ಫಲಾನುಭವಿಗಳಿಗೆ ಮರಳು ಕೊಂಡೊಯ್ಯಲು ಅವಕಾಶ : ಸಚಿವ ಪಾಟೀಲ್

ಉಡುಪಿ, ಜ.6: ಹೊಸ ಮರಳು ನೀತಿ 2020ರಂತೆ ಉಡುಪಿ ಜಿಲ್ಲೆಯ ನಾನ್ ಸಿಆರ್‌ಝೆಡ್ ವ್ಯಾಪ್ತಿಯಲ್ಲಿ ಮೊದಲನೆ, ಎರಡನೇ ಮತ್ತು ಮೂರನೇ ಶ್ರೇಣಿಯ ಹಳ್ಳ/ತೊರೆ ಮತ್ತು ಕೆರೆಗಳಲ್ಲಿ ಗುರುತಿಸಿರುವ ಒಟ್ಟು 34 ಮರಳು ದಿಬ್ಬಗಳಲ್ಲಿ ಲಭ್ಯ ಇರುವ ಮರಳು ತೆಗೆಯಲು ಆಯಾ ಗ್ರಾಪಂಗಳಿಗೆ ಆಶ್ರಯ ಪತ್ರ ನೀಡಲಾಗಿದೆ ಎಂದು ರಾಜ್ಯ ಗಣಿ ಮತ್ತು ಭೂ ವಿಜ್ಞಾನ ಸಚಿವ ಸಿ.ಸಿ.ಪಾಟೀಲ ಹೇಳಿದ್ದಾರೆ.

ಕಾರ್ಕಳ ತಾಲೂಕು ಪಂಚಾಯತ್ ಸಭಾಂಗಣದಲ್ಲಿ ಬುಧವಾರ ಗಣಿ ಚಟುವಟಿಕೆಗಳಿಗೆ ಸಂಬಂಧಿಸಿದ ಇಲಾಖೆ ಅಧಿಕಾರಿಗಳೊಂದಿಗೆ ಸಭೆ ನಡೆಸಿದ ಬಳಿಕ ಅವರು ಮಾಧ್ಯಮದವರಿಗೆ ಈ ಕುರಿತು ಮಾಹಿತಿ ನೀಡಿದರು.

ಹೆಬ್ರಿ ತಾಲೂಕಿನ ಶಿವಪುರ ಗ್ರಾಪಂನಲ್ಲಿ ನಾಲ್ಕು, ವರಂಗ-4, ಮುದ್ರಾಡಿ ಒಂದು, ಕಾರ್ಕಳ ತಾಲೂಕಿನ ಶಿರ್ಲಾಲು-3, ಬೈಲೂರು ಮತ್ತು ಸೂಡಾ ತಲಾ ಎರಡು, ಕಡ್ತಲ, ಹೆರ್ಮುಂಡೆ, ಮರ್ಣೆ, ಇನ್ನಾ, ಮುಡಾರು, ಕೆರ್ವಾಶೆ, ಯರ್ಲಪಾಡಿ, ಪಳ್ಳಿ, ಸಾಣೂರು ತಲಾ ಒಂದು, ಬೈಂದೂರು ತಾಲೂಕಿನ ಶಿರೂರು- 2, ಆಲೂರು ಮತ್ತು ಕಾಲ್ತೋಡು ತಲಾ ಒಂದು, ಕುಂದಾಪುರ ತಾಲೂಕಿನ ಕಾಳಾವರ ಮತ್ತು ಬೇಳೂರು ಗ್ರಾಪಂ ಗಳಲ್ಲಿ ತಲಾ ಎರಡು ಸೇರಿದಂತೆ ಒಟ್ಟು 34 ಮರಳು ದಿಬ್ಬಳನ್ನು ಗುರುತಿಸಲಾಗಿದೆ ಎಂದರು.

