ನಿಧಾನಗತಿಯಲ್ಲಿ ಸಾಗಿರುವ ಮತಪತ್ರಗಳ ಎಣಿಕೆ ಕಾರ್ಯ: ಉಡುಪಿ ಜಿಲ್ಲೆಯಲ್ಲಿ 1774 ಸ್ಥಾನಗಳ ಫಲಿತಾಂಶ ಘೋಷಣೆ

ಉಡುಪಿ, ಡಿ.30: ಈ ಬಾರಿಯ ಗ್ರಾಮ ಪಂಚಾಯತ್ ಸಾರ್ವತ್ರಿಕ ಚುನಾವಣೆಯಲ್ಲಿ ಮತದಾನಕ್ಕೆ ಮತ್ತೆ ಮತಪತ್ರಗಳನ್ನು ಬಳಸಿರುವುದರಿಂದ ಮತಗಳ ಎಣಿಕೆ ನಿರೀಕ್ಷೆಗಿಂತಲೂ ನಿಧಾನಗತಿಯಲ್ಲಿ ಸಾಗಿದ್ದು, ರಾತ್ರಿ 8:30ರವರೆಗೆ ಜಿಲ್ಲೆಯಲ್ಲಿ ಮತದಾನ ನಡೆದಿರುವ 2225 ಸ್ಥಾನಗಳಲ್ಲಿ 1774ರ ಫಲಿತಾಂಶಗಳನ್ನು ಮಾತ್ರ ಘೋಷಿಸಲಾಗಿದೆ.

ಸ್ಪರ್ಧೆ ತೀರಾ ನಿಕಟವಾಗಿ ನಡೆದಿರುವುದರಿಂದ ಮತ ಎಣಿಕೆ, ಮರು ಎಣಿಕೆಗಳೂ ಸಾಕಷ್ಟು ಸಂಖ್ಯೆಯಲ್ಲಿ ನಡೆದಿದ್ದು, ಕೆಲವು ಕಡೆಗಳಲ್ಲಿ ಇಬ್ಬರು ಸ್ಪರ್ಧಿಗಳ ನಡುವೆ ಟೈ ಆಗಿ ವಿಜಯಿ ಅಭ್ಯರ್ಥಿಯ ನಿರ್ಣಯಕ್ಕೆ ಟಾಸ್ ಬಳಕೆಯೂ ನಡೆದಿದೆ. ಇವುಗಳಿಂದ ತಡರಾತ್ರಿಯವರೆಗೂ ಮತಎಣಿಕೆ ಮುಂದುವರಿಯುವ ಸಾಧ್ಯತೆ ಇದೆ.

ಜಿಲ್ಲೆಯಲ್ಲಿ ಒಟ್ಟು 153 ಗ್ರಾಪಂಗಳಲ್ಲಿ ಚುನಾವಣೆ ಘೋಷಣೆಯಾಗಿದೆ. ಕುಂದಾಪುರ ತಾಲೂಕಿನ ಹೊಸಾಡು ಗ್ರಾಪಂಗೆ ಸೇನಾಪುರ ಗ್ರಾಮ ಸೇರ್ಪಡೆಗೆ ಸಂಬಂಧಿಸಿ ಅರ್ಜಿಯ ವಿಚಾರಣೆ ನ್ಯಾಯಾಲಯದಲ್ಲಿ ನಡೆದಿರುವುದರಿಂದ ಅಲ್ಲಿ ಚುನಾವಣೆ ನಡೆಯುತ್ತಿಲ್ಲ. ಉಳಿದಂತೆ ಬ್ರಹ್ಮಾವರ ತಾಲೂಕಿನ ಕೋಡಿ ಗ್ರಾಪಂನಲ್ಲಿ ಚುನಾವಣೆಯನ್ನು ಗ್ರಾಮಸ್ಥರು ಬಹಿಷ್ಕರಿಸಿದ್ದರಿಂದ ಅಲ್ಲಿ ಯಾರೊಬ್ಬರೂ ಸ್ಪರ್ಧಿಸದೇ ಚುನಾವಣೆ ರದ್ದಾಗಿದೆ.
ಇನ್ನುಳಿದ 152 ಗ್ರಾಮಗಳಲ್ಲಿ 2353 ಸ್ಥಾನಗಳಿಗೆ ಚುನಾವಣೆ ನಡೆದಿದ್ದು, ಇವುಗಳಲ್ಲಿ 128 ಸ್ಥಾನಗಳಿಗೆ ಅಭ್ಯರ್ಥಿಗಳು ಅವಿರೋಧವಾಗಿ ಆಯ್ಕೆಯಾಗಿ ದ್ದರು. ಹೀಗಾಗಿ ಉಳಿದ 2225 ಸ್ಥಾನಗಳಿಗೆ ಮತದಾನವಾಗಿದ್ದು, ಇವುಗಳ ಮತಗಳ ಎಣಿಕೆ ಇಂದು ನಡೆದಿದೆ.

