ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತ ಉರ್ದು ಕವಿ, ವಿಮರ್ಶಕ ಶಂಸುರ್ರಹ್ಮಾನ್ ಫಾರೂಕಿ ನಿಧನ

ಹೊಸದಿಲ್ಲಿ, ಡಿ. 26: ಉರ್ದು ಕವಿ ಹಾಗೂ ವಿಮರ್ಶಕ ಶಂಸುರ್ರಹ್ಮಾನ್ ಫಾರೂಕಿ (85) ಅವರು ಶುಕ್ರವಾರ ಅಲಹಾಬಾದ್‌ನ ತನ್ನ ಸ್ವಗೃಹದಲ್ಲಿ ನಿಧನರಾಗಿದ್ದಾರೆ. ಅವರು ಕೊರೋನ ಸೋಂಕಿನಿಂದ ಕಳೆದ ತಿಂಗಳು ಗುಣಮುಖರಾಗಿದ್ದರು.

 ‘‘ಅಲಹಾಬಾದ್‌ನ ನಿವಾಸಕ್ಕೆ ಹಿಂದಿರುಗುವಂತೆ ಅವರು ಸೂಚಿಸಿದ್ದರು. ನಾವು ಇಂದು ಬೆಳಗ್ಗೆಯಷ್ಟೇ ಇಲ್ಲಿಗೆ ತಲುಪಿದೆವು. ಇಲ್ಲಿಗೆ ಆಗಮಿಸಿದ ಅರ್ಧ ಗಂಟೆಯಲ್ಲಿ ಸುಮಾರು 11 ಗಂಟೆಗೆ ಅವರು ನಿಧನರಾದರು’’ ಎಂದು ಫಾರೂಕಿ ಅವರ ಸೋದರಳಿಯ ಹಾಗೂ ಲೇಖಕ ಮಹಮೂದ್ ಫಾರೂಕಿ ಹೇಳಿದ್ದಾರೆ.

ಕೊರೋನದಿಂದ ಗುಣಮುಖರಾಗಿದ್ದ ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತ ಫಾರೂಕಿ ಅವರು ನವೆಂಬರ್ 23ರಂದು ದಿಲ್ಲಿಯ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದರು. ‘‘ಆದರೆ, ಸ್ಟಿರಾಯ್ಡಿನಿಂದಾಗಿ ಅವರಲ್ಲಿ ಶಿಲೀಂದ್ರ ಸೋಂಕು ಅಭಿವೃದ್ಧಿಯಾಯಿತು. ಇದು ಅವರ ಆರೋಗ್ಯವನ್ನು ಮತ್ತಷ್ಟು ಹದಗೆಡಿಸಿತು’’ ಎಂದು ಮಹಮೂದ್ ಹೇಳಿದ್ದಾರೆ.

ಉತ್ತರಪ್ರದೇಶದಲ್ಲಿ 1935 ಸೆಪ್ಪಂಬರ್ 30ರಂದು ಜನಿಸಿದ ಫಾರೂಕಿ ಅವರು 16ನೇ ಶತಮಾನದ ಉರ್ದು ಮೌಖಿಕ ಕಥೆ ಹೇಳುವ ಕಲಾ ಪ್ರಕಾರವಾದ ದಸ್ತಾಂಗೋಯಿಯನ್ನು ಪುನರುಜ್ಜೀವನಗೊಳಿಸಿದ ಕೀರ್ತಿಗೆ ಬಾಜನರಾಗಿದ್ದಾರೆ.

ಅವರು ತನ್ನ ಐದು ದಶಕಗಳ ಸಾಹಿತ್ಯ ಯಾನದಲ್ಲಿ ‘ಮಿರರ್ ಆಫ್ ಬ್ಯೂಟಿ’(2006), ‘ಗಾಲಿಬ್ ಅಫ್ಸಾನೇ ಕಿ ಹಿಮಾಯತ್ ಮೈನ್’(1989) ಹಾಗೂ ‘ದ ಸನ್ ದ್ಯಾಟ್ ರೋಸ್ ಫ್ರಂ ದಿ ಅರ್ಥ್’ (2014) ಸೇರಿದಂತೆ ಹಲವು ಕೃತಿಗಳನ್ನು ರಚಿಸಿದ್ದಾರೆ.

18ನೇ ಶತಮಾನದ ಕವಿ ಮಿರ್ ತಖಿ ಮಿರ್ ಕುರಿತ ನಾಲ್ಕು ಸಂಫಟಗಳ ಸಂಶೋಧನಾ ಗ್ರಂಥ ‘ಶೇರ್-ಎ-ಶೋರ್- ಅಂಗೇಝ್‌ಗೆ ಅವರು 1996ರಲ್ಲಿ ಸರಸ್ವತಿ ಸಮ್ಮಾನಕ್ಕೆ ಭಾಜನರಾಗಿದ್ದರು.