ಸರ್ವಾಧಿಕಾರಿಗಳ ಹೆಸರುಗಳು 'ಎಂ' ಅಕ್ಷರದಿಂದ ಏಕೆ ಆರಂಭಗೊಳ್ಳುತ್ತವೆ?: ಟ್ವೀಟ್ ಮೂಲಕ ರಾಹುಲ್ ಗಾಂಧಿ ವ್ಯಂಗ್ಯ

ಹೊಸದಿಲ್ಲಿ: "ಇಷ್ಟೊಂದು ಸರ್ವಾಧಿಕಾರಿಗಳ ಹೆಸರುಗಳು 'ಎಂ' ಅಕ್ಷರದಿಂದ ಏಕೆ ಆರಂಭಗೊಳ್ಳುತ್ತವೆ?" ಎಂದು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಪ್ರಶ್ನಿಸಿ ಟ್ವೀಟ್ ಮಾಡಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಅವರ ಹೆಸರನ್ನು ಉಲ್ಲೇಖಿಸದೆಯೇ ಅವರೂ ಸರ್ವಾಧಿಕಾರಿಯೇ ಎಂಬರ್ಥದ ಟ್ವೀಟ್ ಅನ್ನು ರಾಹುಲ್ ಗಾಂಧಿ ಮಾಡಿರುವುದು ಸಾಕಷ್ಟು ಕುತೂಹಲ ಮೂಡಿಸಿದೆ.

ಕೇಂದ್ರದ ಕೃಷಿ ಕಾಯಿದೆಗಳ ವಾಪಸಾತಿಗೆ ಆಗ್ರಹಿಸಿ ರೈತರು ನಡೆಸುತ್ತಿರುವ ಪ್ರತಿಭಟನೆಗಳನ್ನು ಬೆಂಬಲಿಸಿ ಸೆಲೆಬ್ರಿಟಿಗಳಾದ ಪಾಪ್ ತಾರೆ ರಿಹಾನ್ನಾ, ಪರಿಸರ ಹೊರಾಟಗಾರ್ತಿ ಗ್ರೆಟಾ ಥನ್ಬರ್ಗ್,  ಅಮೆರಿಕಾ ಉಪಾಧ್ಯಕ್ಷೆ ಕಮಲಾ ಹ್ಯಾರಿಸ್ ರವರ ಸೋದರ ಸೊಸೆ ಮೀನಾ ಹ್ಯಾರಿಸ್ ಅವರು ಟ್ವೀಟ್ ಮಾಡಿದ ಬೆನ್ನಿಗೇ  ಭಾರತ ಸರಕಾರ ಅವರ ಟ್ವೀಟ್‍ಗಳು ʼದುರದೃಷ್ಟಕರʼ ಎಂದು ಹೇಳಿ ಅವುಗಳನ್ನು ಖಂಡಿಸಿದ ನಂತರ ರಾಹುಲ್ ಅವರ ಟ್ವೀಟ್ ಬಂದಿದೆ.

"ಇಷ್ಟೊಂದು ಸರ್ವಾಧಿಕಾರಿಗಳ ಹೆಸರುಗಳೇಕೆ ʼಎಂʼ ಅಕ್ಷರದಿಂದ ಆರಂಭಗೊಳ್ಳುತ್ತವೆ?" ಎಂದು ಬರೆದಿರುವ ರಾಹುಲ್ ತಮ್ಮ ಟ್ವೀಟ್ ಜತೆಗೆ "ಮಾರ್ಕೊಸ್, ಮುಸ್ಸೊಲಿನಿ, ಮಿಲೊಸೆವಿಕ್, ಮುಬಾರಕ್, ಮೊಬುಟು, ಮುಷರಫ್ ಹಾಗೂ ಮೈಕೊಂಬೆರೊ" ಅವರ ಹೆಸರುಗಳನ್ನೂ ಉಲ್ಲೇಖಿಸಿ ಪರೋಕ್ಷವಾಗಿ ಪ್ರಧಾನಿ ಮೋದಿಯನ್ನು ವ್ಯಂಗ್ಯವಾಡಿದ್ದಾರೆ.

Why do so many dictators have names that begin with M ?

Marcos
Mussolini
Milošević
Mubarak
Mobutu
Musharraf
Micombero

— Rahul Gandhi (@RahulGandhi) February 3, 2021