ಆ್ಯಸ್ಟ್ರಾಝೆನೆಕ ಕೊರೋನ ಲಸಿಕೆಯ ಪರಿಣಾಮದ ಬಗ್ಗೆ ಗೊಂದಲ!

ಲಂಡನ್, ನ. 27: ಬ್ರಿಟನ್‌ನ ಆ್ಯಸ್ಟ್ರಾಝೆನೆಕ ಕಂಪೆನಿಯ ಕೋವಿಡ್-19 ಲಸಿಕೆ ಎಷ್ಟು ಪರಿಣಾಮಕಾರಿ ಎಂಬ ಬಗ್ಗೆ ಅನಿಶ್ಚಿತತೆಗಳು ಉಂಟಾಗಿರುವ ಹಿನ್ನೆಲೆಯಲ್ಲಿ, ಹೊಸದಾಗಿ ಜಾಗತಿಕ ಪರೀಕ್ಷೆಗಳನ್ನು ನಡೆಸಲು ಕಂಪೆನಿಯು ಮುಂದಾಗಿದೆ. ಈಗ ನಡೆಯುತ್ತಿರುವ ಪರೀಕ್ಷೆಯ ಒಂದು ಹಂತದಲ್ಲಿ ಲಸಿಕೆ ತೋರಿಸಿದೆಯೆನ್ನಲಾದ 90 ಶೇಕಡ ಪರಿಣಾಮವನ್ನು ಸಾಬೀತು ಪಡಿಸುವುದಕ್ಕಾಗಿ ಹೊಸ ಪರೀಕ್ಷೆಯೊಂದನ್ನು ನಡೆಸಲು ಕಂಪೆನಿ ಬಯಸಿದೆ ಎಂದು ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಪ್ಯಾಸ್ಕಲ್ ಸೋರಿಯಟ್ ಹೇಳಿದ್ದಾರೆ.

 ಹೆಚ್ಚು ಪರಿಣಾಮಕಾರಿ ಎಂಬುದಾಗಿ ಕಂಡುಬಂದ ಕಡಿಮೆ ಡೋಸ್‌ನ ಲಸಿಕೆಯು ಉತ್ಪಾದನಾ ದೋಷದೊಂದಿಗೆ ತಯಾರಾಗಿದೆ ಎನ್ನುವುದನ್ನು ಕಂಪೆನಿ ಒಪ್ಪಿಕೊಂಡ ಬಳಿಕ ಲಸಿಕೆಯ ಬಗ್ಗೆ ಪ್ರಶ್ನೆಗಳು ಎದ್ದಿವೆ. ಕಂಪೆನಿ ಮತ್ತು ಅದರ ಪಾಲುದಾರ ಆಕ್ಸ್‌ಫರ್ಡ್ ವಿಶ್ವವಿದ್ಯಾನಿಲಯವು ಆರಂಭದಲ್ಲಿ ಈ ತಪ್ಪನ್ನು ಹಾಗೂ ಅದರ ಪ್ರಮುಖ ವಿವರಗಳನ್ನು ಬಹಿರಂಗಪಡಿಸಿರಲಿಲ್ಲ.

‘‘ಈಗ, ಉತ್ಪಾದನಾ ದೋಷದೊಂದಿಗೆ ತಯಾರಾದ ಲಸಿಕೆಯು ಹೆಚ್ಚು ಪರಿಣಾಮವನ್ನು ತೋರಿಸಿರುವುದರಿಂದ, ನಾವು ಅದನ್ನು (ಉತ್ಪಾದನಾ ದೋಷವನ್ನು) ಒಪ್ಪಿಕೊಳ್ಳಬೇಕಾಗಿದೆ. ಹಾಗಾಗಿ, ನಾವೀಗ ಇನ್ನೊಂದು ಸುತ್ತಿನ ಪರೀಕ್ಷೆಯನ್ನು ನಡೆಸಬೇಕಾಗಿದೆ’’ ಎಂದು ಲಸಿಕೆಯ ಪ್ರಾಯೋಗಿಕ ಪರೀಕ್ಷೆಯ ಅಂಕಿಅಂಶಗಳು ಬಿಡುಗಡೆಗೊಂಡ ಬಳಿಕ ನೀಡಿದ ಮೊದಲ ಸಂದರ್ಶನದಲ್ಲಿ ಸೋರಿಯಟ್ ಹೇಳಿದರು.

‘‘ನೂತನ ಪರೀಕ್ಷೆಯು ಇನ್ನೊಂದು ಅಂತರ್‌ರಾಷ್ಟ್ರೀಯ ಮಟ್ಟದ ಅಧ್ಯಯನವಾಗಿರಬಹುದು. ಆದರೆ ಹೊಸ ಪರೀಕ್ಷೆಯು ಬೇಗನೇ ಮುಗಿಯಬಹುದು, ಯಾಕೆಂದರೆ ಅದರ ಪರಿಣಾಮ ಗರಿಷ್ಠವಾಗಿದೆ ಎನ್ನುವುದು ನಮಗೆ ಗೊತ್ತಿದೆ. ಹಾಗಾಗಿ, ನಾವು ಸಣ್ಣ ಪ್ರಮಾಣದ ರೋಗಿಗಳ ಮೇಲೆ ಈ ಪ್ರಯೋಗವನ್ನು ಮಾಡುತ್ತೇವೆ’’ ಎಂದು ಅವರು ನುಡಿದರು.

