ಸ್ಟ್ಯಾನ್ ಫೋರ್ಡ್ ವಿವಿಯ ಜಗತ್ತಿನ ಅತ್ಯುತ್ತಮ ವಿಜ್ಞಾನಿಗಳ ಪಟ್ಟಿಯಲ್ಲಿ ವಿಟ್ಲದ ಡಾ. ಅಬ್ದುಲ್ ರಹಿಮಾನ್ ಬೇಗ್
ಮಂಗಳೂರು, ಡಿ.5: ಸ್ಟ್ಯಾನ್ ಫೋರ್ಡ್ ವಿಶ್ವವಿದ್ಯಾನಿಲಯ ನಡೆಸಿದ ಜಾಗತಿಕ ಸಮೀಕ್ಷೆಯಲ್ಲಿ ಬಂಟ್ವಾಳ ತಾಲೂಕಿನ ವಿಟ್ಲದ ಡಾ.ಅಬ್ದುಲ್ ರಹಿಮಾನ್ ಬೇಗ್ ಅವರು 'ಜಗತ್ತಿನ ಅತ್ಯುತ್ತಮ ವಿಜ್ಞಾನಿಗಳ ಪಟ್ಟಿ'ಯಲ್ಲಿ ಸ್ಥಾನ ಪಡೆದಿದ್ದಾರೆ.
ವಿಟ್ಲದ ಬೊಳಂತಿಮೊಗರು ನಿವಾಸಿಯಾಗಿರುವ ಡಾ.ಅಬ್ದುಲ್ ರಹಿಮಾನ್ ಸದ್ಯ ಅಬುಧಾಬಿಯ ಖಲೀಫಾ ಯುನಿವರ್ಸಿಟಿ ಆಫ್ ಸಾಯನ್ಸ್ ಆ್ಯಂಡ್ ಟೆಕ್ನಾಲಜಿ ಇಲ್ಲಿನ ಎಲೆಕ್ಟ್ರಿಕಲ್ ಇಂಜಿನಿಯರಿಂಗ್ ಆ್ಯಂಡ್ ಕಂಪ್ಯೂಟರ್ ಸಯನ್ಸ್ ವಿಭಾಗದ ಅಸೋಸಿಯೇಟ್ ಪ್ರೊಫೆಸರ್ ಆಗಿದ್ದಾರೆ.
ಬೊಳಂತಿಮೊಗರು ಸರಕಾರಿ ಪ್ರಾಥಮಿಕ ಶಾಲೆ, ವಿಟ್ಲ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ, ವಿಟ್ಲ ಜೂನಿಯರ್ ಕಾಲೇಜು ಹಾಗೂ ಎನ್ಐಟಿಕೆ-ಸುರತ್ಕಲ್ ಹಾಗೂ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಸಾಯನ್ಸ್ ಇಲ್ಲಿನ ಹಳೆ ವಿದ್ಯಾರ್ಥಿಯಾಗಿರುವ ಡಾ. ಬೇಗ್ ಸ್ಟ್ಯಾನ್ ಫೋರ್ಡ್ ವಿವಿಯ ‘ಜಗತ್ತಿನ 2 % ಉನ್ನತ ವಿಜ್ಞಾನಿಗಳ ಪಟ್ಟಿ’ಯಲ್ಲಿ ಸ್ಥಾನ ಪಡೆದಿದ್ದಾರೆ. ವಿಜ್ಞಾನಿಗಳು ನಡೆಸಿರುವ ಸಂಶೋಧನಾ ಕಾರ್ಯಗಳು ಹಾಗೂ ಪಿಎಲ್ಒಎಸ್ ಬಯಾಲಜಿ ಜರ್ನಲ್ ನಲ್ಲಿ ಪ್ರಕಟಗೊಂಡ ಸಂಶೋಧನಾ ಪ್ರಬಂಧಗಳ ಆಧಾರದಲ್ಲಿ ಈ ಪಟ್ಟಿ ತಯಾರಿಸಲಾಗಿದೆ.
ಡಾ. ಅಬ್ದುಲ್ ರಹಿಮಾನ್ ಬೇಗ್ ಅವರು ಎಲೆಕ್ಟ್ರಿಕಲ್ ಆ್ಯಂಡ್ ಎಲೆಕ್ಟ್ರಾನಿಕ್ಸ್ ಇಂಜಿನಿಯರಿಂಗ್ ವಿಭಾಗದಲ್ಲಿ 1,320ನೇ ರ್ಯಾಂಕ್ ಪಡೆದಿದ್ದಾರೆ ಹಾಗೂ ಈ ವಿಭಾಗದಲ್ಲಿ ಜಗತ್ತಿನಾದ್ಯಂತದ ಒಟ್ಟು 87,661 ವಿಜ್ಞಾನಿಗಳು ಸ್ಥಾನ ಪಡೆದಿದ್ದಾರೆ. ಖಲೀಫಾ ವಿಶ್ವವಿದ್ಯಾಲಯದ 30 ಪ್ರೊಫೆಸರ್ ಗಳ ಪೈಕಿ ಬೇಗ್ ಈ ಪಟ್ಟಿಯಲ್ಲಿ ಸ್ಥಾನ ಪಡೆದ ಭಾರತೀಯ ಶಿಕ್ಷಣ ಸಂಸ್ಥೆಯಿಂದ ಪದವಿ ಪಡೆದ ಏಕೈಕ ಭಾರತೀಯ ಪ್ರೊಫೆಸರ್ ಆಗಿದ್ದಾರೆ ಎಂದು ಪ್ರಕಟನೆ ತಿಳಿಸಿದೆ.