ಜನರಿಂದಲೇ ಮರಳು ಸಾಗಾಟ

ಈ ಹೊಸ ಮರಳು ನೀತಿಯಂತೆ ಮನೆ ಕಟ್ಟಲು ಅವಶ್ಯಕತೆ ಇರುವ ಗ್ರಾಮಸ್ಥರು, ಆಯಾ ಗ್ರಾಪಂಗಳಿಗೆ ಒಂದು ಟನ್‌ಗೆ 170ರೂ. ರಾಯಧನ ಪಾವತಿಸಿ, ನಾನ್ ಸಿಆರ್‌ಝೆಡ್‌ನಲ್ಲಿ ಗುರುತಿಸಿರುವ ದಿಬ್ಬಗಳಿಂದ ಅವರೇ ಮರಳನ್ನು ಮನೆಗೆ ತೆಗೆದುಕೊಂಡು ಹೋಗಬಹುದಾಗಿದೆ. ಒಂದು ವಾಹನ ಗಳಲ್ಲಿ ಮೂರು ಮೆಟ್ರಿಕ್ ಟನ್‌ಗಿಂತ ಹೆಚ್ಚು ಮರಳು ಸಾಗಾಟ ಮಾಡುವಂತಿಲ್ಲ ಎಂದು ಸಚಿವರು ತಿಳಿಸಿದರು.

ಮರಳು ತೆಗೆಯಲು 150- 200ರೂ. ವೆಚ್ಚ ತಗಲ ಬಹುದು. ಹೀಗೆ 300-400ರೂ. ಒಳಗೆ ಫಲಾನುಭವಿಗಳಿಗೆ ಆಶ್ರಯ ಮನೆ, ಸ್ವಚ್ಛ ಭಾರತ ಅಭಿಯಾನದಲ್ಲಿ ಶೌಚಾಲಯ ಹಾಗೂ ಇತಕ ಅವಶ್ಯಕತೆಗಳ ನಿರ್ಮಾಣಕ್ಕೆ ಮರಳು ದೊರೆಯುತ್ತದೆ. ಈ ವಿಚಾರದಲ್ಲಿ ಅಧಿಕಾರಿಗಳಿಂದ ಯಾವುದೇ ತೊಂದರೆ ಆಗುವುದಿಲ್ಲ ಎಂದು ಅವರು ಹೇಳಿದರು.

8.55ಲಕ್ಷ ಮೆ.ಟನ್ ಮರಳು ತೆರವು

ನಮ್ಮ ಸರಕಾರ ಬಂದ ನಂತರ ಸಿಆರ್‌ಝೆಡ್ ವ್ಯಾಪ್ತಿಯಲ್ಲಿ ಮರಳಿಗೆ ಸಂಬಂಧಿಸಿ ಎರಡೂವರೆ ವರ್ಷಗಳಿಂದ ಬಾಕಿ ಇದ್ದ ಕಾನೂನು ತೊಡಕು ಗಳನ್ನು ನಿವಾರಿಸಿ, 8.55ಲಕ್ಷ ಮೆಟ್ರಿಕ್ ಟನ್ ಮರಳನ್ನು ತೆರವುಗೊಳಿಸಲು ಅವಕಾಶ ನೀಡಿದ್ದೇವೆ. ಹೊಸದಾಗಿ ಸುಮಾರು 10ಸಾವಿರ ಮೆಟ್ರಿಕ್ ಟನ್‌ಗಿಂತ ಅಧಿಕ ಮರಳು ಇರುವ 21 ಬ್ಲಾಕ್‌ಗಳನ್ನು ಗುರುತಿಸಿ, ಈಗಾಗಲೇ ಟೆಂಡರ್ ಕರೆಯ ಲಾಗಿದೆ. ಇನ್ನು ಕೆಲವೇ ದಿನಗಳಲ್ಲಿ ಮರಳು ತೆರವುಗೊಳಿಸುವ ಕಾರ್ಯ ಆರಂಭಾಗಲಿದೆ ಎಂದು ಸಚಿವರು ತಿಳಿಸಿದರು.