ಕಡಿಮೆ ಪ್ರಮಾಣದ ಲಸಿಕೆಯನ್ನೊಳಗೊಂಡ ಆರಂಭಿಕ ಡೋಸ್ ಮತ್ತು ಪೂರ್ಣ ಪ್ರಮಾಣದ ಲಸಿಕೆಯನ್ನೊಳಗೊಂಡ ಇನ್ನೊಂದು ಡೋಸ್, ಪರೀಕ್ಷೆಯಲ್ಲಿ ಭಾಗವಹಿಸಿದ ಸಣ್ಣ ಗುಂಪಿನ ಸ್ವಯಂಸೇವಕರಲ್ಲಿ 90 ಶೇಕಡದಷ್ಟು ಪರಿಣಾಮ ಬೀರಿದೆ ಹಾಗೂ ಎರಡು ಪೂರ್ಣ ಪ್ರಮಾಣದ ಡೋಸ್‌ಗಳನ್ನು ತೆಗೆದುಕೊಂಡವರಲ್ಲಿ ಲಸಿಕೆಯ 62 ಶೇಕಡದಷ್ಟು ಪರಿಣಾಮಕಾರಿಯಾಗಿದೆ ಎಂದು ಆ್ಯಸ್ಟ್ರಝೆನೆಕ ಮತ್ತು ಆಕ್ಸ್‌ಫರ್ಡ್ ಸೋಮವಾರ ಘೋಷಿಸಿವೆ.

ಲಸಿಕೆ ಅಧ್ಯಯನಕ್ಕೆ ನಿಯಂತ್ರಣ ಸಂಸ್ಥೆಗೆ ಬ್ರಿಟನ್ ಸೂಚನೆ

ಕೊರೋನ ವೈರಸ್ ಸಾಂಕ್ರಾಮಿಕವನ್ನು ಎದುರಿಸುವ ನಿಟ್ಟಿನಲ್ಲಿ, ವರ್ಷದ ಕೊನೆಯ ವೇಳೆಗೆ ಆಸ್ಟ್ರಝೆನೆಕದ ಲಸಿಕೆಯನ್ನು ಬಿಡುಗಡೆಗೊಳಿಸುವುದಕ್ಕೆ ಪೂರ್ವಭಾವಿಯಾಗಿ ಲಸಿಕೆಯನ್ನು ಪರೀಕ್ಷೆಗೊಳಪಡಿಸುವಂತೆ ಬ್ರಿಟಿಶ್ ಸರಕಾರ ಶುಕ್ರವಾರ ತನ್ನ ಸ್ವತಂತ್ರ ಔಷಧ ನಿಯಂತ್ರಣ ಪ್ರಾಧಿಕಾರ ಮೆಡಿಸಿನ್ಸ್ ಆ್ಯಂಡ್ ಹೆಲ್ತ್‌ಕೇರ್ ಪ್ರಾಡಕ್ಟ್ಸ್ ರೆಗ್ಯುಲೇಟರಿ ಏಜನ್ಸಿಗೆ ಸೂಚನೆ ನೀಡಿದೆ.

‘‘ಆಕ್ಸ್‌ಫರ್ಡ್/ಆ್ಯಸ್ಟ್ರಝೆನೆಕ ಲಸಿಕೆಯನ್ನು ಪರಿಶೀಲಿಸುವಂತೆ, ಅದರ ಪ್ರಾಯೋಗಿಕ ಪರೀಕ್ಷೆಯ ಅಂಕಿಅಂಶಗಳನ್ನು ಅರ್ಥಮಾಡಿಕೊಳ್ಳುವಂತೆ ಹಾಗೂ ಅದು ಕಠಿಣ ಸುರಕ್ಷಾ ಮಾನದಂಡಗಳಿಗೆ ಹೊಂದಿಕೊಳ್ಳುತ್ತದೆಯೇ ಎನ್ನುವುದನ್ನು ನಿರ್ಧರಿಸುವಂತೆ ನಾವು ಔಷಧ ನಿಯಂತ್ರಣ ಸಂಸ್ಥೆಯನ್ನು ಔಪಚಾರಿಕವಾಗಿ ಕೋರಿದ್ದೇವೆ’’ ಎಂದು ಆರೋಗ್ಯ ಕಾರ್ಯದರ್ಶಿ ಮ್ಯಾಟ್ ಹ್ಯಾನ್‌ಕಾಕ್ ಹೇಳಿದರು.