ಅಬುಧಾಬಿಯ ಖಲೀಫಾ ಯುನಿವರ್ಸಿಟಿ ಆಫ್ ಸಾಯನ್ಸ್ ಆ್ಯಂಡ್ ಟೆಕ್ನಾಲಜಿಗೆ ಸೇರುವ ಮೊದಲು ಡಾ.ಬೇಗ್ ಅವರು ಸುರತ್ಕಲ್ನ ಎನ್ಐಟಿಕೆಯಲ್ಲಿ ಸಹಾಯಕ ಪ್ರೊಫೆಸರ್ ಆಗಿದ್ದರು. 1989ರಿಂದ 1992ರ ತನಕ ಅವರು ಮೈಸೂರಿನ ಕಿರ್ಲೋಸ್ಕರ್ ಎಲೆಕ್ಟ್ರಿಕ್ ಕಂಪೆನಿಯ ಆರ್.ಡಿ. ವಿಭಾಗದಲ್ಲೂ ಸೇವೆ ಸಲ್ಲಿಸಿದ್ದರು.
ಎನ್ಐಟಿಕೆಯಿದ 1989ರಲ್ಲಿ ಎಲೆಕ್ಟ್ರಿಕಲ್ ಆ್ಯಂಡ್ ಎಲೆಕ್ಟ್ರಾನಿಕ್ಸ್ ಇಂಜಿನಿಯರಿಂಗ್ ನಲ್ಲಿ ಬಿಇ ಪದವಿ ಪಡೆದ ಡಾ.ಬೇಗ್ ಅವರು ಬೆಂಗಳೂರಿನ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಸಾಯನ್ಸ್ ನಿಂದ ಸ್ನಾತ್ತಕೋತ್ತರ ಪದವಿ ಪಡೆದಿದ್ದರು. ಮುಂದೆ ಅಲ್ಲಿಂದಲೇ 2004ರಲ್ಲಿ ಅವರು ಎಲೆಕ್ಟ್ರಿಕಲ್ ಇಂಜಿನಿಯರಿಂಗ್ನಲ್ಲಿ ಪಿಎಚ್ಡಿ ಪಡೆದಿದ್ದಾರೆ.
ಪವರ್ ಎಲೆಕ್ಟ್ರಾನಿಕ್ಸ್ ಮತ್ತು ಎಲೆಕ್ಟ್ರಿಕ್ ಡ್ರೈವ್ಸ್ ನಲ್ಲಿ ಸ್ಪೆಶಲೈಸೇಶನ್ ಹೊಂದಿರುವ ಡಾ.ಬೇಗ್ ಅವರು ಎಲೆಕ್ಟ್ರಿಕ್ ವಾಹನಗಳು, ವಯರ್ ಲೆಸ್ ಚಾರ್ಜಿಂಗ್, ಪವರ್ ಎಲೆಕ್ಟ್ರಾನಿಕ್ ಟ್ರಾನ್ಸ್ ಫಾರ್ಮರ್ಸ್, ಮೊಡ್ಯುಲರ್ ಮಲ್ಟಿಲೆವೆಲ್ ಕನ್ವರ್ಟರ್ಸ್ ಮತ್ತು ಗ್ರಿಡ್ ಕನೆಕ್ಟೆಡ್ ಕನ್ವರ್ಟರ್ಸ್ನ ಆಟೋ ಟ್ಯೂನಿಂಗ್ ನಲ್ಲಿ ಸಂಶೋಧನೆಯಲ್ಲಿ ಆಸಕ್ತಿ ಹೊಂದಿದ್ದಾರೆ.
ಅವರ 70ಕ್ಕೂ ಅಧಿಕ ಉನ್ನತ ಮಟ್ಟದ ವೈಜ್ಞಾನಿಕ ಲೇಖನಗಳು ಐಇಇಇ ಜರ್ನಲ್ ಗಳಲ್ಲಿ ಪ್ರಕಟವಾಗಿವೆ ಹಾಗೂ 80 ಐಇಇಇ ಅಂತಾರಾಷ್ಟ್ರೀಯ ಸಮ್ಮೇಳನಗಳಲ್ಲಿ ತಮ್ಮ ಪ್ರಬಂಧಗಳನ್ನು ಮಂಡಿಸಿದ್ದಾರೆ.
