ್ವಾವಲಂಬನೆ ಸಾಧ್ಯವಾಗಿದೆ. ಈ ನಡುವೆ ರಾಸಾಯನಿಕ ಬಳಕೆ ಹೆಚ್ಚುತ್ತಾ ಭೂಮಿ ಬರಡಾಗಿದೆ. ಬೀಜ ಖನಿಜ ಧ್ವಂಸ ಆಗಿದೆ. ಜೀವ ವೈವಿಧ್ಯ ಹಾಳಾಗಿದೆ. ಕುಡಿಯುವ ನೀರು ಕೂಡಾ ವಿಷಪೂರಿತವಾಗಿದೆ. ಕೃಷಿ ಉತ್ಪಾದನೆ ಹೆಚ್ಚಾಗಿದ್ದರೂ ರೈತರಿಗೆ ಪೂರಕ ಬೆಲೆ ಸಿಗುತ್ತಿಲ್ಲ. ಉತ್ಪಾದನೆಗಿಂತ ಕಡಿಮೆ ಬೆಲೆಗೆ ರೈತ ತನ್ನ ಬೆಳೆೆಯನ್ನು ಮಾರಾಟ ಮಾಡಬೇಕಿದೆ. ದೇಶದಲ್ಲಿ 3 ಲಕ್ಷಕ್ಕೂ ಅಧಿಕ ರೈತರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ ಸರಕಾರ ಹೊಸ ಕಾಯ್ದೆಗಳನ್ನು ತರುವುದು, ಹಳೆ ಕಾಯ್ದೆಗಳಿಗೆ ತಿದ್ದುಪಡಿ ತರುವ ಕೆಲಸದಿಂದ ರೈತರಿಂದ ಕೃಷಿ ಮಾತ್ರವಲ್ಲದೆ, ಭೂಮಿಯನ್ನೇ ಕಾರ್ಪೊರೇಟ್ ಸಂಸ್ಥೆಗಳಿಗೆ ನೀಡುವ ಹುನ್ನಾರ ಇದಾಗಿದೆ. ಇಂತಹ ವ್ಯವಸ್ಥೆಯಲ್ಲಿ ದೇಶದ ಆಹಾರ ಭದ್ರತೆಯನ್ನು ಕಾಯ್ದುಕೊಳ್ಳಲು ಸಾಧ್ಯವಾಗದು ಎಂದವರು ಆತಂಕ ವ್ಯಕ್ತಪಡಿಸಿದರು.
ಕಾರ್ಪೊರೇಟ್ ಸಂಸ್ಥೆಗಳು ಮಾಡುವ ಕೃಷಿ ಹೈಟೆಕ್ ಆಗಿದ್ದು ತಂತ್ರಜ್ಞಾನ ಬಳಸಿ ಮಾಡುವುದರಿಂದ ಉದ್ಯೋಗ ಸೃಷ್ಟಿ ಅಸಾಧ್ಯ. ಸಾಮಾನ್ಯ ಜನರು ಕೂಡಾ ದುಬಾರಿ ಜೀವನ ನಡೆಸುವ ಕಾಲಕ್ಕೆ ಇದು ಎಡೆ ಮಾಡಿಕೊಡಲಿದೆ. ರೈತರ ಜತೆಗೆ ಮಾರುಕಟ್ಟೆಯೂ ದಿವಾಳಿಯಾಗಲಿದು, ಕೈಗಾರಿಕೆಗಳ ಮೇಲೂ ಪರಿಣಾಮ ಬೀಳಲಿದೆ. ಈ ಬಗ್ಗೆ ಸರಕಾರ ಎಚ್ಚೆತ್ತುಕೊಳ್ಳಬೇಕು. ಸರಕಾರ ತನ್ನ ಕರ್ತವ್ಯ ಮರೆತಾಗ ಅದನ್ನು ಎಚ್ಚರಿಸುವ ಕಾರ್ಯವನ್ನು ಜನಪರ ಐಕ್ಯ ಚಳವಳಿಯ ಮೂಲಕ ಮಾಡಬೇಕಿದೆ. ಆ ಕಾರ್ಯ ದ.ಕ. ಜಿಲ್ಲೆಯಿಂದ ನಡೆದಿರುವುದು ಉತ್ತಮ ಬೆಳವಣಿಗೆ ಎಂದು ಅವರು ಹೇಳಿದರು.
