ಉತ್ತರಪ್ರದೇಶದಲ್ಲಿ ಜನಸಂಖ್ಯಾ ಸ್ಫೋಟಕ್ಕೆ ಪುರಾವೆಯಿಲ್ಲ: ಪಾಪ್ಯುಲೇಷನ್ ಫೌಂಡೇಷನ್ ಆಫ್ ಇಂಡಿಯಾ

ಹೊಸದಿಲ್ಲಿ,ಜು.12: ‘ಜನಸಂಖ್ಯಾ ಸ್ಫೋಟ ’ಕ್ಕೆ ಸಂಬಂಧಿಸಿದಂತೆ ಕೇಳಿ ಬರುತ್ತಿರುವ ಎಚ್ಚರಿಕೆಗೆ ಯಾವುದೇ ರಾಷ್ಟ್ರೀಯ ಅಥವಾ ಜಾಗತಿಕ ದತ್ತಾಂಶಗಳ ಸಮರ್ಥನೆಯಿಲ್ಲ ಮತ್ತು ಅದಕ್ಕೆ ಯಾವುದೇ ಪುರಾವೆಯಿಲ್ಲ ಎಂದು ಪಾಪ್ಯುಲೇಷನ್ ಫೌಂಡೇಷನ್ ಆಫ್ ಇಂಡಿಯಾದ ಕಾರ್ಯಕಾರಿ ನಿರ್ದೇಶಕಿ ಪೂನಂ ಮುತ್ರೇಜಾ ಅವರು ಹೇಳಿದ್ದಾರೆ. ದೇಶವು ಸ್ಥಿರ ಜನಸಂಖ್ಯೆಯನ್ನು ಸಾಧಿಸುವ ಹಾದಿಯಲ್ಲಿದೆ,ಅದು ಬಲವಂತದ ನೀತಿಗಳ ಬದಲಾಗಿ ಹಕ್ಕುಗಳು ಮತ್ತು ಘನತೆಯ ಮಹತ್ವಕ್ಕೆ ಬದ್ಧವಾಗಿರಬೇಕು ಎಂದು ಔಟ್ಲುಕ್ ಗೆ ನೀಡಿದ ಸಂದರ್ಶನದಲ್ಲಿ ಮುತ್ರೇಜಾ ಹೇಳಿದ್ದಾರೆ.

  
ಕಠಿಣ ಕ್ರಮಗಳ ಮೂಲಕ ಜನಸಂಖ್ಯೆಯಲ್ಲಿ ಸ್ಥಿರತೆಯನ್ನು ಸಾಧಿಸಲು ಇಬ್ಬರು ಮಕ್ಕಳ ನೀತಿಯನ್ನು ಉತ್ತೇಜಿಸುವ ಕರಡು ಜನಸಂಖ್ಯಾ ನಿಯಂತ್ರಣ ಮಸೂದೆಯನ್ನು ಉ.ಪ್ರದೇಶ ಕಾನೂನು ಆಯೋಗವು ಬಿಡುಗಡೆಗೊಳಿಸಿದೆ. ಬಲವಂತದ ನೀತಿಗಳು ಜನನ ಪ್ರಮಾಣವನ್ನು ಕಡಿಮೆಗೊಳಿಸುವಲ್ಲಿ ಅಪೇಕ್ಷಿತ ಫಲಿತಾಂಶಗಳು ನೀಡಿವೆ ಎಂದು ಹಿಂದಿನ ಅನುಭವಗಳು ತೋರಿಸಿವೆಯೇ ಎಂಬ ಪ್ರಶ್ನೆಗೆ ಮುರ್ತೇಜಾ,ಉ.ಪ್ರದೇಶದಲ್ಲಿ ಎರಡು ಸಮಾನಾಂತರ ಪ್ರಕ್ರಿಯೆಗಳು ನಡೆಯುತ್ತಿವೆ. ಒಂದೆಡೆ ಮುಖ್ಯಮಂತ್ರಿಗಳು ಜು.11ರಂದು ಉ.