ಸಹಾಯ ಹಸ್ತ ಚಾಚಿದ ಸೋಶಿಯಲ್ ಫೋರಮ್-ಒಮಾನ್; ವಿದೇಶದಲ್ಲಿ ಸಂಕಷ್ಟದಲ್ಲಿದ್ದ ಮೂವರ ರಕ್ಷಣೆ
ಮಂಗಳೂರು, ಜ.12: ಸೋಶಿಯಲ್ ಫೋರಮ್ ಒಮಾನ್ನ ಸದಸ್ಯರ ನಿರಂತರ ಪರಿಶ್ರಮದ ಫಲವಾಗಿ ಉದ್ಯೋಗ ನಿಮಿತ್ತ ವಿದೇಶಕ್ಕೆ ತೆರಳಿ ಸಂಕಷ್ಟಕ್ಕೆ ಈಡಾಗಿದ್ದ ಇಬ್ಬರು ಮಹಿಳೆಯರು ಸಹಿತ ಮೂವರನ್ನು ರಕ್ಷಿಸಿ, ಊರಿಗೆ ಮರಳಿಸುವಲ್ಲಿ ಯಶಸ್ವಿಯಾಗಿದೆ.
ಮಸ್ಕತ್ನ ಕಾಫಿ ಶಾಪ್ನಲ್ಲಿ ದುಡಿಯುತ್ತಿದ್ದ ಮಂಗಳೂರು ಮೂಲದ ಮುಹಮ್ಮದ್ ಎಂಬ ಯುವಕನಿಗೆ ಕೋವಿಡ್ ಲಾಕ್ಡೌನ್ನ ಮೊದಲಿನಿಂದಲೇ ವೇತನ ನೀಡದೇ ಮಾಲಕನು ದುಡಿಸಿಕೊಳ್ಳುತ್ತಿದ್ದ ಎನ್ನುವ ಆರೋಪ ಕೇಳಿಬಂದಿತ್ತು. ನಂತರ ಕೋವಿಡ್ ಸಮಸ್ಯೆ ಪ್ರಾರಂಭವಾಗಿ ಕೆಲ ತಿಂಗಳು ಉದ್ಯೋಗವಿಲ್ಲದೇ ಈ ಯುವಕ ರೂಮ್ನಲ್ಲಿಯೇ ಉಳಿಯಬೇಕಾದ ಸಂದರ್ಭ ಏರ್ಪಟ್ಟಿತ್ತು. ಕುಟುಂಬಕ್ಕೆ ಆಧಾರಸ್ಥಂಭವಾಗಿದ್ದ ಮುಹಮ್ಮದ್ಗೆ ವೇತನ ಸಿಗದೇ ಮನೆಯ ಪರಿಸ್ಥಿತಿ ನೆನೆದು ಮಾನಸಿಕವಾಗಿ ಖಿನ್ನತೆಗೊಳಗಾಗಿದ್ದ ಎಂದು ತಿಳಿದುಬಂದಿದೆ.
ಈ ವಿಚಾರ ತಿಳಿದ ಸೋಶಿಯಲ್ ಫೋರಮ್-ಒಮಾನ್ ಸಂಘಟನೆಯು ಯುವಕನ ಸಹಾಯಕ್ಕೆ ಮುಂದಾಗಿತ್ತು. ಈತನನ್ನು ಆಸ್ಪತ್ರೆಗೆ ದಾಖಲಿಸಿ, ಚಿಕಿತ್ಸೆ ಕೊಡಿಸಲಾಯಿತು. ಯುವಕನಿಗೆ ಬರಬೇಕಿದ್ದ ಬಾಕಿ ವೇತನವನ್ನು ಕಾಫಿ ಶಾಪ್ ಮಾಲಕರಿಂದ ಕೊಡಿಸಲಾಯಿತು. ಅಲ್ಲಿಂದ ವಿಮಾನ ನಿಲ್ದಾಣಕ್ಕೆ ಕರೆತಂದು ಮಂಗಳೂರಿಗೆ ಕಳುಹಿಸುವವರೆಗೆ ಸೋಶಿಯಲ್ ಫೋರಮ್-ಒಮಾನ್ ಪರಿಶ್ರಮ ಪಟ್ಟಿತು.
ಎರಡನೇ ಪ್ರಕರಣದಲ್ಲಿ ಸನಾ ಎನ್ನುವ ಕರ್ನಾಟಕ ಮೂಲದ ಮಹಿಳೆ ಒಮಾನ್ನಲ್ಲಿ ಹಲವು ವರ್ಷಗಳಿಂದ ಹೌಸ್ ಮೇಡ್ ಆಗಿ ಕೆಲಸ ಮಾಡುತ್ತಿದ್ದರು. 10 ವರ್ಷಗಳಿಂದಲೂ ವೀಸಾ ನವೀಕರಿಸಿರಲಿಲ್ಲ. ತಾನು ಹೇಗಾದರೂ ಮಾಡಿ ಊರಿಗೆ ತೆರಳಬೇಕೆಂಬ ಮಹಿಳೆಯ ಮಹದಾಸೆಗೆ ಸೋಶಿಯಲ್ ಫೋರಮ್-ಒಮಾನ್ ಸಹಾಯ ಹಸ್ತ ಚಾಚಿತು.
