ಜ.8ರಿಂದ ಬ್ರಿಟನ್ಗೆ ವಿಮಾನ ಯಾನ ಪುನಾರಂಭ; ಪ್ರಯಾಣಿಕರಿಗಾಗಿ ಕೇಂದ್ರದಿಂದ ಮಾರ್ಗಸೂಚಿ ಜಾರಿ
ಹೊಸದಿಲ್ಲಿ, ಜ.2: ಬ್ರಿಟನ್ನಿಂದ ಆಗಮಿಸುವ ಪ್ರಯಾಣಿಕರ ಕಣ್ಗಾವಲು ಹಾಗೂ ತಪಾಸಣೆಗಾಗಿ ಕೇಂದ್ರ ಸರಕಾರವು ಶನಿವಾರ ನೂತನ ಮಾರ್ಗದರ್ಶಿ ಸೂತ್ರಗಳನ್ನು ಜಾರಿಗೊಳಿಸಿದೆ. ರೂಪಾಂತರಿ ಕೊರೋನ ವೈರಸ್ ಹರಡುವ ಭೀತಿಯ ಹಿನ್ನೆಲೆಯಲ್ಲಿ ಭಾರತ ಹಾಗೂ ಬ್ರಿಟನ್ ನಡುವೆ ಸ್ಥಗಿತಗೊಳಿಸಲಾಗಿದ್ದ ವಿಮಾನಯಾನ ಸೇವೆಗಳು ಜನವರಿ 8ರಿಂದ ಪುನಾರಂಭಿಸಲಾಗುವುದು. ಡಿಸೆಂಬರ್ 21ರಿಂದ ಈ ಎರಡೂ ದೇಶಗಳ ನಡುವಿನ ಪ್ರಯಾಣಿಕ ವಿಮಾನಗಳ ಹಾರಾಟವನ್ನು ರದ್ದುಪಡಿಸಲಾಗಿತ್ತು.
ಜನವರಿ 8 ಹಾಗೂ ಜನವರಿ 30ರ ನಡುವೆ ಬ್ರಿಟನ್ನಿಂದ ಆಗಮಿಸುವ ಪ್ರಯಾಣಿಕರನ್ನು ಸ್ವಯಂಪಾವತಿಯ ಆರ್ಟಿ-ಪಿಸಿಆರ್ ಪರೀಕ್ಷೆಗೆ ಒಳಪಡಿಸಲಾಗುವುದು ಹಾಗೂ ಅವರು ಕಳೆದ 14 ದಿನಗಳಲ್ಲಿ ತಾವು ಕೈಗೊಂಡಿದ್ದ ಪ್ರಯಾಣದ ವಿವರಗಳನ್ನು ಸಲ್ಲಿಸಬೇಕಾಗುತ್ತದೆ.
ವಿಮಾನ ನಿಲ್ದಾಣದ ಅಧಿಕಾರಿಗಳ ಸಹಕಾರದೊಂದಿಗೆ ಆರ್ಟಿ-ಪಿಸಿಆರ್ ಪರೀಕ್ಷೆಗೆ ಕಾಯುವ ಪ್ರಯಾಣಿಕರಿಗಾಗಿ ವಿಮಾನ ನಿಲ್ದಾಣಗಳಲ್ಲಿ ಸೂಕ್ತ ಏರ್ಪಾಡುಗಳನ್ನು ಮಾಡಲಾಗುವುದು, ಸೋಂಕು ದೃಢಪಟ್ಟವರನ್ನು ಪ್ರತ್ಯೇಕವಾಗಿರಿಸಲು ಕೂಡಾ ವ್ಯವಸ್ಥೆಗಳನ್ನು ರೂಪಿಸಲಾಗುವುದು ಎಂದು ಹೇಳಿಕೆ ತಿಳಿಸಿದೆ.
ಬ್ರಿಟನ್ನಿಂದ ಆಗಮಿಸುವ ವ್ಯಕ್ತಿಗಳ ಆರ್ಟಿ-ಪಿಸಿಆರ್ ಪರೀಕ್ಷೆಗಳು ನೆಗೆಟಿವ್ ಆಗಿದ್ದಲ್ಲಿ ಅವರನ್ನು 14 ದಿನಗಳ ಕಾಲ ಕ್ವಾರಂಟೈನ್ನಲ್ಲಿರಿಸಲಾಗುವುದು. ಪರೀಕ್ಷೆಯಲ್ಲಿ ಪಾಸಿಟಿವ್ ಬಂದವರನ್ನು ಪ್ರತ್ಯೇಕವಾದ ಕೇಂದ್ರಗಳಲ್ಲಿ ಕ್ವಾರಂಟೈನ್ನಲ್ಲಿಡಲಾಗುವುದು.
