ನಿರುದ್ಯೋಗ ಸಮಸ್ಯೆಯಲ್ಲ, ಸರಕಾರಗಳ ಅಪರಾಧ: ಪ್ರೊ.ರಾಜೇಂದ್ರ ಚೆನ್ನಿ
ಡಿವೈಎಫ್ಐಯಿಂದ ಮೂರು ದಿನಗಳ ರಾಜ್ಯ ಮಟ್ಟದ ಅಧ್ಯಯನ ಶಿಬಿರಕ್ಕೆ ಚಾಲನೆ
ಮಂಗಳೂರು, ಮಾ.27: ದೇಶವನ್ನು ಕಾಡುತ್ತಿರುವ ನಿರುದ್ಯೋಗವೊಂದು ಸಮಸ್ಯೆಯಲ್ಲ. ಬದಲಾಗಿ ಅದು ಸಂವಿಧಾನಾತ್ಮಕ ಹಕ್ಕು. ಅದನ್ನು ನೀಡಲು ಸಾಧ್ಯವಾಗದಿರುವುದು ಸರಕಾರಗಳ ಅಪರಾಧ. ಹಾಗಾಗಿ ಆರೋಪಿಗಳಾಗಿರುವ ಸರಕಾರಗಳನ್ನು ಕಟಕಟೆಯಲ್ಲಿ ನಿಲ್ಲಿಸಿ ಹಕ್ಕನ್ನು ಪಡೆಯುವ ಕಾರ್ಯ ನಿರುದ್ಯೋಗಿ ಯುವಕರಿಂದ ಆಗಬೇಕು ಎಂದು ಕುವೆಂಪು ವಿವಿಯ ನಿವೃತ್ತ ಪ್ರಾಧ್ಯಾಪಕ ಪ್ರೊ. ರಾಜೇಂದ್ರ ಚೆನ್ನಿ ಅಭಿಪ್ರಾಯಿಸಿದ್ದಾರೆ.
ನಗರದ ಶಕ್ತಿನಗರದ ಕಲಾಂಗಣ್ನಲ್ಲಿ ಡಿವೈಎಫ್ಐ ರಾಜ್ಯ ಸಮಿತಿ ವತಿಯಿಂದ ‘ಉದ್ಯೋಗ ಸೃಷ್ಟಿಸಿ ಸ್ಥಳೀಯರಿಗೆ ಆದ್ಯತೆ ಒದಗಿಸಿ’ ಎಂಬ ಘೋಷಣೆಯೊಂದಿಗೆ ಹಮ್ಮಿಕೊಂಡಿರುವ ಮೂರು ದಿನಗಳ ರಾಜ್ಯ ಮಟ್ಟದ ಅಧ್ಯಯನ ಶಿಬಿರ ವನ್ನು ಶನಿವಾರ ಉದ್ಘಾಟಿಸಿ ಅವರು ಮಾತನಾಡುತ್ತಿದ್ದರು.
ಸಂವಿಧಾನಬದ್ಧ ಹಕ್ಕನ್ನು ತನ್ನ ಜನರಿಗೆ ನೀಡಲಾಗದಂತಹ ಸರಕಾರಗಳು ಅಧಿಕಾರದಲ್ಲಿರಲು ಯಾವುದೇ ನೈತಿಕತೆ ಇಲ್ಲ ಎಂದು ಹೇಳಿದ ಅವರು, ಸರಕಾರ ತೋರಿಸುತ್ತಿರುವ ಉದ್ಯೋಗರಹಿತ, ಮನುಷ್ಯಪರವಲ್ಲದ, ಸಮಾನತೆ ಇಲ್ಲದ, ಜಿಡಿಪಿಯನ್ನು ಮುಂದಿಟ್ಟು ಬಂಡವಾಳಶಾಹಿಗಳ ಆಸ್ತಿ ಬೆಳೆಸುವ ಅಭಿವೃದ್ಧಿ ನಮಗೆ ಬೇಕಾಗಿಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.
