ಮನಪಾ ಆಡಳಿತದಿಂದ ತುಘಲಕ್ ದರ್ಬಾರ್: ದ.ಕ. ಜಿಲ್ಲಾ ಕಾಂಗ್ರೆಸ್ ವಕ್ತಾರ ವಿನಯ್ ರಾಜ್ ಆರೋಪ
ಮಂಗಳೂರು : ಆಡಳಿತದಲ್ಲಿ ಸಂಪೂರ್ಣ ವೈಫಲ್ಯ ಕಂಡಿರುವ ಮಂಗಳೂರು ಮಹಾನಗರ ಪಾಲಿಕೆ ಆಡಳಿತವು ಪಾಲಿಕೆ ಸಭೆಯಲ್ಲಿ ವಿಪಕ್ಷದ ಸದಸ್ಯರನ್ನು ಧ್ವನಿ ಎತ್ತದಂತೆ ಮಾಡುವ ಮೂಲಕ ತುಘಲಕ್ ದರ್ಬಾರ್ ನಡೆಸುತ್ತಿದೆ ಎಂದು ದ.ಕ. ಜಿಲ್ಲಾ ಕಾಂಗ್ರೆಸ್ ವಕ್ತಾರ ಹಾಗೂ ಮನಪಾ ಸದಸ್ಯರಾದ ವಿನಯ್ರಾಜ್ ಆರೋಪಿಸಿದ್ದಾರೆ.
ದ.ಕ. ಜಿಲ್ಲಾ ಕಾಂಗ್ರೆಸ್ ಕಚೇರಿಯಲ್ಲಿಂದು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಪರಿಸರ ಮಾಲಿನ್ಯ ಮಂಡಳಿಯ ನಿಯಮಗಳನ್ನು ಗಾಳಿಗೆ ತೂರಿ ಅವೈಜ್ಞಾನಿಕ ಸ್ಮಾಟ್ ಸಿಟಿ ಕಾಮಗಾರಿ, ಅಮೃತ್ ಯೋಜನೆ, ನೀರಿನ ಬಿಲ್ನ ಅವಾಂತರ, ಸಮರ್ಪಕವಾಗಿ ಸಿಗದ ಟ್ರೇಡ್ ಲೈಸೆನ್ಸ್ ಮೂಲಕ ಕೋವಿಡ್ನಿಂದ ಆರ್ಥಿಕವಾಗಿ ಕಂಗೆಟ್ಟಿರುವ ಜನರನ್ನು ಮನಪಾ ಆಡಳಿತ ಮತ್ತಷ್ಟು ಕಂಗೆಡಿಸಿದೆ ಎಂದು ದೂರಿದರು.
2016ರಲ್ಲಿ ಸ್ಮಾರ್ಟ್ ಸಿಟಿಗೆ ಸಂಬಂಧಿಸಿ ಸಲ್ಲಿಸಲಾದ ಯೋಜನಾ ವರದಿ ಆಧಾರದ ಮೇರೆಗೆ ಮಂಗಳೂರಿಗೆ ಸ್ಮಾರ್ಟ್ ಸಿಟಿ ಯೋಜನೆ ಮಂಜೂರಾಗಿತ್ತು. ಯಾವುದೇ ಸಂಸದರು ಅಥವಾ ಶಾಸಕರ ಶಿಫಾರಸ್ಸಿನ ಮೇರೆಗೆ ಈ ಯೋಜನೆ ಮಂಜೂರಾಗಿಲ್ಲ. ಆದರೆ ನಗರದಲ್ಲಿ ಶಾಸಕರು, ಮನಪಾ ಆಡಳಿತದ ಯೋಜನೆಯಂತೆ ಅವೈಜ್ಞಾನಿಕವಾಗಿ ನಗರದ ವಿವಿಧ ಕಡೆಗಳಲ್ಲಿ ಕಾಮಗಾರಿಗಳಿಗಾಗಿ ಅಗೆದು ಹಾಕಲಾಗಿದೆ. ನಗರದಲ್ಲಿ ಅಂಗಡಿ ವಹಿವಾಟು ಹೊಂದಿದವರು