ಎಐಬಿಇ ಪರೀಕ್ಷಾ ಫಲಿತಾಂಶ ಮತ್ತೆ ಮುಂದೂಡಿಕೆ: ಯುವ ವಕೀಲ ಅಭ್ಯರ್ಥಿಗಳಿಗೆ ನಿರಾಸೆ

ಬೆಂಗಳೂರು, ಮಾ.22: ಆಲ್ ಇಂಡಿಯಾ ಬಾರ್ ಕೌನ್ಸಿಲ್ ಎಕ್ಸಾಮಿನೇಷನ್(ಎಐಬಿಇ) 15ರ ಫಲಿತಾಂಶವನ್ನು ಭಾರತೀಯ ವಕೀಲರ ಪರಿಷತ್ತು(ಬಿಸಿಐ) ಮತ್ತೆ ಮುಂದೂಡಿದೆ. ಇದೇ ವೇಳೆ ಎಐಬಿಇ-16 ಪರೀಕ್ಷೆಗೆ ಅರ್ಜಿ ಸಲ್ಲಿಕೆ ದಿನಾಂಕವನ್ನೂ ವಿಸ್ತರಿಸಿದೆ.

ಕಳೆದ ಜ.24ರಂದು ನಡೆದಿದ್ದ ಎಐಬಿಇ-15ರ ಪರೀಕ್ಷೆಯ ಫಲಿತಾಂಶವನ್ನು ಮೊದಲಿಗೆ ಮಾರ್ಚ್ ಮೊದಲ ವಾರದಲ್ಲಿ ಪ್ರಕಟಿಸುವುದಾಗಿ ತಿಳಿಸಿತ್ತು. ಆದರೆ, ಮೊದಲ ವಾರದಲ್ಲಿ ಫಲಿತಾಂಶ ಪ್ರಕಟಿಸದ ಬಿಸಿಐ ಮಾರ್ಚ್ 3ನೆ ವಾರದಲ್ಲಿ ಫಲಿತಾಂಶ ಹೊರಬಿಡುವುದಾಗಿ ಸ್ಪಷ್ಟನೆ ನೀಡಿತ್ತು. ಇದೀಗ ಮೂರನೆ ಬಾರಿ ಪರೀಕ್ಷಾ ಫಲಿತಾಂಶ ಮುಂದೂಡಿದ್ದು, ಮಾರ್ಚ್ 4ನೆ ವಾರದಲ್ಲಿ ಬಿಡುಗಡೆ ಮಾಡುವುದಾಗಿ ತಿಳಿಸಿದೆ. ಇದರಿಂದಾಗಿ ಪರೀಕ್ಷಾ ಫಲಿತಾಂಶ ನಿರೀಕ್ಷಿಸುತ್ತಿರುವ ಒಂದೂವರೆ ಲಕ್ಷಕ್ಕೂ ಅಧಿಕ ಯುವ ವಕೀಲರಿಗೆ ನಿರಾಸೆಯಾಗಿದೆ.

ಸೋಮವಾರ ಬೆಳಗ್ಗೆ ಬಿಸಿಐ ಪ್ರಕಟಣೆ ಹೊರಡಿಸಿದ್ದ, ಫರೀಕ್ಷಾ ಫಲಿತಾಂಶವನ್ನು ಈ ವಾರದಲ್ಲಿ ಬಿಡುಗಡೆ ಮಾಡುವುದಾಗಿ ತಿಳಿಸಿದೆ. ಅಲ್ಲದೇ, ಎಐಬಿಇ-16 ಪರೀಕ್ಷೆ ತೆಗೆದುಕೊಳ್ಳುವ ಕಾಲಾವಕಾಶವನ್ನು ಮಾರ್ಚ್ 31ರವರೆಗೆ ವಿಸ್ತರಿಸಿದ್ದು, ಪರೀಕ್ಷಾ ಶುಲ್ಕ ಪಾವತಿಗೆ ಎ.2ರವರೆಗೆ ಸಮಯ ವಿಸ್ತರಿಸಿದೆ. ಪರೀಕ್ಷಾ ದಿನಾಂಕ ಈ ಮೊದಲು ಪ್ರಕಟಿಸಿದಂತೆ ಎಪ್ರಿಲ್ 25ರಂದು ನಡೆಯಲಿದೆ.

ಎಐಬಿಇ-16ನೆ ಪರೀಕ್ಷೆಯಲ್ಲಿ ಕೆಲ ಬದಲಾವಣೆ ಮಾಡಿದ್ದು, ಅಭ್ಯರ್ಥಿಗಳು ಪರೀಕ್ಷಾ ಕೇಂದ್ರಕ್ಕೆ ಮೊದಲಿನಂತೆ ಪುಸ್ತಕ, ನೋಟ್ಸ್ ತೆಗೆದುಕೊಂಡು ಹೋಗುವುದನ್ನು ನಿಬರ್ಂಧಿಸಲಾಗಿದೆ. ಬದಲಿಗೆ ಬೇರ್ ಆ್ಯಕ್ಟ್ ಪುಸ್ತಕಗಳನ್ನು ತೆಗೆದುಕೊಂಡು ಹೋಗಿ ಬಳಸಬಹುದಾಗಿದೆ ಎಂದು ಬಿಸಿಐ ಸ್ಪಷ್ಟಪಡಿಸಿದೆ.

ಕಳೆದ ಜ.24ರಂದು ದೇಶದ 45 ನಗರಗಳ 150 ಕ್ಕೂ ಅಧಿಕ ಪರೀಕ್ಷಾ ಕೇಂದ್ರಗಳಲ್ಲಿ ನಡೆದಿದ್ದ ಎಐಬಿಇ ಪರೀಕ್ಷೆಗೆ 1.20 ಲಕ್ಷಕ್ಕೂ ಹೆಚ್ಚು ಅಭ್ಯರ್ಥಿಗಳು ಹಾಜರಾಗಿದ್ದರು. ಕಾನೂನು ಪದವಿ ಪೂರೈಸಿ ಪರಿಷತ್ತುಗಳಲ್ಲಿ ವಕೀಲರಾಗಿ ನೋಂದಾಯಿಸಿಕೊಂಡವರು ಕಕ್ಷಿದಾರರ ಪರ ವಕಾಲತ್ತು ಹಾಕಲು ಈ ಪರೀಕ್ಷೆ ಪಾಸ್ ಮಾಡುವುದು ಕಡ್ಡಾಯವಾಗಿದೆ.