ಅಮೆರಿಕ ವಿಜ್ಞಾನಿಗಳಿಂದ ಕೊರೋನ ತಡೆಗಟ್ಟಲು ಮೂಗಿನ ಸ್ಪ್ರೇ ಅಭಿವೃದ್ಧಿ
ವಾಶಿಂಗ್ಟನ್, ಡಿ. 2: ವಂಶವಾಹಿ ಚಿಕಿತ್ಸೆಗಾಗಿ ಅಭಿವೃದ್ಧಿಪಡಿಸಲಾಗಿರುವ ತಂತ್ರಜ್ಞಾನವನ್ನು ಕೊರೋನ ವೈರಸ್ ಸೋಂಕನ್ನು ತಡೆಯುವ ಉದ್ದೇಶದ ಮೂಗಿನ (ನೇಝಲ್) ಸ್ಪ್ರೇ ತಯಾರಿಕೆಯಲ್ಲಿ ಬಳಸಲು ಸಾಧ್ಯವೇ ಎಂಬ ಬಗ್ಗೆ ಪೆನ್ಸಿಲ್ವೇನಿಯ ವಿಶ್ವವಿದ್ಯಾನಿಲಯ ಮತ್ತು ಜೈವಿಕ ತಂತ್ರಜ್ಞಾನ ಕಂಪೆನಿ ರೆಜನರೋನ್ನ ವಿಜ್ಞಾನಿಗಳು ಸಂಶೋಧನೆ ನಡೆಸುತ್ತಿದ್ದಾರೆ.
ಈ ತಂತ್ರಜ್ಞಾನದಲ್ಲಿ ಮೂಗು ಮತ್ತು ಗಂಟಲಿನಲ್ಲಿ ಇರುವ ಕೋಶಗಳಿಗೆ ದುರ್ಬಲಗೊಳಿಸಲಾದ ಕೊರೋನ ವೈರಸ್ ಮೂಲಕ ವಂಶವಾಹಿ ಸೂಚನೆಗಳನ್ನು ನೀಡಲಾಗುತ್ತದೆ. ಸೂಚನೆಗಳನ್ನು ಪಡೆದುಕೊಂಡ ಕೋಶಗಳು ಕೊರೋನ ವೈರಸ್ ನಮ್ಮ ದೇಹದ ಮೇಲೆ ಆಕ್ರಮಣ ನಡೆಸುವುದನ್ನು ತಡೆಯುವುದಕ್ಕಾಗಿ ಬಲಿಷ್ಠ ಪ್ರತಿಕಾಯಗಳನ್ನು ಸೃಷ್ಟಿಸುತ್ತವೆ.
‘‘ನಮ್ಮ ಸಂಶೋಧನೆಯ ಪ್ರಯೋಜನವೆಂದರೆ, ನಮ್ಮ ಚಿಕಿತ್ಸೆಯು ಫಲಕಾರಿಯಾಗಲು ಜನರು ಬಲಿಷ್ಠ ರೋಗನಿರೋಧಕ ಶಕ್ತಿಯನ್ನು ಹೊಂದಬೇಕಾಗಿಲ್ಲ’’ ಎಂದು ಪೆನ್ಸಿಲ್ವೇನಿಯ ವಿಶ್ವವಿದ್ಯಾನಿಲಯದಲ್ಲಿ ವೈದ್ಯಕೀಯ ಪ್ರೊಫೆಸರ್ ಆಗಿರುವ ಜೇಮ್ಸ್ ವಿಲ್ಸನ್ ಹೇಳುತ್ತಾರೆ.
ಈ ತಂತ್ರಜ್ಞಾನವನ್ನು ಪ್ರಸಕ್ತ ಪ್ರಾಣಿಗಳಲ್ಲಿ ಪರೀಕ್ಷಿಸಲಾಗುತ್ತಿದೆ. ಯಶಸ್ವಿಯಾದರೆ, ಈ ಮೂಗಿನ ಸ್ಪ್ರೇಯ ಒಂದು ಡೋಸ್ ಜನರಿಗೆ ಸುಮಾರು ಆರು ತಿಂಗಳ ಕಾಲ ಕೊರೋನ ವೈರಸ್ನಿಂದ ರಕ್ಷಣೆ ನೀಡುತ್ತದೆ. ಇದನ್ನು ಪೂರಕ ಲಸಿಕೆಗಳಾಗಿ ಬಳಸಬಹುದಾಗಿದೆ ಎಂದು ವಿಲ್ಸನ್ ಅಭಿಪ್ರಾಯಪಡುತ್ತಾರೆ.