ಪ್ರದೇಶ ಜನಸಂಖ್ಯಾ ನೀತಿಯನ್ನು ಪ್ರಕಟಿಸಿದ್ದರೆ,ಇನ್ನೊಂದೆಡೆ ರಾಜ್ಯ ಕಾನೂನು ಆಯೋಗವು ಜನಸಂಖ್ಯೆ ನಿಯಂತ್ರಣಕ್ಕಾಗಿ ಕಠಿಣ ಕ್ರಮಗಳನ್ನು ಪ್ರಸ್ತಾವಿಸಿರುವ ಕರಡು ಮಸೂದೆಯನ್ನು ಬಿಡುಗಡೆಗೊಳಿಸಿದೆ. ಎರಡು ಮಕ್ಕಳ ನೀತಿಗೆ ಸಂಬಂಧಿಸಿದಂತೆ ಪ್ರಸ್ತಾವಿತ ಉತ್ತೇಜಕ ಅಥವಾ ನಿರುತ್ತೇಜಕ ಕ್ರಮಗಳು ಪರಿಣಾಮಕಾರಿಯಾಗುತ್ತವೆ ಎನ್ನುವುದಕ್ಕೆ ಪುರಾವೆಗಳಿಲ್ಲ. ಭಾರತದಲ್ಲಿ ಅಥವಾ ಉ.ಪ್ರದೇಶದಲ್ಲಿ ಜನಸಂಖ್ಯಾ ಸ್ಫೋಟದ ಬಗ್ಗೆ ಆತಂಕಕ್ಕೆ ಯಾವುದೇ ದತ್ತಾಂಶಗಳ ಬೆಂಬಲವಿಲ್ಲ. ಉ.ಪ್ರದೇಶ ಸರಕಾರ ಮತ್ತು ರಾಜ್ಯದ ಜನತೆ ಜನಸಂಖ್ಯಾ ಸ್ಥಿರೀಕರಣವನ್ನು ಬಯಸುತ್ತಾರೆ ಎಂಬ ಬಗ್ಗೆ ಎರಡು ಮಾತಿಲ್ಲ. ವಾಸ್ತವದಲ್ಲಿ ರಾಷ್ಟ್ರೀಯ ಕುಟುಂಬ ಆರೋಗ್ಯ ಸಮೀಕ್ಷೆಯ ದತ್ತಾಂಶಗಳು ದೇಶವು ಜನಸಂಖ್ಯಾ ಸ್ಥಿರೀಕರಣವನ್ನು ಸಾಧಿಸುವ ಹಾದಿಯಲ್ಲಿದೆ ಎನ್ನುವುದನ್ನು ತೋರಿಸಿವೆ ಎಂದು ಉತ್ತರಿಸಿದರು.

ಕುಟುಂಬ ಯೋಜನೆಗಾಗಿ ರಾಜ್ಯದ ಈಡೇರದ ಅಗತ್ಯಗಳು ಶೇ.18ರಷ್ಟಿದ್ದು,ಇದು ರಾಷ್ಟ್ರೀಯ ಸರಾಸರಿ ಶೇ.13ಕ್ಕಿಂತ ಹೆಚ್ಚಿದೆ. ಹೀಗಾಗಿ ಕುಟುಂಬ ಯೋಜನೆ ಹಾಗೂ ಲೈಂಗಿಕ ಮತ್ತು ಸಂತಾನೋತ್ಪತ್ತಿ ಆರೋಗ್ಯ ಸೇವೆಗಳ ಒದಗಣೆಯನ್ನು ಖಚಿತಪಡಿಸಿಕೊಳ್ಳುವುದು ಎಲ್ಲಕ್ಕಿಂತ ಮುಖ್ಯವಾಗಿದೆ. ಉ.ಪ್ರದೇಶದ ಒಟ್ಟು ಫಲವತ್ತತೆ ದರ (ಟಿಎಫ್ಆರ್)ವು 2.7ರಷ್ಟಿದ್ದು,ಇದು ರಾಷ್ಟ್ರೀಯ ಸರಾಸರಿಗಿಂತ ಮತ್ತು ಟಿಎಫ್ಆರ್ನ ಬದಲಿ ಮಟ್ಟಕ್ಕಿಂತ ಸಾಕಷ್ಟು ಹೆಚ್ಚಿದೆ. ಆದರೆ 2015ರಿಂದ ಸರಕಾರಗಳ ಪ್ರಯತ್ನಗಳಿಂದಾಗಿ ಆರೋಗ್ಯ ಸೇವೆಗಳಲ್ಲಿ ಸುಧಾರಣೆಗಳಾಗಿವೆ ಮತ್ತು ಈ ಸುಧಾರಣೆಗಳು ಮುಂದುವರಿಯುವ ನಿರೀಕ್ಷೆಯಿದೆ. ಇದು ಅಂತಿಮವಾಗಿ ಟಿಎಫ್ಆರ್ ಮೇಲೆ ಧನಾತ್ಮಕ ಪರಿಣಾಮವನ್ನು ಬೀರುತ್ತದೆ.