ರಾಜ್ಯ ಕೃಷಿ ಬೆಲೆ ಆಯೋಗದ ಮಾಜಿ ಅಧ್ಯಕ್ಷ ಪ್ರಕಾಶ್ ಕಮ್ಮರಡಿ ಮಾತನಾಡಿ, ಕೋವಿಡ್ ಸಂಕಷ್ಟಮಯ ಸಮಯದಲ್ಲಿ ಕೈಗಾರಿಕೆಗಳೆಲ್ಲವೂ ಸ್ತಬ್ಧವಾಗಿ, ಕಾರ್ಪೊರೇಟ್ ಸಂಸ್ಥೆಗಳವರು ಮನೆಯಲ್ಲೇ ಉಳಿದರೂ ರೈತರು ಮಾತ್ರ ಕೃಷಿಯಿಂದ ವಿಮುಖವಾಗಿಲ್ಲ. ಅಂಕಿಅಂಶಗಳ ಸಂಗ್ರಹದ ಪ್ರಕಾರ 2019-20ರ ಅವಧಿಯಲ್ಲಿ 296 ಮಿಲಿಯ ಟನ್ ಆಹಾರ ಉತ್ಪಾದನೆಯಾಗಿದೆ. 320 ಮಿಲಿಯ ಟನ್ ಹಣ್ಣು ತರಕಾರಿ ಉತ್ಪಾದನೆಯಾಗಿದೆ. 187 ಮಿಲಿಯ ಟನ್ ಹಾಲು ಉತ್ಪಾದನೆಯಾಗಿದೆ. ಕೋವಿಡ್ ಅವಧಿಯಲ್ಲಿ ದೇಶದ ಜನತೆ ಶೇ. 10ರಷ್ಟು ಹೆಚ್ಚು ಕೃಷಿಗೆ ತಮ್ಮನ್ನು ಒಳಪಡಿಸಿದ್ದಾರೆ. ಕರ್ನಾಟಕ ರಾಜ್ಯದಲ್ಲಿ 60 ವಿದ್ಯಾರ್ಥಿಗಳು, 2 ಸಾಫ್ಟ್ವೇರ್ ಕಂಪೆನಿಗಳನ್ನು ಬಳಸಿ ಸಂಗ್ರಹಿಸಿದ ಅಂಕಿಅಂಶಗಳ ಪ್ರಕಾರ ರೈತರು ಬೆಳೆದ, ಉತ್ಪಾದಿಸಿದ ಆಹಾರ ಉತ್ಪಾದನೆಯಲ್ಲಿ ಸರಕಾರದಿಂದ ಖರೀದಿಯಾಗಿದ್ದು ಶೇ.16ರಷ್ಟು ಮಾತ್ರ. ಶೇ.15ರಷ್ಟು ಹಣ್ಣು ತರಕಾರಿಗಳು ಈ ಅವಧಿಯಲ್ಲಿ ಕೊಳೆತು ಹಾಳಾಗಿವೆ ಎಂದು ಮಾಹಿತಿ ನೀಡಿದರು.
ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ, ಕರ್ನಾಟಕ ಪ್ರಾಂತ ರೈತ ಸಂಘ, ಸಿಐಟಿಯು, ಎಐಟಿಯುಸಿ, ದಲಿತ ಸಂಘರ್ಷ ಸಮಿತಿ (ಅಂಬೇಡ್ಕರ್ವಾದ), ದಲಿತ ಸಂಘರ್ಷ ಸಮಿತಿ (ಪ್ರೊ. ಬಿ. ಕೃಷ್ಣಪ್ಪ ಸ್ಥಾಪಿತ), ದಲಿತ ಸೇವಾ ಸಮಿತಿ, ದಲಿತ ಹಕ್ಕುಗಳ ಸಮಿತಿಗಳ ನೇತೃತ್ವದಲ್ಲಿ ನ.18ರಂದು ಸುಳ್ಯದ ಕಲ್ಲುಗುಂಡಿಯಲ್ಲಿ ಈ ವಾಹನ ಜಾಥಾ ಉದ್ಘಾಟನೆಗೊಂಡಿತ್ತು. ಜಾಥಾವು ಜಿಲ್ಲೆಯ ವಿವಿಧ ಕಡೆಗಳಿಗೆ ಸಾಗಿ 23 ಕಡೆಗಳಲ್ಲಿ ಬಹಿರಂಗ ಜಾಥಾಗಳನ್ನು ನಡೆಸಿ ಮಂಗಳೂರು ಪ್ರವೇಶಿಸಿತ್ತು. ಜಾಥಾದ ಅಂಗವಾಗಿ ಇಂದು ಬೆಳಗ್ಗೆ ನಗರದ ಅಂಬೇಡ್ಕರ್ ವೃತ್ತದಿಂದ ಮಂಗಳೂರು ಪುರಭವನದವರೆಗೆ ಪಾದಯಾತ್ರೆ ನಡೆಯಿತು. ಕೇಂದ್ರ ಮತ್ತು ರಾಜ್ಯ ಸರಕಾರಗಳು ರೈತ, ದಲಿತ, ಕಾರ್ಮಿಕ ಹಾಗೂ ಜನವಿರೋಧಿ ಮಸೂದೆಗಳನ್ನು ಜಾರಿಗೊಳಿಸುತ್ತಿದ್ದು, ಇದನ್ನು ಹಿಂಪಡೆಯಬೇಕೆಂದು ಒತ್ತಾಯಿಸಿ ಈ ಜಾಥಾ ಆಯೋಜಿಸಲಾಗಿತ್ತು.
