ಉಡುಪಿ ಮಿನಿವಿಧಾನ ಸೌಧದೊಳಗಿನ ಲೋಪಗಳ ಪರಿಶೀಲನೆ

ಉಡುಪಿ, ಮಾ.6: ಕರ್ನಾಟಕ ರಾಷ್ಟ್ರ ಸಮಿತಿ ಪಕ್ಷದ ವತಿಯಿಂದ ಲಂಚ ಮುಕ್ತ ಕರ್ನಾಟಕ ಅಭಿಯಾನದ ಪ್ರಯುಕ್ತ ರಾಜ್ಯಾಧ್ಯಕ್ಷ ರವಿಕೃಷ್ಣಾ ರೆಡ್ಡಿ ನೇತೃತ್ವದಲ್ಲಿ ಇಂದು ಉಡುಪಿ ಮಿನಿವಿಧಾನ ಸೌಧಕ್ಕೆ ಭೇಟಿ ನೀಡಿ, ಮೂಲ ಭೂತ ಸೌಕರ್ಯ, ಸಿಬ್ಬಂದಿಗಳ ವರ್ತನೆ ಹಾಗೂ ಸೇವಾ ಸೌಲಭ್ಯ ಗಳ ಬಗ್ಗೆ ಪರಿಶೀಲಿಸಿ, ಲೋಪಗಳ ಪಟ್ಟಿಯನ್ನು ತಹಶೀಲ್ದಾರ್‌ಗೆ ಸಲ್ಲಿಸಲಾಯಿತು.

ಬನ್ನಂಜೆಯಲ್ಲಿರುವ ತಾಲೂಕು ಕಚೇರಿ ಮಿನಿ ವಿಧಾನ ಸೌಧಕ್ಕೆ ರವಿ ಕೃಷ್ಣಾ ರೆಡ್ಡಿ ನೇತೃತ್ವದ ಕೆಆರ್‌ಎಸ್ ಪಕ್ಷದ ನಿಯೋಗ ಮೂರು ಮಹಡಿಯ ಕಟ್ಟಡದ ಎಲ್ಲ ಕೋಣೆಗಳಿಗೂ ತೆರಳಿ ಅಧಿಕಾರಿಗಳ ಕ್ಯಾಬಿನ್‌ನಲ್ಲಿ ನಾಮಫಲಕ ಇಲ್ಲದಿರುವುದು, ಹೊರ ಗುತ್ತಿಗೆ ನೌಕರರು ಗುರುತಿನ ಚೀಟಿ ಹಾಕಿಕೊಳ್ಳದಿರು ವುದು ಸೇರಿದಂತೆ ಹಲವು ಲೋಪಗಳನ್ನು ಗುರುತಿಸಿ ಪಟ್ಟಿ ಮಾಡಲಾಯಿತು.

‘ನೀವು ಸರಕಾರಿ ನೌಕರರು ಎಂಬುದಾಗಿ ಸಾರ್ವಜನಿಕರು ಹೇಗೆ ನಂಬುವುದು, ಬ್ಯಾಜ್ ಇಲ್ಲ, ನಾಮಫಲಕ ಇಲ್ಲದೆ ಜನ ಹೇಗೆ ಗುರುತಿಸಿ ಸೇವೆ ಪಡೆದುಕೊಳ್ಳುವುದು’ ಎಂದು ರವಿಕೃಷ್ಣಾ ರೆಡ್ಡಿ ಅಧಿಕಾರಿಗಳನ್ನು ಪ್ರಶ್ನಿಸಿದರು. ಆದುದರಿಂದ ನಿಮ್ಮ ಕ್ಯಾಬಿನ್‌ನಲ್ಲಿ ಪದನಾಮಗಳನ್ನು ಪ್ರದರ್ಶಿಸ ಬೇಕು ಮತ್ತು ಗುರುತಿನ ಚೀಟಿಯನ್ನು ಧರಿಸಿದರೆ ಸಾರ್ವಜನಿಕರಿಗೆ ಅನುಕೂಲವಾಗುತ್ತದೆ ಎಂದು ಅವರು ತಿಳಿಸಿದರು. ಅದರಂತೆ ಉಪ ತಹಶೀಲ್ದಾರ್ ಸೇರಿದಂತೆ ಕೆಲವು ಅಧಿಕಾರಿಗಳು ತಕ್ಷಣವೇ ನಾಮಫಲಕವನ್ನು ಹಾಕಿಕೊಂಡರು.

ಕಚೇರಿಯಲ್ಲಿ ಅನಧಿಕೃತ ವ್ಯಕ್ತಿಗಳು !

