ಜನಸಂಖ್ಯೆ ನಿಯಂತ್ರಣ ಕಾನೂನು ಜಾರಿ ಮಾಡಲು ಹೊರಟ ಉ.ಪ್ರದಲ್ಲಿರುವ ಬಿಜೆಪಿ ಶಾಸಕರಿಗೆ ಇರುವ ಮಕ್ಕಳೆಷ್ಟು ಗೊತ್ತೇ?

ಲಕ್ನೋ : ಉತ್ತರ ಪ್ರದೇಶದ ಯೋಗಿ ಆದಿತ್ಯನಾಥ್ ಸರಕಾರ ಘೋಷಿಸಿರುವ ಕರಡು ಜನಸಂಖ್ಯಾ ನಿಯಂತ್ರಣ ಮಸೂದೆ ಭಾರೀ ಕೋಲಾಹಲವನ್ನು ಸೃಷ್ಟಿಸಿದೆ. ಮುಂದಿನ ವರ್ಷ ವಿಧಾನಸಭಾ ಚುನಾವಣೆ ಎದುರಿಸಲಿರುವ ಉತ್ತರ ಪ್ರದೇಶದಲ್ಲಿ ಸರಕಾರದ ಈ  ಕ್ರಮ ಸಂಚಲನ ಸೃಷ್ಟಿಸಿದೆ. ಸರಕಾರದ ಈ ಕ್ರಮವನ್ನು ವಿಪಕ್ಷಗಳಾದ ಸಮಾಜವಾದಿ ಪಕ್ಷ ಮತ್ತು ಕಾಂಗೆಸ್ ಸಹಜವಾಗಿ ಟೀಕಿಸಿವೆ. ಅತ್ತ  ಹಿಂದುತ್ವ ಸಂಘಟನೆ ವಿಶ್ವ ಹಿಂದು ಪರಿಷದ್‍ನಿಂದಲೂ ಈ ನೀತಿ ಟೀಕೆಗೊಳಗಾಗಿದೆ. ಈ ನಡುವೆ ಉತ್ತರಪ್ರದೇಶದಲ್ಲಿ ಆಯ್ಕೆಯಾಗಿರುವ ಬಿಜೆಪಿ ಶಾಸಕರು ಸ್ವತಃ ಎಷ್ಟು ಮಕ್ಕಳನ್ನು ಹೊಂದಿದ್ದಾರೆಂದು rediff.com ನ ಹೇಮಂತ್‌ ಶಿವಸರಣ್‌ ಪಟ್ಟಿ ಮಾಡಿದ್ದಾರೆ. 

timesofindia.com ಪ್ರಕಾರ ಅಸೆಂಬ್ಲಿಯ ವೆಬ್ ಸೈಟ್‌ ನಲ್ಲಿ ಒಟ್ಟು 397 ಶಾಸಕರ ಮಾಹಿತಿಗಳು ಲಭ್ಯವಿದೆ. ಇದರಲ್ಲಿ 304 ಮಂದಿ ಬಿಜೆಪಿ ಶಾಸಕರಾಗಿದ್ದಾರೆ. ಇವರ ಪೈಕಿ 152 ಮಂದಿಗೆ ಮೂರು ಅಥವಾ ಹೆಚ್ಚು ಮಕ್ಕಳಿದ್ದಾರೆ. ಇದೇ ಮಸೂದೆಯನ್ನು ಸ್ಥಳಿಯ ಸಂಸ್ಥೆಯಿಂದ ರಾಜ್ಯ ಶಾಸಕಾಂಗಕ್ಕೆ ವಿಸ್ತರಿಸಿದರೆ ಅವರೆಲ್ಲರೂ ಅನರ್ಹರಾಗುತ್ತಾರೆ.

ಬಿಜೆಪಿ ನಾಯಕರು ಸ್ವತಃ ತಾವು ಕಾನೂನನ್ನು ಅನುಸರಿಸದೇ ಇತರರಿಗೆ ಕಾನೂನು ಸೂಚಿಸುವುದು ಇದೇ ಮೊದಲೇನಲ್ಲ. 2019ರಲ್ಲಿ ಲೋಕಭೆಯಲ್ಲಿ ಜನಸಂಖ್ಯಾ ಮಸೂದೆಯನ್ನು ಪರಿಚಯಿಸಲು ಆಯ್ಕೆಯಾಗಿದ್ದ ಬಿಜೆಪಿ ಸಂಸದ ಮತ್ತು ಭೋಜ್‌ ಪುರಿ ನಟ ರವಿ ಕಿಶನ್‌ ರಿಗೆ ನಾಲ್ಕು ಮಕ್ಕಳಿದ್ದವು ಎಂದು ವರದಿ ಉಲ್ಲೇಖಿಸಿದೆ.

