ಅಹ್ಮದ್ ಪಟೇಲ್ ಶ್ರಮವಹಿಸಿ ಗೆದ್ದಿದ್ದ ರಾಜ್ಯಸಭಾ ಸ್ಥಾನವನ್ನು ಕಳೆದುಕೊಳ್ಳಲಿರುವ ಕಾಂಗ್ರೆಸ್: ವರದಿ
ಹೊಸದಿಲ್ಲಿ,ಡಿ.23: ಇತ್ತೀಚೆಗೆ ನಿಧನರಾದ ಹಿರಿಯ ಕಾಂಗ್ರೆಸ್ ನಾಯಕ ಅಹ್ಮದ್ ಪಟೇಲ್ ಅವರ ರಾಜ್ಯಸಭಾ ಸ್ಥಾನವನ್ನು ಕಾಂಗ್ರೆಸ್ ಕಳೆದುಕೊಳ್ಳುವ ಸಾಧ್ಯತೆಗಳು ನಿಚ್ಚಳವಾಗಿದೆ. ಆದರೆ 2017ರಲ್ಲಿ ಈ ರಾಜ್ಯಸಭಾ ಸ್ಥಾನ ಬಿಜೆಪಿ ಕೈವಶವಾಗುವುದನ್ನು ತಡೆದು ಗೆಲ್ಲಲು ಅಹ್ಮದ್ ಪಟೇಲ್ ನೇತೃತ್ವದ ಕಾಂಗ್ರೆಸ್ ಪಕ್ಷವು ಬಹಳಷ್ಟು ಶ್ರಮಪಟ್ಟಿತ್ತು ಎಂದು ndtv.com ವರದಿ ಮಾಡಿದೆ.
ಅಹ್ಮದ್ ಪಟೇಲ್ ಅವರ ರಾಜ್ಯಸಭಾ ಅಧಿಕಾರಾವಧಿಯು ಆಗಸ್ಟ್ 18, 2023ರ ತನಕ ಇತ್ತು. ಪಟೇಲ್ ಅವರ ಸ್ಥಾನ ಅವರ ನಿಧನ ಹೊಂದಿದ ನವೆಂಬರ್ 25ರಂದೇ ತೆರವಾಗಿದೆ ಎಂದು ಘೋಷಿಸಲಾಗಿದ್ದರೆ ಬಿಜೆಪಿಯ ಅಭಯ್ ಭಾರಧ್ವಾಜ್ ಅವರು ಡಿಸೆಂಬರ್ 1ರಂದು ನಿಧನರಾದ ಬಳಿಕ ಅವರ ಸ್ಥಾನವೂ ತೆರವುಗೊಂಡಿದೆ. ಭಾರದ್ವಾಜ್ ಅವರ ಅಧಿಕಾರಾವಧಿ ಜೂನ್ 21, 2026ರ ತನಕವಿತ್ತು.
ಈ ಎರಡು ಸ್ಥಾನಗಳನ್ನು ತುಂಬಲು ಪ್ರತ್ಯೇಕವಾಗಿ ಉಪಚುನಾವಣೆ ನಡೆಸಲು ಚುನಾವಣಾ ಆಯೋಗ ತೀರ್ಮಾನಿಸಿದೆ.
ಬಿಜೆಪಿ ಬಳಿ ಗುಜರಾತ್ನಲ್ಲಿ 111 ಶಾಸಕರಿದ್ದರೆ ಕಾಂಗ್ರೆಸ್ ಬಳಿ 65 ಶಾಸಕರಿದ್ದಾರೆ. ಒಬ್ಬ ಅಭ್ಯರ್ಥಿಗೆ ಶೇ 50ರಷ್ಟು ಅಥವಾ 88 ಮತಗಳು ಗೆಲುವಿಗೆ ಅಗತ್ಯವಿದೆ.
ಕಳೆದ ವರ್ಷ ಅಮಿತ್ ಶಾ ಹಾಗೂ ಸ್ಮೃತಿ ಇರಾನಿ ಅವರಿಂದ ತೆರವಾದ ರಾಜ್ಯಸಭಾ ಸೀಟುಗಳನ್ನು ಬಿಜೆಪಿ ಗೆದ್ದಿತ್ತು. ಒಂದರಲ್ಲಿ ವಿದೇಶಾಂಗ ಸಚಿವ ಎಸ್ ಜೈಶಂಕರ್ ಗೆಲುವು ಸಾಧಿಸಿದ್ದರೂ ಇದನ್ನು ಪ್ರಶ್ನಿಸಿ ಕಾಂಗ್ರೆಸ್ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದೆ.
ಎರಡೂ ಸ್ಥಾನಗಳಿಗೆ ಚುನಾವಣೆ ಏಕಕಾಲದಲ್ಲಿ ನಡೆದಿದ್ದರೆ ತಾನು ಒಂದು ಸ್ಥಾನ ಗಳಿಸಬಹುದಾಗಿತ್ತು ಎಂದು ಕಾಂಗ್ರೆಸ್ ಹೇಳುತ್ತಿದೆ. ಎರಡು ಸ್ಥಾನಗಳಿಗೆ ಜತೆಯಾಗಿ ಚುನಾವಣೆ ನಡೆದಾಗ ಪ್ರಮಾಣಾಗುಣ ಪ್ರಾತಿನಿಧಿತ್ವದ ವ್ಯವಸ್ಥೆಯ ಆಧಾರದಲ್ಲಿ ನಡೆಯುತ್ತದೆ, ಎಂದರೆ ಈ ವ್ಯವಸ್ಥೆಯಡಿಯಲ್ಲಿ ಶಾಸಕರು ಪ್ರತಿಯೊಬ್ಬ ಅಭ್ಯರ್ಥಿಯ ಪ್ರಾಶಸ್ತ್ಯ ಪಟ್ಟಿ ಮಾಡುತ್ತಾರೆ. ಯಾವ ಅಭ್ಯರ್ಥಿ ಹೆಚ್ಚಿನ ಮತದಾರರಿಗೆ ಪ್ರಥಮ ಪ್ರಾಶಸ್ತ್ಯದ ಆಯ್ಕೆಯಾಗುತ್ತಾರೆಯೇ ಅವರು ಗೆಲ್ಲುತ್ತಾರೆ ಹಾಗೂ ಪ್ರತಿಯೊಬ್ಬರ ಮತವನ್ನು ಒಮ್ಮೆ ಮಾತ್ರ ಲೆಕ್ಕ ಮಾಡಲಾಗುತ್ತದೆ.
ಆದರೆ ಪ್ರತ್ಯೇಕವಾಗಿ ರಾಜ್ಯಸಭಾ ಚುನಾವಣೆಯನ್ನು 2009ರಿಂದಲೇ ನಡೆಸಲಾಗುತ್ತಿದೆ ಎಂದು ಚುನಾವಣಾ ಆಯೋಗ ಹೇಳುತ್ತಿದೆ. ಇದೇ ರೀತಿ ಈ ಬಾರಿಯೂ ಪ್ರತ್ಯೇಕವಾಗಿ ಚುನಾವಣೆ ನಡೆದರೆ ಎರಡೂ ಸ್ಥಾನಗಳು ಬಿಜೆಪಿ ಪಾಲಾಗಲಿವೆ ಎಂದು ndtv.com ವರದಿ ಮಾಡಿದೆ.