ಉಡುಪಿ: ದಿನದಲ್ಲಿ 829 ಮಂದಿಗೆ ಕೋವಿಡ್ ಲಸಿಕೆ

ಉಡುಪಿ, ಜ.20: ಉಡುಪಿ ಜಿಲ್ಲೆಯಲ್ಲಿ ಬುಧವಾರ ನಿಗದಿತ ವೈದ್ಯರೂ ಸೇರಿದಂತೆ 1256 ಮಂದಿ ಆರೋಗ್ಯ ಕಾರ್ಯಕರ್ತರಲ್ಲಿ ಈವರೆಗಿನ ಗರಿಷ್ಠ 829 ಮಂದಿ ಕೊರೋನಾ ವಿರುದ್ಧದ ‘ಕೊವಿಶೀಲ್ಡ್’ ಲಸಿಕೆ ಪಡೆದಿದ್ದಾರೆ. ಇದು ನಿಗದಿತ ಗುರಿಯ ಶೇ.66ರಷ್ಟು ಸಾಧನೆಯಾಗಿದೆ ಎಂದು ಎಂದು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ.ಸುಧೀರ್‌ಚಂದ್ರ ಸೂಡ ತಿಳಿಸಿದ್ದಾರೆ.

ಕೋವಿಡ್ ವಿರುದ್ಧದ ವ್ಯಾಕ್ಸಿನೇಷನ್‌ನ ಮೊದಲ ಹಂತದಲ್ಲಿ ಜಿಲ್ಲೆಯ ಒಟ್ಟು 22,103 ಮಂದಿಗೆ ಕೋವಿಡ್ ವಿರುದ್ಧದ ಲಸಿಕೆಯನ್ನು ನೀಡುವ ಗುರಿಯನ್ನು ಹೊಂದಲಾಗಿದೆ. ಜ.16ರಿಂದ ಇಂದಿನವರೆಗೆ ಅಂದರೆ ಕಳೆದ ಐದು ದಿನಗಳಲ್ಲಿ ನಿಗದಿತ ಗುರಿಯಾದ 2230 ಮಂದಿಯಲ್ಲಿ 1439 ಮಂದಿಗೆ ಲಸಿಕೆಯನ್ನು ನೀಡುವ ಮೂಲಕ ಶೇ.64.5ರಷ್ಟು ಸಾಧನೆ ಮಾಡಲಾಗಿದೆ ಎಂದವರು ವಿವರಿಸಿದರು.

16 ಕೇಂದ್ರಗಳಲ್ಲಿ ಲಸಿಕೆ ನೀಡಿಕೆ:  ಬುಧವಾರ ಜಿಲ್ಲೆಯ ಒಟ್ಟು 16 ಕೇಂದ್ರಗಳಲ್ಲಿ ಕೋವಿಡ್ ಲಸಿಕೆಯನ್ನು ನೀಡಲಾಯಿತು. ಈ ಎಲ್ಲಾ ಕೇಂದ್ರ ಗಳಿಗೆ ನಿಗದಿಯಾದ ಒಟ್ಟು 1256 ಆಗಿದ್ದು ಇವುಗಳಲ್ಲಿ ಒಟ್ಟು 829 ಮಂದಿ ಲಸಿಕೆಯನ್ನು ಪಡೆದುಕೊಂಡರು. ಇವರಲ್ಲಿ ಕೆಎಂಸಿಯಲ್ಲಿ ಲಸಿಕೆ ಪಡೆದ ಮೂವರಿಗೆ ಸಾಮಾನ್ಯ ಮಟ್ಟದ ಅಲರ್ಜಿ ಕಂಡುಬಂದಿತ್ತು ಎಂದುಹೇಳಲಾಗಿದೆ.

ಗುರುವಾರ ಜಿಲ್ಲೆಯ ಒಟ್ಟು 13 ಕಡೆಗಳಲ್ಲಿ ಲಸಿಕೆ ನೀಡುವ ಯೋಜನೆಯನ್ನು ಹಾಕಿಕೊಳ್ಳಲಾಗಿದೆ. ಪ್ರತಿ ಕೇಂದ್ರದಲ್ಲಿ 100ರಂತೆ ಒಟ್ಟು 1300 ಮಂದಿಗೆ ಲಸಿಕೆ ನೀಡುವ ಗುರಿ ಇದೆ ಎಂದು ಡಿಎಚ್‌ಓ ಡಾ.ಸೂಡ ತಿಳಿಸಿದರು.

ಲಸಿಕೆ ಪಡೆದವರ ವಿವರ

ಕೆದೂರು ಪಿಎಚ್‌ಸಿ: 36ರಲ್ಲಿ 33 ಮಂದಿ, ಕೊರ್ಗಿ: 45ರಲ್ಲಿ 38, ಕೋಡಿ: 38ರಲ್ಲಿ 31, ಬಸರೂರು: 76ರಲ್ಲಿ 60, ಹಳ್ಳಿಹೊಳೆ: 26ರಲ್ಲಿ 21, ನಾಡ: 51ರಲ್ಲಿ 36, ಬಿದ್ಕಲ್‌ಕಟ್ಟೆ: 83ರಲ್ಲಿ 51, ಹಟ್ಟಿಯಂಗಡಿ: 39ರಲ್ಲಿ 33, ಬೆಳ್ವೆ: 67ರಲ್ಲಿ 46, ಹಾಲಾಡಿ: 80ರಲ್ಲಿ 62, ಕೋಟೇಶ್ವರ: 70ರಲ್ಲಿ 51, ಆವರ್ಸೆ: 48ರಲ್ಲಿ 43, ಬಾರಕೂರು: 78ರಲ್ಲಿ 26, ಉಡುಪಿ ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರ: 100ರಲ್ಲಿ 63, ಕೆಎಂಸಿ ಮಣಿಪಾಲ: 400ರಲ್ಲಿ 224, ದುರ್ಗಾ: 19ರಲ್ಲಿ 11. ಒಟ್ಟು 1256ರಲ್ಲಿ 829 ಮಂದಿ ಲಸಿಕೆ ಪಡೆದಿದ್ದಾರೆ.