ಮಾ.20 ರಂದು ನೂತನ ಕೃಷಿ ಕಾಯ್ದೆ ವಿರೋಧಿಸಿ ಶಿವಮೊಗ್ಗದಲ್ಲಿ ಮಹಾಪಂಚಾಯತ್

ಶಿವಮೊಗ್ಗ: ಕೇಂದ್ರ ಸರ್ಕಾರ ಸುಗ್ರಿವಾಜ್ಣೆಗಳ ಮೂಲಕ  ಜಾರಿಗೆ ತಂದಿರುವ  ನೂನತ ಕೃಷಿ ಕಾಯ್ದೆಗಳನ್ನು ರದ್ದು ಮಾಡಬೇಕು ಎಂಬ ರೈತರ ಹೋರಾಟ ತೀವ್ರಗೊಂಡಿದೆ. ಕೇಂದ್ರ ಸರ್ಕಾರದ ಜೊತೆ ನಡೆದ ಹನ್ನೊಂದು ಸುತ್ತಿನ ಮಾತುಕತೆ ಫಲಪ್ರದವಾಗಿಲ್ಲ. ಈ ಹಿನ್ನಲೆಯಲ್ಲಿ ದೇಶಾದ್ಯಂತ ಹೋರಾಟವನ್ನು ತೀವ್ರಗೊಳಿಸಲು ನಿರ್ಧರಿಸಿರುವ ರೈತ ಸಂಘಟನೆಗಳು ಸಂಯುಕ್ತ ಕಿಸಾನ್ ಮೋರ್ಚಾ ನೇತೃತ್ವದಲ್ಲಿ ಚಳವಳಿಗಳ ಜಿಲ್ಲೆ ಶಿವಮೊಗ್ಗದಲ್ಲಿ ಮಹಾಪಂಚಾಯತ್ ನಡೆಸಲು ಬೃಹತ್ ಸಿದ್ದತೆ ನಡೆಸಿದೆ.

ಸಂಯುಕ್ತ ಕಿಸಾನ್ ಮೋರ್ಚಾದ ನೇತೃತ್ವದಲ್ಲಿ ಐಕ್ಯ ಹೋರಾಟ ಸಂಘಟನೆ, ರಾಜ್ಯ ರೈತ ಸಂಘ ಮತ್ತು ಹಸಿರು ಸೇನೆ, ಕಾಂಗ್ರೆಸ್ ಮತ್ತು ಜೆಡಿಎಸ್ ಪಕ್ಷ, ದಲಿತ ಹಾಗೂ ಮಹಿಳಾ ಸಂಘಟನೆಗಳು, ಕಾರ್ಮಿಕ ಸಂಘಟನೆ ಮತ್ತು ಕನ್ನಡ ಪರ ಸಂಘಟನೆಗಳ ಜೊತೆಗೆ ಬೀದಿ ಬದಿ ವ್ಯಾಪಾರಿಗಳು ಹೀಗೆ ಬಿಜೆಪಿ ಮತ್ತು ಸಂಘ ಪರಿವಾರಗಳನ್ನು ಹೊರತು ಪಡಿಸಿ ಇತರ ಎಲ್ಲಾ ಸಂಘಟನೆಗಳ ಒಕ್ಕೂಟದ ವತಿಯಿಂದ ಮಾ.20 ರಂದು ಶಿವಮೊಗ್ಗದಲ್ಲಿ ಬೃಹತ್ ಜನಶಕ್ತಿ ಹೋರಾಟವನ್ನು ಆರಂಭಿಸಲಾಗುತ್ತಿದೆ.

