ಕೊರೋನದಿಂದಾಗಿ ಭಾರತದಲ್ಲಿ ಬಡತನ ಉಲ್ಬಣ: ಬಡವರ ಪಟ್ಟಿಗೆ ಸೇರಿದ 7.50 ಕೋಟಿ ಮಂದಿ

ಹೊಸದಿಲ್ಲಿ,ಮಾ19: ಕೊರೋನ ವೈರಸ್ ಸೋಂಕಿನ ಹಾವಳಿ ಹಾಗೂ ಲಾಕ್‌ಡೌನ್‌ನಿಂದಾಗಿ ಉಂಟಾದ ಆರ್ಥಿಕ ಕುಸಿತದಿಂದಾಗಿ ಭಾರತದಲ್ಲಿ ಮಧ್ಯಮವರ್ಗದ ಜನಸಂಖ್ಯೆಯು 3.20 ಕೋಟಿಗೆ ಇಳಿಕೆಯಾಗಿದೆ ಎಂಬ ಆತಂಕಕಾರಿ ವಿಷಯವನ್ನು ಸಂಶೋಧನಾ ವರದಿಯೊಂದು ಬಹಿರಂಗಪಡಿಸಿದೆ. 2011 ಹಾಗೂ 2019ರ ನಡುವಿನ ಅವಧಿಯಲ್ಲಿ 5.70 ಕೋಟಿ ಜನರು ಮಧ್ಯಮವರ್ಗದ ವ್ಯಾಪ್ತಿಗೆ ಸೇರ್ಪಡೆಗೊಂಡಿರುವುದನ್ನು ಪರಿ ಗಣನೆಗೆ ತೆಗೆದುಕೊಂಡಲ್ಲಿ 2020ರಲ್ಲಿ ಮಧ್ಯಮವರ್ಗದ ಜನಸಂಖ್ಯೆ ಯಲ್ಲಿ 3.20 ಕೋಟಿಯಷ್ಟು ಕುಸಿದಿರುವುದು ಕಳವಳಕಾರಿಯೆಂದು ‘ಪ್ಯೂ ರಿಸರ್ಚ್ ಸೆಂಚರ್’ ಗುರುವಾರ ಪ್ರಕಟಿಸಿದ ವರದಿ ತಿಳಿಸಿದೆ.

ಕೋವಿಡ್-19 ಲಾಕ್‌ಡೌನ್‌ನಿಂದಾಗಿ ಉಂಟಾದ ಆರ್ಥಿಕ ಹಿಂಜರಿತದಿಂದಾಗಿ ಭಾರತದಲ್ಲಿನ ಬಡವರ ಸಂಖ್ಯೆಯು 7.50 ಕೋಟಿ ಯಷ್ಟು ಹೆಚ್ಚಾಗಿದ್ದು, ಇದು ಜಾಗತಿಕ ಬಡತನದ ಪ್ರಮಾಣದ ಒಟ್ಟು ಹೆಚ್ಚಳದ ಶೇಕಡ 60ರಷ್ಟಾಗಿದೆ.

 2011ರಿಂದ 2019ರ ನಡುವಿನ ಅವಧಿಯಲ್ಲಿ ಭಾರತದಲ್ಲಿನ ಬಡ ವರ ಜನಸಂಖ್ಯೆಯು 34 ಕೋಟಿಯಿಂದ 7.80 ಕೋಟಿಗೆ ಕುಸಿದಿತ್ತು. ಆದರೆ 2020ರಲ್ಲಿ ಭಾರತದಲ್ಲಿನ ಬಡವರ ಸಂಖ್ಯೆ 7.50 ಕೋಟಿಯಷ್ಟು ಹೆಚ್ಚಾಗಿದೆ. ಇದರೊಂದಿಗೆ ಬಡತನ ನಿವಾರಣೆಯಲ್ಲಿ ಭಾರತ ಸಾಧಿಸಿದ ಹಲವಾರು ವರ್ಷಗಳ ಪ್ರಗತಿಗೆ ಹಿನ್ನಡೆಯಾಗಿದೆಯೆಂದು ಪ್ಯೂ ಇಂಟರ್‌ನ್ಯಾಶನಲ್ ವರದಿ ತಿಳಿಸಿದೆ.