ರಾತ್ರಿ 8:30ಕ್ಕೆ ಬಂದ ಮಾಹಿತಿಯಂತೆ ಜಿಲ್ಲೆಯಲ್ಲಿ 1774 ಸ್ಥಾನಗಳ ವಿಜಯಿ ಅಭ್ಯರ್ಥಿಗಳ ಘೋಷಣೆಯಾಗಿದ್ದು ಇನ್ನು 451 ಸ್ಥಾನಗಳ ಫಲಿತಾಂಶ ಬರಲು ಬಾಕಿ ಇದೆ.

ಉಡುಪಿ ತಾಲೂಕಿನಲ್ಲಿ ಒಟ್ಟು 329 ಸ್ಥಾನಗಳಿಗೆ ಚುನಾವಣೆ ನಡೆದರೆ, 9 ಸ್ಥಾನಗಳಿಗೆ ಅವಿರೋಧ ಆಯ್ಕೆಯಾಗಿದೆ. ಉಳಿದ 320ರಲ್ಲಿ 266 ಸ್ಥಾನಗಳ ಫಲಿತಾಂಶ ಘೋಷಣೆಯಾಗಿದ್ದು, 54 ಸ್ಥಾನಗಳ ನಿರ್ಣಯ ಬಾಕಿ ಉಳಿದಿದೆ.

ಕಾಪು ತಾಲೂಕಿನಲ್ಲಿ ಒಟ್ಟು 290 ಸ್ಥಾನಗಳಿದ್ದು 10 ಸ್ಥಾನಗಳಿಗೆ ಅವಿರೋಧ ಆಯ್ಕೆಯಾಗಿದೆ. ಉಳಿದ 280 ಸ್ಥಾನಗಳಲ್ಲಿ 196ರ ಫಲಿತಾಂಶ ಬಂದಿದ್ದು, ಇನ್ನು 84 ಸ್ಥಾನಗಳ ಅಭ್ಯರ್ಥಿಗಳ ಆಯ್ಕೆ ಘೋಷಣೆಯಾಗಬೇಕಿದೆ.

ಕಾರ್ಕಳ ತಾಲೂಕಿನಲ್ಲಿ 399 ಸ್ಥಾನಗಳಿದ್ದು, 31ಕ್ಕೆ ಅವಿರೋಧ ಆಯ್ಕೆ ಈಗಾಗಲೇ ನಡೆದಿದೆ. ಇನ್ನುಳಿದಂತೆ 232 ಸ್ಥಾನಗಳ ವಿಜಯಿ ಅಭ್ಯರ್ಥಿಗಳನ್ನು ಘೋಷಿಸಲಾಗಿದ್ದು, ಉಳಿದ 136 ಸ್ಥಾನಗಳ ವಿಜಯಿ ಅಭ್ಯರ್ಥಿಗಳ ಹೆಸರು ಘೋಷಣೆಯಾಗಬೇಕಿದೆ.