ಯಾವುದೇ ಬಲವಂತದ ನೀತಿಗಳ ಅಗತ್ಯವಿಲ್ಲದೆ ಉ.ಪ್ರದೇಶವು 2025ರ ವೇಳೆಗೆ ಟಿಎಫ್ಆರ್ನ ಬದಲಿ ಮಟ್ಟವನ್ನು ಸಾಧಿಸುತ್ತದೆ ಎಂದು ರಾಷ್ಟ್ರೀಯ ಜನಸಂಖ್ಯಾ ಆಯೋಗವು ನೇಮಿಸಿದ್ದ 2011-30ರ ಅವಧಿಗೆ ಜನಸಂಖ್ಯಾ ಮುನ್ನಂದಾಜು ಕುರಿತು ತಾಂತ್ರಿಕ ಸಮಿತಿಯು ಅಂದಾಜಿಸಿದೆ ಎಂದು ಹೇಳಿದ ಮುತ್ರೇಜಾ,ಭಾರತವು ಜನಸಂಖ್ಯೆ ಮತ್ತು ಅಭಿವೃದ್ಧಿ ಕುರಿತು ಅಂತರರಾಷ್ಟ್ರೀಯ ಸಮ್ಮೇಳನದ ನಿರ್ಣಯಕ್ಕೆ ಸಹಿ ಹಾಕಿದೆ. ಸಂಖ್ಯಾತ್ಮಕ ಜನಸಂಖ್ಯಾ ಗುರಿಗಳು ಅಥವಾ ಬಲವಂತದ ನೀತಿಗಳಿಗಿಂತ ಹಕ್ಕುಗಳು ಮತ್ತು ಘನತೆಯ ಮಹತ್ವ ಕುರಿತು ಜಾಗತಿಕ ಸಹಮತಕ್ಕೆ ನಾವು ಬದ್ಧರಾಗಿದ್ದೇವೆ ಮತ್ತು ಈ ಬದ್ಧತೆ ಫಲವತ್ತತೆ ಗುರಿಗಳನ್ನು ಸಾಧಿಸಲು ಅತ್ಯುತ್ತಮ ಮಾರ್ಗವಾಗಿದೆ. ಈ ಬದ್ಧತೆಯು ಮಹಿಳೆಯರ ಸಂತಾನೋತ್ಪತ್ತಿ ಆರೋಗ್ಯ ಮತ್ತು ಹಕ್ಕುಗಳ ರಕ್ಷಣೆಗೆ ನಿರ್ಣಾಯಕವಾಗಿದ್ದು,ನಾವು ಜನಸಂಖ್ಯಾ ಸ್ಥಿರತೆಯ ಸಾಧನೆಗೆ ನಿಕಟವಿರುವಾಗ ಅದರಿಂದ ವಿಮುಖರಾಗಬಾರದು ಎಂದು ಹೇಳಿದರು.