ಪತ್ರಿಕಾಗೋಷ್ಠಿಯಲ್ಲಿ ರೈತ ನಾಯಕ ಕೆ.ಟಿ.ಗಂಗಾಧರ್ ಮಾತನಾಡಿ, ಸುಗ್ರೀವಾಜ್ಞೆಯ ಮೂಲಕ ಕೃಷಿಕಾಯ್ದೆಗೆ ತಿದ್ದುಪಡಿ ತಂದಿರುವುದು ಪ್ರಜಾಪ್ರಭುತ್ವದ ವಿರೋಧಿ ನಡೆಯಾಗಿದೆ. ರೈತನ ಅಗತ್ಯ ಹೋರಾಟವನ್ನ ಭಾರತ ಸರ್ಕಾರ ದಿಕ್ಕು ಬದಲಾಯಿಸಲು ಬಂದೂಕೊಂದನ್ನ ಬಿಟ್ಟು ರಸ್ತೆಗಳಿಗೆ ಮೊಳೆ ಹೊಡೆದು ಹೋರಾಟ ಹತ್ತಿಕ್ಕಿದೆ. 11 ಬಾರಿ ಮಾತುಕತೆ ನಡೆಸಲಾಗಿದೆ. ಕೇಂದ್ರ ಸರ್ಕಾರ ಕಿಂಚಿತ್ತು ಸಂಧಾನದಲ್ಲಿ ಮುಂದಾಗುತ್ತಿಲ್ಲ ಎಂದು ಕೇಂದ್ರದ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.

ಶಿವಮೊಗ್ಗದಲ್ಲಿ ಹೋರಾಟ ನಡೆಸಲು ಉದ್ದೇಶವೆಂದರೆ ಇದು ರಾಷ್ಟ್ರೀಯ ಹೋರಾಟವಲ್ಲವೆಂದು ಹೇಳುವ ಪ್ರಯತ್ನ ಸರ್ಕಾರ ಮಾಡುತ್ತಿದೆ. ಈ ಹಿನ್ನಲೆಯಲ್ಲಿ ಸರ್ಕಾರಕ್ಕೆ ಸಂದೇಶ ಕಳುಹಿಸಬೇಕಿದೆ. ಇದು ಕೇವಲ ಉತ್ತರ ಭಾರತದ ಹೋರಾಟವಲ್ಲ ಇಡೀ ಭಾರತದ ಹೋರಾಟ ಇದಾಗಿದೆ ಎಂಬ ಸಂದೇಶ ರವಾನಿಸಲು ಶಿವಮೊಗ್ಗವನ್ನ ಆಯ್ಕೆ ಮಾಡಿಕೊಳ್ಳಲಾಗಿದೆ ಎಂದರು.

ಭೂಮಿ, ಕೃಷಿ ಜ್ಞಾನ ,ಬಿತ್ತನೆ, ಉತ್ಪಾದನೆ, ಆಹಾರ ಸಂರಕ್ಷಣೆಗಾಗಿ ಹೋರಾಟ ಮಾಡಬೇಕಿದೆ. ರೈತ ಹೋರಾಟವನ್ನು ಬೆಂಬಲಿಸುವರನ್ನೆಲ್ಲಾ ದೇಶದ್ರೋಹಿ ಎಂದು ಬಿಂಬಲಿಸಲಾಗುತ್ತಿದೆ. ಇದಕ್ಕೆ ತಕ್ಕ ಉತ್ತರ ನೀಡುವ ಅನಿವಾರ್ಯತೆ ಇಲ್ಲಿ ನಿರ್ಮಾಣವಾಗಿದೆ ಎಂದ ಅವರು, ಅಂದು ಎಲ್ಲಾ ಪಕ್ಷದವರು ಬೀದಿ ಬದಿ ವ್ಯಾಪಾರಸ್ಥರು, ಸಂಘಟನೆಗಳು ಬ್ಯಾನರ್ ಅಡಿ ಬಾವುಟ ಅಡಿ ಹೋರಾಡುವುದಿಲ್ಲ. ಹಸಿರು ಶಾಲೆ ಹಾಕಿಕೊಂಡೇ ಬೀದಿಗಿಳಿದು ಹೋರಾಟ ನಡೆಸಲಿದ್ದಾರೆ. ಅಂದು ರೈತ ಪಂಚಾಯತ್ ನಡೆಯಲಿದೆ. ಕಾಯ್ದೆ ಬಗ್ಗೆ ಟಿಕಾಯತ್ ವಿವರಿಸಲಿದ್ದಾರೆ ಎಂದರು.