ಮಾತ್ರವಲ್ಲದೆ ವಿವಿಧ ಕೆಲಸಗಳಿಗೆ ವಿವಿಧ ಜಿಲ್ಲೆಗಳಿಂದ ನಗರದ ಈ ಹೃದಯ ಭಾಗಗಳಿಗೆ ಆಗಮಿಸುವ ಜನರು ಪರದಾಡುವ ಪರಿಸ್ಥಿತಿ ನಿರ್ಮಿಸಲಾಗಿದೆ. ಈ ಬಗ್ಗೆ ಮನಪಾ ಸಾಮಾನ್ಯ ಸಭೆಯಲ್ಲಿ ಪ್ರಶ್ನಿಸಿದರೆ, ನ್ಯಾಯಾಲಯ ತಡೆಯಾಜ್ಞೆ ನೀಡಿದೆ. ಅದಕ್ಕಾಗಿ ಕೆಲಸ ಮಾಡಲಾಗುತ್ತಿಲ್ಲ ಎಂದು ಪ್ರತಿಪಕ್ಷದ ಸದಸ್ಯರನ್ನು ತಡೆಯುವುದು ಮಾತ್ರವಲ್ಲದೆ, ತಪ್ಪು ಮಾಹಿತಿ ನೀಡುತ್ತಿರುವುದಾಗಿ ನೇರ ಪಾಲಿಕೆ ಆಯುಕ್ತರೇ ಆಕ್ರೋಶ ವ್ಯಕ್ತಪಡಿಸುತ್ತಾರೆ. ತಡೆಯಾಜ್ಞೆ ಇದ್ದಲ್ಲಿ ರಥಬೀದಿ ಕೆಲಸ ಯಾಕೆ ಮಾಡಿದ್ದೀರಿ ಎಂದು ಪ್ರಶ್ನಿಸಿದ ವಿನಯ್ ರಾಜ್, ಮೇಯರ್, ಬಿಜೆಪಿ ಸದಸ್ಯರು ಮಾತ್ರವಲ್ಲದೆ ಆಯುಕ್ತರೇ ಪರಿಷತ್ತಿನಲ್ಲಿ ಜನತೆಗೆ ಸುಳ್ಳು ಮಾಹಿತಿ ಕೊಟ್ಟಿರುವುದು ಎಂದು ಅವರು ದೂರಿದರು.
ಸ್ಮಾಟ್ ಸಿಟಿ ಕಾಮಗಾರಿ ಕುರಿತಂತೆ ಕರ್ನಾಟಕ ಉಚ್ಚ ನ್ಯಾಯಾಲಯದ ಆದೇಶವನ್ನು ಉಲ್ಲೇಖಿಸಿ ಮಾತನಾಡಿದ ವಿನಯ್ರಾಜ್, ಕಾಮಗಾರಿಗೆ ತಡೆಯಾಜ್ಞೆಯನ್ನು ನ್ಯಾಯಾಲಯ ನೀಡಿದ್ದಲ್ಲ. ಬದಲಾಗಿ ನ್ಯಾಯಾಲಯ ಸ್ಮಾರ್ಟ್ ಸಿಟಿ ಕಾಮಗಾರಿಯ ತ್ಯಾಜ್ಯದ ವಿಲೇ ಕುರಿತಂತೆ ಕೇಳಿರುವ ಪ್ರಶ್ನೆಗೆ ಮನಪಾ ಆಯುಕ್ತರೇ ಅಂಡರ್ ಟೇಕಿಂಗ್ ನೀಡಿ ಕಾಮಗಾರಿ ಸ್ಥಗಿತಗೊಳಿಸುವುದಾಗಿ ಹೇಳಿಕೊಂಡಿದ್ದಾರೆ. ಇವರು ಮಾಡಿದ ತಪ್ಪಿಗೆ ಜನ ಅನುಭವಿಸುವಂತಾಗಿದೆ. ಈ ಸತ್ಯಾಂಶವನ್ನು ಜನರಿಗೆ ತಿಳಿಸುವ ಬದಲು ತಪ್ಪು ಮಾಹಿತಿ ನೀಡಿ ಜನರನ್ನು ದಾರಿತಪ್ಪಿಸಲಾಗುತ್ತಿದೆ ಎಂದು ಆರೋಪಿಸಿದರು.