ಈ ಮಸೂದೆಯ ಪ್ರಕಾರ ಎರಡಕ್ಕಿಂತ ಹೆಚ್ಚು ಮಕ್ಕಳನ್ನು ಹೊಂದಿರುವವರನ್ನು ಸ್ಥಳೀಯಾಡಳಿತ ಸಂಸ್ಥೆಗಳ ಚುನಾವಣೆಗಳು, ಸರಕಾರಿ ನೌಕರಿಗಳಿಗೆ ಅರ್ಜಿ ಸಲ್ಲಿಸುವುದು, ಸರಕಾರಿ ಹುದ್ದೆಗಳಲ್ಲಿ ಭಡ್ತಿ ಪಡೆಯುವುದು ಹಾಗೂ ಯಾವುದೇ ವಿಧದ ಸಬ್ಸಿಡಿ ಪಡೆಯುವುದನ್ನು ನಿರ್ಬಂಧಿಸಲಿದೆ.

ಈ ಉತ್ತರ ಪ್ರದೇಶ ಜನಸಂಖ್ಯೆ (ನಿಯಂತ್ರಣ, ಸ್ಥಿರೀಕರಣ ಮತ್ತು ಕಲ್ಯಾಣ) ಮಸೂದೆ 2021 ಇದರ ಕರಡನ್ನು ರಾಜ್ಯ ಕಾನೂನು ಆಯೋಗದ ವೆಬ್ ಸೈಟ್‍ನಲ್ಲಿ ಅಪ್‍ಲೋಡ್ ಮಾಡಲಾಗಿದೆ ಹಾಗೂ ಜುಲೈ 19ರ ತನಕ ಜನರು ತಮ್ಮ ಸಲಹೆಸೂಚನೆಗಳನ್ನು ನೀಡಬಹುದಾಗಿದೆ. ಗಜೆಟ್‍ನಲ್ಲಿ ಪ್ರಕಟಣೆಗೊಂಡ ದಿನಾಂಕದಿಂದ ಒಂದು ವರ್ಷದ ನಂತರ ಈ ಕಾನೂನು ಜಾರಿಯಾಗಲಿದೆ.

ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ಉತ್ತರ ಪ್ರದೇಶ ಜನಸಂಖ್ಯಾ ನೀತಿ 2021-2030 ಕೂಡ ಅನಾವರಣಗೊಳಿಸಿದ್ದಾರೆ. ಮಹಿಳೆಯರ ಒಟ್ಟು ಸಂತಾನೋತ್ಪತ್ತಿ ಪ್ರಮಾಣವನ್ನು 2026ರ ವೇಳೆಗೆ 2.1ಗೆ ಹಾಗೂ 2030ರ ವೇಳೆಗೆ 1.9ಗೆ ಇಳಿಸುವ ಉದ್ದೇಶ ಈ ನೀತಿಗೆ ಹೊಂದಿದೆ.

ಜನಸಂಖ್ಯೆ ನಿಯಂತ್ರಿಸಲು ಒಂದು, ಎರಡು ಮಕ್ಕಳಿಗೆ ಜನನ ಸಂಖ್ಯೆ ಸೀಮಿತಗೊಳಿಸಬೇಕು ಎಂದು ಉತ್ತರಪ್ರದೇಶ ಸರಕಾರ ನಿಯಮ ಜಾರಿ ಮಾಡಲು ಮುಂದಾಗಿದ್ದರೆ, ರಾಜ್ಯದಲ್ಲಿ ಆಯ್ಕೆಯಾಗಿರುವ ಬಿಜೆಪಿ ಶಾಸಕರು ಸ್ವತಃ ಎಷ್ಟು ಮಕ್ಕಳನ್ನು ಹೊಂದಿದ್ದಾರೆಂದು rediff.com ನ ಹೇಮಂತ್‌ ಶಿವಸರಣ್‌ ಪಟ್ಟಿ ಮಾಡಿದ್ದಾರೆ. ಆ ಪಟ್ಟಿ ಇಂತಿದೆ.

ಕೃಪೆ: rediff.com