ಕಿತ್ತಳೆ ಹಣ್ಣು ಮಧುಮೇಹಿಗಳಿಗೆ ಒಳ್ಳೆಯದೇ?
ಚಳಿಗಾಲದಲ್ಲಿ ಎಲ್ಲೆಲ್ಲೂ ರಾಶಿಯಾಗಿ ಕಂಡು ಬರುವ ಕಿತ್ತಳೆ ಹಣ್ಣು ಹಲವಾರು ಆರೋಗ್ಯಲಾಭಗಳನ್ನು ನೀಡುತ್ತದೆ. ಅದು ಕ್ಯಾರೊಟಿನಾಯ್ಡಾ,ಫ್ಲಾವನಾಯ್ಡಾ,ಫಾಲೇಟ್ ಮತ್ತು ಸಿ ವಿಟಾಮಿನ್ಗಳಂತಹ ಹಲವಾರು ಉತ್ಕರ್ಷಣ ನಿರೋಧಕಗಳು ಮತ್ತು ಫೈಟೊಕೆಮಿಕಲ್ಗಳನ್ನು ಒಳಗೊಂಡಿದೆ. ಇವೆಲ್ಲವೂ ಸೇರಿ ಮಧುಮೇಹ ಮತ್ತು ಸಂಬಂಧಿತ ಹೃದ್ರೋಗಗಳಂತಹ ಹಲವಾರು ದೀರ್ಘಕಾಲಿಕ ಕಾಯಿಲೆಗಳು ಬಾರದಂತೆ ತಡೆಯುತ್ತವೆ. ಕಿತ್ತಳೆ ಹಣ್ಣು ಸಿಹಿ ನಿಜ,ಆದರೆ ಅದು ಮಧುಮೇಹಿಗಳ ಪಾಲಿಗೆ ಒಳ್ಳೆಯ ಆಯ್ಕೆಯಾಗಿದೆ. ಮಧುಮೇಹವು ವಿಶ್ವಾದ್ಯಂತ ಸಾವುಗಳಿಗೆ ಪ್ರಮುಖ ಕಾರಣಗಳಲ್ಲೊಂದಾಗಿದೆ. ಜಗತ್ತಿನಲ್ಲಿ ಸುಮಾರು 37.10 ಕೋಟಿ ಜನರು ಈ ದೀರ್ಘಕಾಲಿಕ ಕಾಯಿಲೆಯಿಂದ ಬಳಲುತ್ತಿದ್ದಾರೆ ಮತ್ತು 2030ರ ವೇಳೆಗೆ ಅವರ ಸಂಖ್ಯೆಯು ಸುಮಾರು 55.20 ಕೋಟಿಗೆ ಏರಬಹುದು ಎಂದು ಇಂಟರ್ನ್ಯಾಷನಲ್ ಡಯಾಬಿಟಿಸ್ ಫೆಡರೇಷನ್ ತನ್ನ ವರದಿಯಲ್ಲಿ ಹೇಳಿದೆ. ಮಧುಮೇಹವು ಜೀವನದ ಗುಣಮಟ್ಟಕ್ಕೆ ಭಾರೀ ಅಪಾಯವನ್ನು ಒಡ್ಡುತ್ತದೆ ಹಾಗೂ ಹೃದಯ ರಕ್ತನಾಳ ರೋಗಗಳು ಮತ್ತು ಬೊಜ್ಜಿನಂತಹ ವಿವಿಧ ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗುತ್ತದೆ. ಹೈಪೊಗ್ಲೈಸಿಮಿಯಾ ಅಥವಾ ರಕ್ತದಲ್ಲಿ ಗ್ಲುಕೋಸ್ ಕೊರತೆಯನ್ನು ನಿಯಂತ್ರಿಸುವುದು ಮಧುಮೇಹ ಮತ್ತು ಸಂಬಂಧಿತ ರೋಗಗಳ ಅಪಾಯವನ್ನು ತಗ್ಗಿಸಲು ಏಕಮಾತ್ರ ಪ್ರಮುಖ ಮಾರ್ಗವಾಗಿದೆ. ಆರೋಗ್ಯವಂತರು ಸಹ ಇನ್ಸುಲಿನ್ ಪ್ರತಿರೋಧದಂತಹ ಸ್ಥಿತಿಗೆ ಗುರಿಯಾಗುವುದನ್ನು ತಪ್ಪಿಸಲು ಹೈಪೊಗ್ಲೈಸಿಮಿಯಾವನ್ನು ನಿಯಂತ್ರಿಸುವುದು ಅಗತ್ಯವಾಗಿದೆ.
ಫೈಟೊಕೆಮಿಕಲ್ ಸಮೃದ್ಧ ಹಣ್ಣುಗಳು ಮತ್ತು ತರಕಾರಿಗಳ ಸೇವನೆಯು ಶರೀರದಲ್ಲಿಯ ಗ್ಲುಕೋಸ್ ಮಟ್ಟದಲ್ಲಿ ಏರಿಕೆಯನ್ನು ವಿಳಂಬಿಸಲು ಮತ್ತು ತನ್ಮೂಲಕ ಮಧುಮೇಹದ ಅಪಾಯವನ್ನು ತಗ್ಗಿಸಲು ನೆರವಾಗುತ್ತದೆ ಎಂದು ತಜ್ಞರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಕಿತ್ತಳೆ ಹಣ್ಣು ಹೆಚ್ಚಿನ ಪ್ರಮಾಣದಲ್ಲಿ ಫೈಟೊಕೆಮಿಕಲ್ಗಳನ್ನು ಒಳಗೊಂಡಿರುವುದರಿಂದ ರಕ್ತದಲ್ಲಿ ಗ್ಲುಕೋಸ್ ಮಟ್ಟವನ್ನು ಇಳಿಸಲು ಮಧುಮೇಹಿಗಳಿಗೆ ಒಳ್ಳೆಯ ಆಯ್ಕೆಯಾಗುತ್ತದೆ.
ಮಧುಮೇಹಿಗಳು ಕಿತ್ತಳೆಯನ್ನು ಹಣ್ಣಿನ,ಜ್ಯೂಸ್ನ ಅಥವಾ ನೆಕ್ಟರ್ ಸ್ವೀಟನ್ಡ್ (ಮಕರಂದ ಅಥವಾ ಜೇನು ಮಿಶ್ರಿತ)ಜ್ಯೂಸ್ನ ರೂಪದಲ್ಲಿ ಸೇವಿಸಬಹುದು. ಇವುಗಳಲ್ಲಿ ಅಧಿಕ ಪ್ರಮಾಣದಲ್ಲಿರುವ ನಾರು ಮಧುಮೇಹ ನಿರೋಧಕ ಪರಿಣಾಮಗಳಿಗೆ ಮುಖ್ಯ ಕಾರಣವಾಗಿರಬಹುದು ಎಂದು ಅಧ್ಯಯನಗಳು ಬೆಟ್ಟು ಮಾಡಿವೆ. ಆದರೆ ನೆಕ್ಟರ್ ಸ್ವೀಟನ್ಡ್ ಜ್ಯೂಸ್ ಕೆಲವರಲ್ಲಿ ಪ್ರಿಡಯಾಬಿಟಿಸ್ ಅಥವಾ ಪೂರ್ವ ಮಧುಮೇಹ ಮತ್ತು ಹೃದಯ ರೋಗಗಳಿಗೆ ತುತ್ತಾಗುವ ಅಪಾಯವನ್ನು ಹೆಚ್ಚಿಸಬಹುದು. ಆದ್ದರಿಂದ ಇದನ್ನು ನಿಯಮಿತವಾಗಿ ಸೇವಿಸುವುದರಿಂದ ದೂರವಿರಬೇಕು ಎನ್ನುತ್ತಾರೆ ತಜ್ಞರು.
ರಕ್ತದಲ್ಲಿನ ಗುಕೋಸ್ ಮಟ್ಟವನ್ನು ನಿಯಂತ್ರಿಸಲು ಕಿತ್ತಳೆ ಹಣ್ಣಿನ ಜ್ಯೂಸ್ ಒಳ್ಳೆಯದಾಗಿದ್ದರೂ ದಿನದ ವಿಭಿನ್ನ ಸಮಯಗಳಲ್ಲಿ ಅದರ ಸೇವನೆಯು ಶಕ್ತಿ ಮತ್ತು ಇನ್ಸುಲಿನ್ ಮಟ್ಟಗಳ ಮೇಲೆ ಪರಿಣಾಮವನ್ನು ಬೀರಬಹುದು ಮತ್ತು ಗ್ಲುಕೋಸ್ ಮಟ್ಟ ಹೆಚ್ಚಲು ಕಾರಣವಾಗಬಹುದು. ಕಿತ್ತಳೆ ಜ್ಯೂಸ್ನ್ನು ಬ್ರೇಕ್ಫಾಸ್ಟ್,ಮಧ್ಯಾಹ್ನದ ಊಟ ಮತ್ತು ರಾತ್ರಿಯ ಊಟದ ಜೊತೆಗೆ ಸೇವಿಸಿದರೆ ಮತ್ತು ಇವುಗಳ ನಡುವೆ ಯಾವುದೇ ತಿನಿಸನ್ನು ತಿನ್ನದಿದ್ದರೆ ಅದು ಶಕ್ತಿ ಮತ್ತು ಇನ್ಸುಲಿನ್ ಮಟ್ಟಗಳ ಮೇಲೆ ಧನಾತ್ಮಕ ಪರಿಣಾಮವನ್ನು ಬೀರುತ್ತದೆ ಮತ್ತು ಶರೀರದಲ್ಲಿಯ ಕೊಬ್ಬನ್ನೂ ಕರಗಿಸುತ್ತದೆ ಎಂದು ಅಧ್ಯಯನವೊಂದು ತೋರಿಸಿದೆ. ಅಲ್ಲದೆ ಜ್ಯೂಸ್ನ ಸೇವನೆಯು ಸೂಕ್ತ ಪೋಷಕಾಂಶಗಳನ್ನು ಒದಗಿಸುವ ಮೂಲಕ ಆರೋಗ್ಯವನ್ನೂ ಹೆಚ್ಚಿಸುತ್ತದೆ. ಹೀಗಾಗಿ ಕಿತ್ತಳೆ ಜ್ಯೂಸ್ ಅನ್ನು ಊಟಗಳ ನಡುವೆ ಸೇವಿಸುವುದಕ್ಕಿಂತ ಊಟದ ಜೊತೆಗೆ ಸೇವಿಸುವುದು ಒಳ್ಳೆಯದು.
