ಬ್ರಾಹ್ಮಣ್ಯದ ವಿರುದ್ಧದ ಹೋರಾಟಕ್ಕೆ ಮಂತ್ರ ಮಾಂಗಲ್ಯ ಸೂಕ್ತ ವೇದಿಕೆ: ಜ್ಞಾನಪ್ರಕಾಶ ಸ್ವಾಮೀಜಿ

ಚಿಕ್ಕಮಗಳೂರು, ಮಾ.22: ಬ್ರಾಹ್ಮಣ್ಯ ಪ್ರತಿಪಾದಿಸುವ ಶಾಸ್ತ್ರ ಆಧಾರಿತ ವಿವಾಹ ಪದ್ಧತಿ ಶೋಷಣೆಯ ಸಂಕೇತ. ಬ್ರಾಹ್ಮಣತ್ವದ ಗೊಡ್ಡು ಸಂಪ್ರದಾಯಗಳನ್ನು ವಿರೋಧಿಸಲು ಹುಟ್ಟಕೊಂಡಿದ್ದೇ ಮಂತ್ರ ಮಾಂಗಲ್ಯ ವಿವಾಹ ಪದ್ಧತಿ. ಅಂಬೇಡ್ಕರ್ ಪ್ರತಿಪಾದಿಸಿರುವ ಸಮಸಮಾಜದ ಪರಿಕಲ್ಪನೆಯ ಸಾಕಾರಕ್ಕೆ ಸದ್ಯ ಬ್ರಾಹ್ಮಣ್ಯ ಬಹುದೊಡ್ಡ ಅಡ್ಡಿಯಾಗಿದೆ. ಶೋಷಿತ ಸಮುದಾಯಗಳ ಜನರು ಮಂತ್ರ ಮಾಂಗಲ್ಯ ಪದ್ಧತಿಯಡಿಯಲ್ಲಿ ವೈವಾಹಿಕ ಸಂಬಂಧಕ್ಕೆ ಆಧ್ಯತೆ ನೀಡಬೇಕು. ಈ ಮೂಲಕ ಬ್ರಾಹ್ಮಣತ್ವವನ್ನು ವಿರೋಧಿಸಲು ಮುಂದಾಗಬೇಕು ಎಂದು ಮೈಸೂರಿನ ಉರಿಲಿಂಗಪೆದ್ದಿ ಮಠದ ಜ್ಞಾನಪ್ರಕಾಶ ಸ್ವಾಮೀಜಿ ಕರೆ ನೀಡಿದ್ದಾರೆ.

ಸೋಮವಾರ ತಾಲೂಕಿನ ಆಲ್ದೂರು ಪಟ್ಟಣದಲ್ಲಿ ಮಂತ್ರ ಮಾಂಗಲ್ಯ ಪದ್ಧತಿಯಡಿಯಲ್ಲಿ ನಡೆದ ಕೂದುವಳ್ಳಿ ಗ್ರಾಮದ ಮಹೇಶ್ ಹಾಗೂ ಕಾವ್ಯಾ ಅವರ ಸರಳ ವಿವಾಹ ಕಾರ್ಯಕ್ರಮದಲ್ಲಿ ಮಂತ್ರ ಮಾಂಗಲ್ಯ ವಿವಾಹ ಆಚರಣೆಯ ಆವಶ್ಯಕತೆ ಕುರಿತು ಮಾತನಾಡಿದ ಅವರು, ದೇವರು, ಧರ್ಮದಲ್ಲಿ ಅಪಾರ ನಂಬಿಕೆ, ಭಕ್ತಿ ಹೊಂದುವುದರಿಂದ ಡಿಸಿ, ಎಸಿ ಆಗಲು ಸಾಧ್ಯವಿಲ್ಲ. ಆದರೆ ಶಿಕ್ಷಣದಿಂದ ಏನು ಬೇಕಾದರೂ ಆಗಬಹುದು. ಬುದ್ಧ, ಬಸವ, ಅಲ್ಲಮಪ್ರಭು, ಅಂಬೇಡ್ಕರ್ ಹಾಗೂ ರಾಷ್ಟ್ರಕವಿ ಕುವೆಂಪು ಸೇರಿದಂತೆ ಅನೇಕ ಸಮಾಜ ಸುಧಾರಕರು ಇದನ್ನೇ ಹೇಳಿದ್ದಾರೆ. ಆದರೆ ನಾವು ನಮ್ಮ ಈಗಿನ ಪರಿಸ್ಥಿತಿಗೆ ಕಾರಣಕರ್ತರಾದವರ ಆಚರಣೆಗಳಿಗೆ ಮಾರು ಹೋಗಿದ್ದೇವೆ. ಶಾಸ್ತ್ರಗಳ ಗುಲಾಮರಾಗುತ್ತಿದ್ದೇವೆ. ಈ ಮೂಲಕ ಮೌಢ್ಯಗಳನ್ನು ಪೋಷಿಸುತ್ತಿದ್ದೇವೆ. ಇದು ನಮ್ಮ ಬದುಕಿನ ಬದಲಾವಣೆಗೆ ಕಾರಣರಾದ ಅಂಬೇಡ್ಕರ್ ಅವರಿಗೆ ಮಾಡುವ ಅವಮಾನ ಅಪಮಾನ ಎಂದರು.