ರೂಪಾಂತರಿ ವೈರಸ್ ಸೋಂಕಿತರಾದವರನ್ನು ಅವರ ಸ್ಯಾಂಪಲ್ ಪರೀಕ್ಷೆಗಳು ನೆಗೆಟಿವ್ ಬರುವವರೆಗೂ ಐಸೋಲೇಶನ್ನಲ್ಲಿರಿಸಲಾಗುವುದು. ಅವರೊಂದಿಗೆ ಸಂಪರ್ಕಕ್ಕೆ ಬಂದವರೆಲ್ಲರನ್ನೂ ಸಾಂಸ್ಥಿಕ ಕ್ವಾರಂಟೈನ್ ಕೇಂದ್ರಗಳಲ್ಲಿ ಇರಿಸಲಾಗುವುದು ಎಂದು ಸಚಿವಾಲಯ ತಿಳಿಸಿದೆ.
ಆರಂಭದಲ್ಲಿ ದಿಲ್ಲಿ,ಮುಂಬೈ, ಬೆಂಗಳೂರು, ಹೈದರಾಬಾದ್ ಹಾಗೂ ಚೆನ್ನೈ ವಿಮಾನನಿಲ್ದಾಣಗಳಿಗೆ ಮಾತ್ರ ಬ್ರಿಟನ್ನಿಂದ ವಿಮಾನಗಳ ಆಗಮನ, ನಿರ್ಗಮನಕ್ಕೆ ಅವಕಾಶ ನೀಡಲಾಗುವುದು ಎಂದು ಅದು ಹೇಳಿದೆ.
ಪ್ರಯಾಣಿಕರು ವಿಮಾನನಿಲ್ದಾಣಕ್ಕೆ ಆಗಮಿಸುವ ಕನಿಷ್ಠ 72 ತಾಸುಗಳ ಮೊದಲು ಆನ್ಲೈನ್ ಪೋರ್ಟಲ್ನಲ್ಲಿ ಸ್ವಯಂಘೋಷಣಾ ಪತ್ರವನ್ನು ಸಲ್ಲಿಸುವ ಅಗತ್ಯವಿದೆ. ಪ್ರಯಾಣವನ್ನು ಕೈಗೊಳ್ಳುವ 72 ತಾಸುಗಳ ಮೊದಲು ಅವರು ತಮಗೆ ನಡೆಸಲಾದ ನೆಗೆಟಿವ್ ಆರ್ಟಿ-ಪಿಸಿಆರ್ ಪರೀಕ್ಷೆಯ ವರದಿಯನ್ನು ಸಲ್ಲಿಸಬೇಕಾಗುತ್ತದೆ.
ಬ್ರಿಟನ್ನಲ್ಲಿ ಪತ್ತೆಯಾದ ರೂಪಾಂತರಿ ಕೊರೋನ ವೈರಸ್ನ ಹರಡುವಿಕೆಯನ್ನು ತಡೆಯಲು ಭಾರತವು ಡಿಸೆಂಬರ್ 21ರಂದು ಬ್ರಿಟನ್ನಿಂದ ಎಲ್ಲಾ ವಿಮಾನಗಳ ಹಾರಾಟವನ್ನು ರದ್ದುಪಡಿಸಿತ್ತು. ರೂಪಾಂತರಿತ ವೈರಸ್ ಸಾಮಾನ್ಯ ಕೊರೋನ ವೈರಾಣುವಿಗಿಂತ ಶೇ.70ರಷ್ಟು ಅಧಿಕ ಹರಡುವ ಸಾಮರ್ಥ್ಯ ಹೊಂದಿದೆ. ಈವರೆಗೆ ಭಾರತದಲ್ಲಿ 29 ಮಂದಿಗೆ ರೂಪಾಂತರಿತ ವೈರಸ್ ಸೋಂಕು ತಗಲಿರುವುದು ದೃಢಪಟ್ಟಿದೆ.