ವರದಿಗಳ ಪ್ರಕಾರ ಕೊರೋನ ಅವಧಿಯೊಂದರಲ್ಲೇ ಅಂಬಾನಿ, ಅದಾನಿಯಂತಹ ಬಂಡವಾಳಶಾಹಿಗಳ ಆಸ್ತಿ ಶೇ. 98ರಷ್ಟು ಹೆಚ್ಚಳವಾಗಿದೆ. ಆದರೆ ಯಾವುದೇ ಮುನ್ಸೂಚನೆ ನೀಡದೆ ಕೊರೋನ ಲಾಕ್ಡೌನ್ ಹೇರಿದ ಸಂದರ್ಭ ಹೊಟ್ಟೆಪಾಡಿಗಾಗಿ ನಗರಗಳಲ್ಲಿದ್ದ ಕಾರ್ಮಿಕರು, ಶ್ರಮಿಕರು ತಮ್ಮ ಅಸ್ತಿತ್ವವನ್ನೇ ಕಳೆದುಕೊಂಡು ನಿರಾಶ್ರಿತರಾದಾಗ ಸರಕಾರ ಅಸಹಾಯಕವಾಗಿತ್ತು. ಕಿ.ಮೀ.ಗಟ್ಟಲೆ ಕ್ರಮಿಸಿ ಊರು ಸೇರಿದ ಶ್ರಮಿಕರಿಗೆ ಅಲ್ಲೇ ಕೆಲಸ ನೀಡುವ ವ್ಯವಸ್ಥೆಯನ್ನು ಮಾಡಲಾಗಿಲ್ಲ. ಲಾಕ್ಡೌನ್ ತೆರವಾದಾಗ ಅವರು ಮತ್ತೆ ನಗರ ಸೇರುವಂತಾಯಿತು. ಮೆಟ್ರೋ, ಹೆದ್ದಾರಿ ಮೊದಲಾದ ಅಭಿವೃದ್ಧಿ ಕೆಲಸಗಳಲ್ಲಿ ದುಡಿಯುವ ಶ್ರಮಿಕರನ್ನು ಪ್ರಾಣಿಗಳಂತೆ ಒಂದೆಡೆ ಕೂಡಿ ಹಾಕಿ ದುಡಿಸಿಕೊಳ್ಳುವ ಪರಿಸ್ಥಿತಿ ನಮ್ಮೆದುರಿಗಿದೆ. ಯುವಜನತೆ ಶೇ.50ಕ್ಕೂ ಅಧಿಕ ಸಂಖ್ಯೆಯಲ್ಲಿರುವ ನಮ್ಮ ದೇಶ ಎಂದು ಅಭಿಮಾನದಿಂದ ಹೇಳಿಕೊಳ್ಳುವಲ್ಲಿ ಕೋಟ್ಯಂತರ ಯುವಜನತೆ ಉದ್ಯೋಗ ಇಲ್ಲದಿರುವುದು. ಉನ್ನತ ಶಿಕ್ಷಣ ಪಡೆದ ಯುವಕರು ಡಿ ಗ್ರೂಪ್ನಂತಹ ಉದ್ಯೋಗಗಳಿಗೆ ಅರ್ಜಿ ಸಲ್ಲಿಸುವ ಅಸಹಾಯಕತೆ ಮೊದಲಾದ ಪರಿಸ್ಥಿತಿ ಕುರಿತು ಪ್ರಶ್ನಿಸುವ, ಗಂಭೀರವಾಗಿ ಚಿಂತಿಸುವ ಅಗತ್ಯವಿದೆ ಎಂದು ಅವರು ಹೇಳಿದರು.