ವೇದಿಕೆಯಲ್ಲಿ ಸಿಐಟಿಯು ರಾಜ್ಯ ಉಪಾಧ್ಯಕ್ಷ ವಸಂತ್ ಆಚಾರ್, ಸಿಐಟಿಯು ದ.ಕ. ಜಿಲ್ಲಾ ಸಮಿತಿ ಅಧ್ಯಕ್ಷ ಬಾಲಕೃಷ್ಣ ಶೆಟ್ಟಿ, ದಲಿತ ಸಂಘಟನೆಗಳ ಮುಖಂಡರಾದ ದೇವದಾಸ್, ಶೇಷಪ್ಪ ಬೆದ್ರಕಾಡು, ವಿವಿಧ ಸಂಘಟನೆಗಳ ಪ್ರಮುಖರಾದ ತಿಮ್ಮಯ್ಯ ಕೊಂಚಾಡಿ, ಸುರೇಶ್ ಭಟ್ ಕೊಜಂಬೆ, ಶ್ರೀಧರ್ ಶೆಟ್ಟಿ ಬೈಲಗುತ್ತು, ಮನೋಹರ್ ಶೆಟ್ಟಿ, ಧನಕೀರ್ತಿ ಬಲಿಪ, ರೂಪೇಶ್ ರೈ, ಆಲ್ವಿನ್ ಮಿನೇಜಸ್, ಎಚ್.ವಿ. ರಾವ್ ಉಪಸ್ಥಿತರಿದ್ದರು.
ಸುನೀಲ್ ಕುಮಾರ್ ಬಜಾಲ್ ಕಾರ್ಯಕ್ರಮ ನಿರೂಪಿಸಿದರು. ಕೃಷ್ಣಪ್ಪ ಸಾಲ್ಯಾನ್ ಸ್ವಾಗತಿಸಿದರು. ರೈತ ಮುಖಂಡ ರವಿಕಿರಣ ಪುಣಚ ಪ್ರಾಸ್ತಾವಿಕವಾಗಿ ಮಾತನಾಡಿದರು.
ಕೃಷಿ ತಜ್ಞ ಸ್ವಾಮಿನಾಥನ್ 2004-06ರ ಅವಧಿಯಲ್ಲಿ ನೀಡಿರುವ ವರದಿ ಪಾರ್ಲಿಮೆಂಟ್ ಮುಂದಿದೆ. ಅದರಲ್ಲಿರುವ ಉತ್ತಮ ಸಲಹೆಗಳನು ಸಂಸತ್ತಿನಲ್ಲಿ ಮಂಡಿಸಿ ಅನುಷ್ಠಾನಕ್ಕೆ ತರಬೇಕಿದೆ. ಕೃಷಿ ಉತ್ಪಾದನೆಗೆ ನ್ಯಾಯಯುತ ಬೆಲೆ ನೀಡಬೇಕು. ಮೂಲಭೂತ ಸೌಕರ್ಯಗಳನ್ನು ಅಭಿವೃದ್ಧಿಪಡಿಸಬೇಕು. ಕೃಷಿ ಸಂಬಂಧಿತ ಕೈಗಾರಿಕೆಗಳು ಬರಬೇಕು. ಅತಿವೃಷ್ಟಿ, ಅನಾವೃಷ್ಟಿ ಸಂದರ್ಭ ಬೆಳೆ ನಾಶ ಆದಾಗ ವಿಮಾ ಪರಿಹಾರ ದೊರೆಯಬೇಕು. ಸರಕಾರ ಇಂತಹ ಕ್ರಮಗಳ ಮೂಲಕ ರೈತರ ಹಿತ ಕಾಯಬೇಕು.
-ಎಚ್.ಎನ್. ನಾಗಮೋಹನ್ದಾಸ್, ನಿವೃತ್ತ ನ್ಯಾಯಾಧೀಶರು, ಕರ್ನಾಟಕ ಉಚ್ಚ ನ್ಯಾಯಾಲಯ.
