ದಲಿತ ಚಳವಳಿ ಮರು ಕಟ್ಟಬೇಕಾದ ಅಗತ್ಯವಿದೆ: ಎಲ್.ಹನುಮಂತಯ್ಯ

ಬೆಂಗಳೂರು, ನ.23: ರಾಜ್ಯಾದ್ಯಂತ ಚದುರಿ ಹೋಗಿರುವ ಎಲ್ಲ ದಲಿತ ಸಂಘಟನೆಗಳು ಹಳೆಯದ್ದನ್ನೆಲ್ಲಾ ಮರೆತು ಎಲ್ಲರೂ ಒಟ್ಟಾಗಿ ದಲಿತ ಚಳವಳಿಯನ್ನು ಮರು ಕಟ್ಟಬೇಕಾದ ಅಗತ್ಯವಿದೆ ಎಂದು ರಾಜ್ಯಸಭಾ ಸದಸ್ಯ ಹಾಗೂ ಸಾಹಿತಿ ಎಲ್.ಹನುಮಂತಯ್ಯ ಅಭಿಪ್ರಾಯಿಸಿದ್ದಾರೆ.

ಸೋಮವಾರ ನಗರದ ಗಾಂಧೀ ಭವನದಲ್ಲಿ ಕರ್ನಾಟಕ ದಲಿತ ಸಂಘಟನೆಗಳ ಒಕ್ಕೂಟ ಹಾಗೂ ಪ್ರೊ.ಬಿ.ಕೃಷ್ಣಪ್ಪ ಟ್ರಸ್ಟ್ ವತಿಯಿಂದ ಆಯೋಜಿಸಿದ್ದ ದಲಿತ ಚಳವಳಿಯ ಸಂಘಟಕ ಎಂ.ಜಯಣ್ಣ ಅವರಿಗೆ ಶ್ರದ್ಧಾಂಜಲಿ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು.

ಅತ್ಯಂತ ಸಂಕಷ್ಟದ ಸಮಯದಲ್ಲಿ 1980-85 ದಶಕದಲ್ಲಿ ದಲಿತ ಚಳವಳಿಯನ್ನು ಕಟ್ಟಲಾಗಿದೆ. ದಲಿತ ನಾಯಕರು ಮನೆ, ಕುಟುಂಬ ಹಾಗೂ ಸಂಬಂಧಗಳು ಎಲ್ಲವನ್ನೂ ತೊರೆದು ಇಡೀ ಜೀವನವನ್ನು ಚಳವಳಿಗೆ ಮೀಸಲಿಟ್ಟಿದ್ದಾರೆ. ಸರಿಯಾದ ನಿದ್ರೆ, ಆಹಾರವಿಲ್ಲದೇ ಬಳಲಿದ್ದಾರೆ. ಆದರೆ, ಇಂದಿನ ಚಳವಳಿಗಾರರಿಗೆ ಅನೇಕ ಸೌಕರ್ಯಗಳಿದ್ದರೂ, ದಲಿತ ಚಳವಳಿ ಒಡೆದು ಹೋಗಿರುವುದು ದುರಂತ. ಹೀಗಾಗಿ, ಒಡೆದು ಹೋಗಿರುವ ಇಡೀ ದಲಿತ ಚಳವಳಿಯನ್ನು ಮತ್ತೆ ಕಟ್ಟಬೇಕಿದೆ ಎಂದು ಸಲಹೆ ನೀಡಿದರು.

ಹಿಂದಿನ ಕಾಲಘಟ್ಟದಲ್ಲಿ ಚಳವಳಿಗಾರರು ಸಿದ್ಧಾಂತಗಳಿಗೆ ಬದ್ಧರಾಗಿದ್ದರು. ಅದಕ್ಕಾಗಿ ಎಂತಹ ಕಠಿಣ ನಿರ್ಧಾರಗಳನ್ನು ಕೈಗೊಳ್ಳಲು ಹಿಂದೆ-ಮುಂದೆ ನೋಡುತ್ತಿರಲಿಲ್ಲ ಎಂದ ಅವರು, ಅಂದಿನ ಸಂದರ್ಭದಲ್ಲಿ ರೈತ ಮತ್ತು ದಲಿತ ಚಳವಳಿ ಜತೆ ಜತೆಯಾಗಿ ನಡೆದಿದ್ದರೆ, ಕರ್ನಾಟಕದಲ್ಲಿ ಪರ್ಯಾಯ ಸರಕಾರವಿರುತ್ತಿತ್ತು. ಈ ಹಿನ್ನೆಲೆಯಲ್ಲಿ ಇದೀಗ ಎಲ್ಲರೂ ಕೂಡಿ ಪರ್ಯಾಯ ಚಳವಳಿಯನ್ನು ಕಟ್ಟುವ ಕಡೆಗೆ ಸಾಗಬೇಕಿದೆ ಎಂದು ನುಡಿದರು.