ಕ್ರಷರ್ ಮಾಲಕರು ಪ್ರತಿ ಐದು ವರ್ಷಗಳಿಗೊಮ್ಮೆ ಅನುಮತಿ ನವೀಕರಣ ಮಾಡಬೇಕಾಗಿತ್ತು. ಆಗ ಹೊಸದಾಗಿ ಪ್ರಮಾಣಪತ್ರಗಳನ್ನು ಸಲ್ಲಿಸಬೇಕಾಗಿತ್ತು. ಇದರಿಂದ ಕ್ರಷರ್ ಮಾಲಕರು ಬಹಳ ತೊಂದರೆ ಅನುಭವಿಸುತ್ತಿದ್ದರು. ನಮ್ಮ ಸರಕಾರ ಅಧಿಕಾರಕ್ಕೆ ಬಂದ ನಂತರ ಕ್ರಷರ್ ಪರವಾನಿಗೆ ಅವಧಿಯನ್ನು ಐದು ವರ್ಷದಿಂದ 20ವರ್ಷಗಳಿಗೆ ವಿಸ್ತರಿಸಲಾಗಿದೆ. ಉಡುಪಿ ಜಿಲ್ಲೆಯಲ್ಲಿ ಅಂತಹ ಒಟ್ಟು 37 ಕ್ರಷರ್‌ಗಳಿಗೆ ಅವಕಾಶ ಮಾಡಿಕೊಟ್ಟಿದ್ದೇವೆ ಎಂದು ಅವರು ಮಾಹಿತಿ ನೀಡಿದರು.

ಈ ಸಂದರ್ಭದಲ್ಲಿ ಕಾರ್ಕಳ ಶಾಸಕ ಸುನೀಲ್ ಕುಮಾರ್, ಉಡುಪಿ ಶಾಸಕ ಕೆ.ರಘುಪತಿ ಭಟ್, ತಾಪಂ ಅಧ್ಯಕ್ಷೆ ಸೌಭಾಗ್ಯ ಮಡಿವಾಳ, ಜಿಪಂ ಸದಸ್ಯರಾದ ಉದಯ ಕೋಟ್ಯಾನ್, ಸುಮಿತ್ ಶೆಟ್ಟಿ ಮೊದಲಾದವರು ಉಪಸ್ಥಿತರಿದ್ದರು.

ಪ್ರತ್ಯೇಕ ಮರಳು ನೀತಿಗೆ ಚಿಂತನೆ

ಕರಾವಳಿ ಭಾಗದ ಜನ ಅನುಭವಿಸುತ್ತಿರುವ ಮರಳು ಸಮಸ್ಯೆಯನ್ನು ನಿವಾ ರಣೆ ಮಾಡಲು ಈಗಾಗಲೇ ಕ್ರಮ ತೆಗೆದುಕೊಳ್ಳಲಾಗಿದೆ. ನಾಳೆ ಮಂಗಳೂರಿ ನಲ್ಲಿ ಎರಡು ಜಿಲ್ಲೆಗಳ ಎಲ್ಲ ಜನಪ್ರತಿನಿಧಿಗಳ ಮತ್ತು ಇಲಾಖೆಯ ಎಲ್ಲ ಹಿರಿಯ ಅಧಿಕಾರಿಗಳ ಸಭೆಯಲ್ಲಿ ಕರಾವಳಿ ಪ್ರದೇಶಕ್ಕೆ ಪ್ರತ್ಯೇಕ ಮರಳು ನೀತಿ ಘೋಷಣೆ ಮಾಡುವ ಕುರಿತು ಚರ್ಚಿಸಿ ಸಕಾರಾತ್ಮಕವಾದ ನಿರ್ಧಾರವನ್ನು ತೆಗೆದುಕೊಳ್ಳಲಾಗುವುದು ಎಂದು ಸಚಿವ ಸಿ.ಸಿ.ಪಾಟೀಲ ತಿಳಿಸಿದರು.

ಪ್ರತ್ಯೇಕ ಮರಳು ನೀತಿಗೆ ಪೂಕರವಾದ ಅಂಶಗಳನ್ನು ಗಮನಿಸಿ, ಕಾನೂನು ತೊಡಕುಗಳಿದ್ದರೆ ಅವುಗಳನ್ನು ಯಾವ ರೀತಿ ಪರಿಹರಿಸಬೇಕು ಎಂಬುದರ ಬಗ್ಗೆ ಸಭೆಯಲ್ಲಿ ಚರ್ಚೆ ಮಾಡಲಾಗುವುದು. ಬಳಿಕ ಪ್ರತ್ಯೇಕ ಮರಳು ನೀತಿ ರಚನೆ ಕುರಿತ ಸವಿಸ್ತಾರವಾದ ವರದಿಯನ್ನು ತಯಾರಿಸಿ ಮುಖ್ಯಮಂತ್ರಿಗಳಿಗೆ ಸಲ್ಲಿಸಲಾಗುವುದು ಎಂದು ಅವರು ಹೇಳಿದರು.