ಜನರಿಗೆ ನೆರವಾಗುವ ಬದಲು ಕೇಂದ್ರ ಮೀಡಿಯಾ ಮ್ಯಾನೇಜ್ಮೆಂಟ್ ಮಾಡುತ್ತಿದೆ:ವಿತ್ತ ಸಚಿವೆ ನಿರ್ಮಲ ಪತಿ ಪ್ರಭಾಕರ್ ವಾಗ್ದಾಳಿ

ಹೊಸದಿಲ್ಲಿ: ಕೇಂದ್ರ ವಿತ್ತ ಸಚಿವೆ ನಿರ್ಮಲ ಸೀತಾರಾಮನ್ ಅವರ ಪತಿ ಹಾಗು ಖ್ಯಾತ ಅರ್ಥಶಾಸ್ತ್ರಜ್ಞ ಪರಕಾಲ ಪ್ರಭಾಕರ್  ಕೇಂದ್ರ ಸರಕಾರ ಕೋವಿಡ್ ನಿರ್ವಹಣೆಯಲ್ಲಿ ವಿಫಲವಾಗಿರುವ ಬಗ್ಗೆ ತೀವ್ರ ಕಿಡಿ ಕಾರಿದ್ದಾರೆ. ಇಂತಹ ಸಂಕಷ್ಟದ ಸಂದರ್ಭದಲ್ಲಿ ಜನರಿಗೆ ನೆರವಾಗುವ ಬದಲು ಕೇಂದ್ರ ಮಾಧ್ಯಮ ಮ್ಯಾನೇಜ್ ಮೆಂಟ್ ಮಾಡುವುದರಲ್ಲಿ ಹಾಗು ತನ್ನ ಬೆನ್ನನ್ನು ತಾನೇ ತಟ್ಟಿಕೊಳ್ಳುವಲ್ಲಿ ನಿರತವಾಗಿದೆ ಎಂದವರು ತೀವ್ರ ಟೀಕಾ ಪ್ರಹಾರ ನಡೆಸಿದ್ದಾರೆ. 

ಈ ಬಗ್ಗೆ ಪ್ರಭಾಕರ್ ಅವರು ತಮ್ಮ ಯೂಟ್ಯೂಬ್ ಚಾನಲ್ ನಲ್ಲಿ ಎಪ್ರಿಲ್ 21 ರಂದು ಮಾತನಾಡಿದ್ದು  ಎಪ್ರಿಲ್ 25 ರಂದು ಖ್ಯಾತ ಹಿಂದಿ ದೈನಿಕ 'ದೈನಿಕ್ ಭಾಸ್ಕರ್' ನಲ್ಲೂ ಈ ಕುರಿತು ಅವರ ಲೇಖನ ಪ್ರಕಟವಾಗಿದೆ.

ಇದೇ ಸಂದರ್ಭದಲ್ಲಿ ಮಾಜಿ ಪ್ರಧಾನಿ ಮನಮೋಹನ್ ಸಿಂಗ್ ಅವರನ್ನು ಪ್ರಶಂಸಿಸಿದ ಪ್ರಭಾಕರ್ ಅವರು ಸಿಂಗ್ ಅವರು ರಚನಾತ್ಮಕ ಸಲಹೆ ನೀಡಿದ್ದರು. ಆದರೆ ಕೇಂದ್ರ ಸಚಿವರು ಅದಕ್ಕೆ ಅಸಭ್ಯವಾಗಿ ಪ್ರತಿಕ್ರಿಯಿಸಿ ರಾಜಕೀಯ ಮಾಡಲು ಹೋದರು ಎಂದು ಟೀಕಿಸಿದ್ದಾರೆ. 

ಪ್ರಧಾನಿ ನರೇಂದ್ರ ಮೋದಿ ಅವರ ಕಾರ್ಯವೈಖರಿ ಬಗ್ಗೆಯೂ ಪರೋಕ್ಷವಾಗಿ ಮಾತನಾಡಿರುವ ಪ್ರಭಾಕರ್ ಅವರು ಈಗ ಮಾನವೀಯತೆ, ಪಾರದರ್ಶಕತೆ ಹಾಗು ಉತ್ತರದಾಯಿತ್ವ ಪ್ರದರ್ಶಿಸಬೇಕಾದ ಸಮಯ. ಹಾಗಾಗಿ ಸರಕಾರ ದೇಶದ ಜನರಿಗೆ ಉತ್ತರಿಸಬೇಕು. ಅದರಿಂದ ನುಣುಚಿಕೊಳ್ಳಬಾರದು ಎಂದು ಹೇಳಿದ್ದಾರೆ. 

ಭಾರತದಲ್ಲಿ ವಿಶ್ವದಲ್ಲೇ ಅತಿಹೆಚ್ಚು ಹಾಗು ಅತಿವೇಗವಾಗಿ ಸೋಂಕು ಹರಡುತ್ತಿದೆ. ದೊಡ್ಡ ಪ್ರಮಾಣದಲ್ಲಿ ಸಾವು ಸಂಭವಿಸುತ್ತಿದೆ. ಇದು ಅರೋಗ್ಯ ತುರ್ತುಪರಿಸ್ಥಿತಿಯ ಕಾಲವಾಗಿದೆ ಎಂದಿರುವ ಪ್ರಭಾಕರ್ ಅವರು ಈಗ ಕೇಂದ್ರ ಸರಕಾರದ ಜವಾಬ್ದಾರಿ ಬಗ್ಗೆ ಪ್ರಶ್ನಿಸುವ, ಅದಕ್ಕೆ ಸರಕಾರ ಉತ್ತರಿಸಬೇಕಾದ ಕಾಲವಾಗಿದೆ. ಸರಕಾರಕ್ಕೆ ತನ್ನವರು ಮೃತಪಟ್ಟರೆ ಭಾರೀ ಸಂಕಟವಾಗುತ್ತದೆ ಬೇರೆಯವರಾದರೆ ಕೇವಲ ಅಂಕಿ ಅಂಶ ಎಂದು ಪ್ರಭಾಕರ್ ವಾಗ್ದಾಳಿ ನಡೆಸಿದ್ದಾರೆ.