ಕೆಲ ದಿನಗಳವರೆಗೆ ಮಹಿಳೆಗೆ ಆಶ್ರಯ ನೀಡಿ, ಭಾರತೀಯ ರಾಯಭಾರಿ ಕಚೇರಿಯಲ್ಲಿ ನಿರಂತರ ಸಂಪರ್ಕದ ಮೂಲಕ ಊರಿಗೆ ತೆರಳಲು ಬೇಕಾದ ಎಲ್ಲ ದಾಖಲೆ ಪತ್ರಗಳನ್ನು ತಯಾರಿಸಲಾಯಿತು.
ಈ ಮಹಿಳೆಯನ್ನು ವಿಮಾನ ನಿಲ್ದಾಣದವರೆಗೂ ಬಿಟ್ಟುಬರಲಾಗಿತ್ತು. ಬೋರ್ಡಿಂಗ್ ಪಾಸ್ ಕಳೆದರೂ ಮಹಿಳೆಗೆ ವಿಮಾನ ಹೊರ ಡುವ ವಿಚಾರ ಗೊತ್ತಾಗದೇ ಅಲ್ಲೇ ಉಳಿದಿದ್ದರು. ನಿರಾಶೆಗೊಳಗಾಗದ ಸೋಶಿಯಲ್ ಫೋರಂ ಸದಸ್ಯರು ಕೆಲ ದಿನಗಳ ಅಂತರ ದಲ್ಲಿ ಬೇರೆ ಟಿಕೆಟ್ ಹಾಗೂ ವೈದ್ಯಕೀಯ ಪರೀಕ್ಷೆ ಮಾಡಿಸಿ, ವಿಮಾನದಲ್ಲಿ ಕುಳ್ಳಿರಿಸುವವರೆಗೂ ಸೋಶಿಯಲ್ ಫೋರಮ್-ಒಮಾನ್ ಸದಸ್ಯರೊಬ್ಬರನ್ನು ಪ್ರತ್ಯೇಕವಾಗಿ ಏರ್ಪೋರ್ಟ್ನ ಒಳಗೆ ನೇಮಿಸಲಾಯಿತು. ಯಾವುದೇ ಕೊರತೆ ಬಾರದ ರೀತಿ ಯಲ್ಲಿ ತವರಿಗೆ ಕಳುಹಿಸಿಕೊಡುವಲ್ಲಿ ಯಶಸ್ವಿಯಾಗಿದ್ದಾರೆ.
ಮೂರನೇ ಪ್ರಕರಣದಲ್ಲಿ ಆಮಿನಾ ಎಂಬ ಬೆಂಗಳೂರು ಮೂಲದ ಮಹಿಳೆಯೊಬ್ಬಳು ಲಕ್ಷ ರೂ. ವೇತನವಿದೆಯೆಂದು ಲ್ಯಾಬ್ ಟೆಕ್ನಿಷಿಯನ್ ಕೆಲಸಕ್ಕೆ ಏಜೆಂಟ್ ಒಬ್ಬರ ಮೂಲಕ ಒಮಾನ್ನ ಸೋಹಾರ್ ಎಂಬಲ್ಲಿಗೆ ತೆರಳಿದ್ದರು. ಏಜೆಂಟ್ನ ಮೋಸ ಅರಿ ಯದೇ ಹೌಸ್ ಮೇಡ್ ಆಗಿ ದುಡಿಯಬೇಕಾಯಿತು. ತಮಗಾದ ಖರ್ಚನ್ನು ಪಾವತಿಸದೇ ಮನೆ ಮಾಲಕರು ಅವಳನ್ನು ಬಿಡಲು ಹಿಂದೇಟು ಹಾಕಿದರು. ಸೋಶಿಯಲ್ ಫೋರಮ್ ಮನೆ ಮಾಲಕರಿಗೆ ಖರ್ಚಾದ ಎಲ್ಲ ಹಣ ಭರಿಸಿ ಆಮೀನಾಳನ್ನು ಮಸ್ಕತ್ಗೆ ಕರೆಸಿ ಪ್ರತ್ಯೇಕ ರೂಮ್ ಕೊಡಿಸಿ ಆಶ್ರಯ ನೀಡಿತು.
ಜೂನ್ ತಿಂಗಳ ಅದೇ ಸಂದರ್ಭದಲ್ಲಿ ಕೋವಿಡ್ ಲಾಕ್ಡೌನ್ ಹೇರಿಕೆಯಾಯಿತು. ಆಕೆ ಲಾಕ್ ಡೌನ್ ಮುಗಿಯುವವರೆಗೂ ಸೋಶಿಯಲ್ ಫೋರಮ್ನ ಆಶ್ರದಲ್ಲೇ ಉಳಿಯಬೇಕಾಗುತ್ತದೆ. ಡಿಸೆಂಬರ್ನಲ್ಲಿ ವಿಮಾನಯಾನ ಪುನರಾರಂಭಗೊಂಡಾಗ ಟಿಕೆಟ್ ಮಾಡಿಸಿ 6 ತಿಂಗಳ ದೀರ್ಘಕಾಲದ ಆಶ್ರಯದ ನಂತರ ಊರಿಗೆ ಕಳುಹಿಸಿ ಕೊಡಲಾಯಿತು ಎಂದು ಸೋಶಿಯಲ್ ಫೋರಮ್-ಒಮಾನ್ ಸದಸ್ಯರ ಪ್ರಕಟನೆ ತಿಳಿಸಿದೆ.
