ದಿಶಾ ರವಿ ಬಂಧನ: ಪೊಲೀಸರಿಗೆ ದಿಲ್ಲಿ ಮಹಿಳಾ ಆಯೋಗದ ನೋಟಿಸ್

ಹೊಸದಿಲ್ಲಿ,ಫೆ.16: ಟೂಲ್‌ಕಿಟ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬೆಂಗಳೂರಿನಿಂದ ಹವಾಮಾನ ಕಾರ್ಯಕರ್ತೆ ದಿಶಾ ರವಿ (22) ಅವರನ್ನು ಬಂಧಿಸಿರುವ ಬಗ್ಗೆ ಫೆ.19ರೊಳಗೆ ಆಯೋಗಕ್ಕೆ ಮಾಹಿತಿಗಳನ್ನು ಸಲ್ಲಿಸುವಂತೆ ದಿಲ್ಲಿ ಮಹಿಳಾ ಆಯೋಗದ ಅಧ್ಯಕ್ಷೆ ಸ್ವಾತಿ ಮಲಿವಾಲ್ ಅವರು ಮಂಗಳವಾರ ದಿಲ್ಲಿ ಪೊಲೀಸರಿಗೆ ನೋಟಿಸ್ ಹೊರಡಿಸಿದ್ದಾರೆ.

ದಿಲ್ಲಿ ಪೊಲೀಸ್‌ನ ಸೈಬರ್ ಅಪರಾಧ ಘಟಕದ ಡಿಸಿಪಿಯವರಿಗೆ ರವಾನಿಸಲಾಗಿರುವ ನೋಟಿಸಿನಲ್ಲಿ ದಿಶಾರ ಹೆತ್ತವರಿಗೆ ಮಾಹಿತಿ ನೀಡದೇ ಅವರನ್ನು ಬೆಂಗಳೂರಿನಿಂದ ದಿಲ್ಲಿಗೆ ತರಲಾಗಿದೆ ಎಂಬ ಮಾಧ್ಯಮ ವರದಿಗಳನ್ನು ಉಲ್ಲೇಖಿಸಲಾಗಿದೆ. ದಿಶಾರನ್ನು ಟ್ರಾನ್ಸಿಟ್ ರಿಮಾಂಡ್‌ಗಾಗಿ ಬೆಂಗಳೂರಿನ ನ್ಯಾಯಾಲಯದಲ್ಲಿ ಹಾಜರು ಪಡಿಸದೆ ನೇರವಾಗಿ ದಿಲ್ಲಿಗೆ ಕರೆತರಲಾಗಿದೆ ಮತ್ತು ನಂತರ ತನಗೆ ವಕೀಲರನ್ನು ಆಯ್ಕೆ ಮಾಡಿಕೊಳ್ಳುವ ಅವಕಾಶವನ್ನೂ ನೀಡದೆ ಅವರನ್ನು ದಿಲ್ಲಿಯ ನ್ಯಾಯಾಲಯದಲ್ಲಿ ಹಾಜರುಪಡಿಸಲಾಗಿದೆ ಎಂದೂ ನೋಟಿಸ್ ಬೆಟ್ಟು ಮಾಡಿದೆ.

ಮಾಧ್ಯಮದ ವರದಿಗಳನ್ನು ಆಯೋಗವು ಸ್ವಯಂಪ್ರೇರಿತವಾಗಿ ಗಣನೆಗೆ ತೆಗೆದುಕೊಂಡಿದ್ದು,ಟ್ರಾನ್ಸಿಟ್ ರಿಮಾಂಡ್ ಪಡೆದುಕೊಳ್ಳುವಲ್ಲಿ ಪೊಲೀಸರ ವೈಫಲ್ಯವು ಅತ್ಯಂತ ಗಂಭೀರ ವಿಷಯವಾಗಿದೆ ಎಂದಿರುವ ನೋಟಿಸ್,ಪೊಲೀಸರು ಬಂಧಿತ ವ್ಯಕ್ತಿಯನ್ನು ಸಮೀಪದ ನ್ಯಾಯಾಲಯಕ್ಕೆ ಹಾಜರು ಪಡಿಸಿದ ಬಳಿಕ ಟ್ರಾನ್ಸಿಟ್ ರಿಮಾಂಡ್ ಪಡೆದುಕೊಳ್ಳಬೇಕು ಎಂದು ಸ್ಪಷ್ಟಪಡಿಸಿದ್ದ ದಿಲ್ಲಿ ಉಚ್ಚ ನ್ಯಾಯಾಲಯದ 2019ರ ಆದೇಶವನ್ನು ಉಲ್ಲೇಖಿಸಿದೆ.

