ಕೋವಿಡ್ ಎರಡನೇ ಅಲೆಯ ನಡುವೆಯೂ ಕುಂಭಮೇಳದಲ್ಲಿ 91 ಲಕ್ಷ ಮಂದಿ ಭಾಗಿ: ವರದಿ

ಹೊಸದಿಲ್ಲಿ : ದೇಶದಲ್ಲಿ ಕೊರೋನ ವೈರಸ್ ಎರಡನೇ ಅಲೆಯ ಅಬ್ಬರದ ನಡುವೆಯೇ ನಡೆದ ಕುಂಭಮೇಳದ ಸಂದರ್ಭದಲ್ಲಿ ಹರಿದ್ವಾರಕ್ಕೆ 91 ಲಕ್ಷ ಯಾತ್ರಿಗಳು ಭೇಟಿ ನೀಡಿದ್ದಾರೆ ಎಂದು ಸಂಘಟಕರು ಪ್ರಕಟಿಸಿದ್ದಾರೆ.

ಕೋವಿಡ್-19 ಶಿಷ್ಟಾಚಾರಗಳ ಉಲ್ಲಂಘನೆ ವ್ಯಾಪಕವಾಗಿ ಈ ಸಂದರ್ಭದಲ್ಲಿ ನಡೆದಿರುವುದು ವ್ಯಾಪಕ ಟೀಕೆಗೆ ಗುರಿಯಾಗಿದ್ದು, ಪ್ರಕರಣಗಳು ಆತಂಕಕಾರಿ ಪ್ರಮಾಣದಲ್ಲಿ ಹೆಚ್ಚಲು ಕುಂಭಮೇಳದ ಕೊಡುಗೆ ಅತ್ಯಧಿಕ ಎಂದು ಆರೋಪಿಸಲಾಗುತ್ತಿದೆ.

ಕುಂಭಮೇಳ ಫೋರ್ಸ್‌ನ ಅಂಕಿ ಅಂಶಗಳ ಪ್ರಕಾರ ಜ. 14ರಿಂದ ಎ. 27ರೊಳಗೆ ಗಂಗಾನದಿಯಲ್ಲಿ 91 ಲಕ್ಷ ಯಾತ್ರಾರ್ಥಿಗಳು ಪುಣ್ಯಸ್ನಾನ ಕೈಗೊಂಡಿದ್ದಾರೆ. ಈ ಪೈಕಿ ಅತ್ಯಧಿಕ ಮಂದಿ ಅಂದರೆ 60 ಲಕ್ಷ ಮಂದಿ ಎಪ್ರಿಲ್‌ನಲ್ಲೇ ಭಾಗವಹಿಸಿದ್ದಾರೆ.

ಎ. 12ರಂದು ಸೋಮಾವತಿ ಅಮಾವಾಸ್ಯೆಯಂದು 35 ಲಕ್ಷ ಮಂದಿ ಶಾಹಿಸ್ನಾನ ಮಾಡಿದ್ದರು. ಮಾರ್ಚ್ 11ರಂದು ಮಹಾಶಿವರಾತ್ರಿಯಂದು 32 ಲಕ್ಷ ಮಂದಿ, ಮೇಷ ಸಂಕ್ರಾಂತಿಯಾದ ಎ. 14ರಂದು 13 ಲಕ್ಷ ಮಂದಿ ಹಾಗೂ ಎ. 27ರಂದು ನಡೆದ ಮೂರನೇ ಶಾಹಿಸ್ನಾನದಲ್ಲಿ 25 ಸಾವಿರ ಮಂದಿ ಭಾಗವಹಿಸಿದ್ದರು. ಇಡೀ ಕುಂಭಮೇಳದ ವೇಳೆ ಕೋವಿಡ್-19 ನಿಯಮಾವಳಿಗಳನ್ನು ಗಾಳಿಗೆ ತೂರಲಾಗಿತ್ತು ಎಂದು ಆರೋಪಿಸಲಾಗಿದೆ.

ಜನವರಿಯಿಂದ ಎಪ್ರಿಲ್‌ವರೆಗೆ ಪ್ರತಿ 12 ವರ್ಷಕ್ಕೊಮ್ಮೆ ನಡೆಯುವ ಕುಂಭಮೇಳವನ್ನು ಈ ಬಾರಿ ಒಂದು ತಿಂಗಳಿಗೆ ಮೊಟಕುಗೊಳಿಸಲಾಗಿತ್ತು. ಆದರೆ ಕುಂಭಮೇಳ ಆರಂಭಕ್ಕೆ ಮುನ್ನವೇ ಲಕ್ಷಾಂತರ ಭಕ್ತರು ಹರಿದ್ವಾರಕ್ಕೆ ಆಗಮಿಸಿದ್ದರು. ಕಳೆದ ವಾರ ಆರೋಗ್ಯ ಸಚಿವಾಲಯ, ಭಕ್ತರ ಸಮಾವೇಶದಿಂದಾಗಿ ಕೋವಿಡ್-19 ಪ್ರಕರಣಗಳು ಹೆಚ್ಚಲಿವೆ ಎಂದು ಎಚ್ಚರಿಕೆ ನೀಡಿತ್ತು. ಹರಿದ್ವಾರದಲ್ಲಿ ಎ. 1ರಂದು 15226 ಇದ್ದ ಒಟ್ಟು ಕೋವಿಡ್ ಪ್ರಕರಣಗಳು ಇದೀಗ 31596 ಕ್ಕೇರಿವೆ. ಸಾವಿನ ಸಂಖ್ಯೆ ಕೂಡಾ 2508ಕ್ಕೇರಿದೆ. ರಾಜ್ಯದಲ್ಲಿ 2236ರಷ್ಟಿದ್ದ ಸಕ್ರಿಯ ಪ್ರಕರಣಗಳು ಇದೀಗ 48,318ಕ್ಕೆ ಹೆಚ್ಚಿವೆ.