ಹಿಂದೆ ಅಮೆರಿಕದಲ್ಲಿ ಬಿಳಿಯರಿಂದ ಕರಿಯನ್ನರನ್ನು ಗುಲಾಮರಾಗಿ ಖರೀದಿಸಲು ಅವರ ಶಕ್ತಿ ಸಾಮರ್ಥ್ಯವನ್ನು ಪ್ರದರ್ಶನಕ್ಕಿಟ್ಟು ಹರಾಜು ಮಾಡುವ ಪರಿಸ್ಥಿತಿ ಇಂದು ನಮ್ಮ ದೇಶದ ವಿವಿಧ ರಾಜ್ಯಗಳಲ್ಲಿ ಶ್ರಮಿಕ ಶಕ್ತಿಯ ಶ್ರಮ, ದೇಹವನ್ನು ಹರಾಜು ನಡೆಸುವ ಪರಿಸ್ಥಿತಿ ಇದೆ ಎಂದು ಪ್ರೊ. ರಾಜೇಂದ್ರ ಚೆನ್ನಿಯವರು ತಮ್ಮ ಮನೆಯೆದುರು ಸ್ಮಾರ್ಟ್ ಸಿಟಿ ಕೆಲಸಕ್ಕೆ ಬಂದಿದ್ದ ಹೊರ ರಾಜ್ಯದ ಕುಟುಂಬವೊಂದರ ಸ್ಥಿತಿಯನ್ನು ಉಲ್ಲೇಖಿಸಿ ಮಾತನಾಡಿದರು.
ರೈತರ ಹೋರಾಟವನ್ನು ಉಲ್ಲೇಖಿಸಿ ಮಾತನಾಡಿದ ಅವರು, ನಿರುದ್ಯೋಗ ಸಮಸ್ಯೆಗೆ ಕೇಂದ್ರ ಜಾರಿಗೆ ತರಲುದ್ದೇಶಸಿರುವ ಕೃಷಿ ಕಾಯ್ದೆಗಳು ಯಾವ ರೀತಿ ಪೂರಕವಾಗಬಲ್ಲದು ಎಂಬುದನ್ನು ವಿವರಿಸಿದದರು.
ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದ ನ್ಯಾಯವಾದಿ ಹಾಗೂ ಅಧ್ಯಯನ ಶಿಬಿರದ ಸಿದ್ಧತಾ ಸಮಿತಿಯ ಗೌರವಾಧ್ಯಕ್ಷ ಯಶವಂತ ಮರೋಳಿ ಮಾತನಾಡಿ, ಸಂವಿಧಾನದ ವೌಲ್ಯಗಳ ಮೇಲಿನ ದೌರ್ಜನ್ಯ ಹಾಗೂ ಅಭಿವ್ಯಕ್ತಿ ಸ್ವಾತಂತ್ರ್ಯದ ಮೇಲಿನ ಆಕ್ರಮಣವನ್ನು ನಾವೆಲ್ಲಾ ವಿರೋಧಿಸಬೇಕೆಂದು ಹೇಳಿದರು.
7 ವರ್ಷಗಳ ಹಿಂದೆ ದೇಶದಲ್ಲಿ ವರ್ಷಕ್ಕೆ 2 ಕೋಟಿ ಉದ್ಯೋಗ ನೀಡುವ ಭರವಸೆಯೊಂದಿಗೆ ಅಧಿಕಾರ ಪಡೆದ ಕೇಂದ್ರದಲ್ಲಿ ಆಡಳಿತ ನಡೆಸುತ್ತಿರುವ ಬಿಜೆಪಿಯು ಪ್ರಸಕ್ತ ಪಂಚ ರಾಜ್ಯಗಳ ಚುನಾವಣೆಯ ಸಂದರ್ಭ ಉದ್ಯೋಗ ಸೃಷ್ಟಿಗೆ ಆದ್ಯತೆ ನೀಡುವುದಾಗಿ ಪ್ರಣಾಳಿಕೆಯಲ್ಲಿ ತಿಳಿಸಿರುವುದು ಹಾಸ್ಯಾಸ್ಪದ ಎಂದು ಅಧ್ಯಕ್ಷತೆ ವಹಿಸಿದ್ದ ಡಿವೈಎಫ್ಐ ರಾಜ್ಯಾಧಕ್ಷ ಮುನೀರ್ ಕಾಟಿಪಳ್ಳ ಅಭಿಪ್ರಾಯಿಸಿದರು.
