ಉಡುಪಿ ಜಿಲ್ಲೆಯಾದ್ಯಂತ ಕೋವಿಡ್ ಕರ್ಫ್ಯೂ: ಅಗತ್ಯ ಕೆಲಸಗಳಿಗೆ ಪರದಾಡಿದ ಜನತೆ

ಉಡುಪಿ, ಎ.28: ಕೊರೋನ ಎರಡನೆ ಅಲೆ ಹಿನ್ನೆಲೆಯಲ್ಲಿ ಸರಕಾರ ಘೋಷಿಸಿರುವ ಸಂಪೂರ್ಣ ಕೋವಿಡ್ ಕರ್ಫ್ಯೂನ ಮೊದಲ ದಿನವಾದ ಬುಧವಾರ ಉಡುಪಿ ಜಿಲ್ಲೆಯಾದ್ಯಂತ ಜನಜೀವನ ಸ್ತಬ್ಧಗೊಂಡಿದೆ. ಇದರಿಂದ ಜನ ತಮ್ಮ ಅಗತ್ಯ ಕೆಲಸಕ್ಕೆ ಪರದಾಡುವಂತಾಯಿತು.

ಬೆಳಗ್ಗೆ 10ಗಂಟೆವರೆಗೆ ಜನ ಪೇಟೆಗಳಿಗೆ ಆಗಮಿಸಿ ಅಗತ್ಯ ವಸ್ತುಗಳನ್ನು ಖರೀದಿಸಿದರು. ತರಕಾರಿ, ದಿನಸಿ, ಹೂವು, ಹಾಲು, ಸುಪರ್‌ಬಜಾರ್‌ಗಳು ಸೇರಿದಂತೆ ಅಗತ್ಯ ವಸ್ತುಗಳ ಅಂಗಡಿಗಳು ಬೆಳಗ್ಗೆ 10 ಗಂಟೆಗ ನಂತರ ಸಂಪೂರ್ಣ ಬಂದ್ ಆದವು.

ಉಳಿದಂತೆ ಮೆಡಿಕಲ್, ಆಸ್ಪತ್ರೆ, ಪೆಟ್ರೋಲ್ ಬಂಕ್, ಬ್ಯಾಂಕ್, ಸೊಸೈಟಿ ಗಳು ಕಾರ್ಯನಿರ್ವಹಿಸಿದ್ದವು. ಕಟ್ಟಡ ಕಾಮಗಾರಿಗಳು ಕೆಲವು ಕಡೆ ನಡೆದವು. ಖಾಸಗಿ ಹಾಗೂ ಸರಕಾರಿ ಸಾರಿಗೆ ಸಂಪೂರ್ಣ ಸ್ತಬ್ಧಗೊಂಡಿದ್ದವು. ರಾಷ್ಟ್ರೀಯ ಹೆದ್ದಾರಿಯಲ್ಲಿ ಅಗತ್ಯ ವಸ್ತುಗಳ ಸಾಗಾಟದ ಲಾರಿಗಳು ಕಂಡುಬಂದವು. ಜಿಲ್ಲೆಯ ಗಡಿ ಭಾಗವಾಗಿರುವ ಹೆಜಮಾಡಿ, ಶಿರೂರು, ಹೆಬ್ರಿ, ಕಾರ್ಕಳ ಮಾಳ ಸೇರಿದಂತೆ ಹಲವು ಕಡೆಗಳಲ್ಲಿ ನಿರ್ಮಿಸಲಾಗಿರುವ ಚೆಕ್ ಪೋಸ್ಟ್‌ಗಳಲ್ಲಿ ಹೊರ ಜಿಲ್ಲೆಗಳಿಂದ ಆಗಮಿಸುವ ವಾಹನಗಳ ಬಗ್ಗೆ ನಿಗಾ ವಹಿಸಲಾಗಿದೆ. ಅಗತ್ಯ ವಸ್ತುಗಳ ಸಾಗಾಟ ಮತ್ತು ವೈದ್ಯಕೀಯ ಚಿಕಿತ್ಸೆಗೆ ಆಗಮಿಸುವ ವಾಹನ ಗಳಿಗೆ ಮಾತ್ರ ಅವಕಾಶ ಕಲ್ಪಿಸಲಾಗುತ್ತಿದೆ.

ನಗರದ ಕಲ್ಸಂಕ, ಕೆಎಸ್‌ಆರ್‌ಟಿಸಿ ಬಸ್ ನಿಲ್ದಾಣ ಸಮೀಪ, ಮಣಿಪಾಲ ಸಿಂಡಿಕೇಟ್ ಸರ್ಕಲ್‌ನಲ್ಲಿ ನಿರ್ಮಿಸಿರುವ ಚೆಕ್‌ಪೋಸ್ಟ್‌ಗಳಲ್ಲಿ ಪೊಲೀಸರು ವಾಹನಗಳ ತಪಾಸಣೆ ನಡೆಸಿದರು. ಸವಾರರ ಪಾಸ್, ಗುರುತು ಚೀಟಿಗಳನ್ನು ಪರಿಶೀಲಿಸಿದರು. ಅನಗತ್ಯವಾಗಿ ತಿರುಗಾಡುತ್ತಿದ್ದ ಕೆಲವೊಂದು ವಾಹನಳಿಗೆ ಪೊಲೀಸರು ದಂಡ ವಿಧಿಸಿದರು.

ಇದರಿಂದ ಕಟ್ಟಡ ಕಾಮಗಾರಿಗೆ ತೆರಳುವ ಕಾರ್ಮಿಕರು, ವೈದ್ಯಕೀಯ ಚಿಕಿತ್ಸೆಗೆ ತೆರಳುವವರು ತೀರಾ ತೊಂದರೆ ಅನುಭವಿಸಿದರು. ಈ ಸಂಬಂಧ ಉಡುಪಿ ಮತ್ತು ಚೆಕ್‌ಪೋಸ್ಟ್‌ಗಳಿಗೆ ತೆರಳಿದ ಉಡುಪಿ ಎಸ್ಪಿ ವಿಷ್ಣುವರ್ಧನ್ ವಾಹನಗಳ ಪರಿಶೀಲನೆ ನಡೆಸಿದರು.

ಉಡುಪಿ ನಗರದಲ್ಲಿ ಫುಡ್ ಡೆಲಿವರಿ ಬಾಯ್ ಎಂದು ಹೇಳಿಕೊಂಡು ಟೀಶರ್ಟ್ ಹಾಕದೆ ಬೈಕಿನಲ್ಲಿ ತಿರುಗಾಡುತ್ತಿದ್ದ ವ್ಯಕ್ತಿಯನ್ನು ತಡೆದು ನಿಲ್ಲಿಸಿದ ಪೊಲೀಸರು, ಬಳಿಕ ತಮ್ಮ ಸಮ್ಮುಖದಲ್ಲಿಯೇ ಆತನಿಗೆ ಟೀಶರ್ಟ್ ಹಾಕುವಂತೆ ಮಾಡಿ ಕಳುಹಿಸಿದ ಘಟನೆ ನಡೆಯಿತು.

ಹೂವು ವ್ಯಾಪಾರಿಗಳಿಗೆ ನಷ್ಟ

ವ್ಯಾಪಾರಕ್ಕೆ ಬೆಳಗ್ಗೆ 10ಗಂಟೆಯವರೆಗೆ ಮಾತ್ರ ಅವಕಾಶ ಕಲ್ಪಿಸಿರುವುದರಿಂದ ಹೂವು ವ್ಯಾಪಾರಿಗಳು ಸಾಕಷ್ಟು ನಷ್ಟ ಅನುಭವಿಸಿರುವ ಬಗ್ಗೆ ಅಳಲು ತೋಡಿ ಕೊಂಡಿದ್ದಾರೆ.
ಮಲ್ಲಿಗೆ ಮಾರುಕಟ್ಟೆ ಬರುವಾಗ ವಿಳಂಬ ಆಗುವುದರಿಂದ ಬೆಳಗ್ಗೆ 10ಗಂಟೆ ಯೊಳಗೆ ಮಾರಾಟ ಮಾಡಲು ಸಾಧ್ಯವಾಗುತ್ತಿಲ್ಲ. ಇದರಿಂದ ಸಾಕಷ್ಟು ಹೂವು ಉಳಿದು ನಷ್ಟ ಆಗುತ್ತಿದೆ. ಅದೇ ರೀತಿ ಮದುವೆ ಮನೆಯವರು ಕೂಡ ಬರಲು ಆಗುತ್ತಿಲ್ಲ. ಬಸ್‌ನಲ್ಲಿ ಹಾಕಲು ಬಸ್‌ಗಳೇ ಇಲ್ಲ. ಭಟ್ಕಳ ಮಲ್ಲಿಗೆ ಕಳುಹಿಸಿ ಕೊಡಲು ಯಾವುದೇ ವ್ಯವಸ್ಥೆ ಇಲ್ಲ ಎಂದು ಹೂವು ವ್ಯಾಪಾರಿಗಳು ದೂರಿದರು.

ಉಚಿತ ಊಟ ವಿತರಣೆ

ಸಾಮಾಜಿಕ ಕಾರ್ಯಕರ್ತ ಅನ್ಸಾರ್ ಅಹ್ಮದ್ ನೇತೃತ್ವದಲ್ಲಿ ಲಾಕ್‌ಡೌನ್ ಸಂದರ್ಭದಲ್ಲಿ ಉಡುಪಿ ನಗರದ ಭಿಕ್ಷುಕರು, ಮಾನಸಿಕ ಅಸ್ವಸ್ಥರು ಹಾಗೂ ನಿರ್ಗತಿಕರಿಗೆ 103 ಉಚಿತ ಊಟದ ಪೊಟ್ಟಣಗಳನ್ನು ಹಂಚಲಾಯಿತು.
ಅದೇ ರೀತಿ ಲಾಕ್‌ಡೌನ್‌ನಿಂದ ಊಟ ಸಿಗದೆ ಹಸಿದ ಅಸಹಾಯಕರಿಗೆ ವಿಶು ಶೆಟ್ಟಿ ಅಂಬಲಪಾಡಿ ನಗರದಾದ್ಯಂತ ಸಂಚರಿಸಿ 150 ಊಟ ವಿತರಿಸಿದರು. ವಿತರಣೆಯ ಸಂಧರ್ಭದಲ್ಲಿ ಸಂದೀಪ್ ಆಚಾರ್ಯ ಸಹಕರಿಸಿದರು.