ನೂತನ ಕೃಷಿಕಾಯ್ದೆಯಿಂದ ಮುಂದೆ ಆಹಾರ ಭದ್ರತೆ ಕಾಡಿ ಬಡವರು ಬದುಕುವುದೇ ಕಷ್ಟವಾಗುವ ದಿನಗಳು ಬರಬಹುದು, ಭೂಮಿ, ಜ್ಞಾನ, ಉತ್ಪಾದನೆ, ಆಹಾರ ರಕ್ಷಣೆ, ಬಂಡವಾಳ, ಬದುಕು ಮುಂತಾದ ಎಲ್ಲಾ ಕ್ಷೇತ್ರಕ್ಕೂ ಬಂಡವಾಳದಾರರು ಬರುವ ಮತ್ತು ಅವರಿಗೆ ಮಣೆಹಾಕುವ ಹುನ್ನಾರ ಮೋದಿ ಸರ್ಕಾರದ್ದು ಎಂದು ಟೀಕಿಸಿದರು.

ರೈತ ಸಂಘದ ಮುಖಂಡ ಹೆಚ್.ಆರ್.ಬಸವರಾಜಪ್ಪ ಮಾತನಾಡಿ, ಬಂಡವಾಳದಾರರಿಗೆ ಮಣೆಹಾಕುವ ಈ ಕೃಷಿ ಕಾಯ್ದೆಗಳು ಪ್ರಜಾಪ್ರಭುತ್ವ ರಾಷ್ಟ್ರದಲ್ಲಿ ಸರ್ವಾಧಿಕಾರಿಯೊಬ್ಬನ ಮನಸ್ಥಿತಿಯಿಂದ ಬರುತ್ತಿದೆ. ಇದು ಕೇವಲ ಕಾಯ್ದೆಗಳನ್ನು ಮಾತ್ರ ವಿರೋಧಿಸಿ ಮಾಡುವ ಹೋರಾಟವಲ್ಲ. ಈ ಸರ್ವಾಧಿಕಾರಿ ಸರ್ಕಾರವನ್ನು ಕಿತ್ತೊಗೆಯುವ ತನಕ ನಮ್ಮ ಹೋರಾಟ ಮುಂದುವರೆಯುತ್ತದೆ. ಕಾಯ್ದೆಗಳನ್ನು ಯಾವುದೊ ಮತ್ತೊಂದು ಸಂದರ್ಭದಲ್ಲಿ ಕೇಂದ್ರ ಸರ್ಕಾರ ವಾಪಸ್ಸು ಪಡೆಯಬಹುದು ಆದರೆ ಬಡವರಿಗೆ ಕೊಡುವ ಕಿರುಕುಳ ಮಾತ್ರ ತಪ್ಪುವುದಿಲ್ಲ. ಹಾಗಾಗಿ ಇದು ಕೂಡ ಒಂದು ಅಘೋಷಿತ ತುರ್ತು ಪರಿಸ್ಥಿತಿಯೇ ಆಗಿದೆ. ಅಂದು ಕಾಂಗ್ರೆಸ್ ವಿರುದ್ಧ ನಾವು ಹೋರಾಡಿದ ನೆನಪಿದೆ. ಹಾಗೆಯೇ ಇಂದು ಬಿಜೆಪಿ ವಿರುದ್ಧ ಹೋರಾಟ ಮಾಡುವ ಸಂದರ್ಭ ಬಂದಿದೆ ಎಂದರು.