ಮಂಗಳೂರಿನ ಎಂಆರ್ಪಿಎಲ್ನಲ್ಲಿ 220 ಹುದ್ದೆಗಳ ನೇಮಕಾತಿಗೆ 60,000 ಅರ್ಜಿಗಳು ಬಂದಿದ್ದು, ಅದರಲ್ಲಿ 30,000 ಅರ್ಜಿಗಳನ್ನು ಅರ್ಹತೆ ಇಲ್ಲವೆಂದು ಅನರ್ಹಗೊಳಿಸಲಾಗಿದೆ. ಉಳಿದ ಅರ್ಜಿದಾರರು ಪರೀಕ್ಷೆ ಬರೆದಿದ್ದಾರೆ. ಶಿಕ್ಷಣದ ಹಬ್ ಎಂದು ಕರೆಸಿಕೊಳ್ಳುವ ಮಂಗಳೂರಿನಲ್ಲಿ ಉನ್ನತ ಶಿಕ್ಷಣ ಪಡೆದವರು 10,000 ರೂ.ಗಳಿಗಿಂತಲೂ ಕಡಿಮೆ ವೇತನದಲ್ಲಿ ದುಡಿಯುವ ಪರಿಸ್ಥಿತಿ ಇರುವಾಗ, ಇದರ ಬಗ್ಗೆ ಪ್ರಶ್ನಿಸಬೇಕಾದ ಸಮಾಜದ ಯುವಕರು ಧರ್ಮಯುದ್ಧ, ಜಾತಿ ಸಂಘರ್ಷ, ಬೆಟ್ಟಿಂಗ್ನಂತಹ ಅನಗತ್ಯ ವಿಷಯಗಳಲ್ಲಿ ಕಳೆದು ಹೋಗುತ್ತಿದ್ದಾರೆ ಎಂದು ಮುನೀರ್ ಕಾಟಿಪಳ್ಳ ಅಸಮಾಧಾನ ವ್ಯಕ್ತಪಡಿಸಿದರು.
ಉದ್ಘಾಟನಾ ಸಮಾರಂಭದಲ್ಲಿ ಡಿವೈಎಫ್ಐ ರಾಜ್ಯ ಸಮಿತಿಯ ಮುಖಂಡರಾದ ಆಶಾ ಬೋಳೂರು, ಪೃಥ್ವಿ, ಅಂಬರೀಶ್, ಮಹೇಶ್, ನಿತಿನ್ ಉಪಸ್ಥಿತರಿದ್ದರು.
ರಾಜ್ಯ ಕಾರ್ಯದರ್ಶಿ ಬಸವರಾಜ್ ಪೂಜಾರ್ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. ಜಿಲ್ಲಾಧ್ಯಕ್ಷ ಬಿ.ಕೆ. ಇಮ್ತಿಯಾಝ್ ವಂದಿಸಿದರು. ಜಿಲ್ಲಾ ಕಾರ್ಯದರ್ಶಿ ಸಂತೋಷ್ ಕುಮಾರ್ ಬಜಾಲ್ ಕಾರ್ಯಕ್ರಮ ನಿರೂಪಿಸಿದರು.
ಮೆರಿಟ್ ಆಧಾರಿತ ಉದ್ಯೋಗಕ್ಕೆ ಪ್ರಬಲ ಜಾತಿಗಳ ಒತ್ತಡವು ಸಂವಿಧಾನ ಶಿಲ್ಪಿ ಅಂಬೇಡ್ಕರ್ರವರ ಮೀಸಲಾತಿ ವ್ಯವಸ್ಥೆಯನ್ನು ದುರ್ಬಲಗೊಳಿಸುವ ಷಡ್ಯಂತ್ರ. ನಿರುದ್ಯೋಗ ಸ್ಥಿತಿ ರೋಗವಾಗಿದ್ದು, ಆ ರೋಗ ಲಕ್ಷಣಗಳಿಗೆ ಕಾರಣವಾಗಿರುವ ಖಾಸಗೀಕರಣ, ಬಂಡವಾಳಶಾಹಿತ್ವವನ್ನು ಗಂಭೀರವಾಗಿ ಪರಿಗಣಿಸಬೇಕಾಗಿದೆ ಎಂದು ಪ್ರೊ. ರಾಜೇಂದ್ರ ಚೆನ್ನಿ ಹೇಳಿದ್ದಾರೆ.