ಚಿತ್ರದುರ್ಗದವರಾದ ಜಯಣ್ಣ ಎಲ್ಲ ವರ್ಗದ, ಜಾತಿಯ ಜನರನ್ನು ಒಗ್ಗೂಡಿಸುವ ಕೆಲಸ ಮಾಡಿದ್ದಾರೆ. ದಲಿತರನ್ನು ಕಂಡರೆ, ದಲಿತ ನಾಯಕತ್ವವನ್ನು ಕಂಡರೆ ಸಹಿಸದವರ ನಡುವೆಯೂ ಸಮರ್ಥ ನಾಯಕರಾಗಿ ಬೆಳೆದಿದ್ದರು. ಇಂದು ದಲಿತರು ಚಳವಳಿಯ ನಾಯಕತ್ವ ವಹಿಸಿಕೊಳ್ಳುತ್ತಾರೆ ಎಂದರೆ ದಲಿತೇತರರು ಅಲ್ಲ, ದಲಿತರೊಳಗಿಂದಲೇ ಅಪಸ್ವರ ಕೇಳಿಬರುತ್ತದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಮಾಜಿ ಸಚಿವ ಎಚ್.ಆಂಜನೇಯ ಮಾತನಾಡಿ, ನಮ್ಮ ಸಮುದಾಯ ಶ್ರೇಯಸ್ಸಿಗಾಗಿ ಜನ ಚಳವಳಿಗೆ ಬರುತ್ತಿರುವ ಅನೇಕ ನಾಯಕರು ತಮ್ಮ ಪೂರ್ತಿ ಆಯಸ್ಸನ್ನು ಪೂರ್ಣಗೊಳಿಸಲಾಗುತ್ತಿಲ್ಲ. ಸರಿಯಾದ ಆಹಾರ, ನಿದ್ರೆಯಿಲ್ಲದೇ ಸಮಾಜಕ್ಕಾಗಿ ದುಡಿಯುವವರು ತಮ್ಮ ಬಗ್ಗೆ ಏನನ್ನು ಚಿಂತಿಸುತ್ತಿಲ್ಲ ಎಂದು ಹೇಳಿದರು.

ದೇಶದಲ್ಲಿ ಸ್ವಾತಂತ್ರ್ಯ ಬಂದು 70 ವರ್ಷಗಳು ಕಳೆಯುತ್ತಿದ್ದರೂ ಇಂದಿಗೂ ಅಸಮಾನತೆ, ಅಸ್ಪೃಶ್ಯತೆ, ಸಾಮಾಜಿಕ ಬಹಿಷ್ಕಾರ ಅಂತಹ ಅಮಾನುಷ ಪದ್ಧತಿಗಳು ಜೀವಂತವಾಗಿದೆ. ಅಧಿಕಾರ ಪಡೆಯುತ್ತಿರುವ ರಾಜಕಾರಣಿಗಳು ಮೇಲ್ವರ್ಗದವರನ್ನು ಎದುರು ಹಾಕಿಕೊಳ್ಳಲು ಮುಂದಾಗುತ್ತಿಲ್ಲ ಎಂದ ಅವರು, ನಾನು ಉಳ್ಳವರು, ಮೇಲ್ವರ್ಗದವರನ್ನು ಎದುರು ಹಾಕಿಕೊಂಡಿದ್ದಕ್ಕೆ ನಾಲ್ಕು ಬಾರಿ ಚುನಾವಣೆಯಲ್ಲಿ ಸೋತಿದ್ದೇನೆ ಎಂದು ನುಡಿದರು.

ಕಾರ್ಯಕ್ರಮದಲ್ಲಿ ದಲಿತ ಸಂಘಟನೆಯ ಮುಖಂಡರಾದ ಮೋಹನ್‍ರಾಜು, ಮಾವಳ್ಳಿ ಶಂಕರ್, ವಿ.ನಾಗರಾಜು, ಪ್ರೊ.ಬಿ.ಕೃಷ್ಣಪ್ಪ ಟ್ರಸ್ಟ್‍ನ ಟ್ರಸ್ಟಿ ರುದ್ರಪ್ಪ ಹನಗವಾಡಿ, ಕಲಾವಿದ ಸಿ.ಚಂದ್ರಶೇಖರ್, ದಲಿತ ಸಂಘಟನೆಗಳ ಒಕ್ಕೂಟದ ಸಂಚಾಲಕ ಗುರುಪ್ರಸಾದ್ ಕೆರೆಗೋಡು ಸೇರಿದಂತೆ ಮತ್ತಿತರರಿದ್ದರು.