ಮುಖ್ಯಮಂತ್ರಿ, ಪ್ರಧಾನ ಮಂತ್ರಿಗಳು ದೊಡ್ಡ ದೊಡ್ಡ ರಾಜಕೀಯ ಸಮಾವೇಶ ನಡೆಸುತ್ತಿದ್ದಾರೆ. ಜನ ಸೇರಿಸುತ್ತಿದ್ದಾರೆ. ಅತ್ತ ಕುಂಭ ಮೇಳವೂ ನಡೆಯುತ್ತಿದೆ. ಇನ್ನು ಇಷ್ಟೆಲ್ಲಾ ಆದ ಮೇಲೆ ಅದನ್ನು ಸಮರ್ಥಿಸಿಕೊಳ್ಳುವ ಕೆಲವು ಪರಿಣಿತರೂ ಇದ್ದಾರೆ. ನಾವು ಇತರ ದೇಶಗಳಿಗಿಂತ ಉತ್ತಮ ಸ್ಥಿತಿಯಲ್ಲಿದ್ದೇವೆ ಎಂದು ಅವರು ಹೇಳಿಕೊಳ್ಳುತ್ತಾರೆ. ಇದು ಅತ್ಯಂತ ಆತಂಕಕಾರಿ ಬೆಳವಣಿಗೆ ಎಂದು ಪ್ರಭಾಕರ್ ಹೇಳಿದ್ದಾರೆ. 

ಸೋಂಕು ಹರಡುವಿಕೆ ಬೇಗ ನಿಲ್ಲದು. ಹೀಗಿರುವಾಗ ದೇಶಕ್ಕೆ ಕನಿಷ್ಠ ೧೪೦ ಕೋಟಿ ಡೋಸ್ ಲಸಿಕೆ ಬೇಕಾಗಿದೆ. ಆದರೆ ಇಂತಹ ವ್ಯವಸ್ಥೆ ಮಾಡಿ ದೇಶದ ಆಸ್ಪತ್ರೆ ಇತ್ಯಾದಿ ಸೌಲಭ್ಯ ಗಟ್ಟಿಗೊಳಿಸಬೇಕಾದ ಸಮಯದಲ್ಲಿ ನಾವು ಚಪ್ಪಾಳೆ ತಟ್ಟುತ್ತಾ ಕಾಲ ಕಳೆದೆವು ಎಂದು ಅವರು ಕೇಂದ್ರಕ್ಕೆ ಚಾಟಿ ಬೀಸಿದ್ದಾರೆ. 

ಈ ಸಂಕಷ್ಟದಲ್ಲಿ ಜನರು ನಿರುದ್ಯೋಗಿಗಳಾಗುತ್ತಿದ್ದಾರೆ. ಚಿಕಿತ್ಸೆಗಾಗಿ ಇರುವ ಉಳಿತಾಯದ ದುಡ್ಡು ಖರ್ಚಾಗುತ್ತಿದೆ. ಬಹಳಷ್ಟು ಜನರು ಆರ್ಥಿಕ ನಷ್ಟದಿಂದ ನಲುಗಿದ್ದಾರೆ. ಈಗ ೧. ೮ ಲಕ್ಷ ಮಂದಿ ದೇಶಾದ್ಯತ ಕೋವಿಡ್ ಗೆ ಬಲಿಯಾಗಿದ್ದಾರೆ ಎಂದು ಹೇಳಲಾಗುತ್ತಿದೆ. ಆದರೆ ಇದು ನಿಜವಾಗಿ ಅಂಕಿ ಅಂಶ ಅಲ್ಲ. ನೈಜ ಚಿತ್ರಣ ಹೊರಬರುತ್ತಿಲ್ಲ ಎಂದವರು ಹೇಳಿದ್ದಾರೆ. 

ದೇಶದಲ್ಲಿ ಕೋವಿಡ್ ಪರೀಕ್ಷೆ ಹಾಗು ಲಸಿಕೆ ನೀಡುವ ಪ್ರಮಾಣವೂ ಬಹಳ ಕಡಿಮೆ ಇದೆ. ಆಸ್ಪತ್ರೆಗಳಿಗೆ ಸ್ಯಾಂಪಲ್ ಸಂಗ್ರಹಿಸಿ ಪರೀಕ್ಷೆ ಮಾಡಿ ಸಮಯಕ್ಕೆ ಫಲಿತಾಂಶ ಕೊಡುವುದೇ ಸಾಧ್ಯವಾಗುತ್ತಿಲ್ಲ. ಸ್ಮಶಾನಗಳಲ್ಲಿ ಗಲಾಟೆಯಾಗುತ್ತಿವೆ, ಬೆಡ್ ಗಳಿಗಾಗಿ ಜಗಳ ನಡೆಯುತ್ತಿವೆ. ಆದರೆ ಯಾವುದೇ ರಾಜಕೀಯ , ಧಾರ್ಮಿಕ ನಾಯಕರಿಗೆ ಇದು ಯಾವುದೇ ಪರಿಣಾಮ ಬೀರಿಲ್ಲ ಎಂದವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. 

ಅವರ ಯೂಟ್ಯೂಬ್ ಚಾನೆಲ್ ಲಿಂಕ್ ಇಲ್ಲಿದೆ: https://youtu.be/Vu2ryLPOME4