ವಿಯೆಟ್ನಾಮ್: ಗಾಳಿಯಲ್ಲಿ ವೇಗವಾಗಿ ಹರಡುವ ಕೊರೋನ ವೈರಸ್ ಪ್ರಭೇದ ಪತ್ತೆ

ಹನೋಯಿ (ವಿಯೆಟ್ನಾಮ್), ಮೇ 30: ಗಾಳಿಯಲ್ಲಿ ವೇಗವಾಗಿ ಹರಡುವ ಕೊರೋನ ವೈರಸ್ ರೂಪಾಂತರಿ ಪ್ರಭೇದವೊಂದು ವಿಯೆಟ್ನಾಮ್ ನಲ್ಲಿ ಪತ್ತೆಯಾಗಿದೆ. ಇದು ಭಾರತ ಮತ್ತು ಬ್ರಿಟನ್ ಗಳಲ್ಲಿ ಮೊದಲು ಪತ್ತೆಯಾಗಿರುವ ಪ್ರಭೇದಗಳ ಮಿಶ್ರಣವಾಗಿದೆ ಎಂದು ವಿಯೆಟ್ನಾಮ್ ಆರೋಗ್ಯ ಅಧಿಕಾರಿಗಳು ಶನಿವಾರ ಹೇಳಿದ್ದಾರೆ.

ವಿಯೆಟ್ನಾಮ್ ಅರ್ಧಕ್ಕಿಂತಲೂ ಹೆಚ್ಚಿನ ಭೂಭಾಗವನ್ನು ಹೊಸ ಪ್ರಭೇದದ ಸಾಂಕ್ರಾಮಿಕ ಆವರಿಸಿದ್ದು, ಅದನ್ನು ನಿಭಾಯಿಸಲು ದೇಶವು ಹರಸಾಹಸಪಡುತ್ತಿದೆ. ಹನೋಯಿ ಮತ್ತು ಹೊ ಚಿ ಮಿನ್ ಸಿಟಿ ಸೇರಿದಂತೆ ಬೃಹತ್ ನಗರಗಳು ಮತ್ತು ವಿವಿಧ ಕೈಗಾರಿಕಾ ವಲಯಗಳಲ್ಲಿ ಸೋಂಕು ಕಾಣಿಸಿಕೊಂಡಿದೆ.

ವಿಯೆಟ್ನಾಮ್ ನಲ್ಲಿ 6,800ಕ್ಕೂ ಹೆಚ್ಚು ಕೊರೋನ ವೈರಸ್ ಸೋಂಕು ಪ್ರಕರಣಗಳು ವರದಿಯಾಗಿವೆ. 47 ಸಾವುಗಳು ಸಂಭವಿಸಿವೆ. ಈ ಪೈಕಿ ಹೆಚ್ಚಿನ ಸಾವುಗಳು ಎಪ್ರಿಲ್‌ ನಲ್ಲಿ ಸಂಭವಿಸಿವೆ.
 
ಭಾರತ ಮತ್ತು ಬ್ರಿಟನ್ ಗಳಲ್ಲಿ ಮೊದಲು ಪತ್ತೆಯಾಗಿರುವ ಪ್ರಭೇದಗಳ ಮಿಶ್ರ ಪ್ರಭೇದ ಪತ್ತೆಯಾಗಿದೆ. ಈ ವೈರಸ್ ಗಾಳಿಯಲ್ಲಿ ವೇಗವಾಗಿ ಹರಡುತ್ತದೆ. ಗಂಟಲ ದ್ರವದಲ್ಲಿ ಅದರ ಸಾಂದ್ರತೆಯು ವೇಗವಗಿ ಹೆಚ್ಚುತ್ತದೆ ಹಾಗೂ ಸುತ್ತಲಿನ ವಾತಾವರಣಕ್ಕೆ ಅತ್ಯಂತ ತೀವ್ರವಾಗಿ ಹರಡುತ್ತದೆ ಎಂದು ಆರೋಗ್ಯ ಸಚಿವ ನಗುಯೆನ್ ತಾನ್ ಲಾಂಗ್ ಹೇಳಿರುವುದಾಗಿ ಸರಕಾರಿ ಮಾಧ್ಯಮ ವರದಿ ಮಾಡಿದೆ.