ಬಂಧಿತ ಪ್ರತಿ ವ್ಯಕ್ತಿಗೂ ನ್ಯಾಯಾಲಯದಲ್ಲಿ ತನ್ನ ಪರವಾಗಿ ವಾದಿಸಲು ವಕೀಲರನ್ನು ನೇಮಿಸಿಕೊಳ್ಳುವ ಹಕ್ಕನ್ನು ಸಂವಿಧಾನದ 22(1) ವಿಧಿಯು ನೀಡಿದೆ ಎಂದೂ ನೋಟಿಸ್‌ನಲ್ಲಿ ಹೇಳಲಾಗಿದೆ.

ಆಯೋಗವು ನೋಟಿಸಿನ ಪ್ರತಿಯನ್ನು ಟ್ವೀಟಿಸಿದ್ದು,ಅದರಲ್ಲಿ ಮಲಿವಾಲ್ ಅವರು ಆಯೋಗದ ಕಳವಳಗಳಿಗೆ ಉತ್ತರಿಸುವಂತೆ ದಿಲ್ಲಿ ಪೊಲೀಸರಿಗೆ ಸೂಚಿಸಿದ್ದಾರೆ. ಎಫ್‌ಐಆರ್ ಪ್ರತಿ ಮತ್ತು ಕ್ರಮಪಾಲನಾ ವರದಿಯ ವಿವರಗಳನ್ನು ಸಲ್ಲಿಸುವಂತೆ ಹಾಗೂ ಟ್ರಾನ್ಸಿಟ್ ರಿಮಾಂಡ್‌ನ್ನು ಪಡೆಯುವಲ್ಲಿ ವೈಫಲ್ಯ ಮತ್ತು ದಿಶಾ ಅವರಿಗೆ ಅವರ ಆಯ್ಕೆಯ ವಕೀಲರನ್ನು ಒದಗಿಸದ್ದಕ್ಕೆ ಕಾರಣಗಳನ್ನು ನೀಡುವಂತೆ ನೋಟಿಸಿನಲ್ಲಿ ಪೊಲೀಸರಿಗೆ ಸೂಚಿಸಲಾಗಿದೆ.

ಪೊಲೀಸರಿಂದ ಸಮರ್ಥನೆ

ತನ್ಮಧ್ಯೆ,ದಿಶಾರ ಬಂಧನದಲ್ಲಿ ಪೊಲೀಸರಿಂದ ಯಾವುದೇ ಲೋಪವಾಗಿರುವುದನ್ನು ನಿರಾಕರಿಸಿದ ದಿಲ್ಲಿ ಪೊಲೀಸ್ ಆಯುಕ್ತ ಎಸ್.ಎನ್.ಶ್ರೀವಾಸ್ತವ ಅವರು,ಸ್ಥಾಪಿತ ಕಾರ್ಯವಿಧಾನಕ್ಕನುಗುಣವಾಗಿ ದಿಶಾರನ್ನು ಬಂಧಿಸಲಾಗಿದೆ. 22 ವರ್ಷದವರಾಗಿರಲಿ ಅಥವಾ 50 ವರ್ಷದವರಾಗಿರಲಿ,ಕಾನೂನಿನ ಮುಂದೆ ಎಲ್ಲರೂ ಒಂದೇ. ಅವರನ್ನು ನ್ಯಾಯಾಲಯದಲ್ಲಿ ಹಾಜರು ಪಡಿಸಿ ಐದು ದಿನಗಳ ಪೊಲೀಸ್ ಕಸ್ಟಡಿಗೆ ಪಡೆದುಕೊಳ್ಳಲಾಗಿದೆ. ಅವರ ಬಂಧನದಲ್ಲಿ ಲೋಪಗಳಿವೆ ಎನ್ನುವುದು ಸುಳ್ಳು ಎಂದು ಹೇಳಿದರು.

ನೂತನ ಕೃಷಿ ಕಾಯ್ದೆಗಳ ವಿರುದ್ಧ ರೈತರ ಪ್ರತಿಭಟನೆಗೆ ನೆರವಾಗಲು ಟೂಲ್‌ಕಿಟ್ ರೂಪಿಸುವಲ್ಲಿ ಭಾಗಿಯಾಗಿದ್ದರು ಎಂಬ ಆರೋಪದಲ್ಲಿ ದಿಲ್ಲಿ ಪೊಲೀಸರು ರವಿವಾರ ದಿಶಾರನ್ನು ಬೆಂಗಳೂರಿನ ಅವರ ನಿವಾಸದಿಂದ ಬಂಧಿಸಿದ್ದರು.

#BREAKING

21 वर्षीय पर्यावरण एक्टिविस्ट दिशा रवि की गिरफ्तारी के मामले में दिल्ली महिला आयोग अध्यक्षा @SwatiJaiHind ने पुलिस को भेजा नोटिस। pic.twitter.com/Al91jihoca

— Delhi Commission for Women - DCW (@DCWDelhi) February 16, 2021