ಆಹಾರ ವಿಭಾಗದಲ್ಲಿ ಹಾಗೂ ಸರ್ವೇಯರ್ ಕಚೇರಿಯಲ್ಲಿ ಅನಧಿಕೃತ ವ್ಯಕ್ತಿಗಳು ಸರಕಾರಿ ನೌಕರರ ಜೊತೆ ಕೆಲಸ ಮಾಡುತ್ತಿರುವುದನ್ನು ನಿಯೋಗ ಪತ್ತೆ ಹಚ್ಚಿ, ತಹಶೀಲ್ದಾರ್ ಗಮನಕ್ಕೆ ತಂದಿತು.

ಆಹಾರ ವಿಭಾಗದಲ್ಲಿ ವ್ಯಕ್ತಿಯೊಬ್ಬರು ಯಾವುದೇ ನೇಮಕಾತಿ ಇಲ್ಲದೆ, ಕೇವಲ 5000ರೂ. ಸಂಬಳಕ್ಕಾಗಿ ಕೆಲಸ ನಿರ್ವಹಿಸುತ್ತಿರುವುದು ಕಂಡು ಬಂತು. ಅದೇ ರೀತಿ ಸರ್ವೇಯರ್‌ಗೆ ಹೆಲ್ಪರ್ ಆಗಿ ವ್ಯಕ್ತಿಯೊಬ್ಬರು ಯಾವುದೇ ಸಂಬಳ ಇಲ್ಲದೆ ಕೆಲಸ ನಿರ್ವಹಿಸುತ್ತಿರುವುದನ್ನು ನಿಯೋಗ ಗುರುತಿಸಿದೆ.

ಈ ರೀತಿ ಸರಕಾರಿ ಕಚೇರಿಯಲ್ಲಿ ಕರ್ತವ್ಯ ನಿರ್ವಹಿಸುವುದು ಕಾನೂನು ಉಲ್ಲಂಘನೆಯಾಗಿದೆ. ಈ ಬಗ್ಗೆ ಪೊಲೀಸರಿಗೆ ದೂರು ನೀಡಿದರೆ ಜೈಲಿನಲ್ಲಿ ಇರಬೇಕಾಗುತ್ತದೆ ಎಂದು ರವಿಕೃಷ್ಣಾ ರೆಡ್ಡಿ ಸಂಬಂಧಪಟ್ಟವರಿಗೆ ತಿಳಿಸಿದರು. ಅಲ್ಲದೆ ಈ ವಿಚಾರವನ್ನು ತಹಶೀಲ್ದಾರ್ ಗಮನಕ್ಕೂ ತಂದು ಸೂಕ್ತ ಕ್ರಮ ತೆಗೆದು ಕೊಳ್ಳುವಂತೆ ಮನವಿ ಮಾಡಿದರು.

ಕ್ರಮಕ್ಕೆ ತಹಶೀಲ್ದಾರ್‌ಗೆ ಮನವಿ

ಕೌಂಟರ್‌ನಲ್ಲಿ ಸರತಿ ಸಾಲಿನಲ್ಲಿ ಕಾಯುವ ಸಾರ್ವಜನಿಕರಿಗೆ ಅನುಕೂಲ ವಾಗುವಂತೆ ಟೋಕನ್ ವ್ಯವಸ್ಥೆ ಮಾಡಬೇಕು. ಸರಕಾರಿ ಹಾಗೂ ಹೊರಗುತ್ತಿಗೆ ನೌಕರರು ಕಡ್ಡಾಯವಾಗಿ ಗುರುತಿನ ಚೀಟಿ ಧರಿಸುವಂತೆ ಕ್ರಮ ತೆಗೆದುಕೊಳ್ಳ ಬೇಕು ಸೇರಿದಂತೆ ಹಲವು ಬೇಡಿಕೆಗಳ ಮನವಿ ಯನ್ನು ಪಕ್ಷದ ನಿಯೋಗ ತಹಶೀಲ್ದಾರ್ ಪ್ರದೀಪ್ ಕುರ್ಡೆಕರ್ ಅವರಿಗೆ ಸಲ್ಲಿಸಿತು.

