ಶೋಷಿತರಿಗೆ ಅವಕಾಶ- ಪ್ರೋತ್ಸಾಹ ಎರಡೂ ಇರಲಿ: ನ್ಯಾ.ನಾಗಮೋಹನ ದಾಸ್

ಬೆಂಗಳೂರು, ಡಿ.31: ಅಸ್ಪೃಶ್ಯರು, ಹಿಂದುಳಿದವರು, ಬುಡಕಟ್ಟು ಜನರು ಮಹಿಳೆಯರು ಮತ್ತು ಇತರೆ ಅವಕಾಶವಂಚಿತರಿಗೆ ಅಗತ್ಯ ಪ್ರೋತ್ಸಾಹ ಮತ್ತು ಅವಕಾಶಗಳನ್ನು ನೀಡುವುದರ ಮೂಲಕ ದೇಶವನ್ನು ಸದೃಢವಾಗಿ ಕಟ್ಟಬೇಕಾಗಿದೆ ಎಂದು ಕರ್ನಾಟಕ ಹೈಕೋರ್ಟ್ ನ ನಿವೃತ್ತ ನ್ಯಾಯಮೂರ್ತಿ ಎಚ್.ಎನ್. ನಾಗಮೋಹನ ದಾಸ್ ಪ್ರತಿಪಾದಿಸಿದ್ದಾರೆ.

ಗುರುವಾರ ಬೆಂಗಳೂರು ವಿಶ್ವವಿದ್ಯಾಲಯದ ಡಾ.ಬಿ.ಆರ್. ಅಂಬೇಡ್ಕರ್ ಅಧ್ಯಯನ ಮತ್ತು ಸಂಶೋಧನಾ ಕೇಂದ್ರವು 203ನೇ ಕೋರೆಗಾಂವ್ ಸ್ಮರಣೆ ಕಾರ್ಯಕ್ರಮದ ಅಂಗವಾಗಿ ಆನ್‍ಲೈನ್‍ನಲ್ಲಿ ಆಯೋಜಿಸಿದ್ದ `ಶೋಷಿತ ವರ್ಗಗಳ ಸ್ವಾಭಿಮಾನದ ಸಂಕೇತವಾಗಿ ಭೀಮಾ ಕೋರೆಗಾಂವ್’ ವಿಚಾರಗೋಷ್ಟಿಯನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಸಂವಿಧಾನ ಜಾರಿಗೆ ಬಂದಿದ್ದರಿಂದಲೇ ಕಳೆದ 70 ವರ್ಷಗಳಲ್ಲಿ ಶೋಷಿತ ವರ್ಗಗಳಿಗೆ ರಾಜಕೀಯ, ಶೈಕ್ಷಣಿಕ, ಔದ್ಯೋಗಿಕ ಅವಕಾಶಗಳು ದೊರೆತು ಉನ್ನತ ಸ್ಥಾನಗಳು ದೊರಕುವಂತಾಗಿದೆ. ಸಂವಿಧಾನ ನೀಡಿದ ಅವಕಾಶಗಳಿಂದಾಗಿಯೇ ಇಂದು ಈ ದೇಶದ ರಾಷ್ಟ್ರಪತಿಗಳು ದಲಿತ ಮತ್ತು ಪ್ರಧಾನಮಂತ್ರಿಗಳು ಹಿಂದುಳಿದ ವರ್ಗಕ್ಕೆ ಸೇರಿದವರು ಎಂದು ಅವರು ಅಭಿಮಾನಪಟ್ಟರು.

ಇಲ್ಲಿಯವರೆಗೂ ದೇಶದಲ್ಲಿ ನಡೆದಿರುವ ಎಲ್ಲಾ ಸಾಧನೆಗಳಿಗೆ ಸಂವಿಧಾನವೇ ಕಾರಣ. ಭಾರತೀಯ ಸಂವಿಧಾನ ಬೃಹತ್ತಾದುದಷ್ಟೇ ಅಲ್ಲ, ವಿಶ್ವದ ಅತ್ಯುತ್ತಮ ಸಂವಿಧಾನಗಳಲ್ಲಿ ಒಂದು. ದೇಶದ ಪ್ರತಿಯೊಬ್ಬರೂ ಸಂವಿಧಾನವನ್ನು ಓದಿ, ಅರ್ಥಮಾಡಿಕೊಂಡು ಅದರ ಆಶಗಳನ್ನು ಮೈಗೋಡಿಸಿಕೊಂಡು ಕಲ್ಯಾಣ ರಾಜ್ಯದ ಕನಸನ್ನು ನನಸು ಮಾಡಬೇಕಿದೆ ಎಂದು ಅವರು ತಿಳಿಸಿದರು.