ಜಾಗತಿಕ ಬಡತನದ ಪ್ರಮಾಣದಲ್ಲಿ ತೀವ್ರ ಹೆಚ್ಚಳ

ಕೊರೋನ ವೈರಸ್ ಸಾಂಕ್ರಾಮಿಕದ ಹಾವಳಿಯು ಜಗತ್ತಿನಾದ್ಯಂತ ಮಧ್ಯಮವರ್ಗದ ಜನಸಂಖ್ಯೆಯ ಬೆಳವಣಿಗೆಯಲ್ಲಿ ಗಣನೀಯ ಕುಸಿತವುಂಟು ಮಾಡಿದೆ ಹಾಗೂ ಬಡತನದ ಪ್ರಮಾಣದಲ್ಲಿ ತೀವ್ರವಾಗಿ ಹೆಚ್ಚಳವಾಗಿದೆಯೆಂದು ವರದಿ ಆತಂಕ ವ್ಯಕ್ತಪಡಿಸಿದೆ.

ಕೊರೋನ ಸಾಂಕ್ರಾಮಿಕ ತಲೆದೋರುವ ಮುನ್ನ 2020ರಲ್ಲಿ 138 ಕೋಟಿ ಜನರು ಜಾಗತಿಕ ಮಧ್ಯವರ್ಗದ ವ್ಯಾಪ್ತಿಗೆ ಸೇರ್ಪಡೆಗೊಳ್ಳುವ ನಿರೀಕ್ಷೆಯಿತ್ತು. ಆದರೆ ಕೊರೋನಾ ಸೋಂಕು ಜಾಗತಿಕವಾಗಿ ಹರಡಿದ ಬಳಿಕ ಈ ಸಂಖ್ಯೆ 132 ಕೋಟಿಗೆ ಕುಸಿದಿದೆ.

ಆರ್ಥಿಕ ಬೆಳವಣಿಗೆ ಒಂದು ವರ್ಷ ಕುಂಠಿತ

ಕೊರೋನಾ ಸಾಂಕ್ರಾಮಿಕವು, ಅರ್ಥಿಕ ಬೆಳವಣಿಗೆಯ ಒಂದು ವರ್ಷವನ್ನು ಅಳಿಸಿಹಾಕಿದ್ದು, 2019ರಿಂದ 2020ರವರೆಗೆ ಜಾಗತಿಕ ಮಧ್ಯಮವರ್ಗದ ಜನಸಂಖ್ಯೆಯ ಪ್ರಮಾಣದಲ್ಲಿ ಯಾವುದೇ ಬದಲಾವಣೆಯಿಲ್ಲದಂತೆ ಮಾಡಿದೆ ಎಂದು ವರದಿ ಹೇಳಿದೆ.

    2020ರಲ್ಲಿ ಜಾಗತಿಕ ಬಡತನದ ದರದಲ್ಲಿ ಶೇ.10.4ರಷ್ಟು ಏರಿಕೆಯಾಗಿದೆ. ಕೊರೋನ ವೈರಸ್ ಬಿಕ್ಕಟ್ಟು ಜಗತ್ತಿನಲ್ಲಿ ಬಡತನದ ಪರಿಸ್ಥಿತಿಯನ್ನುಇನ್ನಷ್ಟು ಉಲ್ಬಣಿಸುವಂತೆ ಮಾಡಿದೆ. 2020ರಲ್ಲಿ ಜಾಗತಿಕ ಮಟ್ಟದಲ್ಲಿ 80.30 ಕೋಟಿಗೆ ಏರಿಕೆಯಾಗಿದೆ. ಆದರೆ ಕೋವಿಡ್ ಸಾಂಕ್ರಾಮಿಕದ ಹಾವಳಿಗೆ ಮುನ್ನ ಜಾಗತಿಕವಾಗಿ ಬಡವರ ಸಂಖ್ಯೆಯಲ್ಲಿ 67.20 ಕೋಟಿಯಷ್ಟು ಹೆಚ್ಚಲಾಗಿದೆಯೆಂದು ಅಂದಾಜಿಸಲಾಗಿತ್ತು. ಹಲವಾರು ವರ್ಷಗಳಿಂದ ಸತತ ಕುಸಿತವನ್ನೇ ಕಂಡಿದ್ದ ಜಾಗತಿಕ ಬಡತನದ ದರದಲ್ಲಿ 10.4 ಶೇಕಡದಷ್ಟು ಹೆಚ್ಚಳವಾಗಿದೆ. ಇದಕ್ಕೂ ಮುನ್ನ 2020ರಲ್ಲಿ ಬಡತನದ ದರದಲ್ಲಿ ಶೇ.8.7ರಷ್ಟು ಇಳಿಕೆ ಯಾಗುವುದೆಂದು ನಿರೀಕ್ಷಿಸಲಾಗಿತ್ತು.

