ಕೊವ್ಯಾಕ್ಸಿನ್ ದುಬಾರಿ ಮಾರುಕಟ್ಟೆ ದರಕ್ಕೆ ತಜ್ಞರ ಆಕ್ಷೇಪ

ಮುಂಬೈ : ದೇಶೀಯವಾಗಿ ಭಾರತ್ ಬಯೋಟೆಕ್ ಉತ್ಪಾದಿಸುತ್ತಿರುವ ಕೊವ್ಯಾಕ್ಸಿನ್ ಕೋವಿಡ್-19 ಲಸಿಕೆಗೆ 1,410 ರೂ. ಮಾರುಕಟ್ಟೆ ದರ ನಿಗದಿಪಡಿಸಿರುವ ಬಗ್ಗೆ ತಜ್ಞರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಈ ದರ ಸೆರಮ್ ಇನ್‌ಸ್ಟಿಟ್ಯೂಟ್, ಕೋವಿಶೀಲ್ಡ್‌ಗೆ ನಿಗದಿಪಡಿಸಿರುವ ದರದ ದುಪ್ಪಟ್ಟಾಗಿರುವುದು ಚರ್ಚೆಗೆ ಗ್ರಾಸವಾಗಿದೆ.

ಕೊವ್ಯಾಕ್ಸಿನ್ ಡೋಸ್ ಖಾಸಗಿ ಮಾರುಕಟ್ಟೆಯಲ್ಲಿ ಅತ್ಯಂತ ದುಬಾರಿ ಲಸಿಕೆಯಾಗಿದ್ದು, ರಷ್ಯಾದಿಂದ ಆಮದು ಮಾಡಿಕೊಳ್ಳುವ ಸ್ಪುಟ್ನಿಕ್‌ಗಿಂತಲೂ ದುಬಾರಿ. 1145 ರೂಪಾಯಿ ದರದಲ್ಲಿ ರಷ್ಯಾದಿಂದ ಸ್ಪುಟ್ನಿಕ್ ಲಸಿಕೆ ಆಮದು ಮಾಡಿಕೊಳ್ಳಲಾಗುತ್ತಿದೆ. ಕೊವ್ಯಾಕ್ಸಿನ್ ಲಸಿಕೆಯನ್ನು ಈಗಾಗಲೇ ಸ್ಥಾಪಿತವಾದ ತಂತ್ರಜ್ಞಾನದ ಮೂಲಕ ಹಾಗೂ ದೇಶೀಯವಾಗಿಯೇ ಉತ್ಪಾದಿಸಲಾಗುತ್ತಿದ್ದು, ಇದರ ಸಂಶೋಧನೆ ಮತ್ತು ಅಭಿವೃದ್ಧಿಗೆ ಕೇಂದ್ರ ಸರ್ಕಾರ ಸಬ್ಸಿಡಿ ನೀಡಿತ್ತು. ಆದಾಗ್ಯೂ ಲಸಿಕೆಗೆ ದುಬಾರಿ ದರ ನಿಗದಿಪಡಿಸಿರುವುದು ಎಷ್ಟು ಸಮಂಜಸ ಎಂದು ತಜ್ಞರು ಪ್ರಶ್ನಿಸಿದ್ದಾರೆ.

ಇತರ ಪೋಲಿಯೊ ಹಾಗೂ ಹೆಪಟೈಟಿಸ್ ಬಿ ಲಸಿಕೆಗಳು ಇಂಥದ್ದೇ ತಂತ್ರಜ್ಞಾನ ಪ್ಲಾಟ್‌ಫಾರಂ ಬಳಸಿಕೊಂಡು ತಯಾರಾಗುತ್ತಿದ್ದು, ದೊಡ್ಡ ಪ್ರಮಾಣದಲ್ಲಿ ಉತ್ಪಾದನೆಯಾಗುವುದರಿಂದ ಕೈಗೆಟುವ ಬೆಲೆಯಲ್ಲಿವೆ. ಇದೇ ಕಾರ್ಯತಂತ್ರವನ್ನು ಆರಂಭದಿಂದಲೇ ಕೋವ್ಯಾಕ್ಸಿನ್ ವಿಚಾರದಲ್ಲೂ ಅನುಸರಿಸಬೇಕು ಎಂದು ತಜ್ಞರು ಸಲಹೆ ಮಾಡಿದ್ದಾರೆ.

ಸಾರ್ವತ್ರಿಕ ಲಸಿಕೆ ನೀತಿ ಇಲ್ಲದಿರುವ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರ ಈ ಲಸಿಕೆಯ ಬೆಲೆ ಕೈಗೆಟುಕುವಂತಾಗಲು ಮತ್ತು ಲಾಭಕೋರ ನೀತಿಯನ್ನು ತಡೆಯುವ ಸಲುವಾಗಿ ಎಲ್ಲ ಲಸಿಕೆ ಉತ್ಪಾದನೆ ಕಂಪನಿಗಳ ಜತೆ ಚೌಕಾಶಿ ನಡೆಸಬೇಕು ಎಂದು ಸಾರ್ವಜನಿಕ ಆರೋಗ್ಯ ಕ್ಷೇತ್ರದ ತಜ್ಞರು ಆಗ್ರಹಿಸಿದ್ದಾರೆ.

ಕೋವ್ಯಾಕ್ಸಿನ್‌ನ ಕ್ಲಿನಿಕಲ್ ಪೂರ್ವ ಅಧ್ಯಯನದ ಮೇಲೆ ಕೇಂದ್ರ ಸರ್ಕಾರ ಹೂಡಿಕೆ ಮಾಡಿತ್ತು. ಕೋವಿಶೀಲ್ಡ್‌ನ ಕ್ಲಿನಿಕಲ್ ಪರೀಕ್ಷೆ ಮೇಲೆ ಸರ್ಕಾರ 11 ಕೋಟಿ ಹಾಗೂ ಕೋವ್ಯಾಕ್ಸಿನ್ ಪರೀಕ್ಷೆ ಮೇಲೆ 35 ಕೋಟಿ ರೂಪಾಯಿ ವೆಚ್ಚ ಮಾಡಿತ್ತು. ಕೋವ್ಯಾಕ್ಸಿನ್‌ನ ಬೌದ್ಧಿಕ ಆಸ್ತಿ ಹಕ್ಕನ್ನು ಭಾರತ್ ಬಯೋಟೆಕ್, ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ ಮತ್ತು ರಾಷ್ಟ್ರೀಯ ವೈರಾಲಜಿ ಸಂಸ್ಥೆ ಜತೆ ಹಂಚಿಕೊಂಡಿದೆ.

"ತಂತ್ರಜ್ಞಾನ ವರ್ಗಾವಣೆ ಮಾದರಿ ಮತ್ತು ಪಾಲುದಾರಿಕೆಯನ್ನು ಅನುಸರಿಸಿದಲ್ಲಿ ಪ್ರಮಾಣ ಹೆಚ್ಚುತ್ತದೆ ಹಾಗೂ ಉತ್ಪಾದನಾ ವೆಚ್ಚ ಕಡಿಮೆಯಾಗುತ್ತದೆ" ಎಂದು ಉದ್ಯಮದ ತಜ್ಞರೊಬ್ಬರು ಅಭಿಪ್ರಾಯಪಟ್ಟಿದ್ದಾರೆ.