ಶೋಷಿತ ಸಮುದಾಯಗಳ ನಿಜವಾದ ತಾಯಿ ಅಂಬೇಡ್ಕರ್. ಬ್ರಾಹ್ಮಣ್ಯದಿಂದಾಗಿ ದೇಶಾದ್ಯಂತ ಎಲ್ಲ ಹಕ್ಕುಗಳಿಂದ ವಂಚಿತರಾಗಿದ್ದ ಸಮುದಾಯಗಳಿಗೆ ಅಂಬೇಡ್ಕರ್ ಅವರು ತಮ್ಮ ಬದುಕು, ಸುಖ, ನೆಮ್ಮದಿಯನ್ನು ತ್ಯಾಗ ಮಾಡಿ ಎಲ್ಲ ರೀತಿಯ ಹಕ್ಕುಗಳನ್ನು ಕೊಟ್ಟಿದ್ದಾರೆ. ಅಂಬೇಡ್ಕರ್ ಅನುಯಾಯಿಗಳಾದವರು ಬ್ರಾಹ್ಮಣ್ಯದ ಸಂಸ್ಕೃತಿ, ಸಂಪ್ರದಾಯಗಳೆಂಬ ಗೊಡ್ಡು ಸಂಪ್ರದಾಯಗಳಿಂದ ಮುಕ್ತರಾಗಲೇಬೇಕು. ಶೋಷಿತ ಸಮುದಾಗಳ ಏಳಿಗೆಗೆ ಬುದ್ಧ, ಬಸವ, ಅಂಬೇಡ್ಕರ್ ತೋರಿದ ಮಾರ್ಗವೇ ಸತ್ಯ. ಈ ಮಾರ್ಗದಲ್ಲಿ ನಡೆಯುವ ಮೂಲಕ ಸಮುದಾಯಗಳು ಶೈಕ್ಷಣಿಕ, ಸಾಮಾಜಿಕ, ಆರ್ಥಿಕವಾಗಿ ಅಭಿವೃದ್ಧಿ ಸಾಧಿಸಬೇಕು. ಅಂಬೇಡ್ಕರ್ ಆಶಯಗಳ ಸಾಕಾರಕ್ಕೆ ಪಣತೊಡಬೇಕೆಂದ ಅವರು, ಮಂತ್ರಮಾಂಗಲ್ಯ ಆಚರಣೆ ಮೂಲಕ ವೈವಾಹಿಕ ಬದುಕಿಗೆ ಕಾಲಿಡುವ ಮೂಲಕ ಬ್ರಾಹ್ಮಣ್ಯವನ್ನು ವಿರೋಧಿಸಬೇಕೆಂದು ಕರೆ ನೀಡಿದರು.

ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಭಾಗವಹಿಸಿ ಮಾತನಾಡಿದ ರೈತ ಸಂಘದ ಮುಖಂಡ ಗುರುಶಾಂತಪ್ಪ, ರಾಜ್ಯದಲ್ಲಿ ಈ ಹಿಂದೆ ನಡೆದ ಅನೇಕ ಪ್ರಗತಿಪರ ಚಳವಳಿಗಳು ಸಮಾಜದಲ್ಲಿ ಅನೇಕ ವೈಚಾರಿಕತೆಯನ್ನು ಬಿತ್ತಿದ್ದವು. ಈ ಚಳವಳಿಗಳು ಜನರಲ್ಲಿ ವೈಚಾರಿಕ ಪ್ರಜ್ಞೆ ಮೂಡಿಸುವಲ್ಲಿ ಪ್ರಮುಖ ಪಾತ್ರವಹಿಸಿವೆ. ಮಂತ್ರ ಮಾಂಗಲ್ಯ, ಸರಳ ವಿವಾಹಗಳು ಈ ಚಳವಳಿಗಳಿಂದಲೇ ಹುಟ್ಟಿಕೊಂಡಿವೆ. ಚಳವಳಿಗಳ ಕಾವು ಕಡಿಮೆಯಾಗುತ್ತಿರುವ ಈ ಸಂದರ್ಭದಲ್ಲಿ ಯುವಜನರು ವೈಚಾರಿಕ ಪ್ರಜ್ಞೆ ಮೈಗೂಡಿಸಿಕೊಳ್ಳುತ್ತಿರುವುದು ಉತ್ತಮ ಬೆಳವಣಿಗೆಯಾಗಿದೆ. ಮೌಢ್ಯತೆ ತೊರೆದು ಮಂತ್ರ ಮಾಂಗಲ್ಯ ವಿವಾಹದತ್ತ ಯುವಜನತೆ ಮುಖ ಮಾಡಿರುವುದು ಶ್ಲಾಘನೀಯ ಎಂದರು.

ಕಾಂಗ್ರೆಸ್ ಮುಖಂಡ, ಚಿಂತಕ ರವೀಶ್ ಬಸಪ್ಪ ಮಾತನಾಡಿ, ಗಂಡು ಹೆಣ್ಣು ದಂಪತಿಯಾಗಿ ನೆಮ್ಮದಿಯ ಜೀವನ ಮಾಡಲು ಶಾಸ್ತ್ರಗಳ ಆಗತ್ಯವಿಲ್ಲ. ಒಲವೊಂದಿದ್ದರೇ ಸಾಕು. ಮನಸಿನ ಮಾತು ಕೇಳಿದಾಗ ಮಂತ್ರ ಮಾಂಗಲ್ಯದಂತಹ ಸರಳ ವಿವಾಹದ ಮೂಲಕ ಸುಂದರ ಜೀವನ ಕಟ್ಟಿಕೊಳ್ಳಲು ಸಾಧ್ಯವಿದೆ. ಇಂದಿನ ಕಾಲದ ಬಹುತೇಕರು ಎಷ್ಟೇ ಬುದ್ಧಿವಂತರು, ವಿಚಾರವಂತರಾಗಿದ್ದರೂ ಮನಸಿನ ಮಾತು ಕೇಳದೇ ಶಾಸ್ತ್ರದ ಮಾತು ಕೇಳುತ್ತಿರುವುದರಿಂದ ಒಂದು ದಿನದ ಆಡಂಬರ ವಿವಾಹಕ್ಕಾಗಿ ಇಡೀ ಜೀವನವನ್ನು ಸಾಲದ ಕೂಪದಲ್ಲಿ ಕಳೆಯುವಂತಾಗಿದೆ. ಮದುವೆ ಬದುಕಿನ ಸಂಭ್ರಮವಾಗಬೇಕೇ ಹೊರತು, ಆಡಂಬರದ ಸಂಭ್ರಮವಾಗಬಾರದು. ಆಡಂಬರದ ಮದುವೆ ಒಂದು ವ್ಯಾಪಾರಕ್ಕೆ ಸಮ ಎಂದ ಅವರು, ಮಂತ್ರ ಮಾಂಗಲ್ಯದಂತಹ ವೈಚಾರಿಕತೆ ಇಂದನ ಕಾಲಘಟ್ಟದಲ್ಲಿ ಹೆಚ್ಚು ಆಚರಣೆಗೆ ಬರಬೇಕಿದೆ ಎಂದರು.

ನಂತರ ನಡೆದ ಕಾರ್ಯಕ್ರಮದಲ್ಲಿ ಮಂತ್ರಮಾಂಗಲ್ಯ ಆಚರಣೆ ಮೂಲಕ ವೈವಾಹಿಕ ಬದುಕಿಗೆ ಕಾಲಿಟ್ಟ ಮಹೇಶ್-ಕಾವ್ಯಾ ದಂಪತಿಗೆ ಜ್ಞಾನಪ್ರಕಾಶ ಸ್ವಾಮೀಜಿ ಪ್ರತಿಜ್ಞಾವಿಧಿ ಬೋಧಿಸಿದರು. ಆಲ್ದೂರು, ಚಿಕ್ಕಮಗಳೂರು, ಮೂಡಿಗೆರೆ ಭಾಗದ ವಿವಿಧ ಪ್ರಗತಿಪರ ಸಂಘಟನೆಗಳ ಮುಖಂಡರು, ಸಾರ್ವಜನಿಕರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.