ಆವರು ಪ್ರತಿಷ್ಠಿತ ಐಇಇಇ ಇಂಡಸ್ಟ್ರಿ ಅಪ್ಲಿಕೇಶನ್ಸ್ ಟ್ರಾನ್ಸಾಕ್ಷನ್/ಐಎಎಸ್ ಮ್ಯಾಗಝೀನ್ ಇದರ ಸಹಾಯಕ ಸಂಪಾದಕರಾಗಿದ್ದು ಐಇಇಇ ಇಂಡಸ್ಟ್ರಿಯಲ್ ಎಲೆಕ್ಟ್ರಾನಿಕ್ಸ್ ಆ್ಯಂಡ್ ಐಇಇಇ ಇಂಡಸ್ಟ್ರಿಯಲ್ ಅಪ್ಲಿಕೇಶನ್ಸ್ ಸೊಸೈಟಿ ಇದರ ತಾಂತ್ರಿಕ ಸಮಿತಿಯಲ್ಲೂ ಸೇವೆ ಸಲ್ಲಿಸುತ್ತಿದ್ದಾರೆ.
ಪ್ರಶಸ್ತಿಗಳು :
2011ರಲ್ಲಿ ರಿಸರ್ಚ್ ಅವಾರ್ಡ್ ಹಾಗೂ 2009ರಲ್ಲಿ ಯಂಗ್ ಟೀಚರ್ ಅವಾರ್ಡ್ ಪಡೆದಿರುವ ಡಾ.ಬೇಗ್ ಅವರ ಪಿಎಚ್ಡಿ ಪ್ರಬಂಧವು 2005ರಲ್ಲಿ ಹೊಸದಿಲ್ಲಿಯ ಇಂಡಿಯನ್ ನ್ಯಾಷನಲ್ ಅಕಾಡಮಿ ಆಫ್ ಇಂಜಿನಿಯರ್ಸ್ ನ್ಯಾಶನಲ್ ಅವಾರ್ಡ್ ನಲ್ಲಿ ಪ್ರಥಮ ಸ್ಥಾನ ಪಡೆದಿದೆ.
ಅವರ ಸ್ನಾತಕೋತ್ತರ ಪ್ರಬಂಧ 1998ರಲ್ಲಿ ಎಲೆಕ್ಟ್ರಿಕಲ್/ಎಲೆಕ್ಟ್ರಾನಿಕ್ ಇಂಜಿನಿಯರಿಂಗ್ ನಲ್ಲಿ ಎಲ್ಟಿ-ಐಎಸ್ಟಿಇ ನ್ಯಾಷನಲ್ ಅವಾರ್ಡ್ ನಲ್ಲಿ ಪ್ರಥಮ ಸ್ಥಾನ ಪಡೆದಿದೆ. ಅಮೆರಿಕದ ವರ್ಜೀನಿಯಾದ ರೋನೋಕೆ ಎಂಬಲ್ಲಿ 2003ರಲ್ಲಿ ನಡೆದ ಐಇಇಇ ಇಂಡಸ್ಟ್ರಿಯಲ್ ಎಲೆಕ್ಟ್ರಾನಿಕ್ಸ್ ಕಾನ್ಫರೆನ್ಸ್ ನಲ್ಲಿ ಅವರ ಸಂಶೋಧನಾ ಪ್ರಬಂಧ ‘ಇನ್ಫ್ಲೂಯೆನ್ಸ್ ಆಫ್ ಪ್ಲೇಸ್ ಮೆಂಟ್ ಆಫ್ ಸ್ಮಾಲ್ ಸ್ಪೇಸ್ ವೆಕ್ಟರ್ಸ್ ಆನ್ ದಿ ಪರ್ಫಾಮೆನ್ಸ್ ಆಫ್ ಪಿಡಬ್ಲುಎಂ ಟೆಕ್ನಿಕ್ಸ್ ಫಾರ್ ತ್ರೀ ಲೆವೆಲ್ ಇನ್ವರ್ಟರ್ಸ್’ ಸ್ಟೂಡೆಂಟ್ ಅವಾರ್ಡ್ ಮತ್ತು ಅತ್ಯುತ್ತಮ ಪ್ರೆಸೆಂಟೇಶನ್ ಅವಾರ್ಡ್ ಪಡೆದಿದೆ.
ಕಿರ್ಲೋಸ್ಕರ್ ನಲ್ಲಿ ಅವರು ಐಜಿಬಿಟಿ ಆಧರಿತ ಎಸಿ ಸರ್ವೋ ಮೋಟರ್ ಡ್ರೈವ್ ವಿಭಾಗದಲ್ಲಿ ಮಾಡಿದ ಕೆಲಸ ಹೊಸದಿಲ್ಲಿಯ ಐಇಇಎಂಎ ಇದರ ಬೆಸ್ಟ್ ಇಂಡಿಜಿನಸ್ ಆರ್ಡಿ ಪ್ರಾಡಕ್ಟ್ ಪ್ರಶಸ್ತಿ ಪಡೆದಿದೆ.
