ʼಬಾಂಗ್ಲಾ ವಿಮೋಚನೆ ಹೋರಾಟದಲ್ಲಿ ಭಾಗಿಯಾಗಿದ್ದ ಮಹಿಳೆಯರುʼ ಎಂದು ನಕಲಿ ಫೋಟೊ ಪ್ರಕಟಿಸಿದ ಪೋಸ್ಟ್‌ ಕಾರ್ಡ್‌ ಸ್ಥಾಪಕ

ಬೆಂಗಳೂರು: ಬಾಂಗ್ಲಾ ದೇಶ ವಿಮೋಚನೆ ಹೋರಾಟದಲ್ಲಿ ಭಾಗಿಯಾಗಿದ್ದ ಮಹಿಳೆಯರು ಎಂದು ನಕಲಿ ಫೋಟೊವೊಂದನ್ನು ಪ್ರಕಟಿಸಿ ಸಂಪೂರ್ಣ ವಿಷಯವನ್ನೇ ಕೋಮುವಾದೀಕರಣಗೊಳಿಸಿದ್ದ ಪೋಸ್ಟ್‌ ಕಾರ್ಡ್‌ ಮತ್ತು ಅದರ ಸ್ಥಾಪಕ ಮಹೇಶ್‌ ವಿಕ್ರಮ್‌ ಹೆಗ್ಡೆ ಸದ್ಯ ನಗೆಪಾಟಲಿಗೀಡಾಗಿದ್ದಾರೆ.

ನಾಲ್ವರು ಮಹಿಳೆಯರು ಕಾರಿನಲ್ಲಿ ಕುಳಿತ ಹಳೆಯ ಫೋಟೊವನ್ನು ಪ್ರಕಟಿಸಿ "ಇದು ಬಾಂಗ್ಲಾ ದೇಶದ ಚಿತ್ರವಾಗಿದ್ದು, ಈ ಚಿತ್ರದಲ್ಲಿರುವ ನಾಲ್ವರ ಹಣೆಯಲ್ಲೂ ಕುಂಕುಮ ಕಾಣಬಹುದಾಗಿದೆ. ಕೆಳಗಿನ ಚಿತ್ರದಲ್ಲಿ ಇಬ್ಬರು ಬುರ್ಖಾ ಧರಿಸಿದ್ದಾರೆ. ಈ ಚಿತ್ರ ಬಾಂಗ್ಲಾದೇಶದ ಕಳೆದ 50 ವರ್ಷದ ಚಿತ್ರಣವನ್ನೇ ವಿವರಿಸುತ್ತದೆ. ಜಾತಿ ಜಾತಿಯೆಂದು ಕಚ್ಚಾಡುತ್ತಿದ್ದರೆ 50 ವರ್ಷದ ತರುವಾಯ ಭಾರತದ ಚಿತ್ರವು ಭಿನ್ನವಾಗಿರಲಾರದು" ಎಂದು ಬರೆಯಲಾಗಿದೆ. ಫೋಟೊದಲ್ಲಿ ಫೇಕ್‌ ನ್ಯೂಸ್‌ ಗಳನ್ನು ಹರಡುವ ಪೋಸ್‌ ಕಾರ್ಡ್‌ ಸಂಸ್ಥಾಪಕ ಮಹೇಶ್‌ ವಿಕ್ರಮ್‌ ಹೆಗ್ಡೆಯ ಫೋಟೊ ಮತ್ತು ಹೆಸರನ್ನು ಉಲ್ಲೇಖಿಸಲಾಗಿದೆ.‌

ಈ ಫೋಟೋದ ಕುರಿತಾದಂತೆ Altnews.in‌ ಸತ್ಯಶೋಧನಾ ವರದಿ ಪ್ರಕಟಿಸಿದ್ದು, ಈ ಚಿತ್ರದಲ್ಲಿರುವವರು ಯಾರೂ ಬಾಂಗ್ಲಾ ವಿಮೋಚನಾ ಹೋರಾಟದಲ್ಲಿ ಭಾಗವಹಿಸಿದವರಲ್ಲ ಎಂದು ತಿಳಿಸಿದೆ. ಈ ಚಿತ್ರವನ್ನು 2020ರ ಆಗಸ್ಟ್‌ ನಲ್ಲಿ ರೆಹಾನ್‌ ಅಹ್ಮದ್‌ ಎಂಬಾತ ಪ್ರಕಟಿಸಿದ್ದ ಎಂದು ವರದಿಯಲ್ಲಿ ಉಲ್ಲೇಖಿಸಿದೆ.

ಈ ಕುರಿತು ರೆಹಾನ್‌ ಅಹ್ಮದ್‌ ರನ್ನು ಸಂಪರ್ಕಿಸಿದಾಗ, ಅದು 1961ರಲ್ಲಿ ತೆಗೆದ ನನ್ನ ಅಜ್ಜಿಯ ಚಿತ್ರವಾಗಿದೆ. ಚಾಲಕನ ಸೀಟಿನ ಪಕ್ಕದಲ್ಲಿ ಕುಳಿತವರು ನನ್ನ ಅಜ್ಜು ರುಖಿಯಾ ಅಹ್ಮದ್‌, ಉಳಿದವರು ಆಯಿಶಾ, ರಶೀದಾ ಅಹ್ಮದ್‌ ಹಾಗೂ ಶಹಾನಾ ಅಹ್ಮದ್‌ ಆಗಿದ್ದಾರೆ. ಅವರು ಫೋಟೊ ತೆಗೆಯುವ ಉದ್ದೇಶದಿಂದ ಮಾತ್ರ ಬಂದೂಕು ಕೈಯಲ್ಲಿ ಹಿಡಿದುಕೊಂಡಿದ್ದರು" ಎಂದು ಹೇಳಿಕೆ ನೀಡಿದ್ದಾರೆ.

"ಆ ಜೀಪ್‌ ಈಗಲೂ ನಮ್ಮ ಮನೆಯಲ್ಲಿದೆ. ನಾವು ಅದನ್ನು ಸಂಗ್ರಹಿಸಿಟ್ಟಿದ್ದೇವೆ. ಆ ಫೋಟೊವನ್ನು ಮತ್ತು ಆ ಸಂದರ್ಭವನ್ನು ಮರುಸೃಷ್ಟಿಸುವ ಸಲುವಾಗಿ ನಾವು 2017ರಲ್ಲಿ ಮತ್ತೊಮ್ಮೆ ಫೋಟೊ ಕ್ಲಿಕ್ಕಿಸಿದ್ದೆವು. ಅವರು ಯಾರೂ ಹಿಂದೂ ಧರ್ಮದಿಂದ ಇಸ್ಲಾಂಗೆ ಮತಾಂತರವಾದವರಲ್ಲ. ಅವರು ಜನ್ಮತಃ ಮುಸ್ಲಿಮರೇ ಆಗಿದ್ದಾರೆ. ಉಳಿದವರೆಲ್ಲಾ ನಮ್ಮ ಸಂಬಂಧಿಗಳೇ ಆಗಿದ್ದಾರೆ" ಎಂದು ಹೇಳಿಕೆ ನೀಡಿದ್ದಾಗಿ ವರದಿ ತಿಳಿಸಿದೆ.

ಪ್ರಕರಣದ ಹಿಂದುಮುಂದು ವಿಚಾರಿಸದೇ ನಕಲಿ ಸುದ್ದಿಗಳನ್ನು ಪೋಸ್ಟ್ ಮಾಡುವ ಹಾಗೂ ಯಾವುದೇ ಪ್ರಕರಣವನ್ನು ಕೋಮುವಾದೀಕರಣಗೊಳಿಸುವ ಪೋಸ್ಟ್‌ ಕಾರ್ಡ್‌ ಮತ್ತು ಅದರ ಸ್ಥಾಪಕ ಮಹೇಶ್‌ ವಿಕ್ರಮ್‌ ಹೆಗ್ಡೆ ಸಾಮಾಜಿಕ ತಾಣದಾದ್ಯಂತ ನಗೆಪಾಟಲಿಗೀಡಾಗಿದ್ದಾರೆ.