ಹೆಬ್ರಿ ತಾಲೂಕಿನಲ್ಲಿ 122 ಸ್ಥಾನಗಳಿದ್ದು, 7ಕ್ಕೆ ಅಭ್ಯರ್ಥಿಗಳು ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ. ಉಳಿದಿರುವಲ್ಲಿ 98 ಸ್ಥಾನಗಳ ವಿಜಯಿ ಅಭ್ಯರ್ಥಿಗಳನ್ನು ಈಗಾಗಲೇ ಘೋಷಿಸಲಾಗಿದ್ದು ಬಾಕಿ ಉಳಿದ 17ರ ಫಲಿತಾಂಶವನ್ನು ಕಾಯಲಾಗುತ್ತಿದೆ.

ಬೈಂದೂರು ತಾಲೂಕಿನಲ್ಲಿ ಒಟ್ಟು 259 ಸ್ಥಾನಗಳಿದ್ದು, ಎಂಟು ಮಂದಿ ಅವಿರೋಧ ಆಯ್ಕೆಯಾಗಿದ್ದಾರೆ. 202 ಸ್ಥಾನಗಳಿಗೆ ಅಭ್ಯರ್ಥಿಗಳ ನಿರ್ಣಯ ವಾಗಿದ್ದು, ಬಾಕಿ ಉಳಿದ 49 ಸ್ಥಾನಗಳಿಗೆ ವಿಜಯಿ ಅಭ್ಯರ್ಥಿಯ ಆಯ್ಕೆ ನಡೆಯಬೇಕಾಗಿದೆ.

ಬ್ರಹ್ಮಾವರ ತಾಲೂಕಿನಲ್ಲಿ ಒಟ್ಟು 412 ಸ್ಥಾನಗಳಿದ್ದು, ಇವುಗಳಲ್ಲಿ ಕೋಡಿಯ 12 ಸ್ಥಾನಗಳಿಗೆ ಚುನಾವಣೆ ನಡೆದಿಲ್ಲ. ಉಳಿದ 400ರಲ್ಲಿ 39 ಸ್ಥಾನಗಳಿಗೆ ಅಭ್ಯರ್ಥಿಗಳು ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ. ಈವರೆಗೆ 328 ಸ್ಥಾನಗಳಿಗೆ ವಿಜಯಿ ಅಭ್ಯರ್ಥಿಗಳ ಘೋಷಣೆಯಾಗಿದ್ದು, 33ಸ್ಥಾನಗಳಿಗೆ ಬಾಕಿ ಉಳಿದಿದೆ.

ಕುಂದಾಪುರ ತಾಲೂಕಿನಲ್ಲಿ 554 ಸ್ಥಾನಗಳಿದ್ದು, 24 ಸ್ಥಾನಗಳಿಗೆ ಅವಿರೋಧ ಆಯ್ಕೆಯಾಗಿದೆ. 452 ಸ್ಥಾನಗಳ ವಿಜಯಿ ಅಭ್ಯರ್ಥಿಗಳನ್ನು ಘೋಷಿಸಲಾಗಿದ್ದು, ಇನ್ನು 78 ಸ್ಥಾನಗಳಿಗೆ ಆಯ್ಕೆ ಇನ್ನಷ್ಟೇ ನಡೆಯಬೇಕಿದೆ.

ಒಟ್ಟಾರೆಯಾಗಿ ಜಿಲ್ಲೆಯ 2365 ಸ್ಥಾನಗಳಲ್ಲಿ 2353ಕ್ಕೆ ಚುನಾವಣೆ ನಡೆದಿದ್ದು 128 ಸ್ಥಾನಗಳಿಗೆ ಅವಿರೋಧ ಆಯ್ಕೆಯಾಗಿದೆ. ರಾತ್ರಿ 8:30ರವರೆಗೆ 1774 ಸ್ಥಾನಗಳ ಫಲಿತಾಂಶವನ್ನು ಘೋಷಿಸಲಾಗಿದ್ದು, 451 ಸ್ಥಾನಗಳ ವಿಜಯಿ ಅಭ್ಯರ್ಥಿಗಳ ಘೋಷಣೆ ಇನ್ನಷ್ಟೇ ನಡೆಯಬೇಕಿದೆ.