ಕಳೆದ ಆಡಳಿತದ ಅವಧಿಯಲ್ಲೇ ಕುಂಜತ್ತಬೈಲ್ನಲ್ಲಿ ಹಳೆ ಕಟ್ಟಡದ ತ್ಯಾಜ್ಯ ಹಾಕಲು 2 ಎಕರೆ ಜಾಗವನ್ನು ಗುರುತಿಸಲಾಗಿತ್ತು. ಆದರೆ ಅದನ್ನು ಮುಂದುವರಿಸಿಲ್ಲ. ಸ್ಮಾರ್ಟ್ ಸಿಟಿ ಸಮಿತಿಗೆ ಪ್ರತಿಪಕ್ಷದಿಂದ ವಕೀಲ ಸದಸ್ಯರ ಹೆಸರನ್ನು ಶಿಫಾರಸ್ಸು ಮಾಡಿದ್ದರೆ ಅದನ್ನು ತಿರಸ್ಕರಿಸುವ ಮೂಲಕ ತಮ್ಮದು ತುಘಲಕ್ ದರ್ಬಾರ್ ಎಂಬುದನ್ನು ಬಿಜೆಪಿ ಸಾಬೀತುಪಡಿಸಿದೆ ಎಂದು ಮನಪಾ ಮಾಜಿ ಸದಸ್ಯ ಪ್ರಕಾಶ್ ಸಾಲಿಯಾನ್ ಹೇಳಿದರು.
ಗೋಷ್ಠಿಯಲ್ಲಿ ಕಾಂಗ್ರೆಸ್ ನಾಯಕರಾದ ಸಲೀಂ, ಅನಿಲ್ ಕುಮಾರ್, ಪ್ರವೀಣ್ ಚಂದ್ರ ಆಳ್ವ, ಲತೀಫ್ ಕಂದುಕ, ರಾಕೇಶ್ ದೇವಾಡಿಗ, ವಿಶ್ವಾಸ್ ಕುಮಾರ್ ದಾಸ್, ನೀರಜ್ಪಾಲ್, ಸಂಶುದ್ದೀನ್, ಸುನಿಲ್ ಮೊದಲಾದವರು ಉಪಸ್ಥಿತರಿದ್ದರು.
2011ರಲ್ಲಿ ರಾಜ್ಯದಲ್ಲಿ ಬಿಜೆಪಿ ಸರಕಾರ ಆಡಳಿತವಿದ್ದಾಗ ಪಾಲಿಕೆಗಳಲ್ಲಿನ ನೀರಿನ ದರವನ್ನು ಹೆಚ್ಚಿಸಲಾಗಿತ್ತು. ಆದರೆ 2013ರಲ್ಲಿ ಕಾಂಗ್ರೆಸ್ ಆಡಳಿತಕ್ಕೆ ಬಂದಾಗ ಏರಿಕೆ ಮಾಡಿರಲಿಲ್ಲ. ಬದಲಿಗೆ 65 ರೂ.ಗಳಿಗೆ 24,000 ಲೀಟರ್ ಕುಡಿಯುವ ನೀರಿನ್ನು ನೀಡಲಾಗುತ್ತಿತ್ತು. ಇದೀಗ ಮನಪಾದಲ್ಲಿ ಬಿಜೆಪಿ ಆಡಳಿತದಲ್ಲಿ 56 ರೂ.ಗಳಿಗೆ 8000 ಲೀಟರ್ ನೀರು ನೀಡಲಾಗುತ್ತಿದೆ. ಹಿಂದೆ ನೀಡಲಾಗುತ್ತಿದ್ದ ನೀರಿನ ಪ್ರಮಾಣದಲ್ಲಿ 16000 ಲೀಟರ್ ನೀರನ್ನೂ ಕಡಿತ ಮಾಡಿದ್ದು, ನೀರಿನ ದರವನ್ನು ಕಡಿತ ಮಾಡಿರುವುದಾಗಿ ಬಿಜೆಪಿ ಸಮರ್ಥಿಸುತ್ತಿದೆ. ಕಟ್ಟಡ ಪರವಾನಿಗೆಗೆ ಸಂಬಂಧಿಸಿ ವಸತಿ ಕಟ್ಟಡಗಳಿಗೆ ಚದರ ಅಡಿಗೆ 4 ರೂ.ಗಳಿದ್ದ ದರವನ್ನು 12 ರೂ.ಗಳಿಗೆ ಹಾಗೂ ವಾಣಿಜ್ಯ ಕಟ್ಟಡಗಳ ದರವನ್ನು 32 ರೂ.ಗಳಿಗೆ ಏರಿಕೆ ಮಾಡುವ ಮೂಲಕ ಜನಸಾಮಾನ್ಯರು ಕಣ್ಣೀರಿಡುವಂತೆ ಮಾಡಿದ್ದಾರೆ ಎಂದು ವಿನಯ್ರಾಜ್ ಆರೋಪಿಸಿದರು.