 2011ರಿಂದ 2019ರ ಮಧ್ಯದ ಅವಧಿಯಲ್ಲಿ ಜಾಗತಿಕ ಬಡತನದ ಪ್ರತಿ ವರ್ಷದ ಸರಾಸರಿ ಕುಸಿತವು 40.90 ಲಕ್ಷ ಆಗಿತ್ತು ಮತ್ತು ಬಡವರ ಸಂಖ್ಯೆ 110 ಕೋಟಿಯಿಂದ 69.10 ಕೋಟಿಗೆ ಕುಸಿದಿತ್ತು.

  ‘ಕೊರೋನ ಸಾಂಕ್ರಾಮಿಕವು ಜಾಗತಿಕ ಬಡವರ ಸಂಖ್ಯೆಗೆ 13.10 ಕೋಟಿ ಜನರನ್ನು ಹೆಚ್ಚುವರಿಯಾಗಿ ಸೇರ್ಪಡೆಗೊಳಿಸುವ ಮೂಲಕ ಬಡತನ ನಿರ್ಮೂಲನೆಯಲ್ಲಿ ಜಗತ್ತು ಸಾಧಿಸಿದ್ದ ಪ್ರಗತಿಯನ್ನು ಹಲವಾರು ವರ್ಷಗಳಷ್ಟು ಹಿಂದಕ್ಕೆ ದೂಡಿದೆ’ ಎಂದು ವರದಿ ಹೇಳಿದೆ.

 ಕೋವಿಡ್-19 ಸಾಂಕ್ರಾಮಿಕ ಹಾಗೂ ಲಾಕ್‌ಡೌನ್‌ನಿಂದಾಗಿ 2020ರಲ್ಲಿ ದಕ್ಷಿಣ ಏಶ್ಯದಲ್ಲಿ ಮಧ್ಯಮವರ್ಗದ ಜನಸಂಖ್ಯೆಯಲ್ಲಿಯೂ ಭಾರೀ ಕುಸಿತವುಂಟಾಗಿದೆ ಹಾಗೂ ಬಡವರ ಸಂಖ್ಯೆಯಲ್ಲಿ ಹೆಚ್ಚಳವಾಗಿದೆ.

2020ರ ಜನವರಿಯಲ್ಲಿ ದಕ್ಷಿಣ ಏಶ್ಯದಲ್ಲಿ ಒಟ್ಟು ಆಂತರಿಕ ಉತ್ಪನ್ನದಲ್ಲಿ ಶೇ.4.3ರಷ್ಟು ಹೆಚ್ಚಳವಾಗಲಿದೆಯೆಂದು ವಿಶ್ವಬ್ಯಾಂಕ್ ಅಂದಾಜಿಸಿತ್ತು. ಆದರೆ ಜನವರಿ 2021ರಲ್ಲಿ ನಡೆಸಿದ ಅಧ್ಯಯನವು 2020ರಲ್ಲಿ ದಕ್ಷಿಣ ಏಶ್ಯದ ಜಿಡಿಪಿಯಲ್ಲಿ ಶೇ.7.8ರಷ್ಟು ಕುಸಿತವುಂಟಾಗಿರುವುದು ಕಂಡುಬಂದಿತ್ತು.