ಕಚೇರಿಯಲ್ಲಿ ಲಭ್ಯವಿರುವ ಸೇವೆಗಳ ಪಟ್ಟಿಯನ್ನು ಕಚೇರಿಯ ಆವರಣದ ಮುಂಭಾಗ ಪ್ರದರ್ಶಿಸಬೇಕು. ನೌಕರರ ಸ್ಥಳದಲ್ಲಿ ಅನಧಿಕೃತವಾಗಿ ಇರುವ ಮಧ್ಯವರ್ತಿಗಳ ವಿರುದ್ಧ ಕಾನೂನು ಕ್ರಮ ತೆಗೆದುಕೊಳ್ಳಬೇಕು. ನೌಕರರು ಸಾರ್ವಜನಿಕರೊಂದಿಗೆ ಸೌಜನ್ಯದಿಂದ ವರ್ತಿಸದಿರುವ ಬಗ್ಗೆ ಕ್ರಮ ಜರಗಿಸ ಬೇಕು. ವಿನಾಕಾರಣ ಸಾರ್ವಜನಿಕರ ಕೆಲಸಗಳನ್ನು ವಿಳಂಬ ಮಾಡುತ್ತಿ ರುವ ಕುರಿತ ದೂರುಗಳನ್ನು ಪರಿಶೀಲನೆ ಮಾಡಬೇಕು. ಸರದಿ ಸಾಲಿನಲ್ಲಿ ನಿಂತವರಿಗೆ ಕುಳಿತುಕೊಳ್ಳಲು ಕುರ್ಚಿ ವ್ಯವಸ್ಥೆ ಮಾಡಬೇಕು. ಹಾಜರಾತಿ ಪಟ್ಟಿಯನ್ನು ಪ್ರಕಟಿಸಬೇಕು. ಅಟಲ್‌ಜೀ ಜನಸ್ನೇಹಿ ಕೇಂದ್ರದಲ್ಲಿ ದರಪಟ್ಟಿ ಪ್ರದರ್ಶಿಸಬೇಕು ಎಂದು ಮನವಿಯಲ್ಲಿ ಒತ್ತಾಯಿಸಲಾಗಿದೆ.

ಈ ಸಂದರ್ಭದಲ್ಲಿ ಜಿಲ್ಲಾಧ್ಯಕ್ಷ ಕಿರಣ್ ಕುಮಾರ್, ರಾಜ್ಯ ಯುವ ಘಟಕದ ಕಾರ್ಯದರ್ಶಿ ರಾಮದಾಸ್ ಪೈ, ಅಲ್ಪಸಂಖ್ಯಾತರ ಘಟಕದ ರಜ್ಯಾಧ್ಯಕ್ಷ ಶಾಹಿದ್ ಅಲಿ, ಜಿಲ್ಲಾಧ್ಯಕ್ಷ ಇಕ್ಬಾಲ್ ಕುಂಜಿಬೆಟ್ಟು, ದ.ಕ. ಜಿಲ್ಲಾಧ್ಯಕ್ಷ ಅಲೆಕ್ಸ್, ರಾಜ್ಯ ಉಪಾಧ್ಯಕ್ಷ ಪೌಲ್, ಮುಖಂಡರಾದ ಸಲೀಂ, ಭರತ್, ಮಮತಾ ಅಮೀನ್, ಜಾಹೀದ್, ರೇಷ್ಮಾ, ಸಂಧ್ಯಾ, ಶ್ರೀಲತಾ ಮೊದಲಾದವರು ಉಪಸ್ಥಿತರಿದ್ದರು.

ಉಡುಪಿ ಮಿನಿ ವಿಧಾನ ಸೌಧದಲ್ಲಿ ಒಟ್ಟು 17 ಲೋಪದೋಷಗಳು ಕಂಡು ಬಂದಿವೆ. ಆಹಾರ ವಿಭಾಗದಲ್ಲಿ ಶಿರಸ್ತೇದಾರರು ಅನಧಿಕೃತವಾಗಿ ವ್ಯಕ್ತಿಯೊಬ್ಬ ರನ್ನು ನೇಮಿಸಿಕೊಂಡು 5000ರೂ. ನೀಡಿ ಸರಕಾರಿ ದಾಖಲೆಗಳನ್ನು ತೆಗೆಯಲು ಮತ್ತು ಕೌಂಟರ್‌ನಲ್ಲಿ ಕುಳಿತುಕೊಳ್ಳಲು ಅವಕಾಶ ನೀಡಿರುವುದು ಕಂಡು ಬಂದಿದೆ. ಇದು ಕಾನೂನು ಬಾಹಿರವಾಗಿದೆ. ಬುದ್ದಿವಂತ ಜಿಲ್ಲೆ ಎನಿಸಿರುವ ಉಡುಪಿಯ ಜನತೆ ಯಾವುದೇ ಕಾರಣಕ್ಕೂ ಸೇವೆ ಪಡೆ ಯಲು ಲಂಚ ನೀಡಬಾರದು. ಸಕಾಲವನ್ನು ಬಳಸಿಕೊಳ್ಳಬೇಕು.
-ರವಿಕೃಷ್ಣಾ ರೆಡ್ಡಿ, ರಾಜ್ಯಾಧ್ಯಕ್ಷರು, ಕೆಆರ್‌ಎಸ್