ಕೆ.ಪಿ.ಶ್ರೀಪಾಲ್ ಮಾತನಾಡಿ, ಒಂದೇ ವೇದಿಕೆಯಲ್ಲಿ ಎಲ್ಲರೂ ಒಟ್ಟಾಗಿ ಐಕ್ಯತೆಯಿಂದ ಹೋರಾಡುವ ವೇದಿಕೆಯಿದಾಗಿದೆ. ಈ ಹೋರಾಟದ ಸ್ಥಳವನ್ನು ಮಾ.20 ರಂದು ನಡೆಯುವ ಹೋರಾಟದ ಸ್ಥಳವನ್ನು ಮುಂದೆ ತಿಳಿಸಲಾಗುವುದು. ಈ ಹೋರಾಟಕ್ಕೆ ರಾಷ್ಟ್ರೀಯ ಹೋರಾಟಗಾರರಾದ ರಾಕೇಶ್ ಟಿಕಾಯಿತ್, ಯಧುವೀರ್ ಸಿಂಗ್, ದರ್ಶನ್ ಪಾಲ್, ಯೋಗೇಂದ್ರ ಸೇರಿದಂತೆ ಹಲವರು ಭಾಗವಹಿಸಲಿದ್ದಾರೆ. ಇವರ ಜೊತೆಗೆ ಕಾಗೋಡು ತಿಮ್ಮಪ್ಪ ಸೇರಿದಂತೆ ಜಿಲ್ಲೆಯ ಎಲ್ಲಾ ಹೋರಾಟಗಾರರು, ಸಮಾಜವಾದಿ ಹಿರಿಯರು, ಪ್ರಗತಿಪರರು ಭಾಗಹಿಸಲಿದ್ದಾರೆ ಎಂದರು.

ಪತ್ರಿಕಾಗೋಷ್ಠಿಯಲ್ಲಿ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಹೆಚ್.ಎಸ್.ಸುಂದರೇಶ್, ಮಾಜಿ ಶಾಸಕಿ ಶಾರದಾ ಪೂರ್‍ಯಾನಾಯ್ಕ್, ಡಿಎಸ್‌ಎಸ್ ಮುಖಂಡ ಎಂ.ಗುರುಮೂರ್ತಿ, ಹೆಚ್. ಹಾಲೇಶಪ್ಪ, ಪ್ರೆಸ್ ಟ್ರಸ್ಟ್ ಅಧ್ಯಕ್ಷ ಎನ್.ಮಂಜುನಾಥ್, ಕಾಂಗ್ರೆಸ್ ಮುಖಂಡರಾದ ಎನ್.ರಮೇಶ್, ಹೆಚ್.ಸಿ.ಯೋಗೀಶ್, ಕಾಶಿ ವಿಶ್ವನಾಥ್, ಪಾಲಾಕ್ಷಿ, ಶಿವಮೂರ್ತಿ, ಪ್ರಗತಿಪರ ಹೋರಾಟಗಾರ ಕೆ.ಎಲ್.ಅಶೋಕ್, ಶಿಜುಪಾಶ ಸೇರಿದಂತೆ ಹಲವರಿದ್ದರು.

ರೈತ ಸಂಘಟನೆಗಳು ಎರಡು ಭಾಗವಾಗಿದ್ದವು. ನಾವ್ಯಾರು ಒಟ್ಟಿಗೆ ಕೂರುವ ಪರಿಸ್ಥಿತಿಯಲ್ಲಿರಲಿಲ್ಲ. ಆದರೆ ಪ್ರಧಾನಿ ಮೋದಿ ಒಟ್ಟಿಗೆ ಸೇರಿಸಿದ್ದಾರೆ. ಹಾಗಾಗಿ ನಮ್ಮನ್ನೆಲ್ಲಾ ಒಟ್ಟಿಗೆ ಸೇರಿಸಿ ಹೋರಾಟ ಮಾಡುವಂತೆ ಮಾಡಿರುವ ಪ್ರಧಾನಿ ಮೋದಿಗೆ ಧನ್ಯವಾದ ಹೇಳಬೇಕಿದೆ ಎಂದು ರೈತ ನಾಯಕರಾದ ಕೆ.ಟಿ.ಗಂಗಾಧರ್ ಹಾಗೂ ಹೆಚ್.ಆರ್.ಬಸವರಾಜಪ್ಪ ಹೇಳಿದರು.