ಮುಂಬೈ- ಮಂಗಳೂರು ಸೆಂಟ್ರಲ್ : ದೈನಂದಿನ ವಿಶೇಷ ರೈಲು ಸಂಚಾರ ಫೆ.1ರವರೆಗೆ ವಿಸ್ತರಣೆ

ಉಡುಪಿ : ಮುಂಬೈ (ಲೋಕಮಾನ್ಯ ತಿಲಕ್) ಹಾಗೂ ಮಂಗಳೂರು ಸೆಂಟ್ರಲ್ (ರೈಲು ನಂ. 02620/02619) ಮಧ್ಯೆ ಡಿ.17ರಿಂದ ಪ್ರಾರಂಭಗೊಂಡ ದೈನಂದಿನ ಸೂಪರ್‌ ಫಾಸ್ಟ್ ಹಬ್ಬದ ವಿಶೇಷ ರೈಲಿನ ಸಂಚಾರವನ್ನು 2021ರ ಫೆ.1ರವರೆಗೆ ವಿಸ್ತರಿಸಲಾಗಿದೆ ಎಂದು ಕೊಂಕಣ ರೈಲ್ವೆ ಪ್ರಕಟಣೆಯಲ್ಲಿ ತಿಳಿಸಿದೆ.

ಈ ಮೊದಲು ಡಿ.17ರಿಂದ 31ರವರೆಗೆ ರೈಲು ಸಂಚಾರವನ್ನು ಪ್ರಕಟಿಸಲಾಗಿತ್ತು. ಇದೀಗ ಈ ಸಂಚಾರವನ್ನೂ ಇನ್ನೂ ಒಂದು ತಿಂಗಳು ವಿಸ್ತರಿಸಲಾಗಿದೆ. ಮಂಗಳೂರು ಸೆಂಟ್ರಲ್ ಕಡೆಯಿಂದ ಜ.1ರಿಂದ 31ರವರೆಗೆ ಹಾಗೂ ಮುಂಬೈ ಲೋಕಮಾನ್ಯ ತಿಲಕ್‌ನಿಂದ ಜ.2ರಿಂದ ಫೆ.1ರವರೆಗೆ ಈ ರೈಲು ತನ್ನ ದೈನಂದಿನ ಓಡಾಟವನ್ನು ನಡೆಸಲಿದೆ.

ಡಿ.17ರ ವೇಳಾಪಟ್ಟಿಯಂತೆ ರೈಲು ಪ್ರತಿದಿನ ಅಪರಾಹ್ನ 2:25ಕ್ಕೆ ಮಂಗಳೂರು ಸೆಂಟ್ರಲ್‌ನಿಂದ ಹೊರಟು ಮರುದಿನ ಬೆಳಗ್ಗೆ 6:35ಕ್ಕೆ ಮುಂಬೈ ತಲುಪಿದರೆ, ಮುಂಬೈ ಲೋಕಮಾನ್ಯ ತಿಲಕ್‌ನಿಂದ ಅಪರಾಹ್ನ 3:20ಕ್ಕೆ ಹೊರಟು ಮರುದಿನ ಬೆಳಗ್ಗೆ 7:30ಕ್ಕೆ ಮಂಗಳೂರು ಸೆಂಟ್ರಲ್ ತಲುಪುತ್ತದೆ.

ಇದಲ್ಲದೇ ಕೊಂಕಣ ರೈಲು ಮಾರ್ಗದಲ್ಲಿ ಸಂಚರಿಸುವ ಇನ್ನೂ ನಾಲ್ಕು ರೈಲುಗಳ ಅವಧಿಯನ್ನು ವಿಸ್ತರಿಸಲಾಗಿದೆ. ಎರ್ನಾಕುಲಂ ಜಂಕ್ಷನ್- ಓಕಾ ನಡುವಿನ ದ್ವಿಸಾಪ್ತಾಹಿಕ ವಿಶೇಷ ರೈಲು ಸಂಚಾರವನ್ನು ಎರಡೂ ಕಡೆಗಳಿಂದ ಜ.1ರಿಂದ ಫೆ.1ರವರೆಗೆ ವಿಸ್ತರಿಸಲಾಗಿದೆ.

ಅಲ್ಲದೇ ತಿರುನಲ್ವೇಲಿ-ದಾದರ್ ಸೂಪರ್‌ಫಾಸ್ಟ್ ಎಕ್ಸ್‌ಪ್ರೆಸ್ ಹಬ್ಬದ ವಿಶೇಷ ರೈಲಿನ ಸಂಚಾರವನ್ನು ಜ.6ರಿಂದ 28ರವರೆಗೆ ವಿಸ್ತರಿಸಲಾಗಿದೆ ಎಂದು ಕೊಂಕಣ ರೈಲ್ವೆ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.