ಮಹಾರಾಷ್ಟ್ರದ ಪುಣೆ ಬಳಿಯ ಕೋರೆಗಾಂವ್‍ನ ವಿಜಯೋತ್ಸವ ಆಚರಣೆ ಸಂದರ್ಭದಲ್ಲಿ ನಡೆದ ಅಹಿತಕರ ಘಟನೆ ಬಗ್ಗೆ ಪ್ರಸ್ತಾಪಿಸಿ, ಕಾರ್ಯಕ್ರಮದಲ್ಲಿ ಭಾಗವಹಿಸಿದವರನ್ನು ನಗರ ನಕ್ಸಲರೆಂದು ಜೈಲಿನಲ್ಲಿಟ್ಟಿರುವುದು ಸರಿಯಲ್ಲವೆಂದು ಎಂದು ಬೇಸರ ವ್ಯಕ್ತಪಡಿಸಿದರು.

ಡಾ.ಅಂಬೇಡ್ಕರ್ ಅಧ್ಯಯನ ಕೇಂದ್ರಗಳ ಮೇಲುಸ್ತುವಾರಿ ಸಮಿತಿ ಅಧ್ಯಕ್ಷ ಡಾ.ಸಿದ್ದಲಿಂಗಯ್ಯ ಮಾತನಾಡಿ, 28 ಸಾವಿರದಷ್ಟಿದ್ದ ಮೇಲ್ಜಾತಿ ಪೇಶ್ವೆ ಸೈನಿಕ ವಿರುದ್ಧ ಮಹರ್ ಸಮುದಾಯದ 500 ಮಂದಿ ಸೈನಿಕರ ಜಯವು ಬ್ರೀಟಿಷರ ಪರ ಅಥವ ಮೇಲ್ಜಾತಿಯ ವಿರುದ್ಧದ್ದಾಗಿರಲಿಲ್ಲ. ಬದಲಾಗಿ ಮಾನವೀಯತೆ ಪರವಾಗಿ ನಡೆದ ಹೋರಾಟವಾಗಿತ್ತು’’ ಎಂದು ಬಣ್ಣಿಸಿದರು.

ಬೆಂಗಳೂರು ನಗರ ಸಶಸ್ತ್ರ ಮೀಸಲು ಪಡೆಯ ಉಪಪೊಲೀಸ್ ಆಯುಕ್ತ ಎಸ್.ಸಿದ್ದರಾಜು ಮಾತನಾಡಿ, ಶೋಷಿತರು ಈ ದೇಶದ ಮೂಲ ನಿವಾಸಿಗಳು. ಚಾತುರ್ವಣದ ಕಾರಣಕ್ಕಾಗಿ ದೇಶದ ಪ್ರತಿಶತ ಶೇ.90 ಮಂದಿ ತಮ್ಮ ನೆಲದಲ್ಲಿ ತಾವು ಪರಕೀಯರಾಗಿದ್ದಾರೆ. ಹಾಗಾಗಿ ಸಾಮಾಜಿಕ ನ್ಯಾಯವನ್ನು ಸಮಾಜದ ಕಟ್ಟಕಡೆಯ ಸಮುದಾಯಗಳಿಗೆ ತಲುಪಿಸುವ ಪ್ರಯತ್ನವನ್ನು ರಾಜಕಾರಣಿಗಳು ಮಾಡಬೇಕಿದೆ ಎಂದು ಅಭಿಪ್ರಾಯಪಟ್ಟರು.

ಬೆಂಗಳೂರು ವಿಶ್ವವಿದ್ಯಾಲಯದ ಕುಲಪತಿ ಪ್ರೊ.ವೇಣುಗೋಪಾಲ್, ಡಾ.ಎನ್.ಸಂಜೀವ ರಾಜ್, ಡಾ.ಸುಧಾಕರ್. ಎಚ್,  ಡಾ.ಗೋವಿಂದರಾಜು, ಎಂ.ಉದಯ ಕುಮಾರ್, ಗೋಪಿನಾಥ್, ಡಾ.ಎಂ.ವಿ. ಆಶಾ, ಪ್ರೇಮ್ ಸೋಹನ್ ಲಾಲ್, ಪ್ರೊ.ಕೆ.ವಿ.ರಾಜು, ವಿದೇಯ ಬೆಳಗೋಡೆ ಶ್ರೀಕಂಠ, ಪ್ರೊ.ಎಂ. ನಾರಾಯಣಸ್ವಾಮಿ, ಪ್ರೊ.ಸಿದ್ದಪ್ಪ ಬೆಳಗಟ್ಟಿ ಮತ್ತಿತರರಿದ್ದರು.