ಕೊರೋನ ಲಸಿಕೆಗೆ ನೋಂದಣಿ ಎಪ್ರಿಲ್ 28ರಿಂದ ವಯಸ್ಕರಿಗೆ ಅವಕಾಶ

ಹೊಸದಿಲ್ಲಿ, ಎ.22: ಸರಕಾರದ ಕೊ-ವಿನ್ ಪೋರ್ಟಲ್ ಅಥವಾ ಆರೋಗ್ಯಸೇತು ಆ್ಯಪ್ನಲ್ಲಿ ಎಪ್ರಿಲ್ 28ರಿಂದ ಎಲ್ಲಾ ಭಾರತೀಯ ವಯಸ್ಕರೂ ಕೊರೋನ ಲಸಿಕೆ ಪಡೆಯಲು ತಮ್ಮ ಹೆಸರನ್ನು ನೋಂದಾಯಿಸಬಹುದು ಎಂದು ಕೇಂದ್ರ ಸರಕಾರ ಗುರುವಾರ ಘೋಷಿಸಿದೆ. ಮೇ 1ರಿಂದ ಆರಂಭವಾಗುವ ಮೂರನೇ ಹಂತದ ಲಸಿಕಾ ಅಭಿಯಾನದಲ್ಲಿ 18 ವರ್ಷ ಮೇಲ್ಪಟ್ಟ ಎಲ್ಲರೂ ಲಸಿಕೆ ಪಡೆಯಬಹುದಾಗಿದೆ. 

ಮೂರನೇ ಹಂತದಲ್ಲಿ ಸಂಸ್ಥೆಗಳು ತಾವು ಉತ್ಪಾದಿಸಿದ ಲಸಿಕೆಯಲ್ಲಿ ಅರ್ಧಾಂಶದಷ್ಟನ್ನು ರಾಜ್ಯ ಸರಕಾರಗಳಿಗೆ ಮತ್ತು ಖಾಸಗಿ ಆಸ್ಪತ್ರೆಗಳಿಗೆ ಒದಗಿಸಬಹುದು. ಆದರೆ ಸಂಸ್ಥೆಗಳು ತಾವು ಉತ್ಪಾದಿಸುವ ಲಸಿಕೆಯ ಬೆಲೆಯನ್ನು ಮೇ 1ರ ಮೊದಲು ಪ್ರಕಟಿಸಬೇಕು ಎಂದು ಕೇಂದ್ರ ಸರಕಾರ ಸೂಚಿಸಿತ್ತು.
 
ಇದರಂತೆ ಕೋವಿಶೀಲ್ಡ್ ಲಸಿಕೆ ಉತ್ಪಾದಿಸುವ ಸೆರಮ್ ಇನ್ಸ್ಟಿಟ್ಯೂಟ್, ಕೋವಿಶೀಲ್ಡ್ ಲಸಿಕೆಯನ್ನು ರಾಜ್ಯ ಸರಕಾರಗಳಿಗೆ 400 ರೂ, ಖಾಸಗಿ ಆಸ್ಪತ್ರೆಗಳಿಗೆ 600 ರೂ.ಯಲ್ಲಿ ಒದಗಿಸುವುದಾಗಿ ತಿಳಿಸಿದೆ.

ಆರಂಭದ ಹಂತದಲ್ಲಿ 30 ಕೋಟಿ ದುರ್ಬಲ ವ್ಯಕ್ತಿಗಳಿಗೆ ಮಾತ್ರ ಉಚಿತ ಲಸಿಕೆ ಒದಗಿಸಲಾಗುತ್ತದೆ. ಆ ಬಳಿಕ ರಿಯಾಯ್ತಿ ದರದ ಲಸಿಕೆ ಒದಗಿಸಲಾಗದು. ಇದೀಗ ಲಸಿಕೆಗೆ ಬೆಲೆ ನಿಗದಿಗೊಳಿಸುವ ಅಧಿಕಾರ ಆಯಾ ರಾಜ್ಯಗಳದ್ದಾಗಿದ್ದು ರಾಜ್ಯ ಸರಕಾರ ಸಬ್ಸಿಡಿ ನೀಡಿದರೆ ಲಸಿಕೆ ಬೆಲೆ ಕಡಿಮೆಯಾಗಬಹುದು ಎಂದು ಕೇಂದ್ರ ಸರಕಾರ ಹೇಳಿತ್ತು. ಆದರೆ ಕೇಂದ್ರದ ಈ ನಿರ್ಧಾರಕ್ಕೆ ವಿಪಕ್ಷಗಳ ಸಹಿತ ವ್ಯಾಪಕ ಟೀಕೆ ಎದುರಾಗಿದೆ. 18 ವರ್ಷ ಮೇಲ್ಪಟ್ಟವರಿಗೆ ಉಚಿತ ಲಸಿಕೆ ಒದಗಿಸುವುದಾಗಿ ಮಧ್ಯಪ್ರದೇಶ, ಕೇರಳ, ಛತ್ತೀಸ್ಗಢ, ಉತ್ತರಪ್ರದೇಶ, ಸಿಕ್ಕಿಂ ಮತ್ತು ಅಸ್ಸಾಂ ರಾಜ್ಯಗಳು ಘೋಷಿಸಿವೆ. ಕೇಂದ್ರ ಸರಕಾರ ಎಲ್ಲರಿಗೂ ಉಚಿತ ಲಸಿಕೆ ಒದಗಿಸಬೇಕೆಂದು ರಾಜಸ್ತಾನ ಹಾಗೂ ಇತರ ಕೆಲವು ರಾಜ್ಯಗಳು ಆಗ್ರಹಿಸಿವೆ.

ಜನತೆ ಮೊದಲೇ ನೋಂದಣಿ ಮಾಡಿಕೊಂಡು ಆಸ್ಪತ್ರೆಗೆ ಹೋದರೆ ಉತ್ತಮ ಎಂದು ಕೊರೋನ ಲಸಿಕೆ ಅಭಿಯಾನದ ತಜ್ಞರ ತಂಡದ ಅಧ್ಯಕ್ಷ ಆರ್.ಎಸ್ ಶರ್ಮ ಹೇಳಿದ್ದಾರೆ. ದೇಶದಲ್ಲಿ ಇದುವರೆಗೆ ಸೆರಮ್ ಸಂಸ್ಥೆ ಉತ್ಪಾದಿಸಿದ ಕೋವಿಶೀಲ್ಡ್ ಮತ್ತು ಭಾರತ್ ಬಯೋಟೆಕ್ ಉತ್ಪಾದಿಸಿದ ಕೊವ್ಯಾಕ್ಸಿನ್ ಲಸಿಕೆಯನ್ನು ನೀಡಲಾಗುತ್ತಿದೆ. ರಶ್ಯಾದಲ್ಲಿ ನಿರ್ಮಿಸಲಾಗಿರುವ ಸ್ಪುಟ್ನಿಕ್ ಲಸಿಕೆಯ ಬಳಕೆಗೂ ದೇಶದ ಔಷಧ ನಿಯಂತ್ರಕರು ಅನುಮೋದನೆ ನೀಡಿದ್ದಾರೆ.