ಚೀನಾದ ಲ್ಯಾಬ್ ನಲ್ಲಿ ಕೋವಿಡ್19 ವೈರಸ್ ಸೃಷ್ಟಿ !: ಬ್ರಿಟನ್, ನಾರ್ವೆ ವಿಜ್ಞಾನಿಗಳ ಅಧ್ಯಯನ ವರದಿ
ಲಂಡನ್, ಮೇ 30: ಜಗತ್ತನ್ನೇ ತಲ್ಲಣಗೊಳಿಸಿರುವ ಕೋವಿಡ್-19 ವೈರಸ್ ಮೂಲದ ಬಗ್ಗೆ ಹೊಸತಾಗಿ ತನಿಖೆಯಾಗಬೇಕೆಂಬ ಕೂಗು ಕೇಳಿಬರುತ್ತಿರುವಂತೆಯೇ, ಈ ಮಾರಣಾಂತಿಕ ವೈರಸನ್ನು ಚೀನಿ ವಿಜ್ಞಾನಿಗಳು ಪ್ರಯೋಗಾಲಯದಲ್ಲಿ ಸೃಷ್ಟಿಸಿದ್ದಾರೆಂದು ಹೊಸ ಅಧ್ಯಯನ ವರದಿಯೊಂದು ಪ್ರತಿಪಾದಿಸಿದೆ.
ಕೊರೋನ ವೈರಸ್ ಅನ್ನು ಪ್ರಯೋಗಾಲಯದಲ್ಲಿ ಸೃಷ್ಟಿಯಾಗಿರುವುದನ್ನು ಬಚ್ಚಿಡುವ ಉದ್ದೇಶದಿಂದ ಚೀನಿ ವಿಜ್ಞಾನಿಗಳು ಬಾವಲಿಗಳಿಂದ ಸಹಜವಾಗಿ ಹುಟ್ಟಿಕೊಂಡಿತೆಂಬಂತೆ ತೋರಿಸಲು ಅದನ್ನು ರೂಪಾಂತರಗೊಳಿಸಿದ್ದರೆಂದು ಅದು ಆಪಾದಿಸಿದೆ.
ಕೋವಿಡ್-19 ಸೋಂಕನ್ನು ಹರಡುತ್ತಿರುವ ನೊವೆಲ್ ಕೊರೋನ ವೈರಸ್ (ಸಾರ್ಸ್-ಕೋವ್-2)ಗೆ ಯಾವುದೇ ವಿಶ್ವಸನೀಯವಾದ ಪ್ರಾಕೃತಿಕ ಪೂರ್ವಜನಿಲ್ಲ ಹಾಗೂ ಅದು ವುಹಾನ್ ನ ಪ್ರಯೋಗಾಲಯದಲ್ಲಿ ‘ಗೈನ್ ಆಫ್ ಫಂಕ್ಷನ್’ ಪ್ರಾಜೆಕ್ಟ್ ನಡಿ ಕೆಲಸ ಮಾಡುತ್ತಿರುವ ವಿಜ್ಞಾನಿಗಳಿಂದ ಸೃಷ್ಟಿಯಾಗಿದೆ ಎಂದು ಬ್ರಿಟಿಶ್ ಪ್ರೊಫೆಸರ್ ಆ್ಯಂಗಸ್ ಡ್ಯಾಲ್ಗ್ಲೆಯಿಶ್ ಹಾಗೂ ನಾರ್ವೆ ವಿಜ್ಞಾನಿ ಡಾ ಬಿರ್ಗರ್ ಸೊರೆನ್ಸನ್ ಅವರ ನೂತನ ಸಂಶೋಧನಾ ವರದಿ ಪ್ರತಿಪಾದಿಸಿರುವುದಾಗಿ ಬ್ರಿಟನ್ ನ ಡೈಲಿ ಮೇಲ್ ಪತ್ರಿಕೆ ರವಿವಾರ ವರದಿ ಮಾಡಿದೆ.
ಚೀನಿ ವಿಜ್ಞಾನಿಗಳು ಚೀನಾದ ಗುಹೆ ಬಾವಲಿಗಳಲ್ಲಿ ಕಂಡುಬರುವ ಪ್ರಾಕೃತಿಕ ಕೊರೋನ ವೈರಸ್ನ ಕಣಗಳಿಂದ ಪ್ರಯೋಗಾಲಯದಲ್ಲಿ ಮಾರಣಾಂತಿಕವಾದ ಹಾಗೂ ತೀವ್ರವಾಗಿ ಕೋವಿಡ್19 ರೋಗವನ್ನು ಹರಡಬಲ್ಲ ವೈರಸ್ ಆಗಿ ಮಾರ್ಪಡಿಸಿದ್ದಾರೆಂದು ನೂತನ ಸಂಶೋಧನಾ ವರದಿ